1. ¿Chem ramtuwabüiñ?

 PICHIÑMA mu apümcangeai tati coilaque religion, Gog tuulu Magog caiñetuafi Jehová tañi pu che ca pichiñma mu acuai ti Armagedón hueichan. Llicaquepelaimi ñi rupayal com tüfa. Feimu eimi ramtuhuafuimi chi: “Rupale com tüfa, ¿petu fülconcülepean mai Jehová mu?”. Femngechi raquiduamülmi, yafültucupelayafeimu Jesús ñi feipifiel tañi pu discipulo cuifi mu. Quisu feipi: ‘Ca raquiduamcülequilmün. Felei tamün maneluhual ta Ngünechen meu’ (Juan 14:1). Rüf maneluucüleliyiñ Jehová mu, aguantayaiñ chem huesa dungu rume rupafuliyiñ.

2. 1) ¿Chumngechi newentuabüiñ taiñ maneluwün? 2) ¿Chem ngütramkaaiñ tübachi kimelün mu?

² Cüme chaftufiliyiñ ti huesaque dungu ñi ruparupangen famülque mu, doi maneluhuaiñ Jehová mu, fei nehuencüleaiñ rupafuliyiñ huesaque dungu mu cüpalechi antü meu. Tüfachi troquiñ mu, peaiñ meli dungu ñi rupan Jesús tañi pu discipulo pengelingün tañi müte maneluucülenon. Ti huesaque dungu ñi rupan Jesús tañi pu discipulo, iñchiñ ca rupayafuiñ. Fei tüfachi troquiñ mu, peaiñ chumngechi cüme chaftuafuiñ feitachi huesaque dungu. Ca peaiñ chumngechi tüfa quelluafeiñmu taiñ nehuencüleal rupaliyiñ huesaque dungu mu cüpalechi antü meu.

3. Mateo 6:30, 33 tañi eipin, ¿chem eipi Jesu maneluwün mu?

³ Tati pu ngen familia ayüquei ñi cüdahual ñi eluafiel com tañi duamnieel tañi pu che. Huelu famülque mu cüdaungeafui ñi femal. Quiñeque peñi quechangei  tañi cüdau mu, fei cüdautuqueingün ñi peal ca cüdau chumfule engün rume. Ca quiñeque peñi famentuquefi quiñeque cüdau chaftuquefilu Biblia ñi feipin. Femngechi dungu rupafuliyiñ, mülei taiñ maneluhual Jehová meu müten. Quisu elulleaiñmu mai com taiñ duamnieel. Jesús cüme loncontuculelfi feitachi dungu tañi pu discipulo (papeltunge Mateo 6:30, 33). Maneluucüleliyiñ Jehová taiñ quisucünunoaeteu, doyümafiyiñ taiñ cüdahuelafiel Jehová. Jehová elueliyiñmu com taiñ duamnieel, doi fülconcüleaiñ ca doi maneluhuaiñ quisu meu.

4, 5. Kiñe familia, ¿chumingün tañi bill rakiduamkülen tañi duamneel nieal?

⁴ Peaiñ chem dungu ñi rupan ti familia Castro, Venezuela mapu mu. Cuifi niequefui ta mapu tañi cüdahual engün. Feitachi mapu eluquefeyu tañi nieal ñi mongeluhual engün. Huelu quiñe antü contupaeyu quiñeque pandillero. Fei müntuñmangei tañi mapu engün ca quechanentungei. Ti peñi Miguel feipi: “Arelngeiñ quiñe pichin mapu, feimu tucucauqueiñ taiñ nieal taiñ duamnieel taiñ mongeluhuam. Huitran mu pulihuen, llellipuquefiñ ta Jehová femngechi tañi eluaeteu iyael feichi antü mu”. Tüfachi familia cüdaungefui ti mongen tañi yenietuel engün. Huelu maneluucülefui tañi cuidayaeteu Jehová, feimu eluucülefui ñi amuldungual ca ñi amual ta trahun mu engün. Tañi cüdahuelafiel Jehová doi falintuquefingün, feimu Jehová eluqueyu com tañi duamnieel.

⁵ Miguel ca tañi domo loncontucuingu chumngechi tañi quelluqueteu Jehová. Jehová adniequefi quiñeque peñi ca quiñeque lamngen ñi quelluafiel tati familia Castro. Cafei Miguel quellungequei ñi peal quiñe cüdau. Cafei pu peñi mülelu Betel mu quelluntucuqueyu engün chem tañi duamnieel. Jehová turpu quisucünulaeyu engün, femngechi tüfachi familia doi maneluucülequei Jehová mu. Miguel tañi ñahue, Yoselin pingelu, feipi: “Yafültucuqueiñmu taiñ quellueteu mu Jehová. Iñche ñi hueni troquiquefiñ ta Jehová, quisu ñi duam mu trecayauquen. Ti huesaque dungu taiñ rupafel, quelluqueiñmu taiñ nehuencüleal femngechi cüme chaftuafuiñ doi huesaque dungu rupafuliyiñ cüpalechi antü meu”.

