1. ¿Chumngechi trukuneabüiñ (trokineabüiñ) ta Jewba?

JEHOVÁ ñi familia mu coneltulei ta Jesús. Ca millonque püllü coneltulei feichi familia mu (Sal. 103:20; Col. 1:15). Jesús mülepalu Mapu meu feipicünui pu che peafuingün ta Chau Dios quisu ñi Chau reque. Jesús nütramcafilu tañi pu discipulo feipifi: ‘Iñche ñi Chau ca eimün tamün Chau’ (Juan 20:17). Fautizaulu iñchiñ, conpuiñ quiñe piuqueyen fütra familia mu (Mar. 10:29, 30).

2. ¿Chem ngütramkaaiñ tübachi kimelün mu?

² Quiñeque che cüdautuquei tañi peafiel ta Jehová quiñe cüme Chau reque. Ca quiñeque cüdautuquei ñi pengelafiel poyen tañi peñi ca tañi lamngen. Tüfachi troquiñ mu peafiyiñ Jesús chumngechi quelluqueiñmu taiñ peafiel Chau Dios quiñe cüme Chau reque. Ca femngechi quimürpuaiñ chumngechi ñi inayentuafiel ta Jehová chumngechi ñi piuqueyechequen trahunche mu.

3. Taiñ ngillatol Jewba mu, ¿chumngechi kimelelkeiñmu ta Jesu?

³ Jehová ta quiñe poyechefe Chau. Jesús ayüquei taiñ peafiel ta Jehová chumngechi fei tañi femquen. Jehová feipiquelaeiñmu müten taiñ femal. Fei ñi poyechefengen mu, tunten rupa rume ayüliyiñ taiñ nütramcayafiel, femafuiñ. Tüfa pengeli Jesús tañi quimeltufiel tañi pu inanieteu ca ñi chumngechi ngillatual engün. Jesús ñi ngillatun feipi: “Taiñ Chau Ngünechen” (Mat. 6:9). Jesús quimeltulafi tañi pu inanieteu ñi feipial: Com Nehuen-ngelu, Com Deumaquelu  ca Rumel Loncolelu (Gén. 49:25; Is. 40:28; 1 Tim. 1:17). Doi mai quimeltufi tañi pu discipulo ñi feipial ta Jehová “Chau Dios”.

4. Jewba, ¿chumngechi pengelkeiñmu taiñ bülkontuabel?

⁴ ¿Cüdautuqueimi tami peafiel ta Chau Dios ñi poyechefengen? Quiñeque iñchiñ pichicalu, niefuiñ chi quiñe chau poyechefengenolu. Feimu cüdautuafuiñ taiñ peafiel ta Chau Dios ñi poyechefengen. Rume ayühun-ngei taiñ quimal chumngechi Jehová tañi quimnien taiñ felen. Jehová ayülei taiñ fülcontuafiel, feimu Biblia quimeltui: “Fülconmün ta Ngünechen meu, fei quisu fülconai ta eimün meu” (Sant. 4:8). Jehová poyenieiñmu, fei taiñ doi cüme Chau taiñ nieal.

5. Lucas 10:22 tañi eipin, taiñ bülkonal Jewba mu, ¿chumngechi kellukeiñmu (ingkakeiñmu) ta Jesu?

⁵ Jesús quelluafeiñmu taiñ doi fülcontuafiel ta Chau Dios Jehová. Jesús cüme quimniefi ta Chau Dios, feimu cüme inayentuquefi chumquen ta Jehová. Feimu feipi ‘pequeteu ta iñche, ca femngechi pequefi ta Chau’ (Juan 14:9). Jesús quimeltueiñmu chumngechi taiñ respetayafiel ca taiñ feyentual taiñ Chau. Ca quimeltueiñmu chem taiñ femal taiñ ayühulafiel ta Jehová ca taiñ rumel hueniyeafiel. Jesús ca quelluqueiñmu taiñ quimürpual Jehová rume piuqueyechequei ca hulquei cümelcan (papeltunge Lucas 10:22). ¿Chumngechi pengelquei Jehová ñi poyechefengen? Peafiyiñ quiñeque ejemplo.

