Números 16:1-50
16 Coré quiñehui Datán, Abiram ca On engün. Coré tañi chau feita Izhar, tañi lacu feita Cohat ca tañi bisabuelo feita Leví. Datán ca Abiram ñi chau feita Eliab ca On tañi chau feita Pélez. Tüfa engün Rubén tañi pu cüpanche.
2 Tüfa engün ca caquelu 250 Israel che caiñetufingün ta Moisés. Feitichi pu huentru loncolefuingün tati pu che meu, dullinque huentrungefuingün, falinque huentru tati.
3 Fei trahuluhuingün ñi caiñetuafiel ta Moisés ca Aarón, feipifingün: “¡Afeluhuiyiñ eimu meu! Com ti troquiñche püntücünulelngei* ta Chau Dios, com engün. Chau Jehová mülei quisu engün meu. Feimu, ¿chumngelu* doicülelu troquiuqueimu Chau Jehová ñi troquiñche meu?”.
4 Allcülu müten Moisés, puhuli ñi ange mapu mu.
5 Fei Moisés feipifi ta Coré ca tañi pu compañ: “Pulihuen mu Chau Jehová quimfalcünuai chem che mu ngen-ngei, inei püntücünufi* ca inei elufi tañi fülmanieaeteu. Fei chem che ñi dullifiel fülmayaeyu.
6 Tüfa femaimün: Coré ca com tañi pu quellunieteu nüpe braserillo.
7 Hule Chau Jehová ñi adquiñ meu tucungepe cütral tati braserillo mu, fei huente tucungepe incienso.* Chau Jehová dulliai quiñe huentru, fei tüfa quisu ñi püntücünufiel.* ¡Eimün pu Leví che, fentecünumün!”.
8 Fei Moisés feipifi ta Coré: “Pu Leví che, fürenemun, allcütumuchi.
9 ¿Falintulafimün am chem tamün femeteu Israel ñi Chau Ngünechen? Quisu püntücünueimünmeu* pu Israel che mu, elueimünmeu tamün fülconal* quisu mu, femngechi cüdauqueimün Chau Jehová ñi ngillatuhue tolto ruca mu* ca serfiquefimün pu Israel che.
10 ¿Falintulafimi am? Chau Dios elueimu tami fülconal quisu mu, eimi ca tami pu peñi Leví chengelu. ¿Ca ayüniepeimün mai tamün sacerdotengeal?
11 Feimu eimi ca com pu trahuluucülelu tami quelluaeteu chaftumequefimün ta Chau Jehová. Ca, ¿chem huesa dungu femi Aarón tamün dunguyefiel?”.
12 Fei hula Moisés mütrümfalfi* ta Datán ca Abiram, Eliab ñi epu fotüm. Huelu “Amulayayu” pingu.
13 “Cheu taiñ mülequefel mülefui fentren lichi ca miel,* huelu eimi entumuiñ fei mu, fei cüpalmuiñ huellin mapu mu* taiñ langümngeal. ¿Chem dungu no pimi am? Tüfa hula cai, ¿ayüniepeimi mai eimi müten tami ngüneniemuafiel?
14 Cüpalmulaiñ quiñe mapu mu cheu ñi mülen fentren lichi ca miel. Ca elumulaiñ mapu cam quiñe ofadentu taiñ nieal. ¿Trauma huentru reque ayüniepeimi am tami inayaeteu tüfachi pu huentru?* ¡Amulayayu!”.
15 Feimu Moisés rume illcui,* fei feipifi ta Chau Jehová: “Lloumalayafimi ñi fün chalintucun.* Müntuñmalafiñ* quiñe burro no rume ca quiñe no rume cutrancalafiñ engün”.
16 Fei Moisés feipifi ta Coré: “Hule Chau Jehová ñi adquiñ mu cüpayaimi ca com pu che tami quellunieteu. Eimi, quisu engün ca Aarón.
17 Caque quiñeque nüai tañi braserillo, tuculelafi incienso, fei chalintucuai tañi braserillo Chau Jehová ñi adquiñ mu, 250 braserillo müleai. Eimi ca Aarón ca yenieaimu tamu braserillo”.
18 Caque quiñeque nüfingün tañi braserillo, tuculelfingün cütral, huente mu tuculelfingün incienso. Com huitracünuhuingün itrotripa ti trahunhue tolto ruca mu. Moisés ca Aarón ca femingu.