6. Nienolmi tami duamneel, ¿chumngechi newentuabüimi tami maneluwün?

⁶ Eimi müte nielaimi chi plata, feimu müte nielaimi chi tami duamnieel. Müna huesa dungu tati. Femülmi rume, eluunge tami doi maneluhual Jehová mu. ¿Chumngechi femafuimi? Llellipuafimi Jehová ca papeltuafimi ca raquiduamaimi ñi feipin Mateo 6:25-34. Ca raquiduamafuimi ñi rupan quiñeque peñi ca quiñeque lamngen. Fei engün huesaque dungu rume rupafulu, fentecünulaingün tañi poyeafiel Jehová. Fei Jehová quellueyu engün (1 Cor. 15:58). Femülmi,  doi maneluhuaimi tami quisucünunoaeteu Jehová. Quisu fente cüme quimniei chem tami duamnieel, chumngechi rume eluafeimu. Pefilmi chumngechi tami cümelcaqueteu Jehová, doi maneluhuaimi quisu meu. Ca nehuencüleaimi tami chaftuafiel doi huesaque dungu rupafulmi cüpalechi antü meu (Hab. 3:17, 18).

7. Mateo 8:23-26 tañi eipin, bütra kürübtukumawlu, ¿chumingün pu inaneketu?

⁷ Jesús feipifi tañi pu discipulo mülei ñi doi maneluhual Chau Jehová mu. ¿Chumngelu? (Papeltunge Mateo 8:23-26). Jesús ca tañi pu discipulo amulelu quiñe farcu meu, mahuntucu cürüfrumei. Fente tañi mahunün, ti co huitruconpui farcu meu. Jesús conumaucülefui. Fente tañi llicalen engün, trepelfingün ta Jesús tañi montulaeteu. Fei Jesús feipieyu engün: ‘¿Chumngelu am ta fente llicaimün? ¡Nehue feyentulelaimün!’. Jehová fente tañi nehuen-ngen, montulafui tañi Fotüm ca tañi pu discipulo. Huelu fei engün raquiduamlaingün tüfa. ¿Chem quimeltueiñmu tüfa? Rüf maneluucüleliyiñ Jehová mu, chaftuafuiñ chem huesaque dungu rume, cürüftucu mahun reque felelu.

8, 9. ¿Chem weya dungu mu upai taiñ lamngen Anel? ¿Chem kellueyu (ingkaeyu)?

⁸ Peaiñ ñi rupan quiñe lamngen, Anel pingelu. Quiñe fütra cürüftucu mahun ruparumei tañi lof mu. Fei ñamümi com tañi niequefel ca tañi cüdau. Tañi rupan taiñ lamngen quellueyu ñi doi maneluhual Jehová mu. Anel feipi: “Anücünuulan fente tañi llicalen. Doi mai eluhun tañi maneluhual ta Jehová mu ca ngillatufiñ”.

⁹ ¿Ca chem quellueyu taiñ lamngen? Tañi feyentual com tañi feipieteu Jehová tañi troquiñche. Tüfa quellueyu tañi tüngcületual. Taiñ lamngen feipi: “Jehová adniefi tañi pu lamngen tañi quelluaeteu ca yafültucuaeteu. Jehová doi elurpueneu tañi duamnieel, feimu doi maneluhun quisu meu”.

10. Upalmi re küdawngechi dungu, ¿chumabüimi?

¹⁰ ¿Rupaquefuimi chi quiñe huesa dungu mu? ¿Quiñe cürüftucu mahun mu chi cam quiñe fütra nüyün? Cam, ¿cutrancüleimi chi? Femngechi dungu mu rupalmi, huesa duamcüleafuimi chi, quimlayafuimi tami chumal. Huelu fentecünuquilnge tami maneluhual Jehová mu. Ngillatufinge Jehová com tami piuque mu. Raquiduamaimi Jehová chumngechi tami quelluqueteu cuifi, fei nehuentucuaimu (Sal. 77:11, 12). Loncontucunge: Jehová turpu quisucünulayaimu.

11. ¿Chemu mupituabüiñ taiñ pu longkolelu?

