Diccionario
Quimfalcünungei Biblia mu tripachi dungu
A B C CH D E F G H I J L LL M N NG Ñ O P Q R S T TR U Ü Y Z
A
Acaya.
Chumngechi feipilei Mateo puulu ta Apocalipsis, tüfa quiñe troquiñ mapu Grecia mu mülelu sur püle, cheu ñi ngünenieel pu Roma che. Corinto fei tañi doi falin huaria. Acaya mu coneltulefui com ti Peloponeso ca tati mapu rangiñ Grecia mu mülelu (Hch 18:12).
adentun; poyeafiel coilaque dios ñi adentun.
Tüfa ta quiñe chemcün rüf mülelu cam mülelu pu che tañi raquiduam mu. Pu che pünequefi adentun cam imagen ñi poyeam. Pu poyequefilu coilaque dios ñi adentun piuqueyequefingün, feyentuquefingün ca püramyequefingün ta quiñe adentun (Sl 115:4; Hch 17:16; 1Co 10:14).
afaelchi antü.
Biblia feipicünulu ñi chem rupayal feipi “afaelchi antü” ca caquelu femngechi dungu ñi pengelal quiñeque medin antü cheu fentepuhuai falinque dungu (Eze 38:16; Da 10:14; Hch 2:17). Femtripayafui rupalu pichin tripantu cam alün tripantu. Biblia mu tüfachi dungu fentren rupa pengeli ñi epe puucülen tañi afal mapu müleyechi dungu petu ñi ngüneniemequen Jesús huenu mu (2Ti 3:1; Snt 5:3; 2Pe 3:3).
afmatun dungu.
ajenjo.
Fillque anümca rume fürengelu, mucürngelu ca rume nümün-ngelu. Quiñeque niei pichique mamüll ca venenongeafui.
alabastro.
Pichique fotilla perfume cura mu deumangelu. Feichi cura Alabastrón lof mu mülerquefui, Egipto mapu mu. Tüfachi perfume rume fali, feimu ti fotilla doi pichi rupai huechuñ püle, fei tacungequefui ñi hutrunoal ti perfume. Rupalu ta antü, ti cura ca ti fotilla nierpui quiñe üi müten, alabastro (Mr 14:3, nota).
alfa ca omega.
Alfa fei tati hunen letra pu Grecia che ñi abecedario mu. Omega, tati inan-ngechi letra. Cüla rupa tripai Apocalipsis mu, femngechi pingequei ta Chau Dios. Tüfa mu “tati Alfa ca tati Omega” cüpa feipi “tati hunelelu ca tati inalelu”, “tati ellaca mu mülelu ca tati af mu mülelu” (Ap 1:8; 21:6; 22:13).
altar.
Tüfachi chemcün püramcünungei. Ñi deumangeal ngülümngequefui trufür mapu, rentrücünungequefui cura, pünengequefui quiñe troquiñ cura cam mamüll impolcülelu pañillhue meu. Fei huente mu hulngequefui chalintucun cam incienso ñi poyeafiel ta Chau Dios. Ti hunen pieza mülelu ti ngillatuhue tolto ruca ca Chau Ngünechen ñi ruca mu mülefui quiñe pichi “oro altar”, fei ñi lüpümngeal incienso. Tüfa deumangei mamüll mu impolcülelu oro meu. Lepün mu mülefui quiñe “cobre altar”, doi alüi tañi hulngeal lüpümngeelchi chalintucun (Éx 27:1; 39:38, 39; Gé 8:20; 1Re 6:20; 2Cr 4:1; Lu 1:11). Ngüneduamnge apéndice B5 ca B8.
Antü ñi Huiñoduamtungeal pu Israel che ñi Culpan.
Pu Israel che rume falintuquefi tüfachi yamfal antü. Ca feipingei Yom Kipur, hebreo quehun mu yohm hakkippurím pilei, tüfa cüpa feipi ‘antü ñi tacual’. Femngequefui 10 antü conchi etanim cüyen mu. Feichi antü müten ti hunen lonco sacerdote conpuquefui ti Doi Yamfal Mülehue ti tolto ruca mu cam Chau Ngünechen ñi ruca. Üyeu hulquefui pu culliñ ñi mollfüñ, fei ñi rulpacünungeal quisu tañi culpan, yafcan. Cafei ñi rulpacünungeal ñi culpan tati pu Leví che ca com pu che. Feichi chalintucun adentulei ñi femün Jesús, quiñe rupa müten huli ñi mongen, fei liftuñmafi pu che ñi culpan rumel meu. Femngechi elungei com pu che ñi cümelcautual Chau Jehová engu. Feichi antü pu che niequefui quiñe saquin trahun ca ngüñüluuquefui engün. Ürcütun antüngefui, feimu cüdauquelafuingün (Le 23:27, 28; Col 1:20; Heb 9:12).
antü ñi ramtucadungungeal pu che.
Antü cam quiñeque medin antü Chau Dios ñi ramtucadunguafiel quiñeque troquiñche cam com pu che. Tüfa mu apümcangeafui pu condenangelu ñi layal. Huelu ramtucadungungele caquelu che, elungeafui ñi montual ca llohual afnoachi mongen. Jesucristo ca tañi pu apostol feipingün ñi müleal quiñe “antü ñi ramtucadungungeal pu che” mongelelu ca tati deu lalu (Mt 12:36).
anümca hulquelu mongen.
apostol.
arameo.
Tüfachi quehun trürcülei hebreo quehun mu, niei quiñe abecedario müten. Ellaca mu pu arameo che müten dunguquefui tüfachi quehun. Huelu rupalu ta antü, pu Asiria che ca pu Babilonia che dunguquefui tüfachi quehun tañi negociayal ca tañi nütramcayal. Cafei pu ngünenielu Persia mapu mu pünequefuingün tüfachi quehun (Esd 4:7). Quiñeque troquiñ ti lifru Esdras, Jeremías ca Daniel huirintucungei arameo quehun mu. Mateo puulu ta Apocalipsis mülei quiñeque dungun arameo quehun mu (Esd 4:8-6:18; 7:12-26; Jer 10:11; Da 2:4b-7:28; Mr 14:36; Hch 9:36).
arcangel.
Areópago.
Huincul Atenas huaria mülelu, picun püle Acrópolis huincul mu. Cafei Areópago pingequefui ti troquiñche trahuquefulu üyeu. Quiñe rupa quiñeque quim huentru inaquefilu Epicuro ca Zenón ñi quimeltun yefingün ta Pablo Areópago mu ñi nütramcayal tañi feyentun (Hch 17:19).
Armagedón.
Hebreo quehun Har Meghiddóhn pingequei. Cüpa feipi “Meguidó huincul”. Armagedón nüucülei Chau Ngünechen ñi fütra hueichan mu, ñi fütra quehuan. “Feichi hueichan rupayai Chau Ngünechen ñi fütra antü meu, tati Com Nehuen Nielu”. “Com mapu müleyechi pu lonco ülmen” hueichayafingün ta Chau Jehová (Ap 16:14, 16; 19:11-21). Ngüneduamnge FÜTRA CUTRANCAHUN.
armazon.
Quiñe ventana ñi marco reque felefui. Chumngechi ñi deumangen feitichi armazon, tati pu sacerdote pepi adquintuquefingün tati querubin ñimicalelu tati lino pañu mu (Éx 26:15-18). Ngüneduamnge apéndice B5.
asélgueia.
Ngüneduamnge YEHUEQUENOCHI HUESA FEMÜN.
Asia.
Mateo puulu ta Apocalipsis lifru mu, femngechi üitungequei quiñe troquiñ mapu ñi ngünenieel Roma. Asia mu coneltulefui quiñe troquiñ Turquía mapu mu ca quiñeque huapi, tüfa ta Samos, Patmos ca caquelu. Éfeso fei tañi doi falin huaria (Hch 20:16; Ap 1:4).
ayüfalchi mapu.
Adngechi rayen mapu. Tati hunen ayüfalchi mapu Chau Dios elufi tati hunen curehuen Edén mapu mu. Epe lalu Jesús orcon mamüll meu, cüpa quimelelfi quiñe hueñefe com ti mapu quiñe ayüfalchi mapungetuai. Ti texto 2 Corintios 12:4 cüpa feipi quiñe ayüfalchi mapu ñi müleal. Cafei Apocalipsis 2:7 nütramcai ñi mülen quiñe ayüfalchi mapu reque huenu mu (Can 4:13; Lu 23:43).
Azazel.
B
Baal.
Pu Canaán che ñi dios. Ngen callfü huenu troquingequefui. Fei ñi duam mu mülei mahun, cümeque cosecha ca doi coñiquei culliñ piquefui che. Baal ca pingequefui quiñeque dios müte falin-ngenolu. Hebreo quehun mu tüfachi üi feipi “ngen-ngelu” cam “ñidol” (1Re 18:21; Ro 11:4).
balsamo.
Cüme nümün-ngechi aceite deumangelu quiñeque anümca mu. Pünengequefui perfume reque cam ñi lahuentungeal ta che. Rume falin-ngefui.
Belcebú.
C
caiñetuquefilu ta Chau Dios; apostata.
Biblia femngechi üituquefi tati pu amutulu, püntütripalu cam elcünulu ñi poyefiel ta Chau Dios. Quiñepülecünuquefingün ti rüf religion, cafei caiñetuquefingün (Pr 11:9; Hch 21:21; 2Te 2:3).
caiñetuquefilu ta Cristo; anticristo.
Griego quehun mu cüpa feipi epu dungu: tati chaftuquefilu ta Cristo cam feiti Cristo femfaluuquelu. Femngechi feipingequei com pu che cam troquiñche chaftuquefilu ta Cristo ca tañi pu inanieteu. Cafei coneltulei pu che Cristo ñi üi mu cüpan pimequelu cam Mesías femfaluuquelu (1Jn 2:22).
calcu dungu; fülmahual pu huesaque püllü mu.
Quiñeque che feyentuquei lale quiñe che, tañi püllü amulei ñi mongelen ca nütramcaquefi pu mongelelu. Quiñe calcu che rangiñelhueleafui taiñ nütramcayafiel tüfachi pu püllü piqueingün. Griego quehun mu feipingequei farmakía, tüfa cüpa feipi ‘drogatual’. Cuifi pu che drogatuquefui ñi fülmahual pu huesaque püllü engün, fei ñi femal calcu dungu. Feimu tüfachi palabra farmakía nüucülei calcu dungu meu (Gál 5:20; Ap 21:8).
caldeo.
Tüfachi pu che mülerquefui delta troquiñ mapu mu, cheu ñi mülen Tigris ca Éufrates leufü. Ur pingefui tañi doi falin huaria, tüfa mu tuhui ta Abrahán (Hch 7:4).
candelabro.
Quiñe chemcün cheu rentrücünungequei pelontuhue nielu aceite. Biblia feipilei ñi mülequefel candelabro fillque ruca mu, huelu doi nütramcaquei ñi pünengequeel candelabro ñi püramyengeal Chau Jehová.
carreta.
casia.
Entungequei tati trolüf ti anümca mu casia pingelu. Canela de la China ca pingei ti anümca (Cinnamomum cassia). Feitichi anümca nüucülei tati canela anümca mu. Perfume reque pünengequefui ti casia ca tuculelngequefui tati falin aceite mu.
cepo.
Tüfachi chemcün mu traringequefui che ñi castigangeal. Quiñeque mu traringequefui ti che ñi namun müten, huelu caquelu rupa traringequefui chi tañi namun, cuhu ca tañi pel, femngechi ñi cutrancangeal com tañi cuerpo (Jer 20:2; Hch 16:24).
César.
Roma meu tuhui tüfachi üi. Femngechi üitungequefui Roma ñi pu lonco ülmen. Biblia mu nütramcangequei quiñeque, tüfa ta Augusto, Tiberio ca Claudio. Ti lonco ülmen Nerón tripalai tañi üi Biblia mu, huelu ca üitungequei César. Mateo puulu ta Apocalipsis lifru mu, pu autoridadcülelu cam ti gobierno ca üitungequei César (Mr 12:14, nota; Hch 25:8, nota).
circuncision.
