Levítico 10:1-20
10 Fei hula Nadab ca Abihú, Aarón tañi pu fotüm, nüfingu tañi braserillo, tuculelfingu cütral, fei huente tucuingu ti incienso. Fei chalintuculelfingu ta Chau Jehová. Huelu femlaingu chumngechi ñi feipicünuel Chau Dios.
2 Fei Chau Jehová huercüi cütral ca lüpümfi engu. Femngechi laingu Chau Jehová ñi adquiñ meu.
3 Fei Moisés feipifi ta Aarón: “Tüfa ñi feipiel Chau Jehová: ‘Com pu che fülcülelu* ta iñche meu mülei tañi raquiduamtucunieafiel iñche tañi lifngen. Püramyengean com tati pu che ñi adquiñ meu’”. Fei Aarón dunguhuelai.
4 Fei Moisés mütrümfi* ta Misael ca Elzafán, Uziel tañi pu fotüm, fei ta Aarón ñi malle. Moisés feipifi engu: “Cüpamu. Entufimu tamu pu peñi mülelu itrotripa ti yamfal mülehue meu. Fei huecun entufimu cheu ñi mülenon pu che”.
5 Fei amuingu, yetufingu ti epu la, petu tucunieingu tañi sacerdote tacun. Huecun entufingu cheu ñi mülenon pu che. Femingu chumngechi ñi feipieteu Moisés.
6 Moisés feipifi ta Aarón ca tañi caquelu fotüm, Eleazar ca Itamar: “Cüme dapinieafimün* tamün cal lonco, huichafcalayaimün* tamün tacun, femngechi lalayaimün ca Chau Dios illcutulayafi* com tati pu che. Tamün pu peñi, pu Israel che, ngümayeafingün feichi pu huentru Chau Jehová ñi langümfiel cütral meu.
7 Famtripalayaimün itrotripa ti trahunhue tolto ruca mu.* Femülmün, layaimün, Chau Jehová cai dullieimünmeu tañi falin aceite meu”. Fei femingün com tañi feipieteu Moisés.
8 Fei Chau Jehová feipifi ta Aarón:
9 “Eimi ca tami pu fotüm conülmün ti trahunhue tolto ruca meu, putulayaimün pulcu ca chem no rume.* Femngechi lalayaimün. Elcünungei tüfachi ley dungu ñi amulerpual, com tamün pu cüpanche mülei ñi inanieafiel.
10 Femngechi quimaimün chem ñi yamfalngen ca chem ñi yamfalngenon, chem ñi lifngen ca chem ñi lifngenon.
11 Cafei quimelelafimün pu Israel che Chau Jehová tañi huercün dungu, quisu elufi ta Moisés ñi quimeltulelafiel pu Israel che”.
12 Fei Moisés feipifi ta Aarón ca tañi mülehuechi fotüm, Eleazar ca Itamar: “Chalintuculu eimün tamün fün, quiñe troquiñ lüpümelfimün ta Chau Jehová. Fei hula nüaimün chem ñi lüpümngenoel ca deumayaimün cofque fayümhue nienolu.* Tüfa rume yamfalngei, feimu inafül altar meu iyafimün.
13 Iyafimün quiñe yamfal mülehue meu. Tüfa püntücünulelngeimi* ca tami pu fotüm, coneltulei chem ñi chalintuculelngeel ta Chau Jehová cütral mu. Femngechi feipingen tamün femal.
14 Quiñe lif mülehue meu, eimi, tami pu fotüm, tami pu ñahue mülei tamün iyafiel ti rücu feiti chalintucun* epuñpüle nengümngequelu. Cafei iyafimün ti chang* tamün püntücünulelngeel.* Feitichi iyael püntücünulelngeimi ca tami pu fotüm, entungei feiti chalintucun quiñentrür ingequelu ñi hulün pu Israel che.
15 Yeafimün ti chang tamün püntücünulelngeel,* ti rücu feiti chalintucun epuñpüle nengümngequelu ca ti yihuiñ ñi chalintucungeel cütral mu, femngechi Chau Jehová ñi adquiñ meu epuñpüle nengümcangeai feiti chalintucun. Tüfa rumel püntücünulelngeaimi ca tami pu fotüm. Femngechi feipicünui Chau Jehová”.
16 Moisés huall püle quintufi ti chifu* hulngealu ti chalintucun culpan dungu mu,* fei quimtucui ñi lüpümngeel. Feimu rume illcutufi* ta Eleazar ca Itamar, Aarón ñi mülehuechi fotüm. Fei feipifi engu:
17 “Tüfachi chalintucun culpan dungu mu* rume yamfalngei. Feimu, ¿chumngelu* ilafimün ti yamfal mülehue meu? Chau Dios elueimünmeu tamün yenieal pu Israel che ñi culpan, femngechi ñi perdonangeal tañi culpan engün Chau Jehová ñi adquiñ meu.
18 ¡Tüfei! Ti chalintucun ñi mollfüñ yengelai ponhuitu ti yamfal mülehue mu. Mülefui tamün iyafiel ti chalintucun ti yamfal mülehue mu chumngechi tañi feipingeel iñche”.
19 Aarón feipifi ta Moisés: “Tati pu che hulingün chalintucun culpan dungu mu* ca ti lüpümngeelchi chalintucun Chau Jehová ñi adquiñ meu. Huelu iñche ilayafun feitichi chalintucun. Eimi cüme quimnieimi com tañi rupan fachantü. Feimu ifuli feiti chalintucun culpan dungu mu, ¿cümepeafui mai Chau Jehová ñi adquiñ meu?”.
20 Moisés allcülu tüfa, cümelu troquifi.
Quimnieal
^ Ca lof mu: “Püllelelu”.
^ Ca lof mu: “Ngütrümfi”.
^ Ca lof mu: “Cuñiutucunieafimün”.
^ Ca lof mu: “Huicürcalayaimün”.
^ Ca lof mu: “Lladcütulayafi”.
^ Ca lof mu: “Trahunhue carpa ruca mu”.
^ Cam: “Chem no rume ngollilcachequelu”.
^ Ca lof mu: “Lefaura nienolu”.
^ Ca lof mu: “Hudacünulelngeimi”.
^ Ca lof mu: “Füchotun, mañumtun”.
^ Ca lof mu: “Hudacünulelngeel”.
^ Ca lof mu: “Llique”.
^ Ca lof mu: “Hudacünulelngeel”.
^ Ca lof mu: “Chivo”.
^ Ca lof mu: “Yafcan dungu mu”.
^ Ca lof mu: “Lladcütufi”.
^ Ca lof mu: “Yafcan dungu mu”.
^ Ca lof mu: “Chemu”.
^ Ca lof mu: “Yafcan dungu mu”.
