Biblia feipi chem taiñ femal ñi adümafiel tañi huercün dungu. Taiñ feipieteu Ngünechen Biblia mu, com che quimafui, fei “nehue cüdaungelai” inei no rume mu (Deuteronomio 30:11).

Chem duamfali

1.   Cüme raquiduamnieal. Mülei taiñ quimtucual Biblia ñi cüpan Chau Ngünechen mu. Cafei mülei taiñ ñom piuquengeal, Ngünechen am duamquelafi pu mallmangelu (1 Tesalonicenses 2:13; Santiago 4:6). Ca femngechi, ngelai taiñ pürüm feyentual taiñ papeltuel cam feipingeel mu, huelu mai Chau Ngünechen ayüniei iñchiñ taiñ cüme adnieafiel chem taiñ raquiduamquen (Romanos 12:1, 2).

2.   Ngillatual taiñ nieal quimün. Biblia feipi Proverbios 3:5: “Eimi tami raquiduam mu recüluuquinolnge”. Falin-ngei taiñ ‘ngillatuafiel’ taiñ Huenu Chau ñi eluaeteu quimün ñi cüme quimafiel ti Biblia (Santiago 1:5).

3.   Rumel chillcatuleal. Rumel chillcatufiliyiñ Biblia doi cümelcayaiñmu, huelu chillcatufiliyiñ quiñeque mu müten nehue quimürpulayaiñ llemai (Josué 1:8).

4.   Inaduamal quiñeque troquiñque dungu Biblia mu. Inaduamliyiñ quiñeque troquiñque dungu Biblia mu doi cüme adümafiyiñ tañi quimeltuqueel. Hue chillcatufiliyiñ Biblia cümeafui hune ngüneduamal ti quimeltun doi cüdaungenolu, fei hula adümürpuafuiñ ti doi cüdaungechi quimeltun (Hebreos 6:1, 2). Cafei ngüneduamfiliyiñ fillque versiculo, quimtucuaiñ chumngechi tati Biblia quisutu quimfaluuquei ca “quiñeque dungu cüdaungelu ñi loncontucungeael” cütu (2 Pedro 3:16).

5.   Eluhual taiñ quellungeal. Biblia yafültucueiñmu ñi eluhual taiñ quelluaeteu tati doi adümuulu Biblia ñi quimeltun mu (Hechos 8:30, 31). Pu Dunguquelu Inei Ngen Jehová cofrangenon mu quimeltuqueingün Biblia mu. Pu cuifique cristiano reque, famülque mu inaduamqueingün fillque versiculo ñi quimeltulelafiel pu che Biblia ñi rüf quimeltuqueel (Hechos 17:2, 3).

Chem duamfalngelai

1.   Fütra pepiluhun nieal cam adümuucüleal quimün mu. Jesús ñi mari epu apostol quimtucuingün ti Biblia ca quimeltulelfingün ti pu che, quiñeque che feipieteu rume “ñi nehue fütra quim papeltunon” (Hechos 4:13).

2.   Nieal plata. Taiñ quimal chem ñi quimeltuqueel ti Biblia duamfalngelai plata taiñ cullial. Jesús feipifi tañi pu inaniequeteu: “Eimün ta re elungeimün [...] ca femngechi re hulafimün ta eimün” (Mateo 10:8).