Samuel ñi epungechi lifru 23:1-39
23 Tüfa ta David ñi quiñelehuechi ülcantun:
“Ñi dungun ta David, Jesé ñi fotüm,ñi dungun ti huentru püramyengelu,Chau Ngünechen ñi dullin huentru, Jacob ñi Chau Ngünechen,ti ayüfal huentru ülcantulu Israel ñi ül.
2 Iñche dungun Chau Jehová ñi nehuen mu.
Iñche dungun chem ñi tucuel Chau Dios tañi quehun mu.
3 Dungui Israel ñi Chau Ngünechen,Israel ñi Fütra Cura feipieneu:
‘Norngele ti che ngüneniefilu com pu checa ti ngünenielu yamfile* ta Chau Dios,
4 pelon reque felei pulihuen mu, aloftripalu ti antü,quiñe pulihuen reque nienolu tromü.
Alof reque felei rupalu ti mahunca tremümquefi ti cachu mapu mu’.
5 Femngechi felei tañi pu che Chau Dios ñi adquiñ mu.
Quisu femeneu quiñe eldungu rumel mülequelu,cüme adcünungelu ca caletuquenolu.
Feiti eldungu pengeli tañi montulngeal iñche ca cüme duameleneu,feimu Chau Ngünechen eluquefi tañi pu che ñi cüme feleal.
6 Huelu pu illamfalchi che ütrüfentungequei zarza reque,nüfalngequelai cuhu mu.
7 Quiñe huentru ñi nüafiel,mülei ñi cüme pepicaucüleal, yenieal quiñe pañillhue herramienta* ca quiñe huaiqui.*
Ca mülei ñi lüpümtucungeal cütral mu cheu tañi mülen”.
8 Femngechi pingequefui David tañi nehuen-ngechi hueichafe:* Joseb-Basébet, ti tahkemonita,* loncolei ti cüla huentru mu. Quiñe rupa langümfi 800 huentru tañi huaiqui mu.
9 Ca inalei Eleazar, Dodó ñi fotüm, Ahohí tuulu. Tüfa ca coneltulefui ti cüla nehuen-ngechi hueichafe mu. Mülefuingün David engün chaftufilu pu Filistea che. Tiye mu pu Filistea che trahuluhuingün ñi hueichayal. Pu Israel che amutulu,
10 Eleazar mülenagi cheu tañi mülen ca langümfi pu Filistea che cansalu hula tañi lipang. Tañi cuhu pünalehuei reque fütra cuchillo mu. Feichi antü Chau Jehová elufi ñi huehuafiel pu Filistea che. Ca pu hueichafe furitu inanieyu tañi müntuñmayafiel* falinque fillem tati pu la.
11 Ca inalei Samá, Agué ñi fotüm, ti hararita che. Pu Filistea che trahuluhuingün Lehí mapu mu, cheu ñi mülen quiñe lelfün ngancülelu lenteja mu. Feichi mu pu hueichafe lefmahuingün pu Filistea che mu.
12 Huelu quisu mülenagi cheu ñi mülen, rangi lelfün mu ca incafi. Langümfi pu Filistea che. Femngechi Chau Jehová hueufi pu Filistea che.
13 Mülefui 30 loncolelu, fei cüla nagingün cosecha antü meu ca pemefingün ta David quiñe lolo meu mülelu Adulam huaria. Quiñe troquiñ Filistea hueichafe anümingün ñi tolto ruca* Refaím ñi laf mapu mu.
14 David ellcaucülefui* ca Belen huaria mu mülefui pu Filistea hueichafe.
15 Fei David feipi chem tañi ayüel: “¡Pütocofuli pichin co müten entungelu ti rünganco* mülelu inafül Belén ñi puerta püle!”.
16 Rupalu tüfa, ti cüla nehuen-ngechi hueichafe maloconpuingün cheu ñi mülen pu Filistea che ñi tolto ruca. Fei inafül Belén ñi puerta püle ti rünganco mu entucoingün ca yelelfingün ta David. Huelu David pilai ñi pütocoafiel, fei hutrulelfi* ta Chau Jehová.
