Samuel ñi epungechi lifru 22:1-51
22 Saúl ca com tañi pu caiñe ñi cuhu mu, Chau Jehová montulfi ta David. Feichi antü David ülcantulelfi Chau Jehová tüfachi ül.
2 Feipi:
“Chau Jehová, fei tañi fütra cura, tañi nehuen-ngechi mülehue,* tañi lifrenentuqueteu.*
3 Chau Ngünechen, fei tañi cura, cheu tañi ellcauquen iñche,*tañi escudo, tañi nehuen-ngechi montulchefe,* tañi ellcaupeyüm cheu ñi cuñiutucuhual,tañi mülehue cheu tañi lefmahual, tañi montulqueteu, eimi montulqueen mülen mu quehuan.
4 Iñche mütrümquefiñ* Chau Jehová, tati felelu ñi püramyengeal,iñche montulngean tañi pu caiñe mu.
5 Ti lan dungu reu reque felelu* hualloñmaeneu,llicalcaqueneu pu illamfal huentru mangiñmalechi leufü reque felelu.
6 Ti Rüngan* llasu reque mainatuquefeneu,ti lan huachi reque felelu aneltuquefeneu.*
7 Rume hueñancülelu iñche ngillatufiñ ta Chau Jehová,ngillatuniefiñ tañi Chau Ngünechen.
Fei tañi ruca mu* allcütuñmaeneu ñi dungun,huirarlu tañi quellungeal quisu* allcütueneu.
8 Ti mapu eluhui ñi mütrohual ca ñi nengümuhual.
Ti huenu amulei ñi nüyülen*ca ñi mütroulen illculu cai* Chau Ngünechen.
9 Tañi yu meu* tripai fitrun*ca tañi hun meu tripai quiñe fütra cütral.*
Quisu mu tripai üicülechi ailen.
10 Petu nagcülepalu Chau Ngünechen, elufi ñi pochongnagal reque* ti huenuca dumiñcülei tromü miñche tañi namun.
11 Müpülen cüpai, anülei quiñe querubin mu.
Huefrumei huente quiñe cüme püllü ñi müpü mu.
12 Fei hula quiñe ellcahun reque huallmanieyu ti dumiñ.
Mülefui cürüftucu mahun ca curülechi tromü.
13 Alofcülei tañi adquiñ mu, tüfa mu tripai üicülechi ailen.
14 Fei hula Chau Jehová eli ñi tralcanal huenu mu.
Tati Doi Alüpüralelu eli ñi allcütungeal tañi dungun.
15 Ütrüftufi tañi flecha, fei huall püle amui tañi pu caiñe.
Cafei tañi llüfqueñ* llicalcafi engün, quimlaingün ñi chumal.
16 Ti alüconchi lafquen peufaluhui,pengetui cheu ñi anümngeel ti mapu, illculu cai* Chau Jehová,pimutripalu cai tañi yu.
17 Huenu püle famnacümi tañi cuhu,nüñmaeneu ca entueneu ti llufü co meu.
18 Montuleneu tañi nehuen-ngechi caiñe mu,tañi pu üdequeteu doi nehuen-ngelu iñche mu.
19 Feichi antü huesa dungu rupalu iñche, quisu engün lefcontueneu,huelu Chau Jehová quelluqueneu.
20 Yeeneu cheu tañi cuñiutucuhual.*
Ayüucülelu cai iñche mu, montuleneu.
21 Chumngechi tañi nor chengen iñche, Chau Jehová cümelcaqueneu.
Iñche culpaquelan, feimu Chau Dios culliqueneu reque.
22 Inaniequefiñ Chau Jehová ñi rüpü,iñche huesa femlan, elcünuquelafiñ tañi Chau Ngünechen.
23 Raquiduamtucunien com tami huercün dungu.
Famtripalayan tami ley dungu mu.
24 Amulean tañi lif chengen mu, quisu tañi adquiñ mu.
Cuñiutucuhuan tañi connoal chem culpan no rume.
25 Chau Jehová culliaeneu chumngechi tañi nor chengenca tañi culpaquenon quisu ñi adquiñ mu.
26 Tami piuqueyeteu, eimi piuqueyefimi.
Nor dungu femquefimi tati nor huentru.*
27 Pengelelquefimi tami lif piuquengen tati lif piuque nielu.
Huelu tati ngünencachequelu ngünencaquelaeimu.
28 Montulquefimi pu ñom che.
Huelu pefiel mu pu mallma che, famentuquefimi* ca yehuelcaquefimi.
29 Ahuem Chau Jehová, eimi iñche tañi pelontuhue.
Chau Jehová pelontuñmaqueneu tañi dumiñ.
30 Eimi tami quellun mu, lefcontuafiñ pu malocontuchequelu.
Chau Ngünechen ñi nehuen mu, pürayan quiñe cura malal.
31 Chau Ngünechen ñi rüpü huelulcalelai.
Chau Jehová ñi dungu lifngei.*
Quiñe escudo reque felei com pu ellcaulu quisu mu.
32 ¿Inei am ta Ngünechen? ¡Chau Jehová müten!
¿Inei am quiñe fütra cura reque felei? ¡Taiñ Chau Ngünechen müten!
33 Chau Ngünechen, iñche tañi fütra ellcaupeyüm reque felei.
Quisu femai ñi cümelcaleal ti rüpü cheu ñi miyahun.
