Números 18:1-32
18 Fei hula Chau Jehová feipifi ta Aarón: “Inangenole tati huercün dungu nüucülelu ti yamfal mülehue mu,* eimi, tami pu fotüm ca tami pu cüpanche culliaimün feitichi huelulcan mu. Cafei inangenole ti huercün dungu nüucülelu pu sacerdote mu, eimi ca tami pu fotüm culliaimün feitichi huelulcan mu.
2 Cafei cüpalfinge tami pu peñi coneltulelu Leví tañi troquiñche meu, tüfa tami chau ñi troquiñche. Femngechi quiñehuaimün, fei cüdahuelaimu engün ca tami pu fotüm itrotripa ti ngillatuhue tolto ruca* cheu ñi mülen ti falin caja nielu Chau Dios ñi ley.
3 Mülei ñi femal engün com tami elfalcünulelfiel ca femaingün com ti cüdau ti ngillatuhue tolto ruca mu. Huelu fülconlayaingün* tati yamfal mülehue ñi chemcün meu* ca tati altar mu, femngechi tamün lanoal ca ñi lanoal engün.
4 Quiñehuaingün eimi meu ca femaingün com ti cüdau ti trahunhue tolto ruca mu. Quiñe che no rume elungenolu tañi femal* fülconlayafui eimün meu.
5 Ti yamfal mülehue mu ca ti altar meu, eimün müten mülei tamün cüdaucüleal. Femngechi iñche illcutuniehuelayafiñ* pu Israel che.
6 Rangiñ pu Israel che mu iñche dullifiñ tamün pu peñi, pu Leví che, tamün eluafiel. Hultucungeingün Chau Jehová mu ñi femngechi femal ti cüdau tati trahunhue tolto ruca mu.
7 Tamün sacerdotengen meu eimi ca tami pu fotüm elfalcünulelngeimün ti cüdau femngequelu ti altar mu ca furitu cortina.* Eimün mülei tamün femal feichi cüdau. Eimün llemai eluhuiyiñ tamün cüdahual tamün sacerdotengen. Inei rume elungenolu ñi femal* fülconpule, mülei tañi layal”.
8 Chau Jehová ca feipifi ta Aarón: “Elfalcünueyu com ti chemcün ñi elungeel ta iñche. Ti yamfalchi chemcün meu ñi hulün pu Israel che, quiñe troquiñ elueyu ca tami pu fotüm. Rumel elungeaimün.
9 Eimi ngen-ngeaimi com ti chalintucun* ñi hulal ta che, feitichi rume yamfalchi chalintucun cütral mu, tüfa mu ta coneltulei ti fün chalintucun, ti chalintucun culpan dungu mu* ca ti chalintucun huelulcan mu. Rume yamfalngeai ta eimi ca tami pu fotüm meu.
10 Mülei tamün iyafiel quiñe rume yamfal mülehue mu. Com pu huentru mülei tañi iyafiel. Tüfa yamfalngeai eimi meu.
11 Cafei eimi ngen-ngeaimi feitichi regalo ñi hulal pu Israel che ca com ti chalintucun epuñpüle nengümcangequelu. Iñche elueyu ca tami pu fotüm ca tami pu ñahue. Rumel elungeaimün. Inei rume tami pu che meu lifcülele, iyafui.
12 Iñche eluayu tati doi cüme aceite, doi cüme hue pulcu ca doi cüme fün, tüfa tati hunenque fün ñi elufiel pu che ta Chau Jehová.
13 Pu che elufile ta Chau Jehová ti hunenque afülechi fün ñi mülen tañi mapu meu, eimi ta ngen-ngeaimi. Inei rume tami pu che meu lifcülele, iyafui.
14 Eimi ngen-ngeaimi com ñi huichucünulelngeel ta Chau Dios* Israel mu.
15 Pu che chalintuculelfile ta Chau Jehová tañi hunenque fotüm cam pu culliñ ñi hunenque coñi, eimi ta ngen-ngeaimi. Huelu eluafimi engün ñi ngillanentuafiel tañi hunenque fotüm ca pu lifngenochi culliñ ñi hunenque coñi.
16 Eluafimi ñi ngillanentuafiel engün niele quiñe cüyen cam doi. Quechu siclo* plata culliaingün, fanefanetungeai chumngechi ñi fanefanetungequen ti yamfal mülehue mu. Quiñe siclo fanei mari epu gramo.*
17 Huelu ngillanentungelayai hunenque pichi toro, hunenque pichi cordero ca hunenque pichi chifu.* Tüfa yamfalngei tati. Pütefcayafimi* ñi mollfüñ huente altar ca lüpümafimi ñi yihuiñ ñi tripayal fitrun.* Cütral mu chalintucungeai ca cüme nümün-ngeai Chau Jehová mu.
18 Ti ilo, ti rücu epuñpüle nengümcangelu ca ti chang* ñi nieel man püle, eimi ngen-ngeaimi.
19 Com ti yamfal chemcün pu Israel che ñi eluafiel ta Chau Jehová, eluayu ca tami pu fotüm ca tami pu ñahue, rumel elungeaimün. Tüfachi eldungu rumel amulerpuai* Chau Jehová mu, eimi ca tami pu cüpanche”.
20 Chau Jehová feipiniefi ta Aarón: “Israel mu elungelayaimi mapu, femngechi larpulmi, elcünulel-layafimi tami pu fotüm. Iñche cuñiutucuayu* ca eluayu com tami duamnieel Israel mu.
21 Pu Leví che cüdauqueingün ti trahunhue tolto ruca mu. Feimu mari troquiñ meu, quiñe troquiñ eluafiñ* tañi cüdau mu engün.
22 Pu Israel che fülmahuelayafingün ti trahunhue tolto ruca. Femle engün, culpan dungu mu* conaingün, fei layaingün.
23 Ti pu Leví che cüdahuaingün tati trahunhue tolto ruca mu. Fei engün culliaingün tañi huelulcan mu. Lloulayaingün mapu rangi ti pu Israel che meu. Tüfachi ley dungu elcünungei ñi rumel amulerpual, com tañi pu cüpanche mülei ñi inayafiel.
24 Mari troquiñ meu, quiñe troquiñ pu Israel che eluquefingün ta Chau Jehová. Feichi troquiñ iñche elufiñ* tati pu Leví che. Feimu feipicünun: ‘Lloulayaingün mapu rangi ti pu Israel che mu’”.
25 Chau Jehová feipifi ta Moisés:
26 “Feipiafimi pu Leví che: ‘Mari troquiñ meu pu Israel che hulqueingün quiñe, eimün llohuaimün feichi troquiñ tamün elufiel.* Eimün cai hudamafimün mari troquiñ meu, fei eluafimün quiñe troquiñ ta Chau Jehová.
27 Tüfa tamün hulal tati, tamün fün, tamün pulcu cam tamün aceite reque troquingeai.
28 Mari troquiñ meu pu Israel che hul