17 Feipi: “¡Ahuem Chau Jehová, turpu femlayafun tüfachi dungu! Tüfachi pu huentru amuingün ca cuñihun mu tucuingün ñi mongen, fei ¿pütocopeafun mai ñi mollfüñ engün?”. Feimu pilai ñi pütocoafiel. Tüfachi dungu femingün tañi cüla nehuen-ngechi hueichafe.
18 Abisái, Joab ñi peñi, Zeruyá ñi püñeñ, loncolefui caquelu cüla huentru mu. Quisu langümi 300 huentru tañi huaiqui mu. Cüme quimngerquei ti hunen cüla huentru reque.
19 Tüfachi caquelu cüla huentru mu, Abisái doi quimfaluuquei ca loncolefui, huelu trürümfal-lai ti hunen cüla huentru mu.
20 Benaya, Jehoiadá ñi fotüm, nehuen piuquengefui.* Tüfachi huentru femi fentren fütraque dungu Cabzeel huaria mu. Langümfi Ariel ñi epu fotüm Moab tuulu. Ca quiñe antü piremequelu coni quiñe rünganco mu, fei langümfi quiñe trapial.
21 Cafei langümfi quiñe alüpürachi Egipto huentru. Ca yeniei quiñe caroti müten, huelu ti Egipto huentru yeniei quiñe huaiqui tañi cuhu mu. Femlu rume, Benaya chaftufi ti Egipto huentru, müntuñmafi tañi huaiqui ca quisu tañi huaiqui mu langümfi.
22 Tüfachi dungu femi Benaya, Jehoiadá ñi fotüm. Cüme quimngerquei tati cüla nehuen-ngechi hueichafe reque.
23 Doi quimfaluuquei tati 30 huentru mu, huelu trürümfal-lai ti hunenque cüla huentru mu. Femfulu rume, David elcünufi ta Benaya ñi loncoleal pu soltau tañi cuidanieteu.
24 Asahel, Joab ñi peñi, coneltulefui pu 30 huentru. Cafei Elhanán, Dodó ñi fotüm Belén tuulu.
25 Samá ti Harod che. Elicá ti Harod che.
26 Hélez ti Bet-Pélet che.* Irá, Iqués ñi fotüm, ti Tecoa che.
27 Abí-Ézer ti Anatot che. Mebunái ti Husá che.
28 Zalmón ti Ahohí che. Maharái ti Netofá che.
29 Héleb, Baaná ñi fotüm, ti Netofá che. Ittái, Ribái ñi fotüm, Guibeá huaria tuhui Benjamín ñi mapu mu.
30 Benaya, quiñe Piratón che. Hidái, cüpai Gaas huincul lil püle.
31 Abí-Albón ti Bet-Arabá che. Azmávet ti Bahurim che.
32 Eliahbá ti Saalbim che. Jasén ñi pu fotüm. Jonatán.
33 Samá ti hararita che. Ahiam, Sarar ñi fotüm, ti hararita che.
34 Elifélet, Ahasbái ñi fotüm, ti Maacá che. Eliam, Ahitofel ñi fotüm, ti Guiló che.
35 Hezró ti Carmelo che. Paarái ti Arab che.
36 Igal, Natán ñi fotüm Zobá cüpalu. Baní ti Gad che.
37 Zélec ti Ammón che. Naharái ti Beerot che, tüfa ti hueichafe yenielu Joab ñi escudo, Zeruyá ñi püñeñ.
38 Irá ti itrita che. Gareb ti itrita che
39 ca Urías ti Het che.* Com tüfa engün cüla mari regle huentru.
Quimnieal
^ Ca lof mu: “Respetafile”.
^ Ca lof mu: “Hierro herramienta”.
^ Ca lof mu: “Lanza”.
^ Ca lof mu: “Quehuafe”.
^ Tüfa Hacmoní mu tuhui.
^ Ca lof mu: “Montuñmayafiel”.
^ Ca lof mu: “Carpa ruca”.
^ Ca lof mu: “Llumulefui”.
^ Ca lof mu: “Hufco, pozoco”.
^ Ca lof mu: “Huitrulelfi”.
^ Hebreo quehun feipilei: “Niei quiñe chau llicaquenolu”.
^ Cam: “Ti paltita”.
^ Cam: “Hitita”.
