1. ¿Chem küdawngechi dungu upaupamekebüi David?

 RAQUIDUAMNGE quiñe huesa dungu ñi rupan David. David lefmahui Saúl mu. Tüfachi huesa huentru ngünenielu Israel mapu mu ayüfui ñi langümafiel ta David. Petu lefmaucülelu ta David duamniefui iyael, feimu amui ta Nob huaria mu. Fei mu pedifi quiñe huentru tañi eluaeteu quechu cofque (1 Sam. 21:1, 3). Rupai chi antü, fei David ca tañi pu compañeteu ellcahuingün quiñe cueva mu (1 Sam. 22:1). Rume huesa dungu ta rupai David, ¿chumngelu am? Peafiyiñ.

2. ¿Chumngechi Saul kuñiwün-ngechi dungu künowi? (1 Samuel 23:16, 17).

² Saúl rume ütrirfi ta David, ¿chumngelu? David hueufi alün quehuan, feimu tati pu che rume saquieyu. Cafei Saúl quimniefui tañi feyentunofiel mu Jehová, feimu famentueyu. Ca quimniefui Jehová ñi dullifiel ta David tañi reyngerpual (papeltunge 1 Samuel 23:16, 17). Famentungelu rume ta Saúl, petu reyngefui. Ca niequefui alün soltau ca fentren che tañi quelluaeteu, feimu David mülefui ñi lefmahual. Raquiduamnge, Chau Jehová feipicünui David tañi reyngeal. ¿Rüf raquiduampefui mai Saúl tañi catrütuafiel Jehová ñi feipicünuel? (Is. 55:11). Quimngelai, Biblia feipiquelai tüfa. Huelu quiñe dungu cüme quimnieiñ: pu caiñetuquefilu ta Jehová hueuquelaingün.

3. Upalu David bentren wedake dungu, ¿chum duamküli?

 ³ David femngelai Saúl reque, David ñom piuquengefui. Quisu dullilai tañi reyngeal, Jehová mai dullieyu (1 Sam. 16:1, 12, 13). Feimu Saúl rume üdefi ta David. David cuñihun dungu mu mülefui, huelu culpatulafi ta Jehová. Cafei David turpu illculai tañi nien mu pichin iyael, cam tañi ellcaucülen quiñe cueva mu. Doi mai feichi cueva mu chi David ülcantulelfi ta Jehová tañi püramyeafiel. Ca feipi: “Pu quintuquefilu ta Jehová chem cüme dungu rume faltalayaingün” (Sal. 34:10).

4. ¿Chem meli ramtun llowdunguaiñ ka chemu müna balingi?

⁴ Alün pu peñi ca lamngen fachantü rupamequeingün filla dungu mu, ca nielaingün chem tañi duamnieel engün. * Tüfachi dungu doi rupai ti huesa cutran mu COVID-19 pingelu. Ca ti huesaque dungu doicülerpuai fülpalu am ti “fütra cutrancahun” (Mat. 24:21). Feimu tüfachi troquiñ mu huiñoldunguaiñ meli ramtun: ¿chemu feipiafuiñ David “chem cüme dungu rume” faltalai? ¿Chumngelu mülei taiñ ayüucüleal com taiñ nieel mu müten? ¿Chumngelu maneluucüleafuiñ Jehová taiñ cuidayaeteu? Ca ¿chumngechi pepicaucüleafuiñ taiñ chaftuafiel tati huesaque dungu cüpalelu?

5, 6. Jewba tañi pu che nieaingün kom tañi duamnel, ¿chumngechi kellukeiñmu (ingkakeiñmu) Salmo 23:1-6 taiñ kimal tüba?

⁵ David feipi tati pu poyequefilu ta Jehová ñi faltanoal chem cüme dungu no rume. ¿Chumngelu feipi tüfa? Ngüneduamfiliyiñ ti Salmo 23 quimürpuafuiñ chem tañi cüpa feipiel David (papeltunge Salmo 23:1-6). Ti versiculo quiñe feichi capitulo mu, David femngechi feipi: “Jehová iñche tañi Camañfe. Chem no rume faltalayan”. Caquelu versiculo mu, David nütramcai chumngechi Jehová cümelcaeyu lloufilu am quisu  tañi Camañfe reque. Jehová yequeyu nor rüpü meu, quisu turpu quisucünulaeyu. David elueteu rume ta Jehová “tañi tranaleal carü cachu mu”, huelu quimniefui tañi rupayal huesaque dungu mu. Quiñeque mu, David hueñancülequefui chi ‘miyauquelu fütra dumiñ meu’ reque. Ca feipi tañi caiñetungeal. Huelu quisu am feipilu “Jehová iñche tañi Camañfe”, feimu llicaquelafui.

