Samuel ñi epungechi lifru 1:1-27
1 Deu lalu Saúl, David huiñotui deu hueufilu pu Amalec che, fei epu antü mülenagi Ziclag huaria mu.
2 Cüla antü hula, cheu ñi mülen Saúl tañi tolto ruca* cüpai quiñe huentru, huichafcalei tañi tacun* ca trufürmalei tañi lonco. Fei fülpalu* David mu, trani mapu mu ca pochongnagi.*
3 David ramtufi: “¿Cheu cüpaimi?”. Ti huentru huiñoldungueyu:* “Lefmahun cheu ñi mülen pu Israel che ñi tolto ruca”.
4 Fei David feipifi: “Füreneen, feipien, ¿chem rupai?”. Ti huentru huiñoldungueyu:* “Pu che lefmahui ti hueichan mu* ca fentren che lai. Saúl engu Jonatán ca laingu”.
5 David ramtufi ti hueche ñi feipieteu chi dungu: “¿Chumngechi quimimi ñi lan Saúl ca tañi fotüm Jonatán?”.
6 Ti hueche feipi: “Mülelu iñche Guilboa mahuida püle, perumefiñ ta Saúl recüluucülelu tañi huaiqui mu.* Fei ti hueichan carretela* ca pu püracahuellulelu fülcülepai Saúl mu.
7 Quisu huiñoquintulu, fei peeneu ca mütrümeneu.* Iñche feipifiñ: ‘¡Fau mülen!’.
8 Saúl ramtueneu: ‘¿Inei am ta eimi?’. Iñche huiñoldungufiñ:* ‘Iñche quiñe Amalec chengen’.
9 Fei feipieneu: ‘Füreneen, cüpange fau ca langümen. Rume cutrancaumequen, huelu petu mongelen’.
10 Fei fülcontufiñ ta Saúl ca langümfiñ, quimün ñi rume allfülen ca ñi mongetripanoal. Fei müntuñmafiñ* tañi corona tañi lonco mu ca ti brazalete lipang mu yenielu, fei ñi cüpalelafiel ta eimi, iñche tañi ñidol”.
11 Feica müten David huichafcai tañi tacun,* ca femngechi femi com pu huentru ñi compañnieteu.
12 Fei eluhuingün ñi huiraral ca ngümayal. Nagantüñmai ñi ngüñüluhun engün* Saúl ñi duam mu, tañi fotüm Jonatán, Chau Jehová ñi pu che ca pu Israel che mu, lalu cai engün fütra cuchillo mu.
13 Fei David ramtufi ti hueche ñi feipieteu chi dungu: “¿Cheu tuhuimi?”. Fei ti hueche huiñoldungui:* “Iñche, ca cüpanche ñi fotümngen, quiñe Amalec che”.
14 David feipifi: “¿Chumngelu* eluhuimi tami langümafiel Chau Jehová ñi dullin huentru?”.
15 Feimu David mütrümfalfi quiñe tañi pu hueichafe ca feipifi: “Cüpange ca langümfinge”. Fei ti hueichafe lefcontufi ca langümfi ti hueche.
16 David feipifi tati hueche: “Eimi tami duam mu layaimi.* Quisu tami hun mu condenahuimi, feipilu eimi ‘Iñche langümfiñ Chau Jehová ñi dullin huentru’”.
17 Feimu David entui quiñe hueñancün ülcantun Saúl ca tañi fotüm Jonatán ñi duam mu.
18 Ca feipi ñi quimeltulelafiel pu Judá che. Tüfachi hueñancün ülcantun “Tati arco” pingei, huiriconcülei Jasar pingechi lifru. Feipilei:
19 “¡Aungen mai Israel! Mahuida mu lai tati pu yamfal huentru.*
¡Laingün pu fütraque hueichafe aucan mu!
20 Nütramcalayafimün Gat huaria mu,huldungulayafimün rüpü püle Asquelón huaria mu,femngechi ñi ayüucülenoal pu Filistea che ñi pu ñahueca ñi fiestanoal pu circuncidalenolu* ñi pu ñahue.
21 Ahuem, Guilboa ñi mahuida,mülequilpe ilhuen* ca mahun eimün meu,tüfachi mapu hulquilpe chem iyael no rume.
Üye mu pu nehuen-ngelu ñi escudo podümüñmangei,Saúl tañi escudo hutrungehuelai aceite mu.*
22 Pu la ñi mollfüñ ca pu nehuen-ngelu ñi yihuiñ mu,Jonatán ñi arco huitrautuquelafui,Saúl tañi fütra cuchillo huiñoquelafui, fei tañi hueunon.
23 Saúl ca Jonatán, petu tañi mongelen piuqueyengei ca saquiyengei.
Lalu rume engu püntünentungelaingu.*
Doi matu lefqueingu ta ñamcu mu,*doi nehuen-ngeingu ta trapial mu.
24 Ahuem, Israel ñi pu ñahue, ngümayefimün ta Saúl,fei tacuyeimünmu quelü ca rume falichi tacun mu,cafei adelcacünufi* tamün tacun oro meu.*
25 ¡Laingün pu fütraque hueichafe aucan mu!
¡Jonatán deu lai mahuida mu!
26 Rume hueñancülen eimi mu, iñche tañi peñi, Jonatán.
Rume piuqueyeyu.
Iñche mu, tami piuqueyen doicülei pu domo ñi piuqueyen mu.
27 ¡Laingün pu fütraque hueichafe aucan mu!
¡Tañi hueichahue apümcangei!”.
Quimnieal
^ Ca lof mu: “Carpa ruca”.
^ Ca lof mu: “Huicürcalei tañi tacun”.
^ Ca lof mu: “Püllepalu”.
^ Ca lof mu: “Lloyünagi, ponornagi”.
^ Ca lof mu: “Lloudungueyu”.
^ Ca lof mu: “Lloudungueyu”.
^ Ca lof mu: “Quehuan mu”.
^ Ca lof mu: “Lanza mu”.
^ Ca lof mu: “Carro”.
^ Ca lof mu: “Ngütrümeneu”.
^ Ca lof mu: “Lloudungufiñ”.
^ Ca lof mu: “Montuñmafiñ”.
^ Ca lof mu: “Huicürcai tañi tacun”.
^ Diccionario mu ngüneduamnge “ngüñüluhual”.
^ Ca lof mu: “Lloudungui”.
^ Ca lof mu: “Chemu”.
^ Hebreo quehun feipilei: “Tami mollfüñ mülei quisu tami lonco mu”.
^ Ca lof mu: “Respetafal huentru”.
^ Diccionario mu ngüneduamnge “circuncision”.
^ Ca lof mu: “Mülfen”.
^ Ca lof mu: “Huitrungehuelai aceite mu”.
^ Ca lof mu: “Hudanentungelaingu”.
^ Ca lof mu: “Aguila mu”.
^ Ca lof mu: “Aifiñcünufi”.
^ Ca lof mu: “Milla meu”.
