Samuel ñi hunen lifru 1:1-28
1 Mülerquefui quiñe Efraín che, Elcaná pingei. Tuhui Ramataim-Zofim huaria* mülelu Efraín ñi mahuidantu mapu. Jeroham pingefui ñi chau ca tañi lacu Elihú pingei, tüfa chauyefi ta Tohu, Zuf tañi fotüm.
2 Elcaná niefui epu domo. Quiñe domo Ana pingefui, cangelu Peniná. Tüfachi domo niefui püñeñ, huelu Ana quiñe no rume nielafui.
3 Fill tripantu tüfachi huentru elcünuquefui tañi huaria, fei ñi amual Siló huaria mu tañi püramyeafiel ta Chau Jehová,* tati Ñidolcülelu pu hueichafe mu.* Cafei ñi hultuculelafiel chalintucun.* Tiye mu Hofní ca Finehás sacerdotelerquei engu ñi serfiafiel ta Jehová. Fei tüfa Elí ñi epu fotüm.
4 Quiñe antü, Elcaná huli quiñe chalintucun, hudamfi ca elufi quiñeque troquiñ chalintucun tañi domo Peniná ca com tañi pu püñeñ.
5 Huelu Elcaná piuqueyefi ta Ana, feimu elufi quiñe doi cüme troquiñ. Huelu Chau Jehová elulafi püñeñ ta Ana.
6 Chau Jehová elunofilu püñeñ ta Ana, ti cangelu domo, Ana ñi müri, rumel ayentuquefeyu ñi huesa duamelafiel.
7 Peniná fill tripantu femngechi femfi ta Ana. Fill rupa amulelu Ana Chau Jehová ñi ruca mu, tañi müri domo rume ayentuquefeyu, feimu Ana ngümatripaquefui, cüpa iquelafui rume.
8 Huelu tañi füta Elcaná feipieyu: “Ana, ¿chumngelu* ngümamequeimi? ¿Chemu iquelaimi? ¿Chumngelu fente hueñancüleimi?* Tüfa tañi mülen iñche, ¿fei doi cümepeafui mai nielmi rume mari püñeñ?”.
9 Fei deu icünulu ca putucünulu engün* Siló huaria mu, Ana huitrapürai ca amutui. Feichi mu, ti sacerdote Elí anülefui huancu mu, inafül ti puerta mülelu Chau Jehová ñi ruca mu.*
10 Ana fente ñi hueñancülen, llellipufi ta Jehová. Af ngümalai.
11 Tüfachi dungu feipicünulelfi: “¡Ahuem Chau Jehová, Ñidolcülelu pu hueichafe mu! Adquintuen fente tañi hueñancülen. Iñche eimi tami cüdaufe, fei acordaen,* ngoimalayaen,* eluen quiñe huentru püñeñ. Femülmi, iñche hultuculelayu Chau Jehová, femngechi tami serfiaeteu com tañi mongen mu. Cafei turpu cupilngelayai tañi lonco”.*
12 Ana tiye mu alüñmai ñi llellipumequefiel Chau Jehová, fei Elí leliniefi chumngechi nengümquei tañi mellfü hun.
13 Ana ñochi dungumequefi* ta Chau Dios. Re müllmüllmequei tañi mellfü hun, huelu allcüngelai ñi dungun. Feimu Elí raquiduami ñi ngollilen.
14 Fei Elí feipifi ta Ana: “¿Tuntepuai* tami ngollilen? Fentecünunge tami putun”.
15 Ana huiñoldungueyu:* “¡Femlan ñidol! Iñche putulan* chem pulcu no rume. Rume cutrancaumequen, feimu nütramcalelquefiñ Chau Jehová com tañi hueñancün.
16 Quiñe illamfalngechi domo reque troquinoeli. Rume cutrantupiuquelen ca rume hueñancülen, feimu femngechi dungumequen fantepu mu”.
17 Fei Elí feipieyu: “Cüme feleaimi.* Fei Israel ñi Ngünechen eluaimu tami ngillatufiel”.
18 Fei Ana feipifi ta Elí: “Amulepe tami fürenefiel iñche, eimi tami serfiqueteu”. Fei hula amutui ca itui. Fei hueñancühuelai tañi ange mu.