Ti huentru circuncidangelu catrüñmangequei ñi trahua impolngelu tañi lonco pünün. Abrahán ca tañi pu cüpanche mülefui ñi circuncidangeal, huelu famülque mu pu cristiano femngequelai. Quiñeque texto mu ti circuncision adentulei ca dungu (Gé 17:10; 1Co 7:19; Flp 3:3). Quiñeque mu circuncidangenolu feipingequefui pu ca cüpanche, fei ñi illamcayafiel.
codo.
concubina.
coro.
cortina.
cristiano.
Chau Dios femngechi üitufi pu inaniequefilu ta Jesucristo (Hch 11:26; 26:28, nota).
Cristo.
cüme püllü.
Hebreo quehun mu malʼákh pingei, griego quehun ágguelos. Tachi epu palabra ‘huerquen’ pilei, huelu “cüme püllü” rulpadungungei nütramcangelu pu püllü huerquen-ngelu (Gé 16:7; 32:3; Snt 2:25; Ap 22:8). Pu cümeque püllü rume nehuen-ngei. Chau Ngünechen ta deumaeyu engün petu ñi deumangenon pu che. “Fentren huaranca cümeque püllü” mülei pi tati Biblia. “Chau Ngünechen ñi pu fotüm” pingei engün ca “epe hun tripachi huangülen” (Dt 33:2; Job 1:6; 38:7; Jud 14). Deumangelai engün ñi nieal yall, Chau Ngünechen mai ta deumaeyu caque quiñeque engün. Doi pataca millon cümeque püllü mülei (Da 7:10). Biblia pengeli caque quisuque engün niei ñi üi ca tañi chumngen. Ñom piuquengeingün, feimu piquelai ñi püramyengeal. Epe com engün ayülai ñi quimngeal tañi üi (Gé 32:29; Lu 1:26; Ap 22:8, 9). Quiñeque engün loncolei. Cafei caquerumei ñi cüdau: Chau Jehová ñi ülmen huancu püle cüdauqueingün, quimelqueingün tañi huercün dungu, quelluquefingün Chau Jehová ñi pu che mapu meu, huechunentuqueingün ñi feipicünuel Chau Dios ca quelluntucuqueingün ti amuldungun cüdau (2Re 19:35; Sl 34:7; Mt 4:11; Lu 1:30, 31; Ap 5:11; 14:6). Cüpalechi antü mu compañafingün ta Jesús ñi hueichayal cam quehuayal Armagedón meu (Ap 19:14, 15).
cümeque dungu.
cütral lafquen.
Tüfa quiñe adentun müten. Cütral engu azufre mu üicülei. “Epungechi lan” pingequei. Tüfa mu ütrüftucungei pu culpafe pinolu ñi nor raquiduamtual, tati Huecüfü, ti lan dungu ca tati Rüngan, Hades ca pingelu. Tüfa mu ütrüftucungei tati lüfquenolu cütral mu: quiñe püllü, tati lan dungu ca ti Hades. Femngechi pengeli tati ütrüftucungelu tüfachi cütral lafquen mu reque rumel mu cutrancaucülelayai, doi mai apümcangeai rumel mu (Ap 19:20; 20:14, 15; 21:8).
CH
chalintucun.
Pu che eluquefui chalintucun, füchotun ta Chau Dios ñi mañumafiel, ñi nentudungual tañi culpan cam yafcan, ca ñi cümelcautual Chau Dios engu. Pu che quisu tañi pin mu chalintuculelfingün ta Chau Dios culliñ ca fillque mañumtun. Ti hunen huentru femlu tüfa fei ta Abel. Moisés ñi ley mu pu che feipingei ñi hulal chalintucun. Huelu Jesús hulpai ñi mongen doi cüme chalintucun reque, feimu duamngehuelai chalintucual culliñ. Huelu pu cristiano petu hulqueingün chalintucun reque chumngechi ñi adnieteu Chau Ngünechen ñi nehuen (Gé 4:4; Heb 13:15, 16; 1Jn 4:10).
chalintucun quiñentrür ingequelu.
Pu che hulquefui tüfachi chalintucun ñi cümelcaucüleal Chau Jehová engu. Ti che yefilu ti chalintucun, tañi pu che, ti sacerdote hul-lu ti chalintucun ca ti pu caquelu sacerdote cüdaumequelu iquefuingün tüfachi chalintucun. Lüpümngequefui ti yihuiñ, fei Chau Jehová llouquefui ti cüme nümün tripalu. Cafei llouquefui ti mollfüñ adentulelu ti mongen. Ti pu che yefilu ti chalintucun ca pu sacerdote quiñentrür iquefuingün reque Chau Jehová engün, femngechi pengelquefuingün ñi cümelcaucülen Chau Dios engün (Le 7:29, 32; Dt 27:7).
chalintucungelu pu che ñi culpan mu.
Chau Ngünechen ñi ellcalechi dungu.
Chau Ngünechen ñi huerquen.
Quiñe che quimfalcünuquefilu Chau Dios ñi huercün ca tañi ayünieel. Quimeltuchequei Chau Dios mu cüpachi dungu. Chau Ngünechen ñi huerquen feipicünuafui chem ñi rupayal, huelu griego quehun mu tüfachi palabra pengelquelai quiñe che re feipiquelu chem ñi rupayal.
Chau Ngünechen ñi huirintucuel.
Chau Ngünechen ñi nehuen.
Chau Ngünechen ñi ngünenietual mapu; Reino de Dios.
Chau Ngünechen ñi ruca; templo.
Ellaca mu pu Israel che poyequefuingün ta Chau Dios quiñe tolto ruca mu. Huelu fei hula Jerusalén huaria mu deumangei quiñe fütra ruca Chau Ngünechen ngealu. Salomón deumafi ti hunen templo, huelu pu Babilonia che teifücaeyu. Zorobabel deumafi ti epungelu huiñotulu pu Israel che tañi mapu mu. Rupachi tripantu Herodes el Grande huiño deumatufi. Quiñeque mu tati “ruca” pingequefui (Mt 21:13; 1Cr 29:1; 2Cr 2:4; Mt 24:1).
cheu ñi cütrüngequen fün.
Niefui epu rüngan cura mu deumangelu. Quiñe doi huente püralefui. Nüucülequefui quiñe pichi huechod mu. Ti doi huentelechi rüngan mu cütrüngequefui ofad cam aceituna, femngechi ti co ca tati aceite hutruquefui ti rüngan doi nageltu mülelu. Cafei cheu ñi cütrüngequen ofad adentulei Chau Ngünechen ñi huercüelchi juicio (Ap 19:15).
cheu ñi pünolquetran-ngequem.
cheu ñi pünongequen quetran.
Mülefui laf mapu mu, huechuñ pichi huincul püle, cheu pimuquei ti cürüf (Mt 3:12). Ngüneduamnge PÜNOQUETRANAL.
chumpol chillca.
Fütra hoja alütuulu. Pergamino cam papiro mu deumangei. Quiñe tañi ad püle huirintucungequefui, fei quiñe rüngi mu chumpolcünungequefui, impolcünungequefui. Femngechi chillca mu elcünungei Chau Ngünechen ñi huirintucuel. Ti lifru femngechi felefui huirintucungelu ti Biblia (Lu 4:17-20; 2Ti 4:13).
D
David tañi Fotüm.
Decápolis.
Quiñeque huaria Grecia mu mülelu. Ellaca mu mari huaria coneltulefui. Griego quehun mu déka cüpa feipi ‘mari’, pólis cüpa feipi ‘huaria’. Cafei Decápolis feipingequefui ti troquiñ mapu tripahue antü püle mülelu Galilea lafquen ca Jordán leufü mu. Tüfa mu mülerquei epe com feichi huaria. Ti Decápolis rume falin-ngefui pu Grecia che ñi negociayal ca ñi pengelal tañi huimtun dungu. Jesús rupai tüfachi mapu püle, huelu feipingelai ñi conpun tüfachi huaria mu (Mt 4:25; Mr 5:20).
denario.
diezmo.
Mari troquiñ meu hulngequefui quiñe troquiñ ñi cullial, fei ñi amultucual Chau Dios ñi cüdau (Dt 26:12; Mal 3:10; Mt 23:23; Heb 7:5). Moisés ñi ley feipi, fill tripantu ñi elungeal pu Leví che ti diezmo nentungelu com ñi hulün ti mapu ca tunte ñi alürpun pu culliñ. Ca femngechi pu Leví che eluquefingün ti diezmo tati pu sacerdote Aarón mu tuulu. Fillque diezmo mülequefui. Pu cristiano duamfalngelai ñi hulal ti diezmo.
doi falin cura.
Tüfachi cura elcünungequefui cheu ñi trapümngen epu pared. Femngechi nehuencülefui ti pared ñi hudanoal. Tati doi falilu fei tati cura elcünungelu cheu ñi anümngeal ti ruca. Tati fütraque ruca cheu ñi trahuquen fentren che ca tati huaria ñi fütraque malal tuculelngequefui quiñe nehuen-ngechi cura. Tati doi falin cura adentulei chumngechi nehuencünungei ti mapu. Ti trahunche trürümngei quiñe ruca reque, Jesús “fei tati doi falin cura cheu ñi anümngeal” ti trahunche (Ef 2:20; Job 38:6).
Doi Yamfal Mülehue.
Ti doi ponhuitulechi pieza ti tolto ruca ca Chau Ngünechen ñi ruca mu. Santo de los Santos ca pingei. Tüfa mu mülefui ti falin caja pengelquelu Chau Dios ñi eldungu. Chumngechi feipi Moisés ñi ley, ti hunen lonco sacerdote müten conpuafui quiñe rupa fill tripantu, feichi Antü ñi Huiñoduamtungeal pu Israel che ñi Culpan (Éx 26:33; Le 16:2, 17; 1Re 6:16; Heb 9:3).
dracma.
Chumngechi feipi Mateo puulu ta Apocalipsis, tüfa ta Grecia ñi moneda platangelu. Feichi mu fanefui 3,4 gramo (Mt 17:24, nota).
dullial.
Hebreo quehun mu cüpa feipi ‘tucual aceite’, ‘ngüfontucual’, cam ‘hutrulal’. Hutrunacümelngei aceite ta quiñe che cam quiñe chemcün dullicünungelu quiñe saquin cüdau mu. Mateo puulu ta Apocalipsis lifru mu, tüfachi palabra pengeli tati pu dullingelu ñi amual huenu mu elungei Chau Dios ñi nehuen (Éx 28:41; 1Sa 16:13; Lu 4:18; Hch 10:38; 2Co 1:21).
E
efod.
Tüfachi tacun quiñe delantal reque trüri. Pu sacerdote tucutuuquefui. Ti hunen lonco sacerdote niequefui quiñe falin efod. Rücu püle tucungequefui ti pichi carpa nielu mari epu falinque cura (Éx 28:4, 6). Quiñeque mu tati pu che sacerdotengenolu tucutuuquefui quiñe efod (1Sa 2:18; 2Sa 6:14). Ngüneduamnge apéndice B5.
eldungu; feipicünun.
Epuñpüle feipicünuuquei ñi femal cam ñi femnoal quiñe dungu. Chau Dios eldungucünuhuafui che engu, ca tati pu che hueluquentu eldungucünuhuafui. Quiñeque mu quiñe troquiñ müten mülei ñi huechutripayal tañi feipicünuel. Caquelu rupa epuñpüle mülei ñi huechunentuafiel. Biblia nütramcai Chau Dios ñi eldungucünuhun pu che engün ca nütramcai ñi eldungucünuhun pu huentru ca fillque troquiñche. Tati doi falinque eldungu fei ta Chau Ngünechen ñi eldungucünuel ta Abrahán, David, pu Israel che (ti ley ñi eldungu) ca pu dullin cristiano engün (ti hue eldungu) (Gé 9:11; 15:18; 21:27; Éx 24:7; 2Cr 21:7; Lu 22:29; Hch 3:25; 2Co 3:6; Heb 8:6).
epe afle mapu meu müleyechi dungu.