¹¹ ¿Ca chem quelluafeimu rupafulmi huesaque dungu mu? Feyentuafimi com ñi feipiel Jehová tañi troquiñche. Maneluunge pu loncolelu meu. Quiñeque mu,  cümenolu troquiafuiñ taiñ huercüeteu pu loncolelu, huelu inayafiyiñ taiñ feipingeel. Femliyiñ, cümelcangeaiñ ca montulngeaiñ. Tüfa ta quimeltueiñmu Biblia ca ñi rupan taiñ pu peñi ca taiñ pu lamngen (Éx. 14:1-4; 2 Crón. 20:17). Raquiduamülmi tüfa mu, doi eluucüleaimi tami inayafiel ñi feipin Jehová ñi troquiñche, famülque mu ca cüpalechi antü meu (Heb. 13:17). Feimu chem rume llicalayafimi rupale ti fütra cutrancahun (Prov. 3:25).

12. Lucas 18:1-8 tañi eipin, ¿chumngechi kellukeiñmu maneluwün newentual weyake dungu?

¹² Jesús quimniefui tañi pu discipulo femngefule huesaque dungu, duamnieafuingün ñi doi maneluhual Chau Jehová mu. Tañi quelluafiel engün nütramelfi quiñe lantu domo meu. Feichi lantu domo femngelu huesa dungu, amuquefui quiñe huesa juez mu tañi quelluaeteu, huelu ti huesa juez allcütulaeyu. Feitachi lantu domo feipipelai: “Mollquechi pemefili tati juez, quelluaeneu tati” pipelai. Fei femngechi tripai. ¿Chem quimeltueiñmu tüfa? Jehová rüf quelluquefi tañi pu rumel ngillatuqueteu (papeltunge Lucas 18:1-8). Fei Jesús feipi: ‘Feichi cüpatuale ti Huentrucünuupalu, ¿pepapeai mai che femngechi feyentulelu?’. Huesa femngeliyiñ, inayentuafiyiñ ñi femün feichi lantu domo, fei cüme pengelcünuaiñ taiñ maneluucülen Jehová mu. Femngechi femliyiñ, ca maneluhuafuiñ Jehová taiñ rumel quelluaeteu. Cafei duamnieiñ taiñ ngillatuleal, tüfa müna quelluafeiñmu. Quiñeque mu, taiñ raquiduamquenofel rume Jehová huiñoldunguafeiñmu.

13. Vero ka tañi pu che, ¿chumngechi ti ngillatun kellubi kiñechi upalu weya dungu?

¹³ Peaiñ ñi rupan taiñ lamngen Vero, mülelu ti República Democrática del Congo mapu meu. Tañi füta testigongelai ca tañi domo püñeñ 15 tripantu niefui. Quiñe antü ñi lof mu engün, maloconturumepaeyu pu soltau, feimu mülefui ñi lefmahual engün. Amulelu rüpü mu engün, catrütueyu pütrüquen soltau ca feipingeingün ñi langümngeal. Taiñ lamngen Vero llicalefui feimu ngümangümangefui. Tañi domo püñeñ yafültucueyu ca nehuentu llellipui. Tañi llellipun mu mufüquechi üituquefi ta Jehová. Rupan ngillatulu, tati comandante ramtueyu: “¿Inei am ta enseñaleimu tami ngillatual?”. “Tañi ñuque enseñaeneu” pifi. “Fei pengelqueneu ti llellipun mülelu Mateo 6:9-13”. Fei ti comandante feipieyu: “Amutumün müten. Jehová tami Ngünechen ta quelluaimu”.

14. Ngillatubiliiñ Jewba, ¿chem upaabüi ka chem kelluabeiñmu?

¹⁴ Ñi rupan tüfachi familia, ¿chem quimeltueiñmu? Ñi falin-ngen taiñ llellipuleal. Huelu quiñeque mu, Jehová huiñoldungufemlayaiñmu. Fei, ¿chumafuiñ?  Inayentuafiyiñ ñi femün ti lantu domo. Ngillatuleaiñ müten. Maneluucüleaiñ Jehová taiñ quisucünunoaeteu. Chumül rume Jehová lloudunguafeiñmu taiñ llellipufiel. Ngillatuleaiñ taiñ eluaeteu ñi nehuen (Filip. 4:13). Loncontucuaiñ: cüpalechi antü meu, Jehová rume cümelcayaiñmu. Acordahuelayaiñ taiñ huesa rupan. Famülque mu, Jehová ñi quellun mu cüme chaftuafuiñ taiñ huesa rupamequen. Femliyiñ, nehuencüleaiñ huesaque dungu rupafuliyiñ cüpalechi antü meu (1 Ped. 1:6, 7).

15. Mateo 17:19, 20 tañi eipin, ¿chem duamnekingün pu inaneketu?

¹⁵ Jesús feipifi tañi pu discipulo maneluule engün Jehová mu, chaftuafuingün chem dungu rume rupafule engün (papeltunge Mateo 17:19, 20). Cuifi mu, Jesús tañi pu discipulo huemünentuquefuingün Huecüfü. Huelu quiñe rupa pepi femlaingün. ¿Chumngelu pepi femlaingün? Tañi nehue maneluunon Jehová mu. Jesús feipieyu doi maneluufule engün Jehová mu, chaftuafuingün chem huesa dungu rume rupafule engün. Famülque mu, iñchiñ ca femngechi rupaqueiñ huesaque dungu meu. Fei, “¿pepi chaftupeafun mai?” piafuiñ chi. Femngechi dungu mu rupaliyiñ, ¿chumafuiñ? Peafiyiñ.

