Números 14:1-45
14 Com pun tati pu che nehuentu dunguingün, huiraringün ca ngümacahuingün.
2 Com pu Israel che huesa dunguingün Moisés ca Aarón mu. Com tati pu che huesa dunguyefi engün, feipingün: “¡Doi cümefui taiñ layal Egipto mapu meu! ¡Doi cümefui taiñ layal tüfachi huellin mapu mu!*
3 ¿Chumngelu* Chau Jehová cüpaleiñmeu tüfachi mapu mu? ¿Taiñ langümngeal fütra cuchillo mu? Müntuñmangeaiñ* taiñ domo ca taiñ pu yall, ¿doi cümenoafulu huiñotual Egipto mapu mu?”.
4 Hueluquentu feipihuingün: “¡Cangelu che loncocünuafiyiñ taiñ huiñotual Egipto mapu mu!”.
5 Feica müten tati pu Israel che ñi adquiñ meu, Aarón ca Moisés fampuhulingu ñi lonco mapu mu.
6 Josué, Nun ñi fotüm, ca Caleb, Jefuné ñi fotüm, huichafcaingu* tañi tacun. Tüfachi epu huentru caquelu huentru engün lloftumerquefingün* ti mapu.
7 Feipifingu com pu Israel che: “Tüfachi mapu taiñ lloftumefiel quiñe müna cüme mapungei.
8 Chau Jehová ayüucülele iñchiñ meu, rüfcünu llemai yeaiñmu tüfachi mapu mu ca eluaiñmeu. Feiti mapu mu mülei fentren lichi ca miel.*
9 Huelu caiñetulayafimün ta Chau Jehová. Llicalayafimün tati pu che feiti mapu meu, chem dungu no tati.* Chem no rume cuñiutucuquelaeyu. Chau Jehová mülei iñchiñ meu. Feimu llicalayafimün”.
10 Huelu tati pu che nütramcahuingün ñi ütrüftuafiel cura tañi langümafiel. Fei huente ngillatuhue tolto ruca mu* huefrumei Chau Jehová ñi pelon com pu Israel che ñi adquiñ meu.
11 Fei Chau Jehová feipifi ta Moisés: “¿Tunteñma mu tüfachi pu che yamnielayaeneu?* Iñche afmatufalchi dungu femün quisu engün meu, feimu ¿tuntepu am maneluulayaingün iñche meu?
12 Quiñe huesa cutran mu cutrancayafiñ engün ca apümcayafiñ. Femcünuan eimi mu ñi tripayal quiñe troquiñche doi nehuen-ngealu ca doi alün-ngerpualu”.
13 Huelu Moisés feipifi ta Chau Jehová: “Eimi tami nehuen meu entufimi tüfachi troquiñche pu Egipto che ñi mapu meu. Fei tüfa engün allcüaingün tami femafiel tami pu che.
14 Fei quimelelafingün tati pu Canaán che. Chau Jehová, fei engün allcüingün tami mülen tüfachi troquiñche mu ca tami peufaluhun quisu engün meu. Eimi ta Chau Jehová, tami tromü huente quisu engün meu mülei. Antü mu huneleimi quiñe tromü meu ca pun mu quiñe cütral meu.
15 Matumatu langümfilmi tüfachi pu che, com feichi pu troquiñche allcülu tami femün feipiaingün:
16 ‘Chau Jehová pepi yelafi feitichi pu che ti mapu ñi feipicünuel,* feimu com langümfi huellin mapu mu’.
17 Fei Chau Jehová, füreneen, pengelnge tami fütra nehuen-ngen. Eimi feipicünurqueimi nga:
18 ‘Chau Jehová illcufemquelai,* rume piuqueyechequei.* Quiñe che huesa femle cam culpale,* perdonaquefi. Huelu rulpacünuquelai ñi castigayafiel ti huesa che. Ti chau culpale, cafei castigayafi tañi pu fotüm, tañi pu lacu ca tañi pu bisnieto’.*
19 Egipto mapu mu ta fantepu meu perdonaniefimi tüfachi pu che. Feimu, füreneen, ca femngechi rulpacünuñmayafimi ñi culpan* fente tami piuqueyechequen meu”.*
20 Fei Chau Jehová feipi: “Tami ngillatufiel mu perdonayafiñ engün.
21 Huelu iñche tañi mongen meu feipicünun com huall mapu meu quimngeai fente ñi nehuen-ngen Chau Jehová.
22 Mülei pu huentru tañi quintucaduamnieteu* fentren rupa* ca tañi allcütunoeteu. Feitichi pu huentru peingün iñche tañi afmatufalngen ca tati afmatufalchi dungu ñi femün Egipto mapu mu ca ti huellin mapu meu. Quiñe no rume tüfa engün
23 pelayai feitichi mapu ñi feipicünufiel tañi pu chau. Felei llemai, quiñe no rume tañi yamnienoeteu pelayai ti mapu.
24 Huelu Caleb, iñche tañi cüdaufe, trürlai caquelu che mu. Com tañi piuque mu inanieneu. Feimu iñche yeafiñ feitichi mapu ñi lloftumefiel. Tañi pu cüpanche ngen-ngeaingün feitichi mapu meu.
25 Pu Amalec che ca pu Canaán che müleingün laf mapu mu, feimu hule huiñotuaimün, amuaimün ti huellin mapu feichi rüpü amulelu Quelü lafquen püle”.
