1. Apocalipsis tañi eipin, ¿Satana chumlelbi Jewba ñi pu che?

 TI LIFRU Apocalipsis feipi Chau Dios ñi Gobierno ngünenieuyei huenu mu, ca Huecüfü quechanacümngepai Mapu mu (Apoc. 12:1-9). Com ti pu mülelu huenu mu ayüucülefuingün, huelu iñchiñ mülelu Mapu mu re huesaque dungu rupaqueiñ, ¿chumngelu? Quechanacümngepalu Huecüfü müna illcuquei, feimu huesalcamequeiñmu iñchiñ pu poyequefilu ta Jehová (Apoc. 12:12, 15, 17).

2. ¿Chem kelluaiñmu (ingkaaiñmu) taiñ newen duamküleal?

² ¿Chumngechi nehuentuleafuiñ caiñetueliyiñmu rume ta Huecüfü? (Apoc. 13:10). Inaduamafuiñ chem ñi rupayal cüpalechi antü meu. Apocalipsis lifru mu, Juan feipieiñmu cümeque dungu ñi rupayal. Quiñeque dungu ñi rupayal tañi apümcangeal Jehová tañi pu caiñe. Peaiñ chem pi Apocalipsis Jehová tañi pu caiñe mu ca tañi chumngeal engün.

3. Apocalipsis mu, ¿chuchi pu adentun pengeli Jewba ñi pu kaiñe?

³ Ti lifru Apocalipsis mu mülei fillque adentun ñi pengelelngeel ta Juan (Apoc. 1:1, TNM). Peaiñ chem dungu mu adentulei Jehová ñi pu caiñe. Por ejemplo, Apocalipsis lifru nütramcai “ñi tripapan lafquen meu ta quiñe huapo huesa culliñ regle lonco nielu ca mari müta” (Apoc. 13:1). Ca nütramcai “cangelu huapo huesa culliñ, tripalu ta Mapu meu”, dungui quiñe fütra dragon reque. Ca ‘huenu mu ütrüfnacümpai ta cütral’ (Apoc. 13:11-13). Ca nütramcai “quiñe quelü fütra culliñ meu”, fei mu anülei quiñe prostituta. Feitachi pu huapo huesa culliñ adentulei Jehová tañi pu caiñe mu. Fentren tripantu mu caiñetuquefingün  ta Jehová ca tañi Gobierno. Feimu fente falin-ngei iñchiñ taiñ quimal ineingen engün (Apoc. 17:1, 3).

4, 5. Daniel 7:15-17 tañi eipin, ¿chumngechi kellueiñmu taiñ adümal Apocalipsis tañi pu adentun?

⁴ Petu taiñ quimnon inei engün am Jehová ñi pu caiñe, mülei taiñ quimal chem adentulei ti fütraque huapo culliñ ca tati prostituta. Taiñ quimal, inaduamafiyiñ caquelu troquiñ Biblia. Por ejemplo, ti profeta Daniel peumai, pefi meli fütraque huapo culliñ tripalu lafquen mu (Dan. 7:1-3). Daniel feipi feitachi meli fütraque huapo culliñ adentulei meli “lonco ülmen” cam gobierno (papeltunge Daniel 7:15-17). ¿Chem quimeltuqueiñmu tüfa? Tati fütraque huapo culliñ ñi feipiel Apocalipsis ca adentulei quiñeque gobierno.

⁵ Feula peafiyiñ ti fütraque huapo culliñ ñi feipiel Apocalipsis ca peaiñ chem gobierno mu adentulei engün ca ñi chumngeal engün. Ca peaiñ chem quimeltuqueiñmu Apocalipsis ñi feipin.

6. ¿Chem pengeli tati wapo kulliñ 7 longko nielu Apocalipsis 13:1-4 mülelu?

⁶ ¿Chem adentulei ti fütra huapo culliñ regle lonco nielu? (papeltunge Apocalipsis 13:1-4). Chumngechi ngüneduampeiñ parrafo 4 mu, Daniel capitulo 7 pengeli meli fütraque huapo culliñ. Quiñe huapo culliñ trapial quechilei. Cangelu, oso reque femngei. Cangelu, leopardo (nahuel) quechilei. Tati inan huapo culliñ mari müta niei. Caque quiñeque culliñ adentulei quiñe gobierno mu. Huelu Apocalipsis nütramcai quiñe fütra huapo culliñ mu müten. Tüfachi fütra huapo culliñ quiñe leopardo reque felei. Tañi namun, oso tañi namun quechilei. Tañi hun, trapial tañi hun quechilei, ca mari müta niei. Feimu tüfachi fütra huapo culliñ adentulelai quiñe gobierno müten. Apocalipsis feipi tüfachi huapo culliñ elungei autoridad “itrocom caquerume tripanche meu ca troquiñche meu, dungun ca troquiñque mapu meu”. Feimu tüfachi fütra huapo culliñ doi nehuen niei chem gobierno mu rume (Apoc. 13:7). Fei ¿chem quimeltueiñmu tüfa? Ti fütra huapo culliñ regle lonco nielu adentulei com pu gobierno ngüneniefilu ti Mapu (Ecl. 8:9). *

7. ¿Chem pengeli tati 7 longko?

