Cüme ngüneduamliyiñ Biblia, quimürpuaiñ Miguel cam “san Miguel”, ñi ca pingequen ta Jesús petu ñi mülepanon Mapu mu ca huiño püratulu ta huenu.⁠ a Biblia feipi feichi lalu ta Moisés, Miguel chaftudungufi tati Huecüfü. Ca rupa Miguel quellufi quiñe cüme püllü ñi feipiafiel ta Daniel Chau Dios tañi feipin (Daniel 10:13, 21; Judas 9). ¿Chem pin Miguel tañi üi? Tüfa feipi: “¿Inei am trürümngeafui ta Chau Dios?”. Miguel incafi Chau Dios tañi ngünenieal ca hueichamequefi tañi pu caiñe. Feimu felei tañi femngechi feipingeal (Daniel 12:1; Apocalipsis 12:7).

 ¿Chumngelu feipiafuiñ Jesús fei tati loncolechi cüme püllü Miguel pingelu? Ngüneduamafiyiñ.

•   Miguel, “ti loncolechi cüme püllü” adniefi com ti cümeque püllü (Judas 9, TNM). Biblia mu epu rupa müten huirintuculei: “Ti loncolechi cüme püllü”. Tüfa feipilei ñi mülen quiñe loncolechi püllü müten. Quiñe versiculo feipilu Jesús deu huiñomongetulu nagpayai, “fei tañi loncolechi cüme püllüngen, rume nehuentu dunguai” (1 Tesalonicenses 4:16, TNM) Tüfachi versiculo feipi Jesús “tañi loncolechi cüme püllüngen, rume nehuentu dunguai”. Feimu quimnieiñ Jesús fei tati loncolechi cüme püllü, Miguel pingei.

•  ‘Miguel ca tañi pu cümeque püllü hueichafi engün tati fütra filu’, Huecüfü ca pingelu (Apocalipsis 12:7). Miguel niei fütra autoridad huenu mu feimu Biblia feipi ñi falin principengen ca ñi ‘fütra principengen’ ta Miguel (Daniel 10:13, 21; 12:1). Tüfachi epu dungu pengelquei Miguel “loncolei quiñe fütra ejercito huenu mu”, femngechi feipi David Aune. Tüfa quiñe huentru cüme adümfilu ti Nuevo Testamento.

   Biblia ca feipi Jesús ñi ngüneniefiel pu cümeque püllü. Feipi ‘Jesús peufaluule quisu ñi fütra nehuen-ngechi pu cümeque püllü engün, cüpalelu huenu mapu rangi üicülechi cütral meu reque’. Biblia feipilai cangelu huentru ñi femngechi autoridadcülen (2 Tesalonicenses 1:7, 8; Mateo 16:27). Cafei Biblia feipi Jesús püratui ta huenu, fei elungei ñi ngünenieafiel tati pu cümeque püllü ca tati nielu autoridad ca pepiluhun (1 Pedro 3:21, 22). Chau Dios loncocünufule epu püllü ñi ngünenieafiel ta caquelu cümeque püllü, cümelayafui. Feimu quimfali tüfachi epu üi, Jesús ca Miguel, quiñe püllü müten epu no.

•   Acule ti “fütra cutrancahun”, Miguel “huitrapürayai” (Daniel 12:1). Fentren rupa ti lifru Daniel feipi “huitrapürayai” ca “huitracünuhuai”, femngechi ñi adentuafiel quiñeque lonco ülmen ñi femal falinque dungu (Daniel 11:2-4, 21). Jesucristo ca pingequei: “Ngünechen tañi dunguel” ca ‘Lonco ülmencülei com lonco ülmen meu’. Feimu apümcayafi Chau Dios tañi pu caiñe ca incayafi Chau Dios tañi pu che (Apocalipsis 19:11-16). ¿Chumül femai tüfa? Acule ti “rume fütra cutrancahun. Chumcaunorume mülequelai femngechi cutrancahun ca turpu mülehuelayai rume” (Mateo 24:21, 42).