6. Jewba, ¿chumngechi pengeli ñi allkütubel Jesu?

⁶Jehová allcütuquefi tañi pu yall. Peafiyiñ chumngechi ñi allcütufiel ta Jesús. Jehová rume fentren ngillatun allcütuñmafi ta Jesús (Luc. 5:16). Jesús ñi femal falin-ngechi dungu, Jehová allcütuñmaeyu tañi ngillatun ñi dullial tañi mari epu apostol (Luc. 6:12, 13). Jehová ca femngechi allcütuñmafi tañi ngillatun ta Jesús ñi hueñancülen. Pichilehuelu tañi fendengeal ta Jesús, fei ngillatufi tañi Chau Jehová ñi rupayal  cutrancahun-ngechi dungu mu. Jehová allcütuñmafi tañi ngillatun ta Jesús, ca huercülelfi quiñe püllü tañi eluaeteu nehuen (Luc. 22:41-44).

7. Kimbel mu Jewba ñi allkütukebel taiñ ngillatun, ¿chumngechi duamkimi?

⁷ Fachantü ca femngechi Jehová allcütuñmafi tañi ngillatun tañi pu che. Fei huiñoldunguquei quiñe antü doi tañi duamniengen mu (Sal. 116:1, 2). Peafiyiñ ñi rupan quiñe lamngen India mapu mu mülelu. Fei niefui quiñe emocional cutran. Fei taiñ lamngen rume ngillatuquefui ta Jehová tüfachi dungu mu. Fei feipi: “Ti programa JW Broadcasting^® mayo cüyen meu 2019 tripantu meu, quimeltueneu chem tañi femal nieli quiñe preocupaucülenchi dungu. Tüfa ta iñche tañi duamniefel. Chau Dios allcütuñmaeneu tañi ngillatun”.

8. Jewba, ¿chumngechi pengelelbi Jesu tañi piwkeyenebel?

⁸ Jehová duamtunieiñmu ta iñchiñ chumngechi ñi duamtuniefiel ta Jesús mülepalu Mapu mu (Juan 5:20). Jehová quellufi ta Jesús ñi nieal nehuen-ngechi maneluhun ca elufi nehuen ngañhuadcülelu. Ca elufi com chem tañi duamnieel tañi mongeleam. Ca femngechi feipifi ta Jesús ñi poyeniefiel (Mat. 3:16, 17). Jesús quimniefui tañi Chau engu tañi mülen, feimu turpu quisulelu troquiulai (Juan 8:16).

9. ¿Chemu eipikiiñ Jewba taiñ piwkeyenetu?

⁹ Jesús reque, iñchiñ ca pequefiyiñ chumngechi Jehová taiñ piuqueyenieteu. Raquiduamnge tüfa mu: Jehová quimeltueiñmu taiñ hueniyeafiel. Ca femngechi Jehová elueiñmu taiñ pu peñi ca pu lamngen taiñ piuqueyeaeteu ca taiñ quelluaeteu huesaque dungu mu rupaliyiñ (Juan 6:44). Ca quelluqueiñmu taiñ doi maneluhual quisu mu. Ca femngechi eluqueiñmu com taiñ duamnieel taiñ mongeleam (Mat. 6:31, 32). Taiñ raquiduamün mu chumngechi Jehová taiñ rumel poyenieteu, ca femngechi iñchiñ doi piuqueyequefiyiñ.

10. ¿Chumngechi inayentobiiñ Jewba taiñ piwkeyekel taiñ pu peñi ka lamngen?

¹⁰ Jehová piuqueyeniefi taiñ pu peñi ca taiñ pu lamngen. Huelu iñchiñ quiñeque mu, cüdautuafuiñ taiñ piuqueyeafiel  engün. ¿Chumngelu? Trürlai taiñ tremümngemum ca caquerumei taiñ tuhun. Taiñ culpafe chengen mu quiñeque mu huesa duamelquefiyiñ taiñ pu peñi ca taiñ pu lamngen. Huelu femngechi nentuafuiñ nehuen taiñ doi piuqueyehual taiñ pu peñi ca taiñ pu lamngen. ¿Chumngechi femafuiñ? Inayentuafiyiñ ta Jehová fei pengelelafiyiñ piuqueyen taiñ pu peñi ca taiñ pu lamngen (Efes. 5:1, 2, TNM; 1 Juan 4:19). Peafiyiñ chem quimeltuaiñmu Jehová tañi ejemplo.

11. Jesu, ¿chumngechi inayentubi Jewba tañi kutrantupiwkeyecheken?

¹¹Jehová rume cuñillquefi pu che (Luc. 1:78). Quiñe che cuñillchequelu pefiel mu quiñe che ñi cutrancahun mu, hueñancüquei. Feimu pepicauquei chumngechi ñi quelluafiel ti che cutrancaucülelu. Mülepalu Mapu mu, Jesús inayentufi ta Jehová chumngechi ñi cuñillchequen (Juan 5:19). Biblia feipi: ‘Jesús pefilu tati pu che, cutranpiuqueyefi quisulelu engün am quiñe quechan ufisa reque nienolu quiñe camañ reque’ (Mat. 9:36). Jesús re cutranpiuqueyequelafui müten ta pu che, doi mai quelluquefui. Jesús tremoltufi tati cutrancülelu ca elufi nehuen  tati cansalelu ca fanetulelu tañi cüdau mu (Mat. 11:28-30; 14:14).