Fentepuule feichi medin antü, apümcangeai com ñi ngünenieel Satanás. Tüfachi dungu rupai Cristo tañi mülen iñchiñ meu. Jesús adnieafi tañi pu cümeque püllü, “fei pu nor che meu püntünentuafi pu huesaque che”, fei apümcayafingün (Mt 13:40-42, 49). Jesús ñi pu inanieteu rume cüpa quimingün chem pengeai “epe puucülele ñi afal mapu meu müleyechi dungu” (Mt 24:3). Jesús petu ñi huiñotunon huenu mu, feipicünufi tañi pu inanieteu ñi compañafiel engün puule hula feichi antü (Mt 28:20). Ngüneduamnge MAPU MÜLEYECHI DUNGU.
Epicuro.
Tüfachi quim huentru quimeltuquefui, pu che mülei ñi inayal quisu ñi ayünieel tañi ayüucüleal, tüfa tati doi falin dungu pi tüfachi huentru.
Éufrates leufü.
Tati doi fütra leufü mülelu sur püle Asia mapu mu. Cafei quiñe tati epu fütra leufü rupaquefulu Mesopotamia mapu meu. Ti hunen rupa üitungei Génesis 2:14. Tüfa quiñe tati meli leufü rupaquefulu Edén pingechi lof meu. Feipingequei “tati Leufü” (Gé 31:21). Pu Israel che ñi mapu fentepuhui tüfachi leufü mu (Gé 15:18; Ap 9:14; 16:12).
eunuco.
Huentru catrünentuñmangelu ñi cudañ. Serfiquefuingün tati lonco ülmen ñi pu domo. Eunuco ca pingequefui ti huentru elungelu falinque cüdau ti lonco ülmen ñi gobierno mu, catrünentuñmangenolu rume ñi chem (Est 2:15; Hch 8:27, nota).
F
falin caja pengelquelu Chau Dios ñi eldungu.
Caja acacia mamüll deumangelu. Oro meu tacungei. Elcünungequefui tati Doi Yamfal Mülehue Chau Dios ñi tolto ruca mu. Fei hula elcünungei tati Doi Yamfal Mülehue Chau Ngünechen ñi ruca mu Salomón ñi deumael. Tañi tapa re oro deumangei ca nierquei epu querubin puñmalelu. Ponhuitu mülerquei ti epu cura nielu ti Mari Huercün Dungu (Dt 31:26; 1Re 6:19; Heb 9:4).
fampuhulelngeal cuhu ta quiñe che.
Faraón.
fariseo.
Hunen siglo meu tüfa ta quiñe falin religioso troquiñche nielu pu judio che. Sacerdotengelaingün, huelu inaniequefui itrocom ñi feipiel Moisés ñi ley. Ca femngechi falintuquefuingün tati fillque huimtun (Mt 23:23). Chaftuquefuingün pu Grecia che ñi huimtun dungu. Cüme adümquefuingün ti ley ca tati fillque huimtun, feimu ngencaucülequefuingün pu che meu (Mt 23:2-6). Quiñeque coneltulefui ti Sanedrín mu. Dunguyequefingün ta Jesús ñi yamnofiel ti ürcütun antü, tati fillque huimtun ca ñi trahuluuquen pu culpafe ca pu cofraquelu impuesto engün. Quiñeque fariseo cristianongetui, quiñe tüfa Saulo Tarso meu tuulu (Mt 9:11; 12:14; Mr 7:5; Lu 6:2; Hch 26:5).
fautizahun.
fayümhue.
Chem ñi tuculelngeel quiñe masan cam tati co femngechi ñi fayüal. Quiñe masan mu pichin nentungequefui, fei guardacünungequefui ñi fayümal caquelu masan. Biblia mu ti fayümhue cam lefaura adentulei ti culpan dungu, ti yafcan ca tati huesañmauquelu. Cafei adentulei quiñe dungu fütra tremlu, huall püle puuquei, huelu quimfalngequelai ñi tremün (Éx 12:20; Mt 13:33; Gál 5:9).
feipicünuelchi dungu.
Quiñe che cüme feipicünulelafui ta Chau Dios ñi femal quiñe dungu, hulal quiñe chalintucun cam quiñe regalo, femal quiñe cüdau ca femnoal quiñe dungu huesalcalenole rume. Cafei cüme feipicünuafui ñi rüfngen quiñe dungu. Quiñe che cüme feipicünuafui ñi femal cam ñi femnoal quiñe dungu. Com tüfa feipicünungequei Chau Dios ñi adquiñ mu cam quiñe falin che ñi adquiñ meu. Chau Jehová cüme pengelelfi ta Abrahán ñi rüfngen tañi feipicünufiel (Gé 14:22; Mt 5:33; Heb 6:16, 17).
felepe mai.
Fiesta de la Dedicación.
Ti huentru Antíoco Epífanes pingelu podümfi Chau Ngünechen ñi ruca, feimu pu judio elcünuingün tüfachi fiesta, fei ñi acordayal ñi liftungeel Chau Ngünechen ñi ruca. Tüfachi fiesta conquefui 25 antü kislev cüyen, fei pura antü puuquefui (Jn 10:22).
Fiesta de los Tabernáculos.
Fiesta de las Cabañas ca Fiesta de la Recolección ca pingequefui. Tüfa mu pu judio mülequefui llamasa mu ñi acordayal chumngechi tripaingün Egipto mapu mu. Trahuquefuingün 15 puulu 21 antü etanim cüyen mu, puulu ñi cosechangeal afchi tripantu Israel mapu mu. Rume ayüucülequefui pu che, mañumquefuingün ta Chau Jehová ñi elueteu cümeque cosecha. Pu huentru mülefui ñi amual Jerusalén huaria cüla fiesta mu, tüfa ta quiñe (Le 23:34; Esd 3:4; Jn 7:2).
Fiesta ti Fayümngenochi Cofque.
Pu Israel che nierquefui cüla falin fiesta femngequelu fill tripantu, tüfa tati hunen. Deu rupalu ti Pascua amulefui tüfachi fiesta ti 15 antü nisan cüyen mu, regle antü puuquefui. Re fayümngenochi cofque ingequefui, femngechi pu Israel che acordaingün ñi tripatun Egipto mapu mu (Éx 23:15; Mr 14:1).
fün chalintucungelu.
Feitichi chalintucun mu hulngeafui cüme rüngo, fün cahuella cam fün cachilla cotüngelu. Cafei hulngeafui churrasca cam cofque rangiñ mu huechodcülelu pepicangelu horno mu, cofilechi lata cam challa mu.
fütraconchi lolo.
fütra cura rüngümquetranquelu.
Chincül cura chihudngequefui huechuñ cura mu ñi rüngümal quetran. Biblia ñi antü epe com ruca mu mülefui quiñe pichi cura pu domo ñi püneel, cuhu mu chihudngequefui. Pu che fill antü duamniefui tüfachi cura ñi nieal cofque, feimu Moisés ñi ley feipiquefui inei rume aretule plata, ngelafui ñi müntuñmangeal tüfachi cura rüngümquetranquelu. Ca mülefui fütraque cura ñi rüngümquetranal, huelu culliñ mu chihudngequefui (Dt 24:6; Mr 9:42).
fütra cutrancahun.
Jesús feipi ñi müleal “fütra cutrancahun” Jerusalén huaria mu, turpu mülequelafui femngechi cutrancahun pi. Ca feipi ñi müleal “fütra cutrancahun” com mapu meu cüpale fütra pepiluhun mu (Mt 24:21, 29-31). Pablo feipi ñi norngen tüfachi cutrancahun Chau Dios mu cüpalu, fei castigangeai “tati pu quimnofilu ta Chau Ngünechen ca tati feyentuquenofilu taiñ Ñidol Jesús ñi cümeque dungu”. Apocalipsis capitulo 19 pengeli chumngechi Jesús adnieafi pu cümeque püllü huenu mu, fei hueichayafingün, quehuayafingün ti huapo huesa culliñ, mapu müleyechi pu lonco ülmen ca tañi pu soltau (2Te 1:6-8; Ap 19:11-21). Biblia ca feipi ñi montual quiñe “fütra troquiñche” tüfachi fütra cutrancahun mu (Ap 7:9, 14). Ngüneduamnge ARMAGEDÓN.
fütra cutranpiuqueyechen.
Griego quehun cüpa feipi quiñe ayüfalchi dungu. Tati fütra cutranpiuqueyechequelu hulquei fente tañi cüme piuquengen. Chau Ngünechen ñi fütra cutranpiuqueyechequen mu hulquei fentren dungu, huelu huiñoleltumuchi pilai. Femngechi pengelquei tañi rume cüme piuquengen ca tañi fütra piuqueyechequen. Griego quehun mu fütra cutranpiuqueyechen ca rulpadungungequei “fürenechen” ca “falin regalo”. Cüpa feipi ti che tañi cüme piuquengen mu müten fürenefi ta caquelu, chem ñi chumnon rume engün (2Co 6:1; Ef 1:7).
G
garrocha.
Fütra rüngi, huechuñ mu niei quiñe pichi clafu. Garrocha meu adniengequei pu mansun. Tati pu quimche ñi ngülam adniequefi pu che ñi cüme miyahual, feimu garrocha mu trürümngequei. Ti Biblia feipilu “mancümequefimi ti garrocha”, pengeli fente ñi huesalcauquen ti mansun pinolu ñi adnieaeteu ti garrocha (Hch 26:14, nota; Jue 3:31).
Gehena.
Femngechi feipingequei griego quehun mu Hinón pingechi rulu mapu. Mülerquefui sur püle Jerusalén huaria mu (Jer 7:31). Tüfa mu lüpümngequefui ti pod, mülelu cai huecuntu huaria mu. Chau Ngünechen ñi pu huerquen feipingün ñi ütrüftucungequen layechi cuerpo tüfa mu (Jer 7:32; 19:6). Quimngequelai ñi ütrüftucungen Gehena meu che cam culliñ ñi lüpümngeal ca cutrancahual engün. Jesús ca tañi pu inanieteu nütramcaingün Gehena mu ñi pengelal chumngechi castigangeai pu huesaque che, fei engün apümcangeai, turpu huiñomongetulayai engün. Tüfa “epungechi lan” pingei (Ap 20:14; Mt 5:22; 10:28).
gobernador.
Biblia ñi antü mu pu gobernador niefui autoridad ley dungu meu ca pu soltau mu. Cafei ngüneduamquefuingün tati fillque troquiñ mapu ñi culliafiel ti lonco ülmen chem ñi culliafel engün. Roma ñi Lonco Ülmen ngüneduamquefui ñi femquen tati gobernadorcülefulu Judea mapu mu (Ne 5:14, 15; Lu 2:1, 2).
Grecia che.
Quiñe che Grecia mu tuulu cam tañi pu che üye mu tuhui. Mateo puulu ta Apocalipsis lifru mu Grecia che feipingequei pu che judiongenolu ca tati pu inaniefilu pu Grecia che ñi huimtun ca tañi quehun (Joe 3:6; Jn 12:20).
griego quehun.
Pu Grecia che ñi quehun.
H
Hades.
Griego quehun mu mülei tüfachi palabra. Hebreo quehun “Seol” pingei. Rulpadungungequei “Rüngan”, tüfa adentulei pu lachi che ñi quimnon chem no rume. Quiñe rüf mülehue no tati. Ngüneduamnge RÜNGAN.
hebreo.
Ellaca mu femngechi feipingequefui ta Abrán (Abrahán) ñi trürcülenoal pu amorreo che engün. Rupalu ta tripantu, femngechi feipingequefui Abrahán ñi pu cüpanche Jacob püle. Hebreo ca pingei tañi quehun engün. Jesús ñi antü mu, ti hebreo quehun reyülefui arameo quehun mu. Cristo ca tañi pu inanieteu dunguquefuingün tüfachi quehun (Gé 14:13; Éx 5:3; Hch 26:14).
Hermes.
Pu Grecia che ñi dios, Zeus tañi fotüm ürque. Pu dios ñi huerquen troquingequefui ca cüme hueupife dios. Feimu Listra huaria mu Hermes pingei ta Pablo (Hch 14:12).
Herodes.
