1, 2. ¿Chemu kiñeke ngülam Biblia mu doi balingepoi iñchiñ mu?

 RAQUIDUAMNGE tüfa: puulu feichi antü ñi niehual epu nofio, femngei quiñe cüme hueupin, hulngei cümeque ngülam tañi quelluaeteu engu. Fei engu deu quimniefuingu chi feitachi cümeque ngülam, huelu feula doi falintuafingu. ¿Chumngelu? Tañi curehuen-ngen mu inayafingu feitachi cümeque ngülam.

² Ca femngechi dungu rupaquei quiñe curehuen nierpulu pichiqueche. Petu tañi nienon mu pichiqueche, allcütuquefuingu chi chem pin Biblia chumngechi ñi tremümngeal pu pichiqueche. Huelu nierpulu engu pichiqueche, quisu mülefui tañi tremümafiel engu, feimu doi falinturpufingu chem pin ta Biblia. Rume falin cüdau niefuingu. Com iñchiñ cüme quimquefiyiñ chi quiñeque ngülam mülelu Biblia mu, huelu calerumetulu taiñ mongen doi falinturpuquefiyiñ feitachi cümeque ngülam. Feimu com iñchiñ pu poyequefilu ta Jehová papeltuquefiyiñ ca raquiduamqueiñ Biblia mu “fill antü”, chumngechi pu reycülelu Israel mu huercüngei ñi femal (Deut. 17:19).

3. ¿Chem peabiiñ tübachi kimelün mu?

³ Eimün pu chau ca ñuque quiñe falin cüdau nieimün, ñi enseñayafiel tamün pichiqueche ñi quimafiel ta Jehová. Huelu re papeltulel-layafimün müten ñi chem pin ti Biblia Jehová mu, doi mai quelluafimün ñi piuqueyerpuafiel ta Jehová com tañi piuque mu. ¿Chem quelluafeyu pu chau ñi femal tüfa? Tüfachi troquiñ mu ngüneduamaiñ meli  cümeque ngülam ñi quelluafeteu engün (2 Tim. 3:16). Ca peaiñ quiñeque pu chau cüme tripaquei ñi cüdau engün ñi cüme inafiel mu Biblia ñi ngülam.

4. ¿Chem ngülam kelluabüi pu chaw ka ñuke tañi newentuabel pu püñeñ ñi piwkeyeabel Jewba? (Santiago 1:5).

⁴ Hunen ngülam: Quintuafimün Jehová tamün ngünenieaeteu. Tamün quelluafiel tamün pichiqueche ñi piuqueyeafiel ta Jehová duamnieimün ta quimün. Feimu pediafimün ta Jehová tamün eluaeteu (papeltunge Santiago 1:5). Jehová doi cüme ngülamtuchefengei. ¿Chumngelu? Chau Jehová fentren tripantu yeniefui tañi chaungen, feimu rume quimi (Sal. 36:9). Ca feitachi cümeque ngülam ñi hulqueel ta Jehová rume cümelcaquefi feichi pu che inaquefilu (Is. 48:17).

5. 1) Jewba tañi pepikawkülechi trawünche, ¿chumngechi kellubi pu chaw ka ñuke? 2) Kurewen Amorim ñi bemün, ¿chem kimeleleimu?

⁵ Jehová Biblia mu ca tañi troquiñche mu quelluquefi pu chau (Mat. 24:45). Por ejemplo, peafuimün cümeque ngülam ti troquiñ “Ñi quellungeal pu familia” mülelu jw.org mu. Cafei taiñ pagina internet mu mülei fentrenque video ñi quelluafiel pu chau, femngechi tañi cüme tremümafiel ñi pichiqueche (Prov. 2:4-6). *

6. Jewba tañi pepikawkülechi trawünche ngülamtukebi pu chaw ka ñuke, ¿chem eipi kiñe chaw?

⁶ Fentren pu chau ca ñuque mañumcüleingün tañi quellueteu mu Jehová ñi troquiñche. Quiñe chau, Joe pingelu, feipi: “Cüdaungei ñi enseñayafiel tañi pu cüla pichiqueche Jehová ñi dungu, feimu tañi domo iñchiu ngillatuquefiyu ta Jehová tayu quelluaeteu. Quiñeque mu, pefiel mu quiñeque video cam papeltufiel mu quiñeque revista, ‘feita tayu duamnieel’ piuqueyu. Iñchiu rumel maneluuqueyu Jehová ñi ngülam mu”. Joe ca tañi domo ngüneduamingu Jehová ñi troquiñche chumngechi quellueyu engu ñi cüme tremümafiel tañi pu  pichiqueche, fei ñi piuqueyerpuafiel ta Jehová engün.

