Josué 5:1-15
5 Com pu amorreo ñi lonco ülmen mülerquei conantü püle* Jordán leufü mu, ca inaltu lafquen mu mülerquei com pu Canaán ñi lonco ülmen. Tüfa engün allcüingün Chau Jehová ñi arcümfiel* ti Jordán leufü pu Israel che ñi adquiñ mu nopulu hula engün. Feica müten llicafemingün* ca yafüngehuelai engün* pu Israel che ñi duam mu.
2 Feichi mu Chau Jehová feipifi ta Josué: “Deumange cura cuchillo ñi circuncidayal* pu Israel huentru”.
3 Feimu Josué deumai cura cuchillo, fei circuncidafi pu Israel huentru Guibeat-Haaralot mapu mu.
4 Josué circuncidafi engün tüfachi dungu mu: com pu Israel huentru, tüfa com pu hueichafe* tripalu Egipto mapu mu, com laingün amulelu engün huellin mapu mu,* deu tripatulu engün Egipto mapu mu.
5 Com pu huentru tripatulu Egipto mapu mu circuncidangei engün. Huelu pu huentru choyüngelu petu ñi amulen huellin mapu mu, deu elcünulu engün Egipto mapu mu, quiñe no rume circuncidangelai.
6 Pu Israel che 40 tripantu miyahuingün huellin mapu mu lalu hula com ti troquiñche, fei tüfa tati pu hueichafe tripatulu Egipto mapu mu. Fei engün allcütulafingün Chau Jehová ñi feipin. Feimu Chau Jehová feipicünueyu engün* turpu ñi penoal ti mapu cheu ñi mülen fentren lichi ca miel.* Chau Jehová feipicünufi taiñ pu cuifiqueche taiñ eluaeteu feichi mapu.
7 Chau Dios famentufi feichi pu huentru, fei cüpalfi tañi pu yall engün tüfachi mapu mu. Fei engün petu amulelu rüpü meu circuncidangelai, feimu Josué circuncidaeyu engün.
8 Circuncidangelu hula com pu huentru, pu Israel che mülenagingün cheu ñi mülen tañi tolto ruca,* femngechi ñi tremotual* pu huentru.
9 Fei hula Chau Jehová feipifi ta Josué: “Tañi femün fachantü catrütufiñ* pu Egipto che, fei illamcangelayaimün”. Feimu fantepu mu Guilgal* feipingequei feichi huaria.
10 Pu Israel che amulei ñi mülenagcülen Guilgal huaria mu, tüfa mülerquefui Jericó ñi huellin mapu laf mapu püle. Fei nagantülu ti 14 antü cüyen mu, femingün ti Pascua.
11 Rupalu ti Pascua antü, feichi antü müten eluhuingün ñi iyafiel chem ñi hulqueel ti mapu: fayümngenochi cofque ca fün cotün.
12 Cafei feichi antü ifilu engün chem ñi hulqueel ti mapu, ngehuelai mana. Pu Israel che nienolu rume ti mana, eluhuingün ñi iyafiel chem ñi hulqueel Canaán mapu feichi tripantu.
13 Feichi püllelelu Josué Jericó huaria mu, lelipürai, fei pefi quiñe huentru huitralelu quisu tañi adquiñ mu. Feichi huentru nüniei quiñe fütra cuchillo. Josué fülcontufi,* fei ramtufi: “Eimi, ¿quellumupaiñ cam quellupafimi taiñ pu caiñe?”.
14 Ti huentru huiñoldungui:* “Iñche loncolen Chau Jehová ñi pu hueichafe mu, feimu mülepan tüfa meu”. Allcülu Josué pochongnagi* fente tañi yamniefiel,* fei feipifi: “Tañi ñidol, iñche eimi tami cüdaufengen, ¿chem dungu feipipaen?”.
15 Tati loncolelu Chau Jehová ñi pu hueichafe mu huiñoldungufi ta Josué:* “Nentunge tami ocota, tüfachi mapu cheu pünoleimi huichucünulelngei ta Chau Dios”. Feimeu müten Josué femi tañi feipingeel.
Quimnieal
^ Hebreo quehun feipilei: “Lafquen püle”.
^ Cam: “Ancümfiel”.
^ Hebreo quehun feipilei: “Yafüngehuelai ñi piuque engün”.
^ Hebreo quehun feipilei: “Nehuen-ngehuelai engün”.
^ Hebreo quehun feipilei: “Huiño circuncidayal”. Diccionario mu ngüneduamnge “circuncision”.
^ Cam: “Pu huentru nielu tripantu tañi soltaungeal”.
^ Tüfa cüpa feipilei quiñe troquiñ mapu ñi epe mülenon che.
^ Cam: “Moshcon, mishqui”.
^ Cam: “Cuyalltueyu”.
^ Cam: “Carpa ruca”.
^ Cam: “Mongetual”.
^ Hebreo quehun feipilei: “Huaichüfrulpafiñ chem tamün illamcaeteu”.
^ Tüfachi üi cüpa feipi “huaichüfentufi”.
^ Cam: “Püllecontufi”.
^ Cam: “Lloudungui”.
^ Cam: “Lloyünagi”.
^ Cam: “Respetaniefiel”.
^ Cam: “Lloudungufi”.