Femngechi pingequefui ti familia elfalcünufilu pu Roma che ñi ngünenieafiel pu judio. Herodes el Grande huiño deumatufi Chau Ngünechen ñi ruca Jerusalén mu mülelu. Cüpa langümfi ta Jesús, feimu huercüi ñi langümngeal pu pichiqueche (Mt 2:16; Lu 1:5). Herodes el Grande nierquei epu fotüm, Herodes Arquelao ca Herodes Antipas pingei. Elcünungei engu ñi ngünenieafiel quiñeque troquiñ mapu ñi ngüneniefel tañi chau (Mt 2:22). Antipas gobernadorcülefui quiñe troquiñ mapu, huelu pu che lonco ülmen piquefeyu. Ngünenierquei tati cüla tripantu ca rangiñ ñi amuldunguyahun Jesús. Tañi ngünenieel mu rupai ti dungu nütramcangelu Hechos lifru capitulo 1 puulu 12 (Mr 6:14-17; Lu 3:1, 19, 20; 13:31, 32; 23:6-15; Hch 4:27; 13:1). Fei hula Chau Dios ñi cüme püllü langümfi ta Herodes Agripa I, Herodes el Grande ñi lacu. Tüfa pichiñma mu müten ngünenierquei (Hch 12:1-6, 18-23). Fei tañi fotüm Herodes Agripa II ngünenierquei pu judio caiñetufilu hula ta Roma (Hch 23:35; 25:13, 22-27; 26:1, 2, 19-32).
hisopo.
Anümca nielu pichique tapül ca pichique rou. Pünengequefui ñi pachügngeal mollfüñ cam co, femngechi ñi liftungeal che ca chemcün chumngechi feipi Moisés ñi ley. Hebreo ca griego quehun mu femngechi üitungequei fillque anümca. Ti hisopo nütramcalu Juan 19:29 rüngi reque tremquei, femngechi ñi fültuculelafiel ta Jesús ti esponja cotrü pulcu nielu (Heb 9:19).
Huecüfü.
Mateo puulu ta Apocalipsis lifru mu femngechi üitungei ta Satanás. Griego quehun mu cüpa feipi ‘dallucafe’. Femngechi feipingequei ta Satanás, fei am tati doi fütra dalluntucuquefilu ta Chau Jehová. Fei coila dungu mu caiñetuquefi ta Chau Dios, tañi cüme dungu ca tañi yamfal üi (Mt 4:1; Jn 8:44; Ap 12:9).
hue cüyen.
Femngechi pingequefui tati hunen antü fillque cüyen pu judio ñi calendario mu. Feichi antü trahuquefui pu che ñi iyal ca ñi hulal saquinque chalintucun. Rupachi tripantu mu quiñe fütra fiestangetui rume falin-ngelu, com pu Israel che coneltuquefui. Feichi antü mu cüdauquelafui che (Nú 10:10; 2Cr 8:13; Col 2:16).
huechuñ mülechi mülehue.
Huentru ñi Fotüm.
Génesis puulu ta Malaquías lifru mu, femngechi feipingei ta Ezequiel ca Daniel. Pengeli ñi trürngenon engu ta Chau Ngünechen mu, fei engu laquei, huelu tati hulquelu ti huercün dungu laquelai (Eze 3:17; Da 8:17). Mateo puulu ta Juan lifru mu doi 80 rupa femngechi feipingei ta Jesús. Pengeli Jesús ñi rüf chengen, ñi choyüeteu quiñe domo, quiñe püllü huentrucünuupalu no. Cafei pengeli Jesús ñi huechunentuafiel ñi feipicünuel Daniel 7:13, 14 (Mt 19:28; 20:28).
hueñancün.
Ñi cutrancauquen che layeluhun mu cam rupalu huesaque dungu. Biblia nütramcai pu che pengelquefui ñi hueñancün mufüque antü mu. Tati pu che fütra ngümacauquefui, cacünuquefui ñi tacun, trufquentucuuquefui ñi lonco, huichafcaquefui, huicürquefui ñi tacun ca cutraftucuquefui ñi rücu engün. Quiñeque mu cullingequefui che ñi ngümayafiel ti la (Est 4:3; Mt 11:17; Mr 5:38; Jn 11:33; Ap 21:4).
huesa püllü; huecüfü.
Pengequelaingün ca doi nehuen-ngeingün ti pu che meu. Génesis 6:2, “Chau Ngünechen ñi pu yall” feipingei. Cafei Judas 6, “cüme püllü” feipingeingün. Ellaca mu cümeque püllüngefuingün, huelu feyentuhuelafingün ta Chau Dios Noé ñi antü mu, quiñehuingün Satanás engu ñi caiñetuafiel ta Chau Jehová. Quisu tañi pin mu Chau Dios ñi pu caiñengetui engün (Dt 32:17; Lu 8:30; Hch 16:16; Snt 2:19).
huimacangeal.
Mateo puulu ta Apocalipsis feipi ñi huimacangeel che quiñe refenque mu. Tüfachi refenque nierquei pichique moncol ca yungechi clafu reque (Jn 19:1).
huiñomongetun.
Griego quehun mu anástasis pingequei, cüpa feipi ‘huitratun’. Biblia nütramcai ailla che ñi huiñomongetun. Quiñe ta tüfa Jesús ñi huiñomongeltueteu Jehová. Elías, Eliseo, Jesús, Pedro ca Pablo huiñomongeltufingün quiñeque che Chau Ngünechen ñi nehuen mu. Ñi femtripayal Chau Jehová ñi ayünieel, rume falin-ngei ñi huiñomongetual mapu mu “pu norngechi che ca pu norngenochi che” (Hch 24:15). Biblia ca feipi ñi müleal huiñomongetun huenu meu, tüfa tati pu “hune huiñomongetualu”, “hunen huiñomongetun” ca pingei. Tüfa mu coneltulei Jesús ñi pu peñi pingelu, fei engün dullingei Chau Ngünechen ñi nehuen mu (Flp 3:11; Ap 20:5, 6; Jn 5:28, 29; 11:25).
hunelfe.
hunen lonco sacerdote.
Moisés ñi ley mu fei tati doi falin sacerdote. Rangiñelhuelefui Chau Dios ca tati pu che engu. Adniequefui caquelu pu sacerdote. Fei müten mülefui ñi conpual ti Doi Yamfal Mülehue meu, tüfa doi ponhuitulefui ti tolto ruca ca Chau Ngünechen ñi ruca mu. Fill tripantu quiñe rupa müten conquefui, feichi Antü ñi Huiñoduamtungeal pu Israel che ñi Culpan. Jesucristo ca feipingequei hunen lonco sacerdote (Le 16:2, 17; 21:10; Mt 26:3; Heb 4:14).
I
Ilírico.
Troquiñ mapu ñi ngünenieel Roma, mülei picun püle Grecia mapu mu. Amuldunguyaulu Pablo, puhui feichi mapu meu, huelu rüf quimngelai ñi amuldunguyahun üye mu (Ro 15:19).
inaquefilu Herodes.
Herodianos ca pingequefui. Tüfa quiñe politico troquiñche. Quelluntucuquefui pu Herodes ñi ayünieel, tüfa engün ngüneniequefui pu Roma che ñi duam mu. Quiñeque saduceo coneltulefui chi tüfachi troquiñche mu. Pu inaquefilu Herodes quiñehuingün pu fariseo engün ñi caiñetuafiel ta Jesús (Mr 3:6).
incienso.
Rume cüme nümün-ngei com ñi nieel ti incienso. Ti tolto ruca ca Chau Ngünechen ñi ruca mu füchotungequefui saquin incienso, meli chem tuculelngequefui. Pulihuen ca pun meu füchotungequefui ti altar mu ñi nieel ti Yamfal Mülehue. Ti Antü ñi Huiñoduamtungeal pu Israel che ñi Culpan mu füchotungequefui incienso ti Doi Yamfal Mülehue meu. Adentulei Chau Ngünechen ñi llouquefiel tañi pu che ñi llellipun. Duamfalngelafui pu cristiano ñi füchotual incienso (Éx 30:34, 35; Le 16:13; Ap 5:8).
Israel.
Chau Dios femngechi üitufi ta Jacob. Ca femngechi feipingequei com tañi pu cüpanche. Tati pu che cüpalu Jacob ñi mari epu fotüm meu, Israel ñi pu fotüm pingequei, Israel ñi rucache, Israel troquiñche, pu Israel huentru, Israel che ca israelita. Cafei Israel pingequefui ti mari troquiñche picun püle mülelu, fei engün hudatripai ti epu troquiñche sur püle mülefulu. Rupalu ta tripantu pu dullin cristiano üitungei “Chau Dios ñi Israel troquiñche” (Gál 6:16; Gé 32:28; Hch 4:10; Ro 9:6).
J
Jacob.
Tañi chau Isaac pingei ca tañi ñuque Rebeca pingei. Fei hula Chau Dios Israel üituculelfi ta Jacob. Israel troquiñche ñi cuifi lacu ürque, tüfa tati pu Israel che ca judio pingetui engün. Jacob nierquei mari epu fotüm. Fei engün ca tañi pu cüpanche mu tripai tati mari epu troquiñche ñi nieel Israel. Cafei Jacob feipingequei ti Israel troquiñche (Gé 32:28; Mt 22:32).
Jah.
Femngechi ca feipingequei Jehová ñi üi, tati Doi Alüpüralelu (Éx 15:1, 2). Poesia mu pünengequei. Tüfachi üi tripaquei tati epu hunenque letra ti Tetragrámaton יהוה (YHWH) hebreo quehun mu. Ti hunen letra fei ta yohdh (י), cangelu he’ (ה). Génesis puulu ta Malaquías, 50 rupa tripai Jah: 26 rupa re tripaquei Jah ca 24 rupa tripaquei feipingen mu “Aleluya”, tüfachi palabra feipingequefui quiñe troquiñche ñi “püramyeafiel ta Jah”. Tüfachi Biblia mu re huirintuculei Jehová, huelu fillque nota mu peafuimi cheu ñi tripan Jah.
Jehová.
Tüfachi Hue Mapu ñi Biblia mu 241 rupa tripai Jehová ñi üi ti lifru Mateo puulu ta Apocalipsis. Ñi feipial Chau Dios ñi üi, meli versiculo re feipilei Jah, huelu iñchiñ huirintucuiñ com ti üi, Jehová (Ap 19:1, 3, 4, 6, notas). ¿Chumngelu (chemu) tucungetui Chau Dios ñi üi? Tüfachi dungu mu:
1. Jesús ca tañi pu apostol ñi antü mu mülerquei cuifique huirintucun nielu ti lifru Génesis puulu ta Malaquías. Tüfa mu tripaquefui ti Tetragrámaton cheu ñi müleafel Chau Dios ñi üi. Tetragrámaton pingei tüfachi meli letra יהוה hebreo quehun mu, fei tüfa Chau Dios ñi üi.
2. Jesús ca tañi pu apostol ñi antü mu, griego quehun mu rulpadungungei ti lifru Génesis puulu ta Malaquías. Tüfa mu ca tripaquefui feichi meli letra pengelquelu Chau Dios ñi üi.
3. Ti lifru Mateo puulu ta Apocalipsis pengeli Jesús fentren rupa nütramcai Chau Dios ñi üi mu ca quimeltulelfi pu che (Jn 17:6, 11, 12, 26).
4. Chau Ngünechen adcünui ñi huirintucungeal com ti Biblia. Feimu raquiduamnge: Jehová ñi üi mülei Genésis puulu Malaquías lifru mu. ¿Ca femngechi mülenoafulu cai Mateo puulu Apocalipsis lifru mu?
5. Pu judio ñi cuifique lifru pengeli pu cristiano judio tuhun-ngelu tucuquefuingün tañi huirintucun mu Chau Dios ñi üi.
6. Ti lifru Mateo puulu ta Apocalipsis nütramcai quiñeque troquiñ ti lifru Génesis puulu ta Malaquías. Feimu quiñeque che adümquefilu Biblia ñi dungu feipiquei Chau Dios ñi üi mülefui ñi tripayal feichi versiculo mu.