7. ¿Chemu müna balingi pu chaw ka ñuke tañi küme bemal kom piwke mu? (Romanos 2:21).

⁷ Epu ngülam: Tamün cüme femün mu inayentufalngeaimün. Pu pichiqueche ngüneduamqueingün ñi chumquen tañi pu chau, feimu inayentuquefingün. Com pu chau huelulcauquei (Rom. 3:23). Huelu ti quim chau eluuquei ñi inayentufalngeal (papeltunge Romanos 2:21). Quiñe chau feipi: “Pu pichiqueche esponja reque felei, ngüneduamniequei com tañi peel ca tañi allcütun. Quimeltufiliyiñ quiñe dungu huelu ca dungu femliyiñ, pürüm ngüneduamaiñmu, fei feipiaiñmu chumngelu taiñ femün”. Feimu ayüliyiñ taiñ pu pichiqueche ñi piuqueyerpuafiel ta Jehová, ¿chumaiñ? Hunelu mu iñchiñ taiñ femün mu quimfalcünuaiñ taiñ piuqueyefiel ta Jehová.

8, 9. Andrew ka Emma tañi eipin, ¿chem kimeleleimu?

⁸ Pu chau ca pu ñuque, ¿chumngechi quelluafui tañi pu pichiqueche ñi piuqueyeafiel ta Jehová engün? Quiñe hueche, Andrew pingelu, 17 tripantu nielu feipi: “Tañi pu chau rumel quimeltuqueneu rume falin-ngei tañi ngillatuafiel ta Jehová. Quisutu ngillatuquefulu rume iñche, tañi chau ca ngillatuquefui iñche engu fill pun. Tañi pu chau rumel feipiquefeiñmu iñche ca tañi deya tayu ngillatuafiel ta Jehová chumül rume. Feimu iñche mu rume falin-ngei tañi ngillatual. Rume cüme duamquen tañi ngillatufiel ta Jehová, iñche tañi poyen chau troquiquefiñ”. Feimu eimün pu chau ca pu ñuque piuqueyefilmün Jehová, quelluafuimün tamün pu pichiqueche ñi ca piuqueyeafiel ta Jehová engün.

⁹ Feula peafiyiñ ñi rupan cangelu hueche, Emma pingei. Emma tañi chau quisucünui tañi pu familia ca defecaucünurpui. Feimu Emma tañi ñuque mülefui tañi cullial com feitachi defen. Emma feipi: “Fentren rupa tañi ñuque niequelafui ta plata, huelu rumel nütramcaquefeiñmu Chau Jehová cuidaquefi tañi pu che ca eluquefi chem ñi duamnieel engün. Iñche ngüneduamquen tañi ñuque ñi femün mu pengelquei ñi maneluuquen Jehová mu”. ¿Chem quimeltueiñmu tüfa? Pu chau rupafule engün rume huesaque dungu mu, inayentufalngeafuingün tañi cüme femquen meu (Gál. 6:9). 

10. Pu chaw ka ñuke Israel mapu mu, ¿chumül ngütramkabüi tañi pu püñeñ? (Deuteronomio 6:6, 7).

¹⁰ Cüla ngülam: Rumel nütramcayafimün tamün pu pichiqueche. Cuifi mu, Jehová feipifi pu chau Israel mu ñi quimeltulelafiel engün tañi pu pichiqueche Jehová mu fill antü (papeltunge Deuteronomio 6:6, 7). Feitachi pu chau fentren rupa nütramcayafui tañi pu pichiqueche engün Jehová mu. Por ejemplo, quiñe chau petu nganle cam cosechamequele, tañi fotüm compañafeyu, fei nütramcayafuingu Jehová mu. Cam ti ñuque petu ngürecamequele cam cüdaumequele ti ruca mu, tañi domo püñeñ quelluafeyu, fei nütramcayafuingu Jehová mu. Femngechi trür cüdaulu tañi pu pichiqueche engün, nütramcauquefuingün Jehová ñi cüme piuquengen ca chumngechi ñi cuidaeteu engün.

