Mongepan Acul, püchü waria mu alükamapulelu mawida mu, Guatemala mapu mu. Iñche ta ixilchengen, küpalu pu mayache mu. Beimu kimni ixil kewün dungun ka español. Guatemalache weichawingün 36 tripantu mu, beichi antü iñche tremün. Bentren kutrankawün upai ka alün ixilche lai.

Püchü kampu iñche, meli tripantu nielu müten, ka ñi peñi 7 tripantu nielu awkatui kiñe granada mu. Leb trukui, beimu tañi peñi lai ka iñche trawma ngepon. Beimu yengen internado pu trawma ngelu mu Ciudad de Guatemala waria mu, chew kimelelenu braille. Pu küdawkelu internado mu, katrütuenu ngütramkaabel kakelu püchükeche mu ka ñi pu kompañ bülkonlaenu, beimu kidulen. Kimlan chemu pu che alütripalelu iñche mu, müna ayüken tripaal internado mu tañi upaal epu küyen vacaciones tañi ñuke iñchiw, kidu müna chemchingi. Welu mari tripantu nielu iñche, tañi ñuke lai. Kiñe che müten piwkeyenu, welu ñambiñ, beimu kutrantupiwkengen.

11 tripantu nielu iñche, wiñotun tañi waria mu ñi müleam ñi unen peñi ñi pu che engün. Kidu engün eluenu ruka, yaguel ka takun, welu iñche weñangküleken. Kiñeke mu, lladkün wirarbiñ Chaw Dio: “¿Chemu tañi ñuke lai? ¿Chemu trawmangen iñche?” Pu che wiñoldunguenu: “Kom tami kutrankawün Chaw Dio tami eluetu”, pikingün. Beimu “Chaw Dio kümelai ka kuñilchekelai”, rakiduamün. Iñche piwelan tañi mongeleal, ayün abduamkülekebün tañi mongen.

Pepi pekelan, beimu bentren che abkutranmakenu. Püchü kampu nielu iñche, bill upa nüntukangen. Welu chem no ume eipilan. Iñi no ume allkütuabenu, trukukebün. Pu che, che reke trukukelaenu, beimu müna weñangkülen. Maneluw-welan kiñe che no ume ka ayükelan pu che tañi bülkületu.

13 tripantu nielu iñche kimeltuwe mu, kiñe kimeltuchebe kutranpiwkeyenu. Beimu eipibi kiñe kurewen pu dungukelu iñi ngen Jewba ngelu tañi ngütramkaetu. Kidu engu kimelelenu Biblia mu, pu trawmangelu peai ka pu lalelu wiñomongetuai engün (Isaías 35:5; Juan 5:28, 29). Ayübiñ allkütubel, welu yewechekebün beimu ñükübkülebün müten. Tati kurewen tüngduami ka chemchingi, beimu abeluwkelai. Kimelelenu Biblia ñi dungu kiñe upa ka kiñe upa. Beichi kurewen miyawi 10 kilometro mawida mu ñi powal iñche tañi ruka mu.

“Kuñübalngingu, welu kümelkalingu ka libkülingu”, pi tañi peñi. Kidu engu wülkenu püchüke chemkün, beimu “piwkeyenu” rakiduamkebün. Pu rübngechi cristiano müten küme piwkengi, mupitukebün.

Papiltukebün braille mu billke papil ka libru tripalu Biblia mu. Ayükebün tañi papiltukebel, welu mupitukelan kiñeke dungu. Bücha Chaw inaduamkenu, mupitukelan. Ka kakelu che ka bemngechi inaduamkenu, ka mupitukelan. Kimnebün chemu Bücha Chaw bemkünoki weyake dungu, welu piwkeyechi Chaw reke beli, mupitukelabün. *

Doi papiltulu iñche Biblia, ñochikechi mupitukepon. Kimpon kutrankawküleliiñ iñchiñ ka bemngechi taiñ Bücha Chaw kutrankawki. Biblia mu kidu eipi: “Pekebiñ ti kutrankan upalelu tañi pu che […]. Küme kimnen tañi kutrankawün” (Éxodo 3:7). Bemngechi kimpon Jewba chemchingi ka küme chaw reke beli, beimu ayükebün wenupürambel. 1998 tripantu mu, bautisangen ka kiñe dungukelu iñi ngen Jewba ngepon.

Kiñe tripantu upalu ula, amun kimeltuwe pu che trawmangelu Escuintla waria mu mülelu. Welu trawükebün Acul pu che waria mu, beimu trekakebün 10 kilometro peno mawida mu, ti kurewen kimelkelu Biblia reke. Kiñe longkolelu Escuintla trawünche mu kintui chew tañi müleabel. Kiñe familia llowenu kidu engün tañi ruka mu ka amukiiñ bill trawün mu. Bamülke mu petu mülen kidu engün ñi ruka mu ka inaduamkenu, kiñe familia ngepoiñ.

Bentren pu peñi ka lamngen inaduamkenu piwkeyen mu. Beimu pu dungukelu iñi ngen Jewba ti rübngechi cristiano ngelu am piken (Juan 13:34, 35).

“Ngünam mongelen”, piwelan. Bewla maneluwün nieken. Iñche upalen bill antü kimelelabel pu che Biblia tañi rüb dungu, bemngechi “iñche trawmangen” rakiduamwelan. Iñche ta longkolelu ka wewpibe tañi trawünche mu. Kabei wülken wewpin tripalu Biblia mu bütrake trawün mu chew trawüluwi bentren warangka che, beimu müna mañumkülen.

2010 tripantu mu, amun El Salvador mapu mu ñi konal Kimeltuwe Ruka pu Wentru Amuldungumekelu mu (bewla Kimeltuwe Ruka pu Amuldungukelu ngelu pingi). Beimu kimelelenu tañi doi kelluabel (ingkaabel) pu peñi ka lamngen ñi trawünche mu ka küme duamelkenu, beimu Jewba che reke trokikenu. Bewla yewengekelan, Jewba doyümchekelai, beimu iñi ume kimelelkebi.

Jesus eipi: “Ayüwki tati llowkelu welu doi ayüwngi tati wülkelu” (Hechos 20:35). Kuibi mu, bentren weñangkün dungu upakebün, welu bachantü müna ayüwkülen ka iñche pepi kellukebiñ ta kakelu che.