7. Quiñeque Biblia doi 100 quehun mu rulpadungungelu niei Chau Dios ñi üi Mateo puulu ta Apocalipsis lifru mu.
Quimfali llemai chumngelu mülei ñi tucungetual Chau Jehová ñi üi ti lifru Mateo puulu ta Apocalipsis. Femngechi femingün tati pu rulpadungufilu ti Hue Mapu ñi Biblia. Com engün rume yamquefingün Chau Dios ñi üi ca fentren yamün mu cuñiutucuuqueingün ñi entunoal chem rume mülelu ti cuifique huirintucun mu (Ap 22:18, 19).
Judá.
Tati melingechi fotüm ñi nieel Jacob Lea engu. Epe puulu ñi layal Jacob, feipicünui Judá ñi pu che mu tripayai quiñe falin lonco ülmen ñi ngünenieal fentreñma mu. Jesús cüpalu mapu mu, Judá ñi cüpanchengefui. Judá ca pingequei quiñe troquiñche Israel meu. Rupalu ta tripantu, ca femngechi pingetui ti epu troquiñche hudatripalu ti pu caquelu mu (Gé 29:35; 49:10; Heb 7:14).
judio.
Judá troquiñche mu tuhun-ngechi pu che. Femngechi pingetui tüfachi pu che hueungelu tati mari troquiñche Israel meu (2Re 16:6). Lifrenentungelu pu Israel che Babilonia mu, judio pingetui com pu Israel che huiñotulu tañi mapu mu chem troquiñche mu tuulu rume (Esd 4:12). Rupachi tripantu mu, huall mapu püle judio pingetui pu Israel che ñi trürümngenoal caquelu tuhunche meu (Est 3:6). Pablo feipilu ñi falin-ngenon quiñe che ñi judiongen, cüpa quimeltui chem tuhunche rume coneltuleafui ti trahunche mu (Ro 2:28, 29; Gál 3:28).
L
langosta.
legion.
lepra cutran.
Rume huesa cutran huesalcaquefilu ti trahua. Ti lepra nütramcangelu Biblia mu re cutranelquelafi tati pu che, ca huesalcaquefui ti tacun ca ti ruca. Feimu trürcülelai tati lepra cutran famülque mu mülelu (Le 14:54, 55; Lu 5:12).
lepton.
lepün.
Feiti mapu huallmaniefilu Chau Ngünechen ñi tolto ruca, nielafui techo ca cerrantucungei cortina mu. Rupalu ta antü ca femngechi mapu huallmaniefi Chau Ngünechen ñi ruca, huelu cerrantucungei cura malal mu. Ti altar cheu lüpümngequefui culliñ mülerquei tati tolto ruca ñi lepün meu ca ti ponhuitulechi lepün Chau Ngünechen ñi ruca mu. Biblia ca nütramcai fillque ruca ñi nieel lepün (Éx 8:13; 27:9; 1Re 7:12; Mt 26:3; Mr 15:16; Ap 11:2).
Leví; Leví che.
Ti cülangechi fotüm ñi nieel Jacob Lea engu. Leví ca pingei quiñe troquiñche Israel mu. Leví tañi cüla fotüm mu tripai pu Leví che ñi cüla troquiñche doi falin-ngelu. Quiñeque mu Leví che pingequei com ti troquiñche. Huelu femngechi feipingequelai pu sacerdote Aarón tañi familia mu tripalu. Leví ñi troquiñche elungelai mapu ti Feipicünuelchi Mapu mu. Huelu mai elungei 48 huaria caquelu troquiñche ñi mapu meu (Dt 10:8; 1Cr 6:1; Heb 7:11).
ley.
Fentren rupa tüfa ta Moisés ñi ley, Chau Jehová elufi tati pu Israel che Sinaí pingechi huellin mapu mu 1513 tripantu petu ñi mülepanon Jesús. Fentren rupa ley pingequei tati quechu hunenque lifru Biblia mu (Jos 23:6; Mt 7:12; Lu 24:44; Gá 3:24). Quiñeque huercün dungu mülelu Moisés ñi ley mu cafei ley pingeafui (Nú 15:16; Dt 4:8).
lifngelu; huichucünungelu.
Chau Jehová lifngei ca yamfalngei itrocom dungu mu. Tüfa rume falin-ngei tañi chumngen mu (Éx 28:36; 1Sa 2:2; Jn 17:11). Mateo puulu ta Apocalipsis lifru mu “lifngelu” feipingequei ti che lif mongen nielu (2Co 7:1; 1Pe 1:15, 16). Hebreo ca griego quehun quiñeque mu feipi ñi huichucünungeel pu che (Ef 1:4; 2Te 1:10), chemcün (Ro 7:12; 11:16), fillque mülehue (Hch 7:33; 1Co 3:17; 2Pe 1:18) ca fillque cüdau (Éx 36:4). Tüfa cüpa feipi huichucünulelngei ta Chau Jehová ñi püramyengeal.
lifngenolu.
Biblia mu femngechi feipingequei chemcün cam quiñe che lifcülenolu cam inanofilu Chau Dios ñi ley ñi lif mongen nieal. Ca femngechi feipingequei chem dungu rume lifcülenolu chumngechi feipi Moisés tañi ley (Le 5:2; 13:45; Hch 10:14; Ef 5:5).
loncolechi sacerdote.
Génesis puulu ta Malaquías lifru mu, femngechi feipingequei ti hunen loncolechi sacerdote. Mateo puulu ta Apocalipsis femngechi feipingequei pu sacerdote doi yamfalngelu. Tüfa engün mu coneltulefui chi pu hunen lonco sacerdotengefulu ca tati pu loncolelu ti pu 24 troquiñ sacerdote (2Cr 26:20; Esd 7:5; Mt 2:4; Mr 8:31).
loncolelu.
Huentru deu tremlu ca quimchengelu. Biblia mu tüfachi huentru elungei autoridad ca elfal cüdau cheu ñi mülen cam quiñe troquiñche mu. Apocalipsis lifru mu ca femngechi feipingequei pu cümeque püllü. Griego quehun mu ti palabra presbýteros rulpadungungelu “loncolelu”, cüpa feipi pu elfalcünungelu ñi adnieafiel ti trahunche (Éx 4:29; Pr 31:23; 1Ti 5:17; Ap 4:4).
lüpümngeelchi culliñ; lüpümngeelchi mañumtun.
LL
llihuatuquelu.
Femngechi feipingequei quiñe che llihuatuniefilu cam uhuamtuniefilu quiñe ruca cam caquelu che. Pun meu conle huesaque dungu, ngüfetuchequei ñi mülen cuñihun dungu. Mülenagquefuingün huechuñ ti alüpüralechi ruca cam huente cura malal huaria mu, femngechi pefemquefi inei ñi cüpalen. Ti troquiñ soltau ca niei che llihuatuquelu (Mt 27:65; 28:4).
M
Macedonia.
Troquiñ mapu Grecia mu mülelu picun püle. Doi quimngerpui ngünenielu Alejandro Magno. Pu Macedonia che quisu ngünenieuquefuingün puulu hula pu Roma che. Ti hunen rupa apostol Pablo ñi amun Europa mapu mu, pu Roma che ngüneniequefui Macedonia. Cüla rupa Pablo amui tüfachi troquiñ mapu mu (Hch 16:9).
Malcam.
Tüfa tati dios ñi doi falintuquefiel pu Ammón che, ca feipingequefui chi Mólek (Sof 1:5). Ngüneduamnge MÓLEK.
malisiayal.
Aneltucheal, menazacheal cam feipicünual ñi huesalcaleal quiñe che cam chemcün. Lucatu dungu ca illcutu dungu no tati. Quiñe malisian dungu mu feipicünungequei ñi rupayal huesa dungu. Chau Dios cam quiñe tañi pu huerquen malisiadungule, rüfngei ñi rupayal feichi dungu (Gé 12:3; Nú 22:12; Mr 11:21; Hch 23:12). Quiñe che feipicünule ñi chumal, ca feipiafui ñi malisiangeal huechurpunole ñi feipin (Ne 10:29).
mana.
Tati doi falin iyael ñi nieel pu Israel che 40 tripantu miyaulu engün huellin mapu mu. Chau Jehová mu cüpai. Nagpalu ta ilhuen, huefrumequefui huente mapu mu fillque pulihuen, huelu ürcütun antü no. Pu Israel che hue pefilu ti mana, feipingün “¿Chem am chi?”, hebreo quehun mu “¿Man huʼ?” pingei (Éx 16:13-15, 35). Jesús nütramcafi ti mana pengelün dungu mu (Jn 6:49, 50).
mapu.
mapu müleyechi dungu; fantepu mülechi pu che.
Griego quehun aiṓn pilei. Pengeli chem ñi rupamequen mapu meu ca ñi chumngen quiñe medin antü. Biblia feipilu “mapu müleyechi dungu”, cüpa feipi ñi chumquen epe com pu che ca chumngechi yeniei ñi mongen engün (2Ti 4:10). Moisés ñi ley mu, Chau Ngünechen adcünui ti dungu, tüfa pu judio ñi müleyechi dungu pingeafui. Fei hula Chau Ngünechen huercüfi ta Jesucristo ñi montulcheal, femngechi huiño adcünui ti dungu, tüfa mu coneltulei pu dullin cristiano. Fei huecünungetui reque ti dungu ca huechutripai chem ñi adentucünuel Moisés ñi ley. Nütramcangelu “mapu müleyechi dungu” ca feipiafui chem ñi rupaquefel mapu meu ca chem dungu ñi rupayal (Mt 24:3; Mr 4:19; Ro 12:2; 1Co 10:11). Ngüneduamnge EPE AFLE MAPU MEU MÜLEYECHI DUNGU.
Media mapu tuulu.
Tüfachi pu che tuhui Jafet ñi fotüm mu, Madái pingelu. Cheu ñi mülenagün engün, Media mapu pingerpui. Famülque mu mülei picun püle Irán mapu mu. Ti Pentecostés 33 tripantu mu, Jerusalén meu mülefui che Media mapu tuulu (Hch 2:9).
Mesías.
Tüfachi palabra hebreo quehun mu cüpai. Cüpa feipi “dullinche”. Griego quehun mu feipingequei Cristo (Da 9:25; Jn 1:41).
mina.
Mateo puulu ta Apocalipsis lifru mu, quiñe mina fei ta 100 dracma. Fanefui 340 gramo (Lu 19:13, nota).
mirra.
Cüme nümün-ngechi resina entungelu pichique anümca mu, quiñeque niei chacai, huayun. Commiphora pingei tüfachi fillque anümca. Tuculelngequefui mirra tati aceite pünengequelu ñi dullingeal quiñe che Chau Dios ñi duam mu. Ca pünengequefui ñi cüme nümün-ngeal ti tacun, ti cahuitu cam ngütantu. Reyülngequefui aceite engu ñi tucungeal cuerpo mu. Cafei reyülngequefui pulcu engu, lahuen reque pünengequefui. Ca tuculelngequefui tati lachi cuerpo ñi rüngalngeal (Éx 30:23; Pr 7:17; Mr 15:23; Jn 19:39).
Mólek.
Moloc.
Pu Ammón che ñi dios. Ca pingequefui chi Malcam, Milcom cam Mólek (Hch 7:43).
mongen.
Hebreo ca griego quehun mu mülei fillque palabra rulpadungungelu “mongen”. Quiñe tüfa ti palabra hebrea néfesh, cangelu ti palabra griega psykhḗ. Tüfachi Biblia mu fentren rupa rulpadungungei “mongen”. ¿Chumngechi pünengequei tüfachi epu palabra? Femngechi feipingequei: 1) pu che, 2) pu culliñ ca 3) pu che cam pu culliñ ñi mongen (Gé 1:20; 2:7; ca peafuimi ñi nota; 1Pe 3:20). Tüfachi Biblia mu caquerumei chumngechi rulpadungungei tüfachi epu palabra caque quiñeque versiculo mu. Quiñeque mu feipi “mongen”, “tati mongelelu”, “che”, “itrofill mongen”, “iñche”, “eimi”, “fei” ca caquelu femngechi dungu. Quiñeque versiculo mu ti palabra néfesh ca psykhḗ rulpadungungei “com tami mongen”, fei tüfa femal quiñe dungu com piuque mu (Dt 6:5; Mt 22:37). Quiñeque mu tüfachi epu palabra cüpa feipi ñi ayünieel cam ñi cüpa in quiñe che cam culliñ. Ca femngechi feipingeafui quiñe la cam quiñe lachi cuerpo (Nú 6:6; Pr 23:2; Is 56:11; Ag 2:13).
müta.