⁶ Feimu, ¿chemu faltaquelafui chem cüme dungu no rume ta David? Quisu com niequefui tañi fülmaucüleal Jehová mu. David duamnielafui alün fillem tañi ayüucüleal. Quisu ayüucülequefui Jehová tañi elueteu com ñi duamnieel tañi mongeleal. David mu, doi falin-ngefui llohual Jehová ñi cümelcan ca tañi cuidayaeteu.

7. Lucas 21:20-24 tañi eipin, pu cristiano unen siglo mu Judea mapu mu, ¿chem küdawngechi dungu upaingün?

⁷ ¿Chem quimeltueiñmu David ñi feipin? Iñchiñ ayüucüleafuiñ taiñ nieel mu falinque fillem, huelu doyümlayafiyiñ taiñ mongen mu. Tüfachi falin dungu mülefui ñi quimtucual pu cristiano mülelu Judea mapu mu (papeltunge Lucas 21:20-24). Feichi mu, ¿chem dungu rupai? Jesús feipifi feitachi pu cristiano Jerusalén huaria ñi hualloñmayaeteu fentren soltau. Rupale tüfa, tati pu cristiano mülefui ñi lefmahual huincul püle. Femngechi femle engün, montuafuingün. Huelu ca elcünuafuingün tañi falinque fillem. Cuifi mu tüfachi revista feipi: “Feichi cristiano elcünuingün tañi mapu, ñi ruca ca yelafingün rume tañi nieel ruca mu. Maneluucülefuingün Jehová tañi cuidayaeteu ca quelluaeteu, feimu doyümfingün ñi poyefiel”.

8. Pu cristiano Judea mu tañi upan, ¿chem kimeleleiñmu?

⁸ Ñi femün tati pu cristiano Judea mapu mu mülequefulu quimeltuqueiñmu quiñe falin dungu. Cuifi mu tüfachi revista ca feipi: “Cüpalechi antü meu, rupayaiñ huesaque dungu mu. Fei, ¿chem doi falintuafiyiñ? ¿Tati falinque fillem taiñ nieel cam taiñ poyefiel ta Jehová? Puule ñi afal huesaque dungu, chaftuafiyiñ cüdaungechi dungu. Feichi pu cristiano reque lefmaulu Judea mapu mu, iñchiñ ca femngechi chumaiñ rume taiñ montuluhual”. *

9. Pablo tañi ngülamtubel pu hebreoche, ¿chumngechi newentukeiñmu?

⁹ Feitachi pu cristiano, ¿cüdautupelafuingün tañi elcünual ñi nieel fei ñi mülepual cañpüle? Fei engün duamniefuingün ñi maneluhual Jehová mu tañi cuñiutucuaeteu. ¿Chem quellueyu engün tañi maneluhual Jehová mu? Quechu tripantu cuifi petu ñi hualloñmangenon Jerusalén, Pablo feipieyu feitachi cüme ngülam: “Huesa ayütuquefilmün ta plata ca itrofill chemcün. Ayüucülemün tunten tamün nieel ta feula, fei Ngünechen am feipilu: ‘Chumcaunorume quisucünulayayu ca elcünulayayu rume’. Feimeu mülei taiñ feipial ta maneluhun meu: ‘Ñidol Ngünechen quelluqueneu ta iñche, feimeu llicalayan. ¿Chem chumaeneu anta che?’” (Heb. 13:5, 6). Pu cristiano inafilu Pablo tañi ngülam petu ñi apümcangenon Jerusalén huaria, quellueyu tañi pepicaucüleal. Fei mülepulu engün cañpüle, cüdautulaingün ñi ayüucüleal tañi pichin nieel mu. Maneluuquefuingün Jehová tañi eluaeteu com ñi duamnieel engün. Pablo tañi feipicünuel  ca quelluqueiñmu taiñ maneluhual Jehová taiñ cuidayaeteu.