⁷ ¿Chem adentulei tati regle lonco? Taiñ quimal, Apocalipsis capitulo 17 quelluafeiñmu. Feitachi capitulo mu nütramcangei cangelu fütra huapo culliñ mu ca femngelu, huelu trürcülenolu. Apocalipsis 17:9, 10 feipi: ‘Tati regle lonco adentulei regle lonco ülmen. Quechu ta tüfachi pu lonco ülmen deu ngehuetulai engün, quiñe ta petu lonco ülmencülei, fei tati cangelu petu cüpalai. Huelu cüpale tati inalelu, nehue alüñmalayai ñi lonco ülmen-ngen’. Huecüfü ngüneniefi com pu gobierno, huelu regle gobierno adentucünuafuiñ regle “lonco” mu, ¿chumngelu? Nielu engün am fentren autoridad. Fentren taiñ pu peñi ca pu lamngen mülei cheu ñi ngünenieel feitachi pu gobierno, ca quiñeque gobierno caiñetuquefi Jehová tañi pu che. Petu mongelefulu ti apostol Juan, deu rupai ñi ngüneniequefel quechu gobierno. Tüfa ta Egipto, Asiria, Babilonia, Medopersia ca Grecia. Tati cayu, fei ta Roma. Tüfa  petu ngüneniequefui Juan ñi antü mu. ¿Ti inan gobierno cai? ¿Inei am? Peafiyiñ.

8. ¿Chem pengeli tati 7 konchi longko?

⁸ ¿Inei am tati inan lonco ngünenielu fachantü, “Ñidol tañi antü meu”? (Apoc. 1:10). Tüfa ta epu fütraque gobierno, rume autoridad nielu ca trür quelluuquelu, Estados Unidos ca Gran Bretaña. Tüfa tati inan lonco nütramcalu Apocalipsis 13:1-4. ¿Chumngelu quimiyiñ tüfa? Ti lifru Daniel quelluqueiñmu taiñ quimal.

9. ¿Chem pengeli ti wapo kulliñ “epu müta cordero reke nielu”?

⁹ Apocalipsis capitulo 13 pengeli ñi chumün ti inan lonco. Tüfachi capitulo mu Estados Unidos ca Gran Bretaña ca trürümngequei cangelu huapo culliñ mu. Tüfachi huapo culliñ “niei ta epu müta cordero müta femngelu, huelu dungui quiñe fütra dragon reque”. Cafei ‘pengeli fütraque afman-ngechi dungu. Huenu ütrüfnacümpai ta cütral, fei acui ta Mapu meu, fei peeyu ta com che’ (Apoc. 13:11-15). Apocalipsis lifru mu, tüfachi huapo culliñ ca feipingequei “tati coila pelon huentru” (Apoc. 16:13; 19:20). Daniel pingechi lifru ca feipi ñi chumal Gran Bretaña Estados Unidos engu. Daniel feipi tüfachi epu gobierno quiñeucülelu ñi rume huesalcayal engu (Dan. 8:19, 23, 24, quimal dungu). Tati Segunda Guerra Mundial mu femngechi femingu. Quiñehuingu ñi deumayal epu bomba atomica. Tañi deumafiel mu engu feitachi epu bomba, femngechi ‘huenu ütrüfnacümpai ta cütral, fei acui ta Mapu meu’.

10. ¿Chem pengeli “tati wapo kulliñ tañi adentun”? (Apocalipsis 13:14, 15; 17:3, 8, 11).

¹⁰ Feula nütramcayaiñ cangelu fütra huapo culliñ mu. Feitachi fütra huapo culliñ ca femngei tati fütra huapo culliñ nielu regle lonco, huelu tüfa quelüngei. Tüfa tati “huapo huesa culliñ ñi adentun” pingequei. Ca Apocalipsis 17:11 mu tati ‘purangechi lonco ülmen’ pingequei * (papeltunge Apocalipsis 13:14, 15; 17:3, 8). Tüfachi “lonco ülmen” cuifi mülequefui, rupalu tripantu ngehuetulai, huelu ca rupa ca huiño mületui. ¿Inei am tüfachi lonco ülmen? Tati Organización de las Naciones Unidas. Tüfa quelluntucuquefi tati pu gobierno. Hue deumangelu, Sociedad de Naciones pingequefui. Huelu rupalu ti Segunda Guerra Mundial, ngehuetulai. Rupalu tripantu ca huiño mületui, fei Organización de las Naciones Unidas pingetui.