Tüfa ta müta culliñ, pünengequefui fasu reque, cheu ñi ngülümal aceite, tinta cam caquelu dungu ñi cüme adngeal ta che. Cafei pünengequefui cullcull reque cam ñi dungulafiel musica (1Sa 16:1, 13; 1Re 1:39). Fentren rupa ti müta adentulei nehuen, nüfiel quiñe troquiñche ca ñi hueufiel (Dt 33:17; Miq 4:13; Zac 1:19).
müta ñi nieel ti altar.
N
nardo.
nazareo.
Hebreo quehun mu cüpai, cüpa feipi “huichucünungelu”, “hultucuulu” cam “püntücünungelu”. Epu rume nazareo mülequefui: tati nazareongelu quisu ñi pin mu ca Chau Dios ñi nazareocünufiel. Pu huentru ca pu domo eldungucünulelafui ta Chau Jehová tunteñma mu ñi nazareongeal. Pu femlu quisu ñi pin mu cüla dungu ngelafui ñi femal: putulayafui chem no rume ngollilcachequelu cam entungelu ofad meu, cupiluulayafuingün ca nünütulayafuingün quiñe la. Feiti pu che Chau Dios ñi nazareocünufiel, com tañi mongen mu femngechi felefuingün, Chau Jehová feipiquefui chem ñi femal engün (Nú 6:2-7; Jue 13:5).
nefilim.
Petu ñi acunon ti Fütra Mangin Co, quiñeque püllü huentrucünuupaingün ñi nieafiel domo, tañi pu yall engün nefilim pingei. Tüfa engün rume quehuatuchefengefuingün (Gé 6:4).
nisan.
Ellaca mu tüfachi cüyen abib pingequefui. Huelu nisan pingetui pu Israel che tripatulu Babilonia mapu mu. Nisan fei tati hunen cüyen ti calendario ñi nieel pu judio tañi poyeafiel ta Chau Dios ca tati reglengechi cüyen ti cangelu calendario mu. Nisan cüyen conquefui rangiñ marzo ca puuquefui rangiñ abril (Ne 2:1). Pu judio ñi Pascua femngequefui 14 antü nisan cüyen mu. Feichi antü Jesús elcünui ñi acordangeal tañi lan (Lu 22:15, 19, 20). Cafei feichi antü Jesús langümngei orcon mamüll meu (Lu 23:44-46).
nor dungu.
nor raquiduamtual; huiñoraquiduamtual.
NG
ngüñüluhual.
Ti che ngüñüluulu iquelai chem no rume femtripalu hula quiñe medin antü. Pu Israel che ngüñüluuquefui feichi Antü ñi Huiñoduamtungeal pu Israel che ñi Culpan, rupalu engün huesaque dungu ca duamlu engün ñi adnieaeteu Chau Dios. Pu judio fill tripantu ngüñüluuquefui meli rupa, fei ñi acordayal huesaque dungu tañi rupan. Famülque mu duamfalngelai pu cristiano ñi ngüñüluhual (Esd 8:21; Is 58:6; Lu 18:12).
Ñ
Ñidol tañi iyael.
Tüfachi iyael mu mülequei fayümngenochi cofque ca pulcu. Adentulei Cristo tañi cuerpo ca tañi mollfüñ. Biblia huercüfi pu cristiano ñi femal tüfachi trahun, feimu Trahun Jesús tañi lan ñi acordangeal pingequei (1Co 11:20, 23-26, nota).
ñihualuhun.
O
olibano.
Trufquen reque cam resina nentungelu fillque anümca meu Boswellia pingelu. Lüpümngelu, cochü nümün tripaquei. Tuculelngequefui tati incienso füchotungelu ti tolto ruca ca Chau Ngünechen ñi ruca mu. Tucungequefui huente ti lüpümngeelchi quetran ca tati cofque mülelu ti Yamfal Mülehue meu (Éx 30:34-36; Le 2:1; 24:7; Mt 2:11, nota).
orcon.
Tüfa mu recüluucülequei quiñe ruca. Salomón tucui fütraque orcon ñi deumayal Chau Dios ñi ruca ca caquelu ruca cheu ñi ngünenieal. Mateo puulu ta Apocalipsis lifru mu, ti orcon adentulei feichi dungu rumel mülequelu (Jue 16:29; 1Re 7:21; Ap 3:12).
orcon mamüll.
Quiñeque mapu mu pünengequefui ñi langümngeal che. Cafei orcon mamüll mu pültrücünungequefui quiñeque la ñi pengelal tañi illamcangen cam ñi ngüfetucheal. Quiñe che caiñetudungufilu ti yamfalngelu, püramyequefilu coilaque dios ñi adentun cam femlu caquelu rume huesaque dungu hune mülefui ñi langümngeal curatun meu cam chumngechi rume. Fei hula pültrücünungequefui ti la orcon mamüll mu quiñe antü müten, fei ñi ngüfetucheal. Femngechi feipi pu judio che ñi ley (Dt 21:22, 23). Pu Roma che quiñeque mu re traricünuquefingün ti che orcon mamüll mu. Fei quiñeque antü rupalu quisu larpuquefui ti che cutrantun mu, huihun, ngüñün cam are meu. Cafei chumngechi femngei ta Jesús, orcon mamüll meu clafantucungequefui ti che ñi cuhu ca ñi namun (Mr 15:24; Jn 19:14-16; 20:25; Hch 2:23, 36). Pu poyequefilu coilaque dios pünequefuingün ti cruz fentren pataca tripantu petu ñi choyüngenon Jesús. Huelu griego quehun mu ti palabra rulpadungungelu orcon mamüll cüpa feipilai cruz. Cafei Jesús feipi tañi pu inanieteu ñi yenieal tañi orcon mamüll, femngechi pengeli chem ñi rupayal engün, tañi ahucangeal, cutrancahual ca yehuelcangeal (Mt 16:24; Heb 12:2).
orcon mamüll ñi poyengequeel.
Hebreo quehun mu feipingelu ʼasheráh epu dungu adentuleafui: 1) quiñe orcon mamüll adentulelu Aséra pingechi diosa. Pu Canaán che poyequefuingün ca raquiduamquefuingün ñi eluquefiel püñeñ tati pu domo. 2) Quiñe adentun tüfachi diosa mu. Feitichi orcon huitracünungequefui ca quiñeque troquiñ tuculelngequefui trafla. Feitichi orcon cafüdngequelafui peno cam quiñe anümca müten ngeafui chi (Dt 16:21; Jue 6:26; 1Re 15:13).
P
parousía.
Griego quehun cüpa feipi “müleal quiñe che engu”. ¿Tunteñmayai Jesús ñi mülen iñchiñ mu cam tañi parousía pingelu? Coni eluulu ñi ngünenieal huenu mu ca puhuai afle mapu müleyechi dungu. Petu rupalele feichi antü, Jesús mülei reque pu che engün. Huelu ngepacünulai müten. Doi mai alüñmayai ñi mülen (Mt 24:3).
Pascua.
Fiesta fill tripantu femngequelu, femngequefui ti 14 antü abib cüyen mu, fei hula nisan pingetui tüfachi cüyen. Tüfa mu acordangequefui feichi lifretripalu pu Israel che Egipto mapu mu. Fei engün iloquefui ca cancantucuquefui quiñe cordero cam quiñe pichi capüra. Fei ingequefui füre tucucan engu ca fayümngenochi cofque (Éx 12:27; Jn 6:4; 1Co 5:7).
pelontuchequelu.
Pentecostés.
Pu judio huentru cüla fütraque fiesta mu mülefui ñi amual ta Jerusalén, Pentecostés fei tati epungelu. Génesis puulu ta Malaquías lifru mu Fiesta de la Cosecha cam Fiesta de las Semanas pingequefui. Cafei Mateo puulu ta Apocalipsis lifru mu Pentecostés pingefui tüfachi fiesta. Pentecostés cüpa feipi ‘quechu maringechi antü’. Femngequefui 50 antü rupalu ti 16 conchi nisan cüyen mu (Éx 23:16; 34:22; Hch 2:1).
Pepicahun Antü.
pergamino.
Trülque ufisa, capüra cam pichi culliñ cheu huirintucungequefui. Doi cümefui ta papiro meu. Pergamino mu huirintucungei chi Biblia. Cüpalelen ti pergamino pifi Pablo ta Timoteo, tüfa niepelafui quiñeque troquiñ ti lifru Génesis puulu ta Malaquías. Quiñeque huirintucun tati Rollos del mar Muerto pergamino ürque (2Ti 4:13, nota).
piuqueyen.
Quiñeque mu griego quehun feipilei agápe. Tüfa ta pengelal piuqueyen inaniengen mu cümeque ngülam. Tati nielu femngechi piuqueyen falintuquefi ca duamtuquefi inei ca chem tañi piuqueyefiel (Mt 22:39; Jn 3:16). Caquelu rupa griego quehun feipilei philéo, cüpa feipi “duamtuafiel” cam “hueniyeafiel”. Femngechi piuqueyeuquei pu familiahuen ca cümeque huenihuen. Rume fülmaucülequei engün (Jn 5:20).
piuqueyen afquenolu.
Fentren rupa femngechi rulpadungungequei ti palabra hebrea jésedh. Ti che pengelquelu tüfachi piuqueyen femquei tañi feipicünuel, nor dungu femquei, manelfal chengei ca püntütripaquelai feichi che tañi piuqueyefiel. Fentren rupa Chau Ngünechen pengelelfi tati pu che tüfachi piuqueyen. Cafei tati pu che pengelafui cangelu che tüfachi piuqueyen (Éx 34:6; Rut 3:10).
pod cudumuhun.
Griego quehun mu pornéia pingequei. Coneltulei quiñeque pod cudumuhun Chau Ngünechen tañi condenaquefiel. Tüfa ta ñihualuhun, cudumuhual fei ñi llohual plata, cudumuhual pu curehuen-ngenolu, cudumuhual chaf huentru cam chaf domo engu ca cudumafiel pu culliñ. Apocalipsis lifru feipi tati cüri domo, ñihua domo “Fütra Babilonia” pingelu femquei pod cudumuhun. Femngechi pengeli chumngechi reyüconcülei mapu müleyechi pu gobernante engün, fei ñi elungeal autoridad ca falinque fillem (Ap 14:8; 17:2; 18:3; Mt 5:32; Hch 15:29; Gál 5:19). Ngüneduamnge CÜRI DOMO.
Pornéia.
Ngüneduamnge POD CUDUMUHUN.
prostituta.
Ñihua domo cam cüri domo ca pingequei. Cudumuuquei caquelu che engün, fei ñi cullingeal. Griego quehun mu pórnē pingequei, cüpa feipi ‘fendeal’. Quiñeque mu Biblia nütramcai ñi ca femngechi femquen pu huentru. Moisés ñi ley feipi ñi femngenoal tüfachi dungu. Jehová ñi ruca mu lloungequelafui plata hueulu ti che tañi cudumuhun mu. Huelu ti coilaque religion conquefui tüfachi dungu mu tañi huehual plata (Dt 23:17, 18; 1Re 14:24). Quiñeque che cam troquiñche serfiquefiñ ta Chau Dios piquei, huelu püramyequefi coilaque dios ñi adentun. Cüri domo cam prostituta feipingequei engün Biblia meu. Apocalipsis lifru mu femngechi feipingequei tati coilaque religion “Fütra Babilonia” pingelu, reyüconquei mapu müleyechi pu gobernante engün, fei ñi elungeal autoridad ca falinque fillem (Ap 17:1-5; 18:3; 1Cr 5:25).
püllü.