19 Coré trahulfi com tañi pu che ñi chaftuafiel engu itrotripa ti trahunhue tolto ruca mu, fei Chau Jehová ñi pelon peufaluhui com ti pu che mu.
20 Chau Jehová feipifi ta Moisés ca Aarón:
21 “Püntütripamu* tüfachi pu che mu. Tüfa hula müten apümcayafiñ engün”.
22 Feimeu puhulingu ñi ange mapu mu, fei feipingu: “Ahuem Chau Dios, eimi eluquefimi mongen com pu che, feimu ¿quiñe huentru ñi culpan mu müten* illcutuniefimi am* tüfachi troquiñche?”.
23 Fei Chau Jehová feipifi ta Moisés:
24 “Feipifinge tati pu che: ‘¡Püntütripamün* cheu ñi toltoucülen* Coré, Datán ca Abiram!’”.
25 Moisés huitrapürai, fei amui cheu ñi mülen Datán ca Abiram, pu loncolelu Israel meu ca amuingün.
26 Moisés feipifi tati pu che: “Fürenemuchi, püntütripamün* tüfachi huesaque huentru ñi tolto ruca mu. Nünütulayafimün ñi chemcün.* Femngechi apümcangelayaimün tüfachi pu huentru ñi culpan meu”.*
27 Fei ti pu che matumatu püntütripaingün* cheu ñi toltoucülen* Coré, Datán ca Abiram. Datán ca Abiram tripaingu, fei huitracünuhuingu itrotripa tañi tolto ruca mu engu. Ca mülei tañi pu domo, tañi pu yall ca tañi pu pichiqueche.
28 Fei Moisés feipi: “Femngechi quimaimün Chau Jehová ñi huercüeteu ñi femal com tüfachi dungu, iñche tañi duam mu no.
29 Tüfachi pu che rupale chem ñi rupaquen com pu che, fei lale chumngechi ñi laquen com che, quimfalngeai Chau Jehová ñi huercünoeteu ta iñche.
30 Huelu Chau Jehová femle quiñe afmatun dungu, nülafile ti mapu ca lümüngele engün ca com tañi nieel, fei mongelen nagle Rüngan mu engün,* rüfcünu quimaimün ñi yamnienofiel engün* ta Chau Jehová”.
31 Moisés fentecünulu müten ñi dungumequen, ti mapu nülatripai cheu ñi mülen engün.
32 Nülatripai ti mapu, fei lümüngei tüfachi pu huentru, tañi pu che, Coré tañi pu che ca com tañi nieel.
33 Fei engün ca com tañi pu che mongelen nagingün Rüngan mu,* ti mapu tacueyu, fei ngehuetulai engün.
34 Com pu Israel che huallontu mülelu allcülu ñi huirarcülen engün lefmahuingün. Feipingün: “¡Llicaleiñ! ¡Ca lümüafeiñmu ti mapu!”.
35 Feica müten quiñe cütral tripai Chau Jehová mu, fei langümfi 250 huentru chalintucumequefilu ti incienso.
36 Fei hula Chau Jehová feipifi ta Moisés:
37 “Feipifinge ta Eleazar, ti sacerdote Aarón ñi fotüm, ñi entuafiel cütral mu ti braserillo, tüfa püntücünulelngei* ta Chau Dios. Ca feipifinge ñi camapu ütrüfentuafiel ti ailen.
38 Tati pu huentru lalu tañi culpan mu,* chalintucuingün tañi braserillo Chau Jehová ñi adquiñ mu, femngechi püntücünulelngei* ta Chau Dios feitichi braserillo. Cüme lafcünufimün ñi impolafiel* ti altar, tüfa quiñe ngüfetun dungungeai pu Israel che mu”.
39 Feimu ti sacerdote Eleazar nüfi tati cobre braserillo ñi chalintucuel pu che lüpümngelu. Fei martillo mu cüme lafcünufi ñi impolafiel* ti altar.
40 Femi chumngechi ñi feipicünufiel Chau Jehová ta Moisés. Femngechi pu Israel che raquiduamtucuniefingün inei no rume elungenole ñi femal* ca Aarón ñi cüpanchengenole, fülmalayafui ñi lüpümafiel incienso Chau Jehová ñi adquiñ mu, ca inei no rume ngelafui ñi inayentuafiel ta Coré ca tañi pu quelluqueteu.