26 Fei Chau Jehová feipifi ta Moisés ca Aarón:
27 “¿Tunteñma mu tüfachi huesa troquiñche huesa dunguai iñche meu? Allcün pu Israel che ñi feipimequen iñche mu.
28 Feipifinge: ‘Iñche tañi mongen meu feipicünuan, pi Chau Jehová, allcün tamün feipimequen, femngechi femuhuayiñ tati.
29 Tüfachi huellin mapu meu trananagai tamün lachi cuerpo,* mai, trananagaimün com eimün, nielu 20 tripantu cam doi, pu huirintucuñmangelu tañi üi, com pu huesa dungulu iñche meu.
30 Quiñe no rume ta eimün conlayai feichi mapu mu ñi feipicünufiel tamün mongeleal. Caleb, Jefuné tañi fotüm, ca Josué, Nun tañi fotüm, fei engu müten conaingu.
31 Eimün feipimün tamün müntuñmangeal tamün pu yall, huelu fei engün müten yeafiñ feichi mapu tamün famentufiel.*
32 Huelu eimün layaimün tüfachi huellin mapu mu.
33 Rupayai 40 tripantu, fei com eimün layaimün huellin mapu meu. Com feitichi tripantu mu tamün pu fotüm camañfengeaingün* huellin mapu mu, culliaingün eimün culpalu am* iñche meu.*
34 Eimün 40 antü lloftumefimün ti mapu, quiñe antü feita quiñe tripantu, feimu 40 tripantu culliaimün tamün culpan meu.* Femngechi quimtucuaimün chem rupaquei pu che tañi caiñetuqueteu.
35 Iñche, Chau Jehová, deu dungucünun. Fei tüfa femafiñ tüfachi huesa troquiñche, quiñehuingün tañi caiñetuaeteu. Tüfachi huellin mapu meu afaingün, layaingün.
36 Feitichi pu huentru Moisés ñi huercüfiel tañi lloftumeafiel ti mapu, huesaque dungu feipingün tati mapu meu, feimu hueluraquiduamelfingün tati pu che ñi huesa dunguyeafiel ta Moisés.
37 Felei llemai, feitichi pu huentru huesaque dungu feipilu ti mapu meu cutrancangeaingün ca layaingün Chau Jehová ñi adquiñ meu.
38 Huelu amuleai ñi mongelen Josué, Nun tañi fotüm, ca Caleb, Jefuné tañi fotüm, fei engu ca lloftumerquefingu ti mapu’”.
39 Moisés feipifilu tüfachi dungu pu Israel che, com hueñancünagingün.
40 Pulihuen mu huitraingün ca eluhuingün ñi pürayal huechuñ fütra huincul mu. Feipingün: “Amulaiñ feitichi mapu ñi feipicünuel Chau Jehová, feimu culpaiñ.* Huelu feula queta pepicaucüleiñ taiñ amual”.
41 Huelu Moisés feipi: “¿Chumngelu* inaniequelaimün Chau Jehová ñi feipicünun? Cüme tripalayai tamün femün.
42 Amulayaimün, Chau Jehová mülelai eimün meu. Tamün pu caiñe huehuaimünmeu.
43 Pu Amalec che ca pu Canaán che tiye mu müleingün tamün hueichayaeteu.* Langümngeaimün fütraque cuchillo mu. Eimün quiñepülecünufimün ta Chau Jehová, feimu Jehová mülelayai eimün meu”.
44 Huelu pürapuingün müten huechuñ huincul mu. Moisés ca ti falin caja pengelquelu Chau Jehová ñi eldungu mülecaingu müten rangiñ cheu ñi toltoucülen* pu che.
45 Fei pu Amalec che ca pu Canaán che mülelu feiti huincul meu nagpaingün tañi hueichayafiel pu Israel che, Hormá püle puhulfingün.
Quimnieal
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Chemu”.
^ Ca lof mu: “Montuñmangeaiñ”.
^ Ca lof mu: “Huicürcaingu”.
^ Ca lof mu: “Ngüneduamürquefingün”.
^ Ca lof mu: “Moshcon, mishqui”.
^ Hebreo quehun feipilei: “Cofque reque feleingün iñchiñ mu”.
^ Ca lof mu: “Ngillatuhue carpa ruca mu”.
^ Ca lof mu: “Respetanielayaeneu”.
^ Ca lof mu: “Cuyalltuel”.
^ Ca lof mu: “Yom lacu”.
^ Ca lof mu: “Yafcale”.
^ Hebreo quehun mu feipi piuqueyechen ca fürenechen afquenolu. Diccionario mu ngüneduamnge “piuqueyen afquenolu”.
^ Ca lof mu: “Lladcüfemquelai”. Cam: “Ñochi duamngei”.
^ Ca lof mu: “Yafcan”.
^ Diccionario mu ngüneduamnge “piuqueyen afquenolu”.
^ Cam: “Chaftunieteu”.
^ Hebreo quehun feipilei: “10 rupa”.
^ Ca lof mu: “Calül”.
^ Ca lof mu: “Quiñepülecünufiel”.
^ Ca lof mu: “Cuidayaingün ufisa”.
^ Ca lof mu: “Yafcalu am”.
^ Cam: “Femlu am quiñe prostituta reque”.
^ Ca lof mu: “Yafcan meu”.
^ Ca lof mu: “Yafcaiñ”.
^ Ca lof mu: “Chemu”.
^ Ca lof mu: “Quehuayaeteu”.
^ Ca lof mu: “Cheu ñi anucünun tañi tolto ruca”.