11. ¿Chumai pu politico wapo kulliñ ka chemu llükalaiñ?

¹¹ Tüfachi fütraque huapo culliñ cam gobierno feipiafi pu che ñi caiñetuafiel ta Jehová ca tañi pu che. Tüfa trapümafi reque “itrocom Mapu mülechi pu loncolelu” ñi hueichayafiel ta Jehová Armagedón hueichan mu, tüfa ta Jehová ñi hueichan llemai (Apoc. 16:13, 14, 16). Huelu llicalayaiñ. Taiñ fütra Chau Jehová mülei iñchiñ mu. Quisu montulafi com pu quelluntucuquefilu tañi Gobierno (Ezeq. 38:21-23).

12. ¿Chem upaai kom pu wapo kulliñ mu?

¹² ¿Chumngeai com feitachi fütraque huapo culliñ? Apocalipsis 19:20 feipi: “Tati huapo huesa culliñ cutrancangei, quiñentrür tati coila pelon huentru  engün pengelquelu ta afman-ngechi pepiluhun tati pu che tañi adquiñ meu. Fei tüfeichi afmatufal dungu ñi femel meu, tati coila pelon huentru ngünencayefi tati pu eluuyelu ñi tuculelngeal ti huapo huesa culliñ ñi marca ca püramyeñmafilu tañi adentun. Feimeu tati huapo huesa culliñ ca tati coila pelon huentru mongelen ütrüftucungei fütra cütral meu üicülelu ta azufre engu”. Feimu petu ngüneniemequele Jehová tañi pu caiñe, com apümcangeaingün.

13. Tübachi mapu mu tañi pu ngünenelu mu, ¿chem küdawngechi dungu nieaiñ?

¹³ ¿Chem quimeltueiñmu tüfa? Iñchiñ pu cristianongen mülei taiñ quelluntucuafiel Jehová ca tañi Gobierno müten (Juan 18:36). Taiñ femal tüfa conlayaiñ politico dungu mu. Huelu tüfa cüdaungei, ¿chumngelu? Tati pu gobierno ngüchaltucuquefi pu che ñi quelluntucuaeteu engün. Fei pu che eluulu ñi quelluntucuafiel pu gobierno, tuculelngei reque tati huapo huesa culliñ ñi marca (Apoc. 13:16, 17). Feiti marcacünungelu cüme lloulaeyu Jehová ca rumel mongen nielayaingün (Apoc. 14:9, 10; 20:4). Tunte ngüchaltucueliyiñmu rume pu gobierno, rume falin-ngei taiñ quelluntucunoafiel engün.

14. ¿Chem amatulelbi Juan? (Apocalipsis 17:3-5).

¹⁴ Ti apostol Juan ca dungu pefi. ¿Chem dungu? Quiñe domo anülerquei huente quiñe huapo huesa culliñ mu (Apoc. 17:1, 2, 6). Tüfachi domo quiñe prostitutangei, ca tati ‘Fütra Babilonia’ pingequei. Pu Mapu müleyechi lonco ülmen cudumuhui reque tüfachi prostituta engün (papeltunge Apocalipsis 17:3-5).

15, 16. ¿Chem am “Bütra Babilonia” ka chumngechi kimniiñ tüba?

¹⁵ ¿Inei am tati ‘Fütra Babilonia’? Tüfachi domo cudumuhui reque tati pu politico engün. Feimu adentulelai quiñe politico troquiñche (Apoc. 18:9). Tüfachi domo anülei quiñe huapo huesa culliñ meu, femngechi pengeli ñi cüpa ngüneniefiel pu politico. Tüfachi domo ca adentulelai pu fütraque troquiñche negociaquelu, ¿chumngelu? Ca versiculo mu, tüfachi troquiñche “itrocom mapu müleyechi pu negociante” pingequei. Feimu tüfachi domo adentulelai pu troquiñche negociaquelu (Apoc. 18:11, 15, 16).