12. ¿Chumngechi pengelelabüiñ taiñ piwkeyenebel taiñ pu peñi ka lamngen?

¹² Raquiduamliyiñ chumngechi ñi rupaquen taiñ pu peñi ca pu lamngen, femngechi doi eluucüleaiñ taiñ quelluafiel taiñ pu peñi ca lamngen. Quiñe ejemplo: quiñe lamngen rume cutrancülele, huelu feipiquelai ñi cutrancülen. Huelu doi ayüupelayafui quellufiliyiñ. Cam rume cüdautuquei chi ñi eluafiel iyael tañi familia. Cümeafui taiñ deumalelafiel iyael ca liftulelafiel ñi ruca. Cangelu ejemplo: quiñe peñi niehuelai chi cüdau. Cümeafui taiñ quelluafiel pichin plata mu, pele cüdau hula. Cümeafui chi ñi quimnoal inei ñi quellueteu.

13, 14. Jewba elukeiñmu bill kümeke dungu, ¿chumngechi inayentobüiñ?

¹³Jehová eluucülei taiñ quelluaeteu taiñ pedinofiel mu rume (Mat. 5:45). Jehová eluñmaquefi ñi tripayal ta antü, taiñ pedinofiel mu rume. Ti eñum antü puuquei ti mañumquelu mu ca mañumquenolu mu rume. Eluqueiñmu taiñ duamnieel, Jehová femngechi pengelquei taiñ piuqueyenieteu. Rume piuqueyefiyiñ ta Jehová tañi piuqueyechequen mu ca tañi quelluchequen mu. Jehová reque ca femngechi iñchiñ eluucüleaiñ taiñ quelluafiel taiñ pu peñi ca lamngen, “quelluen” pinole rume.

¹⁴ Ñi inayentufiel mu ta Jehová, taiñ pu peñi ca lamngen quelluqueiñmu taiñ rupan mu huesaque dungu mu. 2013 tripantu mu rupai quiñe fütra cürüftucu mahun Filipinas mapu meu. Feimu fentrenque pu peñi ca pu lamngen ñamümi ñi ruca engün ca ñi niequefel. Huelu pu peñi ca pu lamngen huall Mapu mu mülelu, quellufemeyu engün. Fentrenque peñi ca lamngen quelluingün plata mu. Ca femngechi quiñeque eluhui ñi deumafemeltuafiel ruca engün, epe 750 ruca quiñe tripantu mu. Ca femngechi taiñ pu peñi ca pu lamngen ti COVID-19 mu, hueluquentu quelluhuingün. Feimu quellufemfiel mu taiñ pu peñi ca pu lamngen, pengeliyiñ taiñ piuqueyeniefiel.

15, 16. Lucas 6:36 tañi eipin, ¿chumabüiñ taiñ inayentobel Jewba?

 ¹⁵Jehová cutranpiuqueyechequei ca perdonaquefi che (papeltunge Lucas 6:36). Jehová fill antü perdonaqueiñmu (Sal. 103:10-14). Jesús ñi pu discipulo culpafe chengefuingün, huelu Jesús piuqueyeniefi ca perdonaquefui. Ca femngechi eluhui ñi hulal tañi mongen ta iñchiñ taiñ perdonayaeteu ta Jehová taiñ culpan mu (1 Juan 2:1, 2). Taiñ quimfiel mu Jehová ca Jesús tañi perdonachequen ca piuqueyechen mu, fei ayüqueiñ taiñ doi fülcontuafiel.

¹⁶ Taiñ perdonahun mu hueluconque, doi piuqueyeuqueiñ (Efes. 4:32). Huelu perdonayal caquelu cüdaungeafui, huelu nehuentuliyiñ femürpuafuiñ. Quiñe lamngen papeltufi Ti Huerquen fente falin-ngei ñi perdonangeal ta caquelu. Tüfa rume quellueyu. Feipi taiñ lamngen: “Tüfachi quimeltun ñi papeltufiel, quimeltueneu perdonafili ta caquelu, fei iñche ayüucülean. Ti troquiñ quimeltueneu, perdonafili quiñe che feipilan tañi huesa femnon. Ñi perdonafiel mu ti che, fei illcutuniehuelafiñ femngechi doi cüme duamcületun” pi taiñ lamngen. Taiñ perdonafiel mu taiñ pu peñi ca taiñ lamngen com piuque mu, femngechi pengelqueiñ taiñ piuqueyeniefiel engün ca inayentuquefiyiñ ta Jehová.

