Números 17:1-13
-
Aarón ñi retrü choyüi, quiñe ngüfetun dungungei (1-13)
17 Fei Chau Jehová feipifi ta Moisés:
2 “Feipifinge pu Israel che, caque quiñeque troquiñche, caque quiñeque loncolelu ñi troquiñche mu mülei ñi cüpalal quiñe retrü. Mari epu retrü cüpalngeai. Huirintucuafimi ñi üi caque quiñeque loncolelu ñi retrü meu.
3 Caque quiñeque loncolelu ñi troquiñche mu mülei quiñe retrü müten. Feimu Leví tañi retrü mu huirintucuafimi Aarón tañi üi.
4 Ti trahunhue tolto ruca mu* elcünuafimi feitichi retrü, itrotripa ti falin caja nielu Chau Dios ñi ley. Üye mu iñche peufaluuquen eimün meu.
5 Iñche dulliafiñ quiñe huentru, fei tañi retrü choyüai,* femngechi fentecünuafiñ pu Israel che ñi huesa dungumequen iñche mu ca eimu meu”.
6 Fei Moisés dungufi pu Israel che, com pu loncolelu elueyu tañi retrü, caque quiñe loncolelu ñi troquiñche mu huli tañi retrü. Mari epu retrü trapümngei. Aarón tañi retrü cafei.
7 Chau Jehová ñi adquiñ meu, Moisés elcünufi feitichi retrü ti ngillatuhue tolto ruca mu cheu ñi mülen ti falin caja nielu Chau Dios ñi ley.
8 Ca antü mu, Moisés coni ti ngillatuhue tolto ruca mu cheu ñi mülen ti falin caja nielu Chau Dios ñi ley. Aarón ñi retrü ñi cüpalel Leví ñi troquiñche choyürquei: niei choyün, rayen ca afülechi almendra.
9 Fei Chau Jehová ñi adquiñ mu, Moisés entufi com feitichi retrü ca pengelelfi com pu Israel che. Ngüneduamfingün, fei caque quiñeque huentru nüfingün tañi retrü.
10 Fei hula Jehová feipifi ta Moisés: “Huiño tucuaimi Aarón tañi retrü itrotripa ti falin caja nielu Chau Dios ñi ley. Guardacünungeai, quiñe ngüfetun dungungeai tañi pu chaftumequeteu mu. Femngechi huesa dunguyelayaeneu ca lalayaingün”.
11 Feica müten Moisés femi chumngechi ñi feipieteu Chau Jehová, femngechi femi llemai.
12 Fei pu Israel che feipifingün ta Moisés: “¡Layaiñ! ¡Feula queta layaiñ! ¡Com iñchiñ layaiñ llemai!
13 ¡Inei rume fülconle* Chau Jehová ñi ngillatuhue tolto ruca mu, layai llemai! ¿Femngechi am mülei taiñ layal?”.
Quimnieal
^ Ca lof mu: “Trahunhue carpa ruca mu”.
^ Ca lof mu: “Choyoai”.
^ Ca lof mu: “Pülleconle”.