34 Femfi iñche tañi namun quiñe ciervo* ñi namun reque.
Nehuentucueneu fütraque lil mu.
35 Quisu pepicaeneu ñi cuhu tañi hueichayal.*
Tañi lipang huinüfquefi* quiñe cobre arco.
36 Eimi eluqueen tami escudo tañi montulaeteu.
Ca tami ñom piuquengen, püramyeneu.
37 Liftufimi ti rüpü ñi trecayal iñche.
Trayaflayai* tañi namun.*
38 Inantucuafiñ tañi pu caiñe ca apümcayafiñ,ngehuenole engün, fei hula huiñotuan.
39 Apümcayafiñ ca trañmayafiñ, fei tañi huitrapüranoal engün.
Trananagai engün miñche tañi namun püle.
40 Eimi eluaen nehuen tañi hueichayal.
Quelluaen tañi huehuafiel tañi pu caiñe.
41 Eluafimi tañi pu caiñe ñi lefmahual iñche mu, fei amutuaingün.
Apümcayafiñ* tañi pu üdequeteu.
42 Quisu engün llellipuquei tañi quellungeal, huelu ngelai inei no rume tañi montulaeteu.
Llellipufilu rume ta Chau Jehová, huelu huiñoldungulaeyu.*
43 Rüngümcayafiñ, fei trufür mapu reque feleai engün.
Teifücayafiñ ca pünocayafiñ rüpü mülechi fotra reque.*
44 Dunguyeelimu tañi pu che, eimi montulaen.
Cuñiutucuaen tañi loncoleal fillque troquiñche.
Cüdahuelaeneu quiñe troquiñche tañi quimnofiel.
45 Pu catripanche* huinolcülen* cüpayai iñche tañi adquiñ mu.
Allcüle iñche mu engün, fei feyentuaeneu.
46 Pu catripanche* nehuen-ngehuelayai.*
Cheu ñi ellcaucülen engün, müllmüllcülen cüpayai.
47 ¡Chau Jehová mongelei tati! ¡Püramyengepe tañi fütra cura!
¡Püramyengepe tañi Chau Ngünechen, tati fütra cura tañi montulqueteu!
48 Tañi femeteu tañi pu caiñe, Chau Ngünechen huiñoleltufi engün.
Elcünufi fillque troquiñche, iñche tañi ngünenieafiel.
49 Montuleneu tañi pu caiñe mu.
Eimi doi huitrañpüramqueen, camapu tañi pu caiñetuqueteu.
Eimi montulen ti quehuafe huentru mu.
50 Feimu mañumayu rangi pu troquiñche mu, ahuem Chau Jehová.
Fei ülcantun mu püramyeafiñ* tami üi:
51 Chau Ngünechen fütraque dungu femquei ñi montulafiel tañi lonco ülmen.*
Rumel mu piuqueyeniefi* tañi dullin huentru,David ca tañi cüpanche”.
Quimnieal
^ Tüfa quiñe castillo cam quiñe fütra cura malal.
^ Cam: “Tañi montulqueteu”.
^ Ca lof mu: “Llumuuquen iñche”.
^ Ca lof mu: “Ngütrümquefiñ”.
^ Ca lof mu: “Auna, ola reque felelu”.
^ Cam: “Seol”. Tüfa pengelquei cheu ñi ürcütumequen reque pu la. Diccionario mu ngüneduamnge “Seol”.
^ Ca lof mu: “Ngelutuquefeneu, menazaquefeneu”.
^ Cam: “Templo mu”.
^ Hebreo quehun feipilei: “Tañi pilun”.
^ Ca lof mu: “Nüyünün”.
^ Ca lof mu: “Lladcülu cai”.
^ Ca lof mu: “Yiu meu”.
^ Ca lof mu: “Pitrun”.
^ Cam: “Quiñe cütral com apümcaquelu”.
^ Ca lof mu: “Lloyünagal, ponornagal reque”.
^ Ca lof mu: “Relampago”.
^ Ca lof mu: “Lladcülu cai”.
^ Cam: “Cheu ñi alürupalen”.
^ Hebreo quehun feipilei: “Tati nor huentru nehuen-ngelu”.
^ Ca lof mu: “Quiñepülecünuquefimi”.
^ Cam: “Liftungei cütral mu”.
^ Cam: “Venado”.
^ Ca lof mu: “Quehuayal”.
^ Ca lof mu: “Inüfquefi, ünifquefi, huinafquefi”.
^ Ca lof mu: “Melcailayai”.
^ Cam: “Pallipalli”.
^ Hebreo quehun feipilei: “Ñücüfcünuafiñ, eluafiñ ñi dunguhuenoal”.
^ Ca lof mu: “Lloudungulaeyu”.
^ Ca lof mu: “Chapad, pele reque”.
^ Ca lof mu: “Ca cüpanche”.
^ Ca lof mu: “Huingüdcülen”.
^ Ca lof mu: “Ca cüpanche”.
^ Cam: “Rulpaduamai”.
^ Cam: “Dungulelafiñ musica”.
^ Cam: “Fentren che hueuquefi tañi lonco ülmen ñi duam mu”.
^ Diccionario mu ngüneduamnge “piuqueyen afquenolu”.