19 Fei ca antü pulihuen huitraingün. Deu pochongnaglu Chau Jehová ñi adquiñ mu, huiñotuingün tañi ruca Ramá huaria mu. Elcaná cudumuhui tañi domo Ana engu. Fei Jehová acordafi ta Ana.*
20 Fei Ana niepüñeñi. Petu ñi rupanon quiñe tripantu,* choyüi quiñe huentru püñeñ. Ana feipiquefui: “Llellipufiñ ta Jehová tañi eluaeteu ñi püñeñ”, feimu Samuel* pintuculelfi ñi üi.
21 Rupachi antü Elcaná ca com tañi pu familia amuingün ñi eluafiel Chau Jehová ti chalintucun fill tripantu femngequelu ca hulal ti chalintucun eldungu mu.
22 Huelu Ana amulai. Fei feipifi tañi füta: “Fentecünuli ñi moyolfiel ti pichi huentru, fei hula yeafiñ ñi müleal Chau Jehová ñi adquiñ mu. Feica müten mülenagai tiye mu”.
23 Tañi füta Elcaná feipieyu: “Femnge tami doi cümelu troquifiel.* Mülenagnge fau fentecünulmi hula tami moyolfiel ti pichiche. Chau Jehová fempe tami feipiel”. Feimu Ana mülenagi tañi ruca mu, fei amulei ñi moyolfiel tañi püñeñ moyohuenolu hula.
24 Deu moyolhuenofilu, amui tañi pichiche engu Siló huaria mu. Cafei yefi quiñe toro cüla tripantu nielu, mari quiñe kilo rüngo peno* ca quiñe fütra metahue pulcu. Fei Ana puhui tañi pichiche engu Chau Jehová ñi ruca Siló huaria mu.
25 Fei langümngei ti toro. Cafei yelelngei ti pichi huentru ta Elí.
26 Ana feipifi ta Elí: “¡Tañi ñidol, perdonaen! Tañi ñidol, rüf feipicünueyu, iñche fau mülequefun tami inafül püle. Llellipumequefun ta Chau Jehová.
27 Ngillatufiñ ta Chau Jehová tañi eluaeteu tüfachi pichi huentru, quisu elueneu tañi ngillatufiel.
28 Feula hultuculelfiñ* ta Chau Jehová. Com tañi mongen mu Jehová ngen-ngeai ti pichi huentru”.*
Fei* tiye mu pochongnagi Chau Jehová ñi adquiñ mu.
Quimnieal
^ Cam: “Ramá huaria tuulu, quiñe Zuf che”.
^ Cam: “Pochongnagal, lloyünagal, ponornagal Chau Dios ñi adquiñ mu”.
^ Cam: “Quehuafe mu”.
^ Cam: “Füchotun, mañumtun”.
^ Cam: “Chemu”.
^ Cam: “¿Chumngelu huesa duamcülei tami piuque?”.
^ Cam: “Pütococünulu engün”.
^ Tüfa ta Chau Dios ñi tolto ruca.
^ Cam: “Conümpaen, tuculpaen”.
^ Cam: “Upelayaen”.
^ Cam: “Tünai lonco, cal lonco”.
^ Hebreo quehun feipilei: “Tañi piuque mu dungumequefi”.
^ Cam: “Chumtepuai”.
^ Cam: “Lloudungueyu”.
^ Cam: “Pütocolan”.
^ Hebreo quehun feipilei: “Tüngcülen amutunge”.
^ Cam: “Conümpafi, tuculpafi”.
^ Ca feipiafui chi: “Puuchi antü mu”.
^ Tüfachi üi cüpa feipi “Chau Dios ñi üi”.
^ Hebreo quehun feipilei: “Tati cümelu eimi tami adquiñ mu”.
^ Hebreo quehun feipilei: “Quiñe efá”. Ngüneduamnge apéndice B14.
^ Cam: “Arelelfiñ”.
^ Cam: “Arelelngeai ta Chau Dios”.
^ ¿Elcaná peno?