16. Geydi upalelu weñangkechi dungu, ¿chumngechi kellubi ti maneluwün?

¹⁶ Peaiñ ñi rupan taiñ lamngen Geydi, mülelu Guatemala mapu meu. Taiñ lamngen tañi füta engu tripalu trahun mu, epe puucületulu tañi ruca mu, langümüñmangei tañi füta. Taiñ lamngen fente tañi maneluhun Jehová mu, llellipufi. Tüfa quellueyu ñi nehuencüleal. Fei feipi: “Com tañi fanetunieelchi dungu elcünulelquefiñ Jehová. Fei tüngduamelqueneu. Jehová ca cuidaqueneu tañi trahunche mu ca tañi pu familia mu. Tañi serfifiel mu Jehová ngoimanentuquefiñ reque tañi huesa rupan. Feimu raquiduamquelan chem ñi rupayal ta hule. Tañi huesa rupan mu, quimürpun chem huesaque dungu rume rupafuli, cüme chaftuafun Jehová ñi duam mu. Cafei Jesús ca Jehová tañi troquiñche quelluafeneu”.

17. Katrütungeliiñ kiñe dungu mawida reke belelu, ¿chumabüiñ?

¹⁷ Layeluhulmi quiñe tami piuqueyenieelchi che, ¿chumafuimi? Biblia meu papeltuafuimi ñi huiñomongetun quiñeque che cuifi mu, femngechi tami doi maneluhual Jehová mu. Cam hueñancüleimi chi quiñe tami piuqueyenieelchi che huemünentungelu trahunche mu. Fei ¿chumafuimi? Papeltuafimi taiñ fillque papel, fei quimtucuaimi Jehová norümtufiel mu quiñe che quelluquefi ñi repentiutual. Chem huesaque dungu rume rupafulmi, eluunge tami doi maneluhual  Jehová mu. Nülacünulelafimi tami piuque ta Jehová. Feipiafimi com tami huesa raquiduamelnieteu. Famentuulayaimi tami pu peñi pu lamngen mu, fülconcüleaimi quisu engün mu (Prov. 18:1). Huesa duamcülefulmi rume, faltalayaimi trahun mu, amuldunguaimi ca papeltuafimi Biblia. Tüfa quelluaimu tami aguantayal (Sal. 126:5, 6). Raquiduamtucunieafimi com ti cümeque dungu tami eluaeteu Jehová cüpalechi antü meu. Ngüneduamülmi chumngechi tami quellunieteu ta Jehová ta fachantü, doi maneluhuaimi quisu meu.

18. Newen-nole tami maneluwün, ¿chumabüimi?

¹⁸ Rupan mu huesaque dungu mu, inaduamuufuimi chi tami nehue maneluunon Jehová mu. Femngechi dungu mu rupalmi, huesa duamquilnge, doi mai eluunge tami doi maneluhual Jehová mu. Jesús tañi pu discipulo reque, feipiafimi Jehová tami quelluaeteu tami doi maneluhual quisu meu (Luc. 17:5). Cafei raquiduamtucuafimi ñi rupan taiñ pu peñi ca pu lamngen. Raquiduamnge Jehová chumngechi ñi quellufiel ta Miguel ca tañi domo. Rupalmi huesaque dungu mu, com piuque mu llellipuafimi Jehová. Femngechi inayentuafimi ñi chumel taiñ lamngen Anel ca Vero tañi domo püñeñ. Geydi reque, eluhuaimi tami quelluaeteu tami pu familia ca ti trahunche. Eluhulmi tami quelluaeteu Jehová famülque mu, doi maneluhuaimi tami quelluaeteu cüpalechi antü meu.

19. ¿Chem küme kimnekebün Jesu kabei kimneimi?

¹⁹ Jesús feipifi tañi pu discipulo duamniefuingün ñi doi maneluhual Jehová mu. Huelu Jesús cüme quimniefui Jehová ñi duam mu, tañi pu discipulo cüme chaftuafui chem huesa dungu rume rupafule (Juan 14:1; 16:33). Jesús ca quimniefui quiñe fütra troquiñche fente ñi maneluucülen Jehová mu, mongetripayai ti fütra cutrancahun mu (Apoc. 7:9, 14). Eimi cai, ¿ca mongetripayaimi? Eluhulmi tami doi maneluhual Jehová mu fachantü, mongetripayaimi llemai (Heb. 10:39).