17. Mateo 5:16 tañi eipin, ¿chumngechi püramyeabüiñ ta Jewba?

¹⁷ Rume mañumcüleiñ taiñ nien ta pu peñi ca lamngen huall Mapu mu. Com poyeuqueingün hueluconque. Ayünieiñ fentren che tañi quiñeucüleal ta iñchiñ mu taiñ püramyeafiel ta Jehová. Feimu huesa dungu femquelayaiñ taiñ huesa raquiduamelnoafiel ta caquelu Jehová mu ca tañi troquiñche mu. Doi mai mülei taiñ femal cümeque dungu feimu caquelu pu che ayüaingün ñi quimafiel ta Jehová ca ñi serfiafiel (papeltunge Mateo 5:16).

18. Taiñ newentuleal amuldungun mu, ¿chem kelluabeiñmu?

¹⁸ Taiñ püramyequefiel mu ta Jehová, quiñeque che huesa feipiafeiñmu ca inantuafeiñmu. ¿Chem mülei taiñ femal llicaleliyiñ  ñi quimeltuafiel Biblia mu ta quiñe che? Maneluucüleaiñ Jehová ca Jesús taiñ quelluaeteu. Jesús feipicünufi tañi pu discipulo ñi llicalenoal engün chumngechi ñi dungual ca ñi chem pial engün. ¿Chumngelu? Jesús feipi: ‘Puule tamün dungual, Ngünechen ta eluaimünmeu chumngechi tamün dungual. Eimün no tati quisutu pepicayalu ñi dungual, huelu mai tamün Chau ñi nehuen quelluaimünmeu tamün chem pial’ (Mat. 10:19, 20).

19. Taiñ peñi Roberto, ¿chumi?

¹⁹ Peafiyiñ Roberto ñi rupan. Pichin antü tañi papeltuniefiel ta Biblia niefui pichin quimün müten. Amui quiñe corte mu ñi feipimeal chumngelu ñi quiñeunoal ejercito mu. Feimu nentui nehuen feipimeafiel ti juez ñi poyeniefiel mu tañi pu peñi fei ñi quiñeunoal ti ejercito mu. Feimu ti juez ramturumeyu: “¿Inei am tami pu peñi?”. Roberto afmatulehuei ti ramtun mu. Fei acordai ti texto diario feichi antü mu. Feichi texto Mateo 12:50 feipilu: “Inei rume ayülelu ñi cüdauyeal iñche ñi huenu mapu mülechi Chau ñi ayüqueelchi dungu, fei ta iñche ñi ñuque reque felei, ñi lamngen ca ñi pu peñi ca müten”. Roberto pichin antü mu rume ñi papeltuniefiel ta Biblia, huelu Jehová quellueyu reque chem ñi feipial com ramtun ñi feipieteu ti juez. Roberto ayühulüñmafi ñi piuque ta Jehová. Ca femngechi iñchiñ rüf maneluuliyiñ ta Jehová mu taiñ amuldungual huesaque dungu mu rume mülellele, Jehová rume ayüucüleai.

20. ¿Chem bemkonküleaiñ? (Juan 17:11, 15).

²⁰ Rume ayüucüleiñ taiñ coneltuleal quiñe poyehun-ngechi familia mu. Nieiñ doi cüme Chau, Jehová pingelu. Ca nieiñ fentrenque peñi ca fentrenque lamngen com piuqueyenieiñmu. Mülei taiñ rumel mañumcüleal femngechi dungu mu. Huecüfü ca tañi pu che ayüniei taiñ raquiduamelaeteu ta Jehová piuqueyequelaeiñmu. Ca femngechi femquei taiñ püntühual taiñ pu peñi ca taiñ pu lamngen. Huelu Jesús ngillatufi tañi Chau taiñ quelluaeteu taiñ quiñeucüleal (papeltunge Juan 17:11, 15). Jehová femquei Jesús tañi ngillatueteu. Jesús reque, rüf maneluucüleaiñ Jehová tañi piuqueyenieteu ca taiñ quelluaeteu. Doi eluucüleaiñ taiñ fülmanieafiel taiñ pu peñi ca taiñ pu lamngen.