Éxodo 33:1-23
33 Chau Jehová ca feipifi ta Moisés: “Quiñentrür amuleaimi tüfachi troquiñche tami entufiel Egipto mapu meu. Amuaimi feichi mapu tañi feipicünufiel ta Abrahán, Isaac ca Jacob. Feipifiñ: ‘Eluafiñ tüfachi mapu tami pu cüpanche’.
2 Huercüan quiñe cüme püllü, huneleai eimi meu. Fei huemünentuafiñ* pu Canaán che, amorreo che, Het che,* perizita che, heveo che ca pu jebuseo che.
3 Amuaimi tüfachi mapu mu cheu ñi mülen fentren lichi ca miel.* Huelu amulayan eimün meu. Trencül piuquengeimün, fei apümcahuafuyiñ petu tamün amulen”.
4 Tati pu che allcülu tüfachi cutrancahun-ngechi dungu, rume hueñancüi engün. Feimu inei no rume tuculai tañi llancatu.
5 Chau Jehová feipifi ta Moisés: “Feipiafimi pu Israel che: ‘Eimün trencül piuquengeimün. Matu rupayafun eimün meu ca apümcahuafuyiñ. Feimu petu tañi dullinon chem tamün chumafiel, tuculayaimün tamün llancatu’”.
6 Feimu pu Israel che entuingün tañi llancatu Horeb huincul meu ca huiño tucuhuelaingün.
7 Fei Moisés entui tañi tolto ruca* cheu ñi mülen pu che, pichi camapucünufi, fei trahunhue tolto ruca üituculelfi. Com pu che ayülu ñi ramtuafiel ta Chau Jehová, tripaingün cheu ñi toltoucülen* ca amuingün ti trahunhue tolto ruca huecun mu mülelu.
8 Amun mu Moisés ti tolto ruca mu, com pu che huitrapüraquefuingün. Itrotripa tañi tolto ruca mu com huitracünuuquefuingün, fei adquintuniefingün ta Moisés petu tañi connon ti tolto ruca mu.
9 Conün mu müten Moisés tati tolto ruca mu, ti tromü nagquefui, fei huitracünuuquefui itrotripa ti tolto ruca mu petu dungumequelu Moisés engu Chau Dios.
10 Tati pu che pefilu ti tromü itrotripa Moisés tañi tolto ruca mu, com pu che pochongnagquefuingün* itrotripa quisuque tañi tolto ruca meu.
11 Chau Jehová dunguquefi ta Moisés chumngechi dunguuqueingu epu huentru. Moisés huiñotulu cheu ñi toltoucülen pu che, Josué mülecai ti tolto ruca meu. Feitichi huentru, Nun tañi fotüm, quelluquefi ca serfiquefi ta Moisés.
12 Fei Moisés feipifi ta Chau Jehová: “Eimi feipien ‘Adniefinge tüfachi pu che’, huelu feipilaen inei huercüaimi tañi compañaeteu. Ca feipien ‘Cüme quimnieyu* ca cüme troquinieyu’.
13 Feimu füreneen, cüme troquieli, quimeltuen tami rüpü, femngechi quimafeyu ca ayühuelnieafeyu. Tüfachi troquiñche, eimi tami troquiñche tati, ngüyünentulayaimi”.*
14 Fei Chau Dios huiñoldungui:* “Iñche llemai compañnieayu, ürcütulayu”.
15 Fei Moisés feipi: “Eimi compañniemunoliyiñ, feipimulayaiñ taiñ tripayal tüfa meu.
16 Cüme troquieli iñche ca tami troquiñche, ¿chumngechi quimngeai? Compañniemuliyiñ, iñche ca tami troquiñche trürlayaiñ caquelu troquiñche mapu meu mülelu”.
17 Chau Jehová feipifi ta Moisés: “Cüme troquinieyu ca cüme quimnieyu.* Feimu feman tüfachi dungu tami feipiel”.
18 Moisés feipi: “Füreneen, eluen ñi peafiel tami afmatufalngen”.*
19 Chau Dios feipi: “Rupayan tami adquiñ mu, fei peaimi fente ñi cüme piuquengen iñche. Cafei tami adquiñ mu huldunguan tañi üi, Jehová. Füreneafiñ inei rume tañi ayüel, ca cutranpiuqueyeafiñ inei rume tañi ayüel”.
20 Huelu ca feipi: “Peñmalayaen tañi ange. Chem che rume peelimu, fentepuai ñi mongen”.
21 Cafei Chau Jehová feipifi ta Moisés: “Tüfa mu mülei cheu tami müleal, inafülcülei iñche mu. Huitracünuunge tüfachi fütra cura mu.
22 Rupamequeli, pengelelayu tañi afmatufalngen, fei elcünuayu quiñe lolo ti cura meu. Cuñiutucuayu tañi cuhu mu.
23 Deu rupali, entuan tañi cuhu, fei peaimi tañi furi. Huelu peñmalayaen tañi ange”.
Quimnieal
^ Ca lof mu: “Quechanentuafiñ”.
^ Cam: “Hitita”.
^ Ca lof mu: “Moshcon, mishqui”.
^ Ca lof mu: “Carpa”.
^ Ca lof mu: “Cheu ñi anücünun tañi tolto ruca”.
^ Ca lof mu: “Lloyünagquefuingün, ponornagquefuingün”.
^ Hebreo quehun feipilei: “Quimnieñmaeyu tami üi”.
^ Ca lof mu: “Upenentulayaimi”.
^ Ca lof mu: “Lloudungui”.
^ Hebreo quehun feipilei: “Quimnieñmaeyu tami üi”.
^ Cam: “Tami pelon”.