11. Pu chaw ka ñuke taiñ antü mu, ¿chumül ngütramkaabüi tañi pu püñeñ?

¹¹ Famülque mu, quiñeque chau ca ñuque müleingün tañi cüdau mu ca tañi  pu pichiqueche müleingün colegio mu, feimu nielaingün tiempo ñi quiñentrür müleal engün. Feimu pu chau mülei ñi elcünual tiempo ñi nütramcayafiel tañi pu pichiqueche (Efes. 5:15, 16; Filip. 1:10). Por ejemplo, trahuule com ti familia ñi quiñentrür poyeafiel ta Jehová engün nütramcahuafuingün. Quiñe hueche, Alexander pingelu, feipi: “Tañi chau com cüme adcünuquei taiñ trahuluhual ti familia quiñentrür poyeafiel ta Jehová, ca eluuquelai chem no rume taiñ catrütuaeteu ñi femngeal tüfachi trahun. Deu chillcatulu iñchiñ, nütramcauqueiñ falinque dungu mu”.

12. Wenupüramün familia mu, ¿chem longkontukuabüi tati ngen familia?

¹² Eimi ngen familiangelmi ca petu chillcatulmi tami pu pichiqueche eimün, ¿chumafuimi ñi ayüfalngeal ti chillcatun? Quiñentrür chillcatuafuimün ti lifru ¡Rumel ayüucüleaimi! pingelu. Petu papeltungelu feitachi lifru, cümeque nütram tripaquei. Fei tami pu pichiqueche feipiafeimu ñi chum duamcülen engün ca chem ñi raquiduamelnieteu. Feimu trahulmün tamün quiñentrür poyeafiel Jehová, huesa dungulayafimün ca norümtulayafimün tamün pichiqueche. Feipile engün quiñeque dungu chaftuquefilu Biblia ñi ngülam, illcutulayafimün. Feimu tami pu pichiqueche nütramcaelmu ñi chum duamcülen engün, mañumcülenge ca feipifinge chumül rume tami nütramcayafeteu engün. Loncontucunge, tami pu pichiqueche nütramcaelmu ñi chum duamcülen engün quimafuimi chumngechi tami quelluafiel.

13. ¿Chem kakelu upan mu pu chaw ka ñuke kelluabüingün tañi pu püñeñ tañi doi weniyeabel Jewba?

¹³ Pu chau, chumül rume nütramcayafuimün tamün pichiqueche Jehová mu, petu chillcatulu Biblia müten no. Quiñe ñuque, Lisa pingelu, feipi: “Tañi füta iñchiu quimeltuquefiyu tayu pu pichiqueche Jehová ñi deumael mu, fei ñi doi quimürpuafiel engün. Por ejemplo, aucantumequelu taiñ trehua, taiñ pu pichiqueche ayeconqueingün. Fei iñchiu feipiquefiyu engün Chau Jehová quiñe  ayühun-ngechi Ngünechen, ca ayüquei iñchiñ taiñ ayüucüleal”.

14. ¿Chemu müna balingi pu chaw ka ñuke tañi kellobel tañi pu püñeñ tañi ngümintobel (dulliabel) kümeke weni? (Proverbios 13:20).

¹⁴ Meli ngülam: Quellufimün tamün pichiqueche ñi nieal cümeque hueni. Biblia feipi taiñ pu hueni cümelcayafeiñmu cam huesalcayafeiñmu (papeltunge Proverbios 13:20). Eimi chau, eimi ñuque, ¿quimquefimi tami pu pichiqueche ñi hueni? ¿Trahuluuquefuimi fei engün mu? ¿Chumngechi quelluafuimi tami pu pichiqueche ñi nieal cümeque hueni poyequefilu Jehová? (1 Cor. 15:33). Mangelafuimün tamün ruca mu quiñeque peñi, lamngen cüme hueniyefilu Jehová. Ca mangelafuimün tamün tripayal cam quiñentrür cüme rupaleal (Sal. 119:63).

