Tati pu trem fotüm ca tati trem ñahue mülei ñi dapiafiel tañi pu fütaqueche. Biblia feipilei tati pu fotüm ca tati pu ñahue ‘felei ñi raquiduamal tañi quelluafiel quisu ñi familia meu, femngechi ñi huiño mañumtual piuqueyen meu quisu engün ñi fütaqueche, tüfa femngechi am cümelu ca tutengequei ta Ngünechen’ (1 Timoteo 5:4). Femngechi pu fotüm ca ñahue dapifile tañi pu füchaqueche, yamquefi engu chumngechi ñi feipin ta Biblia (Efesios 6:2, 3).

 Biblia feipilaeiñmu chumngechi taiñ dapiafiel pu fütaqueche, huelu pengeli ñi femün quiñeque che cuifi. Biblia ca niei cümeque ngülam chumngechi taiñ dapiafiel pu fütaqueche.

•  Quiñeque che tripalu Biblia mu, ¿chumngechi dapifingün tañi pu fütaqueche?

•  ¿Chem ngülamtuquei ta Biblia?

•  ¿Feipi ta Biblia tañi ruca mu müten ñi cuidayafiel taiñ chau?

 Fei engün chumngechi ñi rupalen engün quellufi tañi pu fütaqueche.

•   José camapulefui tañi füchalechi chau mu. Peutulu engu, pürüm yemefi tañi chau cheu tañi mülen. Elufi ruca ca com tañi duamnieel (Génesis 45:9-11; 47:11, 12).

•   Rut huiñamtuhui cheu ñi mülen tañi nanüng. Rume cüdahui ñi dapiafiel (Rut 1:16; 2:2, 17, 18, 23).

•   Petu ñi lanon Jesús, feipifi quiñe tañi hueni ñi dapiafiel tañi ñuque, deu lantulefui chi (Juan 19:26, 27).⁠ a

 Rume cüdaungei ñi dapiafiel tati pu fütaqueche. Biblia tañi ngülam rume quelluafeiñmu.

•   Yamnieafiyiñ taiñ puque chau.

   Biblia feipi: “Yamniefinge tami chau ca tami ñuque” (Éxodo 20:12).

   ¿Chumngechi inayafuiñ tüfachi ngülam? Tami pu chau quisu pepiule ñi dapihual, femcape. Fei eluafimi ñi dullial chumngechi tañi dapingeal. Quelluafimi chem dungu meu rume, huelu yamquechi femaimi.

•   Piuqueyeafimi ca perdonayafimi.

   Biblia feipi: “Quiñe che quim ngüneduamlu ngünenieuquei tañi illcufemnoal, ca rume cümelcaquei rulpacünufilu am ñi huesalcangeel” (Proverbios 19:11).

   ¿Chumngechi inayafuiñ tüfachi ngülam? Taiñ pu chau huesa dunguafeiñmu ca falintulayafui taiñ cüdau. Femngechi rupale, ramtuhuaimi: “Iñche tañi chau reque feleli, ¿chum duamcüleafun? ¿Ngañhuadcülelayafun am?”. Cutranpiuqueyefiliyiñ taiñ pu chau ca perdonafiliyiñ, fei tüngduamcüleaiñ.

•   Cüme ngüneduamaimi.

   Biblia feipi: “Quiñe che ramtuquenolu, huesa tripaquei ñi pepicacünuel, huelu cüme tripaquei mülen mu fentren ngülamtufe” (Proverbios 15:22).

   ¿Chumngechi inayafuiñ tüfachi ngülam? Cüme quintuaimi chumngechi dapiafiel tami pu chau. Quimaimi chem quellun nieafui tami puque chau tami mapu mu. Dunguaimi ca che engu ñi dapimequefiel tañi puque chau. Nielmi pu lamngen, peñi, nütramcayaimün chumngechi dapiafiel tamün pu chau.

•   Rume cüdaulayaimi, müchai cansayafuimi.

   Biblia feipi: “Tati pu ñom chengelu niequeingün quimün” (Proverbios 11:2).

   ¿Chumngechi inayafuiñ tüfachi ngülam? Quimnieiñ com cüdau femliyiñ, cansayafuiñ. Com iñchiñ ta cansaqueiñ, ca nielaiñ tiempo taiñ femal com taiñ ayüquefel. Rume cansalmi tami dapiquefiel tami pu chau, quintuaimi quellun, tami familia cam quiñe enfermera chi.

•   Cuidahuaimi.

   Biblia feipi: ‘Inei no rume am üdequenolu quisu ñi cuerpo, huelu mai ta ilelquefi ca poyequefi’ (Efesios 5:29).

   ¿Chumngechi inayafuiñ tüfachi ngülam? Fotüm ca ñahue ngeliyiñ, mülei taiñ cuidayafiel taiñ pu chau, huelu ca mülei taiñ cuidahual quisuque iñchiñ. Curengeliyiñ ca fütangeliyiñ, mülei ca taiñ cuidayafiel taiñ familia. Feimu mülei taiñ iyal cümeque iyael, mülei taiñ cüme umautual ca cüme cansatual (Eclesiastés 4:6). Femngechi femliyiñ, doi cüdaungelayai ñi cuidayafiel taiñ pu chau.

 Biblia ta feipilai cheu tañi cuidangeal taiñ pu chau. Quiñeque familia yequelafi tañi pu chau ñi ruca mu, fei engu ñi ruca mu müten cuidamequefi. Rupachi tiempo mu, quiñeque familia raquiduamqueingün ñi doi cümeleal tañi pu chau quiñe hogar de ancianos mu, feimu elmequefingün. Cümeafui pu familia ñi trür nütramcayal chem doi cümei tañi femal, fei tañi com ayüucüleal engün (Gálatas 6:4, 5).