10. ¿Chem balin dungu wirintukui Pablo iñchiñ mu?

¹⁰ Pablo feipifi ta Timoteo: “Fei nieliyiñ taiñ iyael ca nieliyiñ ta tacuhun taiñ tucutuucüleal, feimeu felei taiñ cüme duamcüleal” (1 Tim. 6:8). Pablo tañi ngülam ca quelluqueiñmu famülque mu. Tüfa, ¿feipipei mai ñi cümenon taiñ iyal cümeque iyael, nieal quiñe cüme ruca cam taiñ ngillayal hueque tacuhun? Femlai. Pablo quimeltueiñmu chem rume nieliyiñ, mülei taiñ ayüucüleal taiñ nieel mu (Filip. 4:12). Pablo quimürpui com tüfachi dungu ñi rüfngen. Tati doi falin dungu taiñ nieel iñchiñ tati falinque fillem no, huelu mai Jehová taiñ hueniyeafiel (Hab. 3:17, 18). 

11. Moises tañi eipibel pu israelche, ¿chem kimeleleiñmu?

¹¹ Quiñeque mu iñchiñ raquiduamafuiñ taiñ duamnieel quiñe dungu, huelu Jehová doi quimniei chem taiñ rüf duamnieel iñchiñ. Peaiñ Moisés tañi chem feipifiel tati pu israelche, deu rupalu engün 40 tripantu desierto mu. Feipifi: “Com tami femqueel mu, Jehová tami Ngünechen, cümelcaqueimu. Quisu fente cüme ngüneduamquei tami miyahun tüfachi fütra desierto mu. Tüfachi 40 tripantu ñi rupan, Jehová tami Ngünechen mülequei eimi mu, fei chem no rume faltalequelaimi” (Deut. 2:7). Feichi 40 tripantu mu, Jehová elufi mana ñi iyal pu israelche.  Ca pu israelche tripalu Egipto mapu mu, tañi ropa huichaflai rume, rupalu rume 40 tripantu (Deut. 8:3, 4). Quiñeque tati pu israelita müte ayüucülelafuingün tüfachi dungu meu, feimu Moisés raquiduameleyu engün tüfa com ñi duamnieel müten. Jehová ayüniei taiñ mañumchefengeal pichin niefuliyiñ rume. Ca ayüniei taiñ peafiel tüfa quiñe regalo reque. Femngechi femliyiñ, ayühulafiyiñ Jehová ñi piuque.

12. David maneluwlai kidu mu, ¿chumngechi pengeli ñi maneluwkebel Jewba müten?

¹² David quimniefui Jehová tañi nor piuquengen tañi pu che mu ca ñi cuñiutucuquefiel tañi pu piuqueyeteu. David huirintuculu ti Salmo 34 rupamequefui cuñihun-ngechi dungu tañi mongen mu. Femfulu rume, quisu maneluuquefui ñi fülcülen “Jehová ñi cüme püllü” (Sal. 34:7). David trürümfi chi Jehová tañi cüme püllü quiñe soltau reque ngüneduamfilu ñi fülcülepan tañi pu caiñe. David quiñe nehuen ca llicaquenochi hueichafengefui ca Jehová feipicünueyu ñi reyngerpual. Huelu quisutu maneluulai ñi huehuafiel ñi pu caiñe (1 Sam. 16:13; 24:12). Doi mai maneluhui Jehová tañi cüme püllü ñi incañpeaeteu. Fachantü, iñchiñ esperaquelaiñ Jehová ñi femal quiñe afmatun dungu taiñ incañpeaeteu. Huelu iñchiñ maneluucüleiñ Jehová mu, langümngefuliyiñ rume quisu huiñomongeltuaiñmu ca eluaiñmu rumel mongen.

13. 1) Lebkontupale Gog tuwlu Magog, ¿chemu nienolu kellun trukuwabüiñ (trokiwabüiñ)? 2) ¿Chemu llükalaaiñ? (Pebinge adentun unen pagina mu).

