Josué 3:1-17
-
Pu Israel che noingün ti Jordán leufü (1-17)
3 Pulihuen huitrai Josué. Fei ca com pu Israel che* elcünuingün Sitim mapu, fei puhuingün Jordán leufü mu. Üyeu umañpuingün petu ñi nopunon ti leufü.
2 Cüla antü rupalu, pu loncolelu ti pu che mu rupaingün cheu ñi mülen pu Israel che ñi tolto ruca.*
3 Ca feipifingün pu che: “Pu sacerdote Leví tuhun-ngelu yeafi ti falin caja pengelquelu Chau Jehová ñi eldungu. Eimün pefilmün müten, amutumün cheu tamün mülen, fei inayafimün.
4 Huelu doi 900 metro püle* pülleconlayaimün, doi fülconpulayaimün, femngechi quimaimün chem rüpü inayal. Eimün turpu miyauquelafuimün feichi rüpü mu”.
5 Fei hula Josué feipifi tati pu che: “Hule Chau Jehová femai fütraque afmatun dungu eimün tamün duam mu, feimu pepicaucülemün”.*
6 Cafei Josué feipifi tati pu sacerdote: “Huitrañpüramafimün ti falin caja pengelquelu Chau Dios ñi eldungu, fei hune amuleaimün tati pu che meu”. Feimu pu sacerdote huitrañpüramfingün ti falin caja pengelquelu Chau Dios ñi eldungu, fei hune amuleingün tati pu che meu.
7 Fei hula Chau Jehová feipifi ta Josué: “Iñche pengelcünuan tami quellufiel, chumngechi quellufiñ ta Moisés. Feimu fachantü ca cüpalechi antü mu tati pu Israel che eluhuaingün tami yamnieaeteu.*
8 Tüfachi dungu feipiafimi pu sacerdote yenielu ti falin caja pengelquelu Chau Dios ñi eldungu: ‘Puhulmün inaltu Jordán leufü, conpuaimün, fei huitracünuhuaimün leufü mu’”.
9 Fei Josué feipifi tati pu Israel che: “Allcütupamün tamün Chau Ngünechen Jehová ñi dungu”.
10 Ca feipi Josué: “Femngechi quimaimün ñi mülen quiñe mongelechi Ngünechen rangiñ eimün meu. Rüfcünu, eimün tamün adquiñ meu Chau Ngünechen huemünentuafi* pu Canaán che, pu Het che,* pu heveo che, pu perizita che, pu guirgaseo che, pu amorreo che ca pu jebuseo che.
11 ¡Ngüneduamaimün! Tati Ñidolcülelu ngüneniei com ti mapu, fei tañi falin caja pengelquelu tañi eldungu conpuai Jordán leufü eimün tamün adquiñ mu.
12 Feula dulliaimün mari epu huentru Israel troquiñche mu, caque quisuque troquiñche dulliaimün quiñe huentru.
13 Pu sacerdote yenieai ti falin caja ñi nieel Chau Jehová, tati Ñidolcülelu com mapu mu. Pu sacerdote pünoconle müten ñi namun Jordán leufü nagcülepalu, catrüfemai ti co, fei ngülümuhuai”.*
14 Fei pu che tripatui cheu tañi mülen engün. Petu tañi nopunon Jordán leufü mu, fei pu sacerdote hune amulerquei tati pu che meu ca yenierquei ti falin caja pengelquelu Chau Dios ñi eldungu.
15 Mülen mu ti antü ñi cosechangeal, ti Jordán leufü mangiñtripaquefui. Pu sacerdote yenielu ti falin caja puhuingün Jordán leufü mu. Pünoconlu müten ñi namun inaltu leufü,
16 catrüfemi ti co nagcülepalu. Fei Adán huaria püllelelu Zaretán huaria mu, ngülümi ti co.* Fei camapulei pu Israel che mu. Cafei arcüi ti co* nagcülepalu Cotrü lafquen pingelu* mülelu Arabá mapu mu. Catrüfemi ti co, fei Jericó huaria itrotripa püle, pu Israel che trecalen noingün.
17 Fei pu sacerdote huitracünuhuingün rangiñ ancülechi Jordán leufü, fei engün yenierquei ti falin caja pengelquelu Chau Jehová ñi eldungu. Femngechi com pu Israel che noingün ti Jordán leufü ancülechi mapu mu.
Quimnieal
^ Hebreo quehun feipilei: “Israel ñi pu yall”.
^ Cam: “Carpa ruca”.
^ Hebreo quehun feipilei: “2.000 codo peno”. Ngüneduamnge apéndice B14.
^ Cam: “Lif chengeaimün Chau Dios ñi adquiñ mu”.
^ Cam: “Respetanieaeteu”.
^ Cam: “Quechanentuafi”.
^ Cam: “Hitita”.
^ Cam: “Ngülümuhuai quiñe represa reque”.
^ Cam: “Quiñe represa reque feletui”.
^ Cam: “Ancüi ti co”.
^ Tüfa Lachi lafquen pingei.
