Números 12:1-16
12 Moisés ñi domo Cus mapu mu tuhurquei. Feimu Aarón ca Míriam huesa dunguyefingu ta Moisés.
2 Feipingu: “¿Chau Jehová adniefi Moisés müten tañi dungual? ¿Iñchiu am ca adnielaeyumu?”. Fei Chau Jehová allcütunieyu.
3 Moisés fei tati doi ñom huentru ñi mülerquefel mapu mu.
4 Chau Jehová feipirumefi ta Moisés, Aarón ca Míriam: “Amumün tati trahunhue tolto ruca mu”.* Fei amuingün.
5 Fei hula Chau Jehová nagpai ti tromü mu, adcünuhui itrotripa ti trahunhue tolto ruca mu, mütrümfi* ta Aarón ca Míriam. Fei fülconpuingu.*
6 Chau Dios feipifi: “Fürenemun, allcütumuchi. Mülefule eimün meu quiñe huerquen cüpalu Chau Jehová mu, iñche peufaluhuafun quiñe afmatun dungu meu ca nütramcayafun peuma mu.
7 ¡Huelu femngechi femquelafiñ ta Moisés, iñche tañi cüdaufe! Elfalcünulelfiñ com tañi pu che.*
8 Iñche dunguquefiñ ta Moisés, chumngechi dunguuqueingu epu huentru. Com cüme quimelelfiñ. Quisu tañi adquiñ meu peufaluuquei Jehová. Feimu, ¿chumngelu* llicalaimu tamu huesa dunguyeafiel ta Moisés, iñche tañi cüdaufe?”.
9 Jehová illcutufi engu,* fei amutui.
10 Ti tromü püntühui* ti tolto ruca mu. Fei Míriam apolerquei lepra cutran mu, fülangcülerquei pire reque. Aarón huiñoquintufi ta Míriam, ngüneduamfi ñi apolerquen lepra cutran mu.
11 Matu müten Aarón feipifi ta Moisés: “¡Llellipueyu, saquin ñidol! ¡Füreneen, cutrancamulayayu tayu culpan mu!* Huedhuedquechi femiyu tati.
12 Quiñe lachi püñeñ choyüngelu ca funanaglu tañi fün ilo, femngechi felei tañi lamngen. Feimu, ¡füreneen, femcünulayaimi ñi femngechi felehuetual!”.
13 Fei Moisés eluhui ñi llellipuafiel ta Chau Jehová: “¡Ahuem Chau Dios, füreneen, tremoltufinge!* ¡Füreneen!”.
14 Chau Jehová huiñoldungufi* ta Moisés: “Tañi chau tofcütueliyu tañi ange mu, ¿regle antü illamcangenoalu chi? Feimu regle antü mu mülepe huecun cheu ñi mülenon che, fei hula huiñotuafui”.
15 Fei Míriam rupai regle antü huecun cheu ñi mülenon che, fei tati pu che cañpüle amulaingün deu huiñotulu hula ta Míriam.
16 Fei hula tati pu che tripaingün Hazerot mapu mu, anüpuingün tañi tolto ruca Parán huellin mapu mu.*
Quimnieal
^ Ca lof mu: “Trahunhue carpa ruca mu”.
^ Ca lof mu: “Ngütrümfi”.
^ Ca lof mu: “Pülleconpuingu”.
^ Hebreo quehun feipilei: “Com tañi ruca mu pengelmequei ñi manelfalngen”.
^ Ca lof mu: “Chemu”.
^ Ca lof mu: “Lladcütufi engu”.
^ Ca lof mu: “Hudahui”.
^ Ca lof mu: “Yafcan mu”.
^ Ca lof mu: “Mongeltufinge”.
^ Ca lof mu: “Lloudungufi”.
^ Tüfa cüpa feipilei quiñe troquiñ mapu ñi epe mülenon che.