Hebreo quehun feipingequei rúaj, griego quehun mu pnéuma. ¿Chem cüpa feipi tüfachi epu palabra? 1) Ti cürüf. 2) Com pu mongelelu ñi neyen. 3) Ñi chum duamcülen pu che tañi piuque, tüfa nengümqueyu ñi femal ca feipial fillque dungu. 4) Huercün dungu cüpalu Chau Ngünechen mu cam chem püllü meu rume. 5) Pu cümeque püllü ca pu huesaque püllü. 6) Chau Ngünechen tañi nehuen. Biblia mu ti palabra rúaj ca pnéuma pengelquelai ti püllü ñi amulen tañi mongelen deu lale ti che (Éx 35:21; Sl 104:29; Mt 12:43; Lu 11:13).
pünoquetranal.
Femngechi hudamentungequei ti fün quetran ca tati pinu. Quiñe garrocha mu femngequefui, huelu rume alün-ngele ti cosecha femngequefui ti cüdau culliñ mu, trillo cam rodillo mu. Cheu ñi ngülümngen ti cosecha huingüdngequefui tüfachi trillo cam rodillo, cheu ñi liftungequem ti quetran (Le 26:5; Is 41:15). Ngüneduamnge CHEU ÑI PÜNONGEQUEN QUETRAN.
Q
quelluquefilu pu loncolelu.
Griego quehun mu diákonos feipingequei. Caquelu rupa tüfachi palabra rulpadungungequei “cüdaufe” cam “serfiquelu”. Biblia feipi ñi chumngechi chengeal pu huentru ñi elungeal tüfachi elfal cüdau trahunche mu (1Ti 3:8-10, 12).
querubin.
quimeltuquelu Moisés ñi ley.
Ellaca mu copiaquefuingün Chau Ngünechen ñi huirintucuel. Huelu Jesús ñi antü mu rume adümquefuingün Moisés ñi ley ca quimeltulelquefingün pu che (Mr 12:38, 39; 14:1).
R
Rabí (Rabbóni).
Quimeltufe. Petu ñi choyüngenon Jesús, femngechi feipingequefui pu yamfal che, pu falin chengelu. Cüpa feipi “tañi ñidol”. Femngechi ayüquefui ñi feipingeal quiñeque quimche ca pu quimeltuquelu Moisés ñi ley.
rag cüdauquelu.
Deumaquei challa, rali ca caquelu chemcün rag meu cam fotra. Chau Jehová chumngechi ñi ngüneniefiel ti pu che ca tati troquiñche trürümngequei ti cüdaufe ñi femfiel tati rag (Is 64:8; Ro 9:21).
rangiñelhue.
recomprador.
Quiñe huentru tati doi fülmaucülechi parientengen mu, mülefui ñi quelluafiel tañi pariente huesa rupamequelu. Por ejemplo, quiñe che esclavongefule, feitichi fülmaucülechi pariente ngillanentuafeyu tañi lifrenentuaeteu. Cafei quiñe che defen dungu mu ñamümfule tañi mapu cam chem ñi elcünueteu ñi chau yem, feitichi fülmaucülechi pariente huiño ngillayafui chem ñi ñamümel ti che (Le 25:25-27, 47-54). Ca femngechi feipingequefui pu huentru nieñmafilu tañi pariente yem ñi domo, fei ñi eluafiel cüpanche tati huentru lalu (Rut 4:7-10).
rescate.
Cullingequei ñi lifrenentuafiel quiñe che presulelu, cam ñi castigangenoal, cutrancaunoal, tañi femnoal quiñe dungu cam ñi montulngeal culpan dungu meu, yafcan dungu. Re plata müten cullingequelafui (Is 43:3). Fillque dungu mu mülefui ñi cullingeal tüfa. Israel mu Chau Jehová ngen-ngefui pu hunenque fotüm ca hunenque coñi, ca elcünungequefui ñi poyengeal ta Chau Jehová. Ñi lifreleal engün tüfachi dungu mu, mülefui ñi cullial (Nú 3:45, 46; 18:15, 16). Neicümcünungefule quiñe huapo toro, fei langümchele, ti ngen toro mülefui ñi cullial quisu tañi langümngenoal (Éx 21:29, 30). Huelu inei rume langümchele quisu tañi pin mu, elungelafui ñi cullial tañi montual (Nú 35:31). Cristo cullipai quisu tañi mongen mu ñi lifrenentuafiel culpan ca lan dungu mu tati pu feyentulelu. Tüfa tati doi fütra dungu ñi cullingeel nütramcalu Biblia (Sl 49:7, 8; Mt 20:28; Ef 1:7).
rüfngechi Ngünechen.
Hebreo quehun mu femngechi feipingequei ta “Chau Ngünechen”. Fentren rupa pengeli Chau Jehová ñi quiñen rüfngechi Ngünechen ngen, femngechi ñi trürümfalngenoal pu coilaque dios engün. Feipilu “rüfngechi Ngünechen” pengeli chem ñi cüpa feipin fillque texto hebreo quehun mu (Gé 5:22, 24; 46:3; Dt 4:39).
rüngan.
Femngechi huirintuculele minuscula mu, cüpa feipi cheu rüngaltucungei quiñe che. Huelu huirintuculele Rüngan mayuscula mu, hebreo quehun feipilei Seol, griego quehun Hades. Biblia mu tripai tüfa quiñe adentun reque, pengelquei cheu ñi umaucülen pu layelu. Tati pu mülelu tüfachi Rüngan mu reque femquelai cüdau ca quimhuequelai chem no rume (Gé 47:30; Ec 9:10; Mt 27:61; Hch 2:31). Griego quehun ti palabra mnēméion ca rulpadungungequei “rüngan”, cüpa feipi “acordayal”. Tüfachi palabra pengeli ñi acordangequen ti lalu (Jn 5:28, 29).
rüngi.
rüpü.
Biblia mu adentulei chumngechi quiñe che yeniei tañi mongen, ñi femquen Chau Jehová ñi ayüqueel cam tañi ayüquenoel. Pu che feipiquefui Jesucristo ñi pu inanieteu miyauquei “Chau Dios ñi rüpü” mu tañi feyentuquefiel engün ca inayentuquefiel ta Jesucristo (Hch 19:9).
S
sacerdote.
Chau Dios ñi üi mu dunguquefingün tati pu che. Quimeltuchequefuingün Chau Dios mu ca tañi ley. Rangiñelhuelefuingün Chau Dios ca tati pu che engün. Feimu hulquefuingün chalintucun, dunguñpequefingün ca ngillatuñmaquefingün tati pu che. Petu ñi mülenon Moisés ñi ley, ti ngen familia sacerdote reque felefui tañi pu che meu. Moisés ñi ley mu pu sacerdote Aarón ñi cüpanchengefui Leví troquiñche meu. Caquelu huentru Leví chengelu quelluquefeyu engün. Elcünungelu ti hue eldungu, pu dullin cristiano quiñe troquiñchengerpuingün, com sacerdotengeingün. Jesucristo fei tati Hunen Lonco Sacerdote (Éx 28:41; Heb 9:24; Ap 5:10).
sacu.
saduceo.
Quiñe falin religioso troquiñche ñi nieel pu judio. Quiñeque che coneltulelu tüfachi troquiñche mu sacerdotengefui, caquelu pu sacerdote ñi familiangerquei ca quiñeque coneltulefui ti Sanedrín meu. Famentuquefingün pu fariseo ñi fillque huimtun ca tañi feyentun. Feyentuquelafuingün ti huiñomongetun ca ñi mülen pu cümeque püllü. Caiñetufingün ta Jesús (Mt 16:1; Hch 23:8).
safiro.
Tüfachi falin cura chayangquintun-ngei. Caque rume color niei, huelu doi falin-ngei tati callfülelu. Feichi safiro nütramcangelu Biblia mu callfüngepelai.
salmo.
Ülcantun ñi püramyengeal Chau Dios. Pu che dungulquefuingün tañi ayecahue, fei ülcantulelquefuingün ta Chau Jehová. Femngequefui fütraque trahun mu ñi püramyengeal ta Chau Jehová, quiñe ta tüfa Chau Ngünechen ñi ruca Jerusalén huaria mu (Lu 20:42; Hch 13:33; Snt 5:13).
Salomón pingechi rupapeyüm.
Jesús ñi antü mu Chau Ngünechen ñi ruca niefui quiñe pasillo, epuñpüle nierquei orcon. Mülerquefui huecuntu mülechi lepün tripahue antü püle. Feipingequefui ñi mülefel Salomón ñi deumaelchi ngillatuhue ruca mu. Tüfa püle rupai Jesús puquem mu. Fei mu trahuquefui pu hunenque cristiano ñi püramyeafiel ta Chau Dios (Jn 10:22, 23; Hch 5:12).
Samaria.
Israel ñi mari troquiñche picun püle mülelu. Samaria ca pingequefui tañi doi falin huaria 200 tripantu mu. Ti huincul cheu ñi elcünungeel ti huaria ca femngechi üi nierquei. Jesús ñi antü mu, picun püle Samaria mapu mülerquei Galilea mapu, sur püle mülerquei Judea mapu. Jesús cüpa amuldungulafui tüfachi mapu meu, huelu quiñeque mu rupai tüfa püle, fei amuldungulelfi quiñeque Samaria che. Pedro pünei reque ti epungechi llafe tañi elungeel pu Samaria che lloulu Chau Ngünechen ñi nehuen (1Re 16:24; Jn 4:7; Hch 8:14).
Samaria che.
Ellaca mu femngechi feipingequefui Israel ñi mari troquiñche picun mülelu. Huelu 740 tripantu petu ñi mülepanon Jesús, pu Asiria che nüfingün Samaria mapu, fei Samaria che ca pingetui pu catripanche yengelu üyeu. Jesús ñi antü meu femngechi feipingehuelai feichi pu che, doi mai Samaria che feipingequefui pu concülelu quiñe religioso troquiñche mülelu Siquem ca Samaria püle. Ñi feyentuqueel tüfachi pu che trürngelafui chem ñi feyentuqueel pu judio che (Jn 8:48).
Sanedrín.
Tati doi falin tribunal nielu pu judio. Jerusalén huaria mülefui. Jesús ñi antü mu 71 huentru coneltulefui, tüfa tati hunen lonco sacerdote ca caquelu huentru niefulu feichi cüdau. Cafei coneltulefui pu loncolelu, pu füchaque huentru, pu loncolelu troquiñche meu, pu parienteyefilu pu hunen lonco sacerdote ca pu quimeltuquelu Moisés ñi ley (Mr 15:1; Hch 5:34; 23:1, 6).
Satanás.
sello.
Yafüngechi chemcün, tucungequefui fotra, chapad cam cera mu ñi marcayal. Pengeli inei ngen-ngei chem ñi marcacünungeel. Cafei pengeli ñi rüfngen quiñe dungu cam ñi eldungucünuhun epu che. Quiñe documento, puerta cam rüngan niefule sello, ngelafui ñi nülangeal. Pu cuifique sello deumangequefui cura meu, marfil cam mamüll. Huaichüfcülequefui tañi fillque huirin. Niei sello feipingele quiñe dungu, adentulei ñi rüfngen, niei tañi ngen cam ellcalei (2Co 1:22; Ap 5:1).
Seol.
sinagoga.
Tüfa cüpa feipi ‘trahun’. Epe com Biblia mu femngechi feipingequei pu judio ñi ngillatuhue ruca. Fau trahuquefuingün ñi papeltual Chau Ngünechen ñi huirintucuel, llohual ngülam, llellipual ca amuldungual. Jesús ñi antü mu, tati fütraque huaria mu quiñe sinagoga müten ngelafui, doi mülequefui. Caquelu huaria mu quiñe müten mülequefui (Lu 4:15, 16, nota; Hch 13:5, nota).
Sion; Sion huincul.