¹³ Cüpalechi antü mu fillque gobierno quiñeucülelu, Gog tuulu Magog pingelu, caiñetuaiñmu. ¿Rüf maneluupeaiñ Jehová taiñ incañpeaeteu? Cam, ¿raquiduamafuiñ chi taiñ langümngeal? Duamnieaiñ maneluhual Jehová mu taiñ montulaeteu. Ufisa reque nienolu inei ñi cuñiutucuaeteu troquiaiñmu tüfachi gobierno (Ezeq. 38:10-12). Nielayaiñ chumngechi taiñ hueichayafiel, feimu “cüdaungelai ñi hueungeal” piaiñmu pu gobierno. Huelu iñchiñ maneluucüleiñ Jehová mu, feimu quimnieiñ pu cümeque püllü taiñ incañpeaeteu. Pu gobierno quimlaingün tüfa. Fei pu gobierno ngüneduamle engün chumngechi taiñ incañpeaeteu pu cümeque püllü, afmatulehueaingün (Apoc. 19:11, 14, 15).

14. Bewla, ¿chumabüiñ taiñ pepikawküleal?

¹⁴ ¿Chumafuiñ taiñ pepicaucüleal? Rume falintulayafiyiñ taiñ falinque fillem. ¿Chumngelu? Cüpalechi antü meu, com elcünuafiyiñ. Cafei ayüucüleaiñ taiñ nieel mu ca taiñ hueniyefiel Jehová. Doi cüme hueniyefiliyiñ Jehová famülque mu, doi maneluucüleaiñ taiñ incañpeaeteu cüpalechi antü meu.

15. David ñi kuibike upan, ¿chumngechi kimpoi Jewba ñi kidutukünonoaetu?

¹⁵ ¿Ca chem quellueyu David? Quisu feipi: “Quimafimün ta Jehová, ca ngüneduamaimün ñi cüme piuquengen; ayüucülei tati huentru recüluuquelu Chau Ngünechen mu” (Sal. 34:8). ¿Chem pengeli ñi feipin David? David maneluucülequefui Jehová mu, ca Jehová turpu quisucünuquelaeyu. Por ejemplo, David huechengelu chaftufi ta Goliat. Feipifi: “Fachantü Jehová quelluaeneu, feimu huehuayu” (1 Sam. 17:46). Rupalu ta antü, ti rey Saúl fentren rupa ayüfui ñi  langümafiel ta David, huelu Jehová turpu quisucünulafi ta David (1 Sam. 18:12). David deu quimniefui Jehová ñi quelluqueteu cuifi, feimu maneluuquefui ñi quellunierpuaeteu. David reque femliyiñ, iñchiñ ca maneluucüleaiñ Jehová taiñ quelluaeteu rupaliyiñ huesaque dungu mu.

16. ¿Chumngechi kimabüiñ Jewba ñi küme piwkengen?

¹⁶ Maneluucüleliyiñ fachantü Jehová mu, cüpalechi antü meu doi maneluucülerpuaiñ taiñ quelluaeteu. Por ejemplo, eimi mülei tami maneluucüleal Jehová mu tami feipiafiel tami jefe: “¿Eluafen permiso tañi amual quiñe fütra trahun mu? ¿Arreglacünulelafen tañi horario tañi amual fill trahun mu ca tañi doi amuldungual?”. “Femlayan” pielmu tami jefe ca quechanentungelmi tami cüdau mu, ¿chumaimi? ¿Maneluupeaimi mai Jehová mu tami quisucünunoaeteu ca tami eluaeteu com tami duamnieel? (Heb. 13:5). Fentren precursor feipiafeiñmu chumngechi Jehová quelluqueyu ca eluqueyu com tañi duamnieel. Felei llemai, Jehová turpu quisucünuquelafi tañi pu che.

17. ¿Chem versiculo longkontukuaiñ 2022 tripantu mu? ¿Chumngechi kelluabeiñmu tüba?

¹⁷ Jehová mülei iñchiñ mu, feimu chem rupale rume llicalayaiñ. Doyümfiliyiñ taiñ poyeafiel Jehová taiñ mongen mu, turpu quisucünulayaiñmu. Famülque mu, iñchiñ mülei taiñ pepicaucüleal taiñ chaftuafiel chem huesaque dungu rume rupale, ca maneluucüleaiñ Jehová mu taiñ quelluaeteu. Feimu ti Cuerpo Gobernante dulli ti Salmo 34:10 taiñ raquiduamtucunieal 2022 tripantu mu. Feipi: “Pu quintuquefilu ta Jehová chem cüme dungu rume faltalayaingün”.