¹⁶ Biblia mu feipingelu “prostituta” adentuleafui epu dungu mu. Quiñe che poyequefilu coilaque dios, ca quiñe che hueniyefilu pu che caiñetuquefilu Chau Dios (1 Crón. 5:25; Sant. 4:4). Huelu pu poyequefilu Jehová rüf piuque mu Biblia mu trürümngequei ta quiñe domo turpu cudumuunolu inei engün no rume (2 Cor. 11:2; Apoc. 14:4, TNM). Cuifi mu, Babilonia huaria mu pütrülequefui tati coilaque religion. Feimu tati Fütra Babilonia adentulei com tati coilaque religion mülelu Mapu meu (Apoc. 17:5, 18; inaduamnge ti troquiñ “¿Chem am ‘Tati Fütra Babilonia’?” mülelu ti lifru Tati Biblia ñi rüf kimeltukeel, pagina 219 ca 220).

17. ¿Chem upaai Bütra Babilonia mu?

¹⁷ ¿Chumngeai tati Fütra Babilonia? Apocalipsis 17:16, 17 feipi: “Tati mari müta tami peel tati huapo huesa culliñ meu, üdeafi engün tati quiñe ñihuafe domo reque felechi fütra huaria. Ca apümcayafi ca triltrancülen quisucünutuafi. Quisu tañi cuerpo meu entuai engün ta ilo tañi iñmayafiel, ca lüpümafi engün ta cütral meu. Ngünechen am elueteu ñi piuque meu  ñi femal engün quisu tañi ayüelchi dungu”. Feimu llemai ti quelüngechi huapo huesa culliñ, tüfa tati Naciones Unidas, adnieaeyu pu gobierno tañi apümcayafiel tati coilaque religion. Jehová ñi duam mu femngeai tüfa (Apoc. 18:21-24).

18. ¿Chumaiñ taiñ deyükon-noal Bütra Babilonia mu?

¹⁸ ¿Chem quimeltueiñmu tüfa? Mülei taiñ cüme püramyeafiel ta Jehová chumngechi ñi ayüqueel (Sant. 1:27). Ti Fütra Babilonia enseñalchequei coilaque quimeltun, ca quimeltuchequelai ñi cüme yenieal tañi mongen. Ca coneltulei fillque dungu mu nüucülelu pu huesaque püllü mu ca fillque fiesta mu ayüquenolu ta Jehová. Feimu turpu coneltulayaiñ ti Fütra Babilonia ñi huesa femquen mu. Ca feipiafiyiñ pu che ñi tripatual Fütra Babilonia meu, femngechi culpaconlayaingün tañi huesa femün mu (Apoc. 18:4).

19. ¿Iñi am bütra dragon kelü ñi ad kütral reke?

¹⁹ Ti lifru Apocalipsis ca nütramcai quiñe llicafalchi fütra filu, quelülei cütral reque (Apoc. 12:3). Tüfachi fütra filu hueichafi Jesús ca tañi cümeque püllü engün (Apoc. 12:7-9). Cafei caiñetuquefi Jehová tañi pu che ca eluquefi nehuen tati pu gobierno (Apoc. 12:17; 13:4). ¿Inei am ta tüfachi fütra filu? Tüfa tati “fütra cuifi filu Huecüfü ca Satanás pingelu” (Apoc. 12:9; 20:2). Quisu ngüneniefi com Jehová tañi pu caiñe.

20. ¿Chem upaai dragon mu?

²⁰ ¿Chumngeai tati fütra filu? Apocalipsis 20:1-3 feipi quiñe cüme püllü ütrüftucuafi tati Huecüfü quiñe fütra conchi lolo meu, cerrantucungeai huaranca tripantu. Femngechi ngünencahuelayafi pu che fentepuule hula ti huaranca tripantu. Fei hula, Satanás ca tañi pu huesaque püllü ütrüftucungeaingün ti lafquen mu nielu cütral ca azufre. Fei llemai, apümcangeaingün ca ngehuelayaingün (Apoc. 20:10). ¡Müna cüme dungu ñi ngehuenoal ti Huecüfü ca tañi pu huesaque püllü! ¿Felelai am?

21. Taiñ papiltubel Apocalipsis, ¿chemu ayüwelabeiñmu?

²¹ Nehuentucuqueiñmu taiñ adümafiel ñi feipin Apocalipsis lifru. Deu inaduampeiñ inei am Jehová ñi pu caiñe ca ñi chumngeal engün. Fei llemai, ‘ayühun nieai tati chillcatulu tüfachi huerquen dungu llohuel ta Ngünechen meu, ca tati feyentulu com tati huiriconcülelu ta tüfa meu’ (Apoc. 1:3). Cüpalechi troquiñ mu, peaiñ chem cümeque dungu llohuaingün pu poyequefilu ta Jehová.