Levítico 5:1-19
5 Quiñe che peafui ta cangelu ñi culpamequen* cam quimafui chi ñi culpan. Feimu mütrümngele* pu che ñi feipial chem tañi rupan,* huelu feichi che amunole, conai culpan dungu mu ca castigangeai tañi culpan mu.
2 Quiñe che nünütufile chem rume lifngenolu,* quiñe lachi auca culliñ* lifngenolu, quiñe lachi ñom culliñ lifngenolu cam lachi pichique culliñ* lifngenolu, feichi che lifngelayai, fei culpayai,* ngüneduamnole rume tañi femün.
3 Quiñe che ngüneduamnon mu nünütufile chem rume lifngenolu, fei tüfa femcünuafeyu ñi lifngenoal. Huelu ngüneduamle ñi femün, fei conai culpan dungu mu.*
4 Quiñe che ngüneduamnon mu matu eldungucünuafui, cüme dungu cam huesa dungungeafui rume. Fei ngüneduamle ñi matu eldungucünun, conai culpan dungu mu.*
5 Inei rume conle culpan mu* tüfachi dungu ñi duam mu, mülei ñi entudungual* chumngechi tañi culpan.
6 Cafei yelelafi ta Chau Jehová quiñe chalintucun* huelulcan mu, quisu culpalu am.* Yelelafi quiñe pichi ufisa cam quiñe pichi capüra, tüfa quiñe chalintucun culpan dungu mu. Fei ti sacerdote hulai ti chalintucun ñi perdonangeal ti che ñi culpan.
7 Huelu nienole plata ñi yeal quiñe ufisa, yelelafi ta Jehová epu maicoño cam epu pichique paloma ñi hulal ti chalintucun huelulcan mu quisu tañi culpan meu.* Chalintucuai quiñe üñüm* tañi culpan meu ca ti cangelu üñüm lüpümngeelchi chalintucun-ngeal.
8 Yelelafi tati epu üñüm ti sacerdote. Fei hune chalintucuai tati üñüm ti culpan dungu mu.* Catrüñmayafi ñi pel, huelu entuñmalayafi ti lonco.
9 Quiñe püle ti altar pütefafi* pichin mollfüñ tati chalintucun culpan dungu mu.* Sofrachi mollfüñ hutrulnacümafi* inaltu altar. Tüfa tati chalintucun culpan dungu mu.
10 Fei chalintucuai ti cangelu üñüm quiñe lüpümngeelchi chalintucun-ngeal. Femai chumngechi ñi femngequen. Femngechi femai ti sacerdote ñi liftungeal ti che ñi culpan,* fei perdonangeai.
11 Huelu nienole plata ñi hulal epu maicoño cam epu pichique paloma, mülei ñi yeafiel quiñe kilo cüme rüngo* ñi hulal ti chalintucun culpan dungu mu* quisu tañi culpan meu. Tuculel-layafi aceite ca olibano no rume, tüfa am quiñe chalintucun culpan dungu mu.
12 Fei yelelafi chem ñi chalintucual ti sacerdote. Ti sacerdote nüai quiñe runa,* fei lüpümafi huente altar ñi tripayal fitrun,* femngechi Chau Dios cüme llohuafi com ti chalintucun. Tucuafi huente feitichi chalintucun ñi elungen ta Chau Jehová cütral mu. Tüfa quiñe chalintucun culpan dungu mu.*
13 Femngechi femai ti sacerdote ti che ñi culpan mu,* chuchi tüfachi dungu meu rume culpale, fei perdonangeai. Sofrachi chalintucun mülei ñi elungeal ti sacerdote, chumngechi ñi elungen ti sofrachi fün chalintucungelu’”.
14 Chau Jehová dunguniefi ta Moisés, feipifi:
15 “Quiñe che ngüneduamnon mu culpayafui* pecancafiel mu* Chau Jehová tañi yamfal chemcün, fei huesa femürpuafui. Femle, mülei ñi yelelafiel ta Chau Jehová quiñe tremolechi caniru,* tüfa quiñe chalintucun huelulcan mu. Ti sacerdote feipiai tunten* plata ñi falin ti caniru. Fanefanetungeai ti plata chumngechi ñi fanefanetungequeel ti yamfal mülehue mu.
16 Mülei ñi cullial tunte ñi falin ti yamfal chemcün quisu ñi pecancafiel. Cafei tunte ñi falin hudamngeai quechu troquiñ meu, fei ca mülei ñi cullial quiñe. Com eluafi tati sacerdote, fei ti sacerdote hulai ti caniru tati chalintucun huelulcan mu, femngechi liftungeai ti che ñi culpan.* Fei perdonangeai.
17 Femlayaimün pile Chau Jehová, huelu quiñe che femle ca culpale,* ngüneduamnon mu rume, culpan dungu mu conai. Fei castigangeai tañi culpan meu.
18 Mülei ñi yelelafiel ti sacerdote quiñe tremolechi caniru, tüfa mülei ñi falial tunte ñi feipingen. Femngechi hulngeai ti chalintucun huelulcan mu. Femngechi femai ti sacerdote ñi liftungeal ti che ñi culpan,* quisu culpalu am tañi ayünon mu ca quimnon mu. Fei perdonangeai.
19 Tüfa quiñe chalintucun huelulcan mu. Quisu culpai* Chau Jehová mu, feimu coni culpan dungu mu”.
Quimnieal
^ Ca lof mu: “Yafcamequen”.
^ Ca lof mu: “Ngütrümngele”.
^ Cam: “Allcüle ñi malisiamequen engün”. Allcüngei chi ñi malisiangen ti culpalu cam quiñe che quimlu ñi rupan huelu entudungulai.
^ Lifngelai chumngechi feipi Moisés ñi ley. Diccionario mu ngüneduamnge “lifngenolu”.
^ Ca lof mu: “Aucan culliñ, caita culliñ”.
^ Tüfa ta pichique culliñ fütraque troquiñ miyauquelu.
^ Ca lof mu: “Yafcayai”.
^ Ca lof mu: “Yafcan dungu mu”.
^ Ca lof mu: “Yafcan dungu mu”. Femngechi feipilei chi tati che huechunentunolu cai tañi feipicünuel.
^ Ca lof mu: “Yafcan mu”.
^ Ca lof mu: “Pengeldungual”.
^ Ca lof mu: “Füchotun, mañumtun”.
^ Ca lof mu: “Yafcalu am”.
^ Ca lof mu: “Yafcan meu”.
^ Ca lof mu: “Idum”.
^ Ca lof mu: “Yafcan dungu”.
^ Ca lof mu: “Huidpüafi”.
^ Ca lof mu: “Huitrulnacümafi”.
^ Ca lof mu: “Yafcan dungu mu”.
^ Ca lof mu: “Yafcan”.
^ Hebreo quehun feipilei: “Ti decima parte quiñe efá mu”. Ngüneduamnge apendice B14.
^ Ca lof mu: “Yafcan dungu mu”.
^ Ca lof mu: “Truna”.
^ Ca lof mu: “Pitrun”.
^ Ca lof mu: “Yafcan dungu mu”.
^ Ca lof mu: “Yafcan mu”.
^ Ca lof mu: “Yafcayafui”.
^ Ca lof mu: “Podümfiel mu”.
^ Ca lof mu: “Carnero”.
^ Ca lof mu: “Chumten”.
^ Ca lof mu: “Yafcan”.
^ Ca lof mu: “Yafcale”.
^ Ca lof mu: “Yafcan”.
^ Ca lof mu: “Yafcai”.