Jebús huaria mu mülefui quiñe troquiñ mapu nehuencünungelu ñi hueichayal cam quehuayal, feita Sion ürque. Tüfa mu mülefui pu Jebús che. Huente huincul Jerusalén mu mülefui, sur püle. David hueufilu ta Sion deumai tañi fütra ruca üyeu, feimu “David ñi Huaria” pingetui (2Sa 5:7, 9). David yefi Jehová ñi falin caja tüfachi huincul mu, feimu Jehová huichucünufi ta Sion quisungealu. Rupachi antü mu Sion ca pingetui cheu ñi mülen Chau Ngünechen ñi ruca Moria huincul mu. Quiñeque mu Sion pingequefui com Jerusalén huaria. Mateo puulu ta Apocalipsis lifru mu quiñe adentun reque nütramcangei ta Sion (Sl 2:6; 1Pe 2:6; Ap 14:1).
Siria mapu.
Mateo puulu ta Apocalipsis lifru mu, Siria fei ta quiñe troquiñ mapu ñi ngünenieel Roma, tañi doi falin huaria fei ta Antioquía. Génesis puulu ta Malaquías lifru mu ca nütramcangei ta Siria, huelu doi mapu ngünenierquefui. Aram ca pingerquefui tüfa. Tati gobernadorcülelu Siria mapu meu ca adniequefui com Palestina mapu (Lu 2:2; Hch 18:18; Gál 1:21).
Sirte.
Epu troquiñcülechi co nehue llufüngenolu. Inaltu Libia mapu mu mülefui África picun püle. Tüfa mu ti cuyüm huircolerquei, trumaucülerquei. Tati fütraque reu cam auna nengümquefeyu, feimu pu miyauquelu lafquen mu llicaniequefingün (Hch 27:17).
sistro.
Tüfa quiñe cuifi dungulhue, pañillhue mu deumangei, epe chincülcülei reque ca niei cheu ñi nüngequen. Nengümngen mu triliuquei.
sortian dungu.
T
talento.
Pu hebreo che fanetuquefui fillque chemcün talento mu, tüfa tati doi fanelu ca tati doi falilu. Fanefui 34,2 kilo. Ti talento ñi pünequefel pu Grecia che doi pichingefui, fanefui 20,4 kilo (1Cr 22:14; Mt 18:24).
tapa tacuquefilu ti falin caja.
Tüfachi falin caja pengelquei Chau Ngünechen ñi eldungu. Feichi Antü ñi Huiñoduamtungeal pu Israel che ñi Culpan, ti hunen lonco sacerdote pachüglelquefui pu culliñ ñi mollfüñ. Hebreo quehun tüfachi dungu cüpa feipi ‘tacungeal’ cam ‘famentungeal’ ti culpan cam yafcan. Ti tapa re oro deumangei ca huente püle nierquei epu querubin puñmalelu. Quiñeque mu “tapa” müten feipingequei (Éx 25:17-22; 1Cr 28:11, nota; Heb 9:5, nota).
Tarsis cüpachi farcu.
Tártaro.
Mateo puulu ta Apocalipsis lifru mu, Tártaro adentulei chumngechi ñi felen pu püllü feyentuhuenofilu ta Chau Dios Noé ñi antü mu, fei engün presulei reque. Pu poyequefilu coilaque dios feipiquefuingün Tártaro fei ta quiñe dumiñcülechi carcel miñche mapu mülelu, cheu ñi ütrüftucungen pu dios müte falinolu. Huelu ñi feipin 2 Pedro 2:4 nütramcalai ñi ütrüftucungen feichi Tártaro mu “pu püllü culpalu”, yafcalu. Doi mai griego quehun feipi tartaróō, tüfa rulpadungungei ütrüftucual Tártaro mu. Pengeli Chau Dios ñi müntuñmafiel tañi falin cüdau engün ca ñi huemünentufiel huenu mu. Cafei dumiñmacünufi reque tañi raquiduam engün, femngechi quimhuelaingün Chau Dios ñi ayünieel. Biblia feipi fei engün apümcangeai quiñentrür tañi ñidol engün, Satanás chi Huecüfü. Ti Tártaro trürcülelai ti “fütraconchi lolo” mu ñi feipiel Apocalipsis 20:1-3.
toro.
Capun-ngequei ti toro ñi ñomümngeal, fei ñi cüme cüdahual. Huelu pu Israel che femquelafui chi. Capun-ngefule ti culliñ, chalintuculelngelayafui ta Chau Jehová. Ñomque toro nierquefui pu Israel che.
TR
trahunche.
tribunal; cheu ñi juiciantucungequem pu che.
Quiñeque mu huecuntu mülequefui ca alüpüracünungequefui. Pürapüratuhue mu püraquefui che. Tüfa mu anücünuuquefui pu juez ñi feipiafiel pu che chem tañi dulliel. Cheu feipilei “Chau Ngünechen ñi tribunal” ca “Cristo ñi tribunal” adentulei chem ñi elcünuel Chau Jehová ñi juzgacheal (Ro 14:10; 2Co 5:10; Jn 19:13).
trilla.
Nentupinungequefui ti fün quetran. Quiñeque mu rüngi mu femngequefui. Huelu alün quetran mülefule, pu culliñ tuculelngequefui trillo cam rodon ñi pünolquetranal (Le 26:5; Is 41:15). Ngüneduamnge CHEU ÑI PÜNOLQUETRAN-NGEQUEM.
trompeta.
Ayecahue pañillhuengelu, cullcull reque felei. Dungulngequefui ñi nentual ülcantun ca feipiafiel pu che chem chumal. Apocalipsis lifru mu dungulngelu ti trompeta quimelngei Chau Jehová ñi juicio ca caquelu falinque dungu fei mu cüpalu (1Co 15:52; Ap 8:7-11:15).
trülque carpa.
Cuntra ca pingei. Tüfa mu guardangequefui pulcu cam caquelu co. Ñi deumangeal, llochonentuñmangequefui ñi trülque tati capüra, ufisa cam caquelu culliñ. Ti pulcu huadcüquei, feimu mülei ñi tucungeal hueque trülque carpa mu, femngechi ñi paucünoal, trofnoal. Ti huesaque trülque carpa doi yafüquei, feimu paucüquei huadcülu ti pulcu (Jos 9:4; Mt 9:17).
U
ungir.
Hebreo quehun mu tüfachi palabra feipi ‘tucual aceite’, ‘huifontucungeal’, ‘hutrulal cam huitrulal’. Hutrulelngequefui aceite quiñe che cam quiñe chemcün, femngechi huichucünungei ñi femal elfal cüdau. Mateo puulu Apocalipsis lifru mu, tüfachi palabra pengeli Chau Dios ñi hutrulelfiel reque tañi nehuen pu dullinche, femngechi dulliquefi engün ñi müleal huenu mu (Éx 28:41; 1Sa 16:13; 2Co 1:21).
Urim ca Tumim.
Ti Israel troquiñche nien mu dungu, tati hunen lonco sacerdote pünequefui tüfachi epu chemcün ñi quimal Chau Jehová tañi ayünieel. Sortian dungu reque femngequefui. Tati sacerdote conlu ti ngillatuhue tolto ruca mu, yeniequefui feitichi fillem tati pichi carpa yenielu tañi rücu mu. Pu Babilonia che apümcafilu Jerusalén, pünengehuelai chi (Éx 28:30; Ne 7:65).
Ü
ünufalngelu.
Biblia mu femngechi feipingeafui quiñe chemcün cam quiñe che podcülelu cam nienolu lif mongen. Huelu fentren rupa femngechi feipingequei tati cümenolu chumngechi feipi Moisés ñi ley (Le 5:2; 13:45; Hch 10:14; Ef 5:5).
üñiftual.
Ñimitual chem ñi ñimitunoel pu cosechamequelu, fei engün ngüneduamafuingün cam ngüneduamlayafuingün rume ñi elcünuel fün. Ñi feipin Moisés ñi ley, pu cosechamequelu ngelafui ñi ñimitual com ñi mülen inaltu lelfün. Cafei ngelafui ñi tunoal com ti aceituna ca ofad. Femngechi Chau Dios quelluquefui pu pofre, pu duamnielu quellu, pu ca cüpanche, pu lantu domo ca pu cuñifallcülelu. Chau Dios elufi engün ñi üñiftual chem ñi elcünuel pu cosechamequelu (Rut 2:7).
ürcütun antü.
Biblia mu femngechi pingequei quiñe saquin antü ñi nieel pu judio fill semana. Sabbat pingequei famülque mu. Hebreo quehun mu cüpa feipi ‘cansatual’ cam ‘fentecünual’. Tüfa tati reglengechi antü ñi nieel pu judio tañi semana mu. Conquei viernes conantü mu ca puuquei sabado conantü mu. Ürcütun antü mu femngequelafui chem cüdau no rume, pu sacerdote müten cüdauquefuingün Chau Ngünechen ñi ruca mu. Ürcütun antü troquingequefui caquelu fiesta, ti reglengechi tripantu ca ti quechu maringechi tripantu. Ürcütun tripantu mu cüdaungequelafui ti mapu ca cofrangequelafui ñi defen tañi chaf hebreo che. Moisés ñi ley feipi chem ñi femngenoal ürcütun antü mu. Com ñi feipin cüdaungelai ñi inangeal. Huelu pu loncolechi religioso doi fütra amulcünuingün ñi feipin ti ley. Feimu Jesús ñi antü mu pu che pepi inaquelafui com ñi feipin engün (Éx 20:8; Le 25:4; Lu 13:14-16; Col 2:16).
Y
yamfal cofque.
Epu troquiñ cofque, elcünungequefui huente mesa ti Yamfal Mülehue tolto ruca mu ca Chau Ngünechen ñi ruca. Caque quiñeque troquiñ niei cayu cofque. Fill sabado tucungequefui hueque cofque. Pu sacerdote müten iquefui ti cofque nentungelu (Éx 25:30; Le 24:5-9; 2Cr 2:4; Mt 12:4; Heb 9:2).
Yamfal Mülehue.
Tati hunen pieza doi fütrangelu ñi nieel ti tolto ruca ca Chau Ngünechen ñi ruca. Trürlai tati Doi Yamfal Mülehue meu, tüfa doi ponhuitulefui. Ti Yamfal Mülehue ñi nieel ti tolto ruca mülerquei ti oro candelabro, ti oro altar cheu ñi füchotungequen incienso, ti mesa cheu ñi elngequen ti yamfal cofque ca quiñeque chemcün orongelu. Ti Yamfal Mülehue ñi nieel Chau Ngünechen ñi ruca mülefui ti oro altar, mari oro candelabro ca mari mesa cheu ñi elngequen ti yamfal cofque (Éx 26:33; Heb 9:2).
yamfal oro lamina.
Huilüfcülechi oro lamina. Huirintucuniei hebreo quehun meu “Lifngei ta Jehová”. Tol mu tucungequefui tati hunen lonco sacerdote ñi munulonco meu (Éx 39:30). Ngüneduamnge apéndice B5.
yehuequenochi huesa femün.
yucu.
Mamüll meñcu yequefilu quiñe che, epuñpüle tuculelngequefui fanechi dungu. Cafei yucu tuculelngequefui pu mansun ñi cüdahual mapu ca ñi huitrayal chemcün. Pu esclavo yucu mu meñcu yequefuingün fanechi dungu, feimu ti yucu adentulei ñi esclavongen quiñe che, tañi huesa ngüneniengen ca tañi cutrancahun. Ti feipin famentual ti yucu cüpa feipi ñi lifretripayal quiñe che, fei esclavongehuelai, huesa ngünengehuelai ca femhuelai fanechi cüdau (Le 26:13; Mt 11:29, 30).
Z
Zenón.
Tüfa quiñe cuifi huentru. Quimeltuquefui tüfachi dungu: pu che mülei ñi maneluucüleal tañi quimün mu müten ca duamcülenoal tati cutrancahun ca tati ayühun. Pu che inaquefilu Zenón ñi quimeltun “estoico” pingequefui.
Zeus.
Pu Grecia che ñi doi falin dios. Listra huaria mu Zeus pingefui ta Bernabé. Püllelelu tüfachi huaria pengei cuifique huirintucun feipilu “Zeus ñi pu sacerdote” ca “Zeus, tati dios-sol”. Pablo tripatulu Malta huapi meu pürapui quiñe farcu mu. Huechuñ püle adentunierquei “Zeus ñi pu fotüm”, tüfa tati epuntu Cástor ca Pólux pingelu (Hch 14:12; 28:11).