41 Ca antü mu com pu Israel che huesa dunguyefingün ta Moisés ca Aarón. Feipingün: “Eimu langümfimu Chau Jehová ñi pu che”.
42 Tati pu che trahuluhuingün ñi chaftuafiel Moisés ca Aarón, fei adquintufingün tati ngillatuhue tolto ruca ca ngüneduamingün ti tromü ñi tacunieteu. Fei Chau Jehová ñi pelon eluhui ñi peufaluhual.
43 Moisés ca Aarón fülpuingu ti trahunhue tolto ruca mu,
44 fei Chau Jehová feipifi ta Moisés:
45 “Püntütripamu* feitichi pu che mu, matu müten apümcayafiñ”. Feimeu puhulingu ñi ange mapu mu.
46 Fei Moisés feipifi ta Aarón: “Nüfinge ti braserillo, tuculelfinge ti cütral mülelu ti altar mu, huente tuculelfinge incienso, fei lefcülen amunge cheu ñi mülen ti pu che ñi perdonañmangeal tañi culpan engün.* Chau Jehová rume illculei.* Deu cutrancamequengeingün”.
47 Feica müten Aarón nüfi ti braserillo, chumngechi ñi feipicünueteu Moisés, fei lefcülen coni rangi ti pu che mu. Huelu deu cutrancamequengerquei ti pu che. Feimu tucui ti incienso tati braserillo mu ñi perdonangeal pu che ñi culpan.*
48 Fei Aarón rangiñcünuhui lachi che mu ca pu mongelelu. Feica müten afi ti cutrancahun.
49 Feitichi cutrancahun mu laingün 14.700 che. Cafei Coré tañi duam mu lai caquelu che.
50 Aarón huiñotulu cheu ñi mülen ta Moisés itrotripa ti trahunhue tolto ruca mu, deu fentecünungerquei ti cutrancahun.
Quimnieal
^ Ca lof mu: “Hudacünulelngei”.
^ Ca lof mu: “Chemu”.
^ Ca lof mu: “Hudacünufi”.
^ Ca lof mu: “Hudacünufiel”.
^ Ca lof mu: “Hudacünueimünmeu”.
^ Ca lof mu: “Pülleconal”.
^ Ca lof mu: “Ngillatuhue carpa ruca mu”.
^ Ca lof mu: “Ngütrümfalfi”.
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Moshcon, mishqui”.
^ Hebreo quehun feipilei: “¿Entuñmayafimi tüfachi pu huentru ñi nge?”.
^ Ca lof mu: “Lladcüi”.
^ Ca lof mu: “Füchotun, mañumtun”.
^ Ca lof mu: “Montuñmalafiñ”.
^ Ca lof mu: “Hudatripamu”.
^ Ca lof mu: “Ñi yafcan mu müten”.
^ Ca lof mu: “Lladcütuniefimi am”.
^ Ca lof mu: “Hudatripamün”.
^ Ca lof mu: “Cheu ñi elcünun tañi tolto ruca”.
^ Ca lof mu: “Hudatripamün”.
^ Ca lof mu: “Fillem”.
^ Ca lof mu: “Yafcan meu”.
^ Ca lof mu: “Hudatripaingün”.
^ Ca lof mu: “Cheu ñi elcünun tañi tolto ruca”.
^ Cam: “Seol”. Tüfa pengelquei cheu ñi ürcütumequen reque pu la. Diccionario mu ngüneduamnge “Seol”.
^ Ca lof mu: “Respetanienofiel engün”.
^ Ca lof mu: “Hudacünulelngei”.
^ Ca lof mu: “Yafcan mu”.
^ Ca lof mu: “Hudacünulelngei”.
^ Ca lof mu: “Munulafiel”.
^ Ca lof mu: “Munulafiel”.
^ Hebreo quehun feipilei: “Quiñe quimngenoelchi che”.
^ Ca lof mu: “Hudatripamu”.
^ Ca lof mu: “Tañi yafcan engün”.
^ Ca lof mu: “Lladcülei”.
^ Ca lof mu: “Yafcan”.
