Génesis 21:1-34
21 Jehová raquiduamtucuniefi ta Sara, feimu Jehová femi com tañi feipicünufiel.
2 Fei Sara niepüñeñcülei. Feichi antü püle ñi feipicünuel Chau Dios, Sara elufi quiñe fotüm ta Abrahán. Abrahán deu fücharquei.
3 Feichi fotüm ñi elueteu Sara, Abrahán üituculelfi Isaac.
4 Pura antü nielu ti pichiche Isaac, Abrahán circuncidafi, femngechi inaniei ñi feipicünueteu Chau Dios.
5 Abrahán nierquei pataca tripantu choyüngelu ñi fotüm Isaac.
6 Sara feipi: “Chau Dios ayelcaeneu, inei rume quimle, quiñentrür ayecahuayu”.*
7 Quisu ca feipi: “¿Inei am raquiduamafui iñche ñi eluafiel quiñe fotüm ta Abrahán? Tüfei, Abrahán füchalei, huelu elufiñ quiñe fotüm”.
8 Feula chi pichi huentru tremi, fei moyohuelai. Feitichi antü Isaac moyohuenolu, Abrahán pepicai fentren iyael.
9 Ti Egipto domo Agar pingelu, elurquefi quiñe fotüm ta Abrahán. Fei Sara ngüneduami Agar ñi püñeñ ñi ayentumequefiel ta Isaac.
10 Feimu Sara feipifi ta Abrahán: “¡Huemünentufinge* ti esclava tañi püñeñ engu! Iñche tañi püñeñ Isaac llohuai com tami nieel. Feitichi esclava ñi püñeñ coneltulayai”.
11 Huelu Abrahán rume cutrantupiuquei Sara ñi feipin tañi fotüm mu.*
12 Chau Dios feipifi ta Abrahán: “Huesa duamquilnge ñi feipin Sara tami esclava mu ca tati hueche huentru mu. Allcütufinge, Isaac meu tripayai tami cüpanche.
13 Huelu tami esclava ñi püñeñ, ca tami cüpanche tati. Feimu femcünuan ñi tripayal quiñe fütra troquiñche quisu mu”.
14 Feimu Abrahán pulihuentu huitrai, nüi cofque ca quiñe trülque carpa* nielu co, fei elufi ta Agar. Abrahán meñcuntuculelfi com ti chemcün, fei elufi ti domo ca ti hueche ñi amutual. Fei tripai, nampiyahui Beer-Seba pingechi huellin mapu.*
15 Aflu ti co mülelu trülque carpa mu,* ti domo ültrentucufi* tati hueche miñche anümca mu.
16 Fei trecalen amui, müte camapu no* quisulen anücünuhui. Ca feipi: “Lale tañi püñeñ, ayülan tañi peafiel”. Fei pichi camapu anücünuhui ca eluhui ñi ngümacahual.
17 Chau Dios allcüi ñi ngümacaumequen ti hueche. Fei Chau Ngünechen ñi cüme püllü huenu mu mütrümfi* ta Agar, feipifi: “¿Chumimi am Agar? Llicalayaimi, Chau Dios allcütufi ti hueche.
18 Huitrange, quellufinge tañi huitrayal, nüfinge tami cuhu mu. Quisu mu tripayai quiñe fütra troquiñche”.
19 Fei Chau Dios pengelelfi ti domo quiñe rünganco.* Fei amui, apolfi ñi trülque carpa* co mu ca pütocolelfi tañi püñeñ.
20 Petu tremcülelu ti hueche, Chau Dios cuñiutucuniefi. Huellin mapu mu mülequefui ca adümürpui ñi nüafiel culliñ flecha mu.
21 Fei ti hueche mülerquei Parán pingechi huellin mapu. Ca tañi ñuque quintuleleyu quiñe domo Egipto mapu mu.
22 Feichi antü püle, Abimélec nütramcamefi ta Abrahán. Ca amui Ficol, ti loncolelu pu hueichafe meu.* Abimélec feipifi ta Abrahán: “Chau Dios quellunieimu com tami femmequen.
23 Feimu tüfa mu Chau Dios mu feipicünuen, ngünencalayaen ca tañi pu fotüm ca tañi pu lacu. Iñche piuqueyeyu,* feimu feipicünuen tami piuqueyeafiel ta iñche ca com tati pu che tüfachi mapu mu cheu tami mülen”.
24 Feimu Abrahán feipi: “Feman llemai”.
25 Abimélec ñi pu cüdaufe quehuafingün ta Abrahán ñi müntuñmayafiel* tañi rünganco. Abrahán quimelfi ta Abimélec chem ñi rupan.
26 Fei Abimélec feipieyu: “Quimlan inei ñi femün. Eimi ca feipilaen, tüfa hula quimün”.
27 Allcülu Abrahán ñi feipin Abimélec, nüi ufisa ca huaca. Elufi ta Abimélec. Fei eldungucünuhuingu.
28 Abrahán hudamentufilu ti regle hueque ufisa,
29 Abimélec ramtufi: “¿Chumngelu am* hudamentufimi feitichi regle hueque ufisa?”.
30 Abrahán huiñoldungufi:* “Mülei tami llohual tüfachi regle hueque ufisa, femngechi quimfalngeai iñche ñi deuman tüfachi rünganco”.
31 Abrahán üituculelfi Beer-Seba* feichi mapu, tiye mu am eldungucünuhuingu.
32 Femngechi Beer-Seba mu eldungucünuhuingu. Fei hula Abimélec huiñotui pu Filistea che ñi mapu mu. Ca huiñotui Ficol, ti loncolelu pu hueichafe mu.
33 Fei hula Beer-Seba mu Abrahán anümtucui quiñe tamarisco anümca. Üye mu llellipui Jehová ñi üi meu, tati rumel mongelechi Ngünechen.
34 Abrahán fentreñma mu mülenagi* pu Filistea che ñi mapu mu.
Quimnieal
^ Ca feipiafui chi: “Ayentuaeneu”.
^ Cam: “Quechanentufinge”.
^ Tüfa ta Ismael.
^ Cam: “Cuntra, trongtrong”.
^ Tüfa cüpa feipilei quiñe troquiñ mapu ñi epe mülenon che.
^ Cam: “Cuntra, trongtrong”.
^ Cam: “Peltrintucufi, rütrentucufi”.
^ Cam: “Cheu ñi ütrüfpuhulafiel ti flecha quiñe che”.
^ Cam: “Ngütrümfi”.
^ Cam: “Hufco, pozoco”.
^ Cam: “Cuntra, trongtrong”.
^ Cam: “Quehuafe”.
^ Diccionario mu ngüneduamnge “piuqueyen afquenolu”.
^ Cam: “Montuñmayafiel”.
^ Cam: “Chemu”.
^ Cam: “Lloudungufi”.
^ Tüfachi üi cüpa feipi chi “rünganco cheu ñi eldungungeel” cam “regle [ufisa] ñi rünganco”.
^ Cam: “Catripanchengetui, ca cüpanchengetui”.
