Números 10:1-36
10 Fei Chau Jehová feipifi ta Moisés:
2 “Martillo mu deumayaimi epu trompeta platangelu. Püneafimi ñi trahulafiel pu che ca ñi cañpüle yeafiel tañi tolto ruca engün.*
3 Dungulngele feiti epu trompeta, com pu che mülei ñi trahuluhual eimi engu itrotripa ti trahunhue tolto ruca mu.
4 Huelu dungulngele quiñe trompeta, pu loncolelu müten trahuluhuai eimi engün, tüfa engün loncolei huarancaque che Israel mu.
5 Fillque rupa pichiquen dungulngele tati trompeta, pu toltoucülelu* tripahue antü püle mülei ñi entuafiel tañi tolto ruca.
6 Ca huiño pichiquen dungulngele ti trompeta fillque rupa, pu toltoucülelu* huaihuen püle* mülei ñi entuafiel tañi tolto ruca. Caque quiñeque troquiñche cañpüle yefile tañi tolto ruca, femngechi mülei ñi dungulngeal ti trompeta.
7 Ñi trahulngeal pu Israel che mülei ñi dungulngeal ti trompeta, huelu fentren rupa pichiquen dungulngelayai.
8 Ti pu sacerdote, Aarón ñi pu fotüm, mülei ñi dungulafiel ti trompeta, elcünungei tüfachi ley dungu ñi amulerpual.
9 Tamün pu caiñe quehuapaelmünmeu tamün mapu meu, tamün quehuayafiel mülei ñi dungulngeal ti trompeta, femngechi Chau Jehová allcütuaimünmeu ca montulaimünmeu tamün pu caiñe meu.
10 Cüme rupamequelmün tamün fiesta mu cam conün mu ti cüyen, mülei ñi dungulngeal ti trompeta hulngele lüpümngeelchi chalintucun* cam ti chalintucun quiñentrür ingequelu. Femngechi femülmün, Chau Dios raquiduamnieaimünmeu. Iñche tamün Chau Dios Jehová”.
11 Ti epungechi tripantu, tati 20 antü ti epungechi cüyen meu, ti tromü pürai huente ti ngillatuhue tolto ruca mu cheu ñi mülen ti falin caja pengelquelu Chau Dios ñi eldungu.
12 Fei chumngechi ñi adcünungeel pu Israel che eluhuingün ñi tripayal Sinaí huellin mapu meu.* Fei ti tromü huitracünuhui Parán huellin mapu mu.
13 Pu Israel che tripaingün chumngechi Chau Jehová ñi feipicünufiel ta Moisés, tüfa tati hunen rupa.
14 Fei ti cüla troquiñche cheu ñi loncolen Judá tañi troquiñche, hunelu mu tripaingün chumngechi tañi feipingeel. Nahsón, Aminadab ñi fotüm, loncolerquei tañi troquiñche mu.
15 Ti troquiñche coneltulelu Isacar tañi pu fotüm meu, loncolerquei Netanel, Zuar ñi fotüm.
16 Ti troquiñche coneltulelu Zabulón tañi pu fotüm meu, loncolerquei Eliab, Helón ñi fotüm.
17 Entungelu ti ngillatuhue tolto ruca, triparqueingün Guersón tañi pu fotüm ca Merarí tañi pu fotüm. Fei engün cañpüle yequefuingün ti ngillatuhue tolto ruca.
18 Fei hula chumngechi tañi feipingeel tripaingün feichi cüla troquiñche cheu ñi loncolen Rubén tañi troquiñche. Elizur, Sedeur tañi fotüm, loncolerquei tañi troquiñche meu.
19 Fei ti troquiñche coneltulelu Simeón tañi pu fotüm meu, loncolerquei Selumiel, Zurisadái ñi fotüm.
20 Fei ti troquiñche coneltulelu Gad tañi pu fotüm meu, loncolerquei Eliasaf, Dehuel tañi fotüm.
21 Fei hula tripaingün pu Cohat che, fei engün cañpüle yequefuingün tati yamfal ruca* ñi itrofillem. Ti ngillatuhue tolto ruca mülefui ñi anücünungeal petu ñi puunon engün.
22 Fei hula chumngechi tañi feipingeel tripaingün feiti cüla troquiñche cheu ñi loncolen Efraín tañi troquiñche. Elisamá, Amihud ñi fotüm, loncolerquei tañi troquiñche mu.
23 Fei ti troquiñche coneltulelu Manasés tañi pu fotüm meu, loncolerquei Gamaliel, Pedahzur ñi fotüm.
24 Fei ti troquiñche coneltulelu Benjamín tañi pu fotüm meu, loncolerquei Abidán, Guideoní ñi fotüm.
25 Fei hula chumngechi ñi feipingeel tripaingün feiti cüla troquiñche cheu ñi loncolen Dan tañi troquiñche, tüfa engün inalechi tripaingün ñi cuñiutucuafiel caquelu troquiñche. Ahiézer, Amisadái ñi fotüm, loncolerquei tañi troquiñche mu.
26 Ti troquiñche coneltulelu Aser tañi pu fotüm meu, loncolerquei Paguiel, Ocrán ñi fotüm.
27 Ti troquiñche coneltulelu Neftalí tañi pu fotüm meu, loncolerquei Ahirá, Enán ñi fotüm.
28 Cañpüle amulu pu Israel che ca tañi pu troquiñche, femngechi adcünungeingün ñi tripayal.
29 Moisés nütramcafi ta Hobab, tüfa ta Reuel* tañi fotüm, ti Madián che, Moisés tañi chedcui. Feipifi: “Tripaleiñ taiñ puhual feichi mapu taiñ feipicünueteu Chau Jehová. Compañmuiñ, cümelcahuaiñ. Chau Jehová feipicünui ñi eluafiel cümeque dungu pu Israel che”.
30 Huelu quisu feipi: “Amulayan, huiñotuan tañi mapu mu cheu ñi mülen tañi pu che”.
31 Fei Moisés feipi: “Füreneen, quisucünumulayaiñ, eimi cüme quimnieimi cheu doi cümeafui taiñ toltoucüleal* huellin mapu meu. Adniemuafuiñ.
32 Fei compañniemuliyiñ, Chau Jehová cümelcaeliyiñmeu, eimi ca cümelcangeaimi”.
33 Pu Israel che tripaingün Chau Jehová ñi huincul meu. Cüla antü miyahurquefuingün, fei hunelei ti falin caja pengelquelu Chau Jehová ñi eldungu. Cüla antü quintuyahurquefuingün quiñe mapu cheu tañi ürcütual.
34 Petu amulelu pu Israel che, com antü Chau Jehová ñi tromü mülerquei huente quisu engün meu.
35 Cañpüle yeniengequelu ti Falin Caja, Moisés feipiquefui: “Huitrapürange ahuem Jehová, fill püle puhulfinge tami pu caiñe, com tami pu üdequeteu lefmaupe engün”.
36 Fei anücünungelu ti Falin Caja, Moisés feipiquefui: “Ahuem Chau Jehová, huiñotunge pu Israel che mu, raquifal-laingün”.
Quimnieal
^ Ca lof mu: “Carpa ruca engün”.
^ Ca lof mu: “Pu anücünufilu ñi tolto ruca”.
^ Ca lof mu: “Pu anümcünulu ñi tolto ruca”.
^ Ca lof mu: “Sur püle”.
^ Ca lof mu: “Füchotun, mañumtun”.
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Respetafal ruca”.
^ Tüfa ta Jetró.
^ Ca lof mu: “Taiñ elcünual taiñ tolto ruca”.
