Jonás 3:1-10
3 Fei Jonás ca quiñe rupa llohui Chau Jehová ñi dungu, feipingei:
2 “Amunge tati fütra huaria Nínive pingelu. Huldungufinge tati pu che iñche tañi huercün dungu”.
3 Fei Jonás allcütufi Chau Jehová ñi dungu, feimu eluhui ñi amual Nínive huaria mu. Nínive quiñe fütra huariangefui.* Quiñe che cüla antü mu hualloñmaquefui ti huaria.*
4 Fei Jonás conpui ti huaria mu, quiñe antü trecayahui. Fei huldungufi tati pu che: “Puule 40 antü, Nínive apümcangeai”.
5 Fei tati pu Nínive che feyentui Chau Dios mu. Com pu che, pu ricu, pu pofre, pu füchaqueche ca pu pichiqueche feipingei engün ñi ngüñüluhual* ca ñi tucual sacu tacun.
6 Fei hula feipingei ti lonco ülmen ngünenielu Nínive huaria mu chem ñi huldunguel ta Jonás. Fei huitrapürai tañi ülmen huancu mu, entui tañi ülmen tacun, tacucünuhui sacu mu, fei trufquen mu anücünuhui.
7 Cafei tati lonco ülmen huercüi ñi huldungual com Nínive huaria mu tüfachi dungu:
“Tüfa ñi feipin tati lonco ülmen ca tañi pu ülmenque che: chem che no rume ca chem culliñ no rume ngelai ñi iyal chem no rume. Ihuelayaingün ca pütocohuelayaingün.
8 Com pu che tucupe sacu tacun ca femngechi tañi pu culliñ. Pu che com tañi nehuen mu ngillatupe engün ta Chau Dios. Elcünupe engün tañi huesa femmequen ca tañi huesalcachequen.
9 Femngechi Chau Ngünechen femlayafui chi tañi feipicünuel,* fei tüngnagafui tañi fütra illcun,* femngechi lalayaiñ”.
10 Fei Chau Ngünechen pefi ñi femün engün ca ñi femhuenon tañi huesa femquefel, feimu femürpulai tañi feipicünuel,* fei huercülafi ti huesa dungu.
Quimnieal
^ Hebreo quehun feipilei: “Quiñe fütra huariangefui Chau Ngünechen ñi adquiñ mu”.
^ Cam: “Rumequefui ti huaria”.
^ Quiñeque mu femngechi femquefui che doi quiñe antü. Diccionario mu ngüneduamnge “ngüñüluhual”.
^ Cam: “Huiño huitrautuafui chi”.
^ Cam: “Lladcün”.
^ Cam: “Huiño huitrautui”.