15. Pu chaw ka ñuke, ¿chumabüingün tañi kelluabel tañi pu püñeñ kümeke weni nieal?

¹⁵ Peaiñ ñi femquen quiñe chau, Tony pingelu. Quisu ca tañi domo quelluquefingu tañi pu pichiqueche ñi nieal cümeque hueni. “Fentren tripantu mu tañi domo iñchiu mangelquefiyu tayu ruca mu fillque peñi ca lamngen huechelelu, füchalelu ca fillque tuhun nielu. Quiñentrür iqueiñ ca mangelquefiyiñ quiñentrür taiñ poyeafiel Jehová taiñ familia iñchiñ. Femngechi cüme quimquefiyiñ pu poyequefilu Jehová. Mangelquefiyiñ huitran-ngepaquechi loncolelu, misionero ca caquelu peñi ca lamngen. Taiñ pu yall inaduamingün ñi rupan feitachi pu peñi ca pu lamngen, tañi yafüluucülen ca ñi fente cüdahuelfiel ta Jehová engün. Tüfa quellueyu taiñ pu yall ñi doi cüme hueniyeafiel ta Jehová”. Pu chau ca pu ñuque, quellufimün tamün pu pichiqueche ñi nieal cümeque hueni.

16. Kiñe püñeñ elkünobile Jewba, ¿chem longkontukuabüingün pu chaw ka ñuke?

¹⁶ Tunte quellufilmi rume tami pu pichiqueche, quiñe tüfa engün ayülayafui ñi serfiafiel Jehová. Femngechi dungu rupalmi, “cüme chaungelan” pilayaimi. Jehová eluquefi caque quiñeque pu che ñi dullial ñi serfiaeteu cam ñi serfinoaeteu. Quiñe tami pu yall püntütripale  Jehová mu, raquiduamlayaimi turpu ñi huiñotunoal Jehová mu. Raquiduamnge ti hueche mu ñamquiyauquefulu (Luc. 15:11-19, 22-24). Feitachi hueche amutui tañi chau ñi ruca mu, coni fentren huesaque dungu mu, huelu rupalu ta tripantu huiñotui. Eimi feipiafuimi chi: “Tüfa re epeu müten. ¿Rüf huiñotupeafui mai Jehová mu tañi yall?” piafuimi. Mai, huiñotuafui llemai Jehová mu. Peaiñ ñi rupan quiñe hueche peñi, Elie pingelu.

17. Elie tañi ngütram, ¿chumngechi newentueiñmu?

¹⁷ Elie feipi: “Tañi chau ca tañi ñuque rumel quelluquefeneu tañi piuqueyeafiel ta Jehová ca falintuafiel tati Biblia. Huelu nierpulu iñche 15 tripantu püle, huedhuedcahun”. Elie epu rume mongen yenierpui ca famentufi com tañi quimeltueteu tañi pu chau. Amutui ñi ruca mu ca fentren huesaque dungu mu coni, huelu quiñeque mu nütramcaquefui quiñe tañi pu hueni Biblia mu. Elie feipi: “Nütramcalu iñche Jehová mu, doi raquiduamquefun quisu meu. Ñochiquechi com tañi quimeltueteu tañi pu chau, fün reque felelu, eluhui ñi tremal reque tañi piuque mu”. Rupalu tripantu, Elie huiñotui Jehová mu. * ¿Rume ayüucülenoafulu tañi pu chau? (2 Tim. 3:14, 15).

18. Pu chaw ka ñuke newentukingün tañi kelluabel ñi pu püñeñ piwkeyeabel Jewba, ¿chem rakiduamimi kidu engün mu?

¹⁸ Pu chau, eimün Jehová elfalcünueimu tamün femal quiñe falin cüdau: tremümafiel tamün pu pichiqueche femngechi ñi poyeafiel ta Jehová engün (Sal. 78:4-6). Tüfa pecan cüdau no, rume cüdaungei. Feimu müna saquihuiyiñ tamün com nehuen mu quimeltufiel tamün pu pichiqueche. Pu chau, fentecünulayaimün tamün quimeltuafiel tamün pu pichiqueche ñi piuqueyeafiel Jehová ca ñi inayafiel ñi ngülam. Femngechi femülmün, ayühulafimün ta Jehová (Efes. 6:4).