No, femngelayai. Taiñ Mapu turpu apümngelayai, lüpümngelayai ca rumel mülecayai. Feimu Biblia feipi Chau Dios deumafi ti Mapu rumel ñi müleam tati pu che.

•   “Tati pu norngechi che llohuai ti Mapu ñi ngen-ngeal engün, ca rumel müleaingün fei mu” (Salmo 37:29).

•   Chau Dios “tucucünufi chi Mapu cheu ñi nehuentuucülemum, turpu nengümngelayai tañi mülequemum” (Salmo 104:5).

•   ‘Tati Mapu rumel müleai’ (Eclesiastés 1:4).

•   “Feiti huidüfilu ca cüme elcünufilu ti Mapu, ca ngünam deumanofilu, doi mai deumafi ñi müleam tati pu che” (Isaías 45:18).

 Ti Mapu turpu aflayai. Chumcaunorume quiñe hueichan mu ca podümngele rume, Chau Dios catrütuafi ti pu che ñi apümnoafiel. Chau Dios ‘apümcayafi tati pu üñfituquefilu ta Mapu’ (Apocalipsis 11:18). ¿Chumngechi femai tüfa?

 Chau Dios apümafi pu che tañi gobierno üñfituquefilu ta Mapu. Fei adcünuai quiñe gobierno huenu mu (Daniel 2:44; Mateo 6:9, 10, TNM). Chau Dios tañi fotüm, Jesucristo, lonco ülmencüleai feichi gobierno mu (Isaías 9:6, 7). Jesús mülepalu Mapu mu ngüneniefi ti cürüf, ti lafquen ca com dungu ñi mülen Mapu mu (Marcos 4:35-41). Chau Dios loncocünufi ta Jesús ñi ngünenieal, fei Jesús itrocom dungu ngünenieafi Mapu meu lonco ülmencülele. Fei cüme elcünutuafi ti Mapu, femngechi ñi feletual ti jardin de Edén reque (Mateo 19:28; Lucas 23:43, TNM).

 No, femlai. ¿Chumngelu quiñeque che raquiduamquei ti mapu ñi apümngeal cütral mu? Cüme adümlafingün ñi feipin epungechi Pedro capitulo 3, versiculo 7. Feipilu: ‘Tati huenu ca nag Mapu mülelu ta feula, elniengei tañi apümngeal cütral meu’. Inaduamaiñ epu dungu taiñ cüme adümafiel ñi feipin tüfachi quimeltun:

1.   Quiñeque mu, feipin mu “huenu”, “mapu” ca “cütral” Biblia mu adentulei caquelu dungu. Por ejemplo, Salmo 97, versiculo 1 feipi: “¡Jehová lonco ülmencülerpui! Ayüupe ta mapu. Ayüupe ta huapi”. Tüfachi versiculo mu ti mapu adentulei tati pu che.

2.   Fillque texto quiñeucülelu epungechi Pedro capitulo 3, versiculo 7 quelluaiñmu taiñ quimal chem adentulei tüfa mu ti huenu, ti mapu, ca tati cütral. Ti versiculo 5 ca 6 feichi capitulo mu nütramcai chem ñi rupan Noé tañi antü meu. Feichi antü mu pu che apümngei, huelu taiñ Mapu felecai müten. Feipiafuiñ ti fütra mangiñ co apümfi ti mapu adentulelu com feiti pu che poyequenofilu ta Chau Dios (Génesis 6:11). Ca femngechi apümfi ti huenu, tüfa adentulei pu che ngüneniequefulu feichi antü meu. Taiñ Mapu ca huenu apümngelai, doi mai apümngei ti huesaque che. Noé tañi familia engün montuingün, fei nierpuingün fotüm, ñahue, ñi apolafiel ta Mapu (Génesis 8:15-18).

 Ti fütra mangiñ co apümlafi taiñ Mapu, doi mai apümfi pu huesaque che. Ca femngechi ti cütral apümafi pu huesaque che cüpalechi antü mu, huelu taiñ Mapu felecayai müten (2 Pedro 3:7). Ca femngechi Chau Dios feipicünueiñmu ñi müleal quiñe “hue deumatuelchi huenu” ca quiñe “hue mapu”, feimu “com cümeque nor dungu mületuai” (2 Pedro 3:13). Feiti “hue mapu” adentulei re cümeque che ñi müleal ca feiti ‘hue huenu’ adentulei quiñe hue gobierno, tüfa Chau Dios ñi ngünenietual ti mapu. Tüfachi gobierno quiñe paraiso reque cünutuafi ti Mapu (Apocalipsis 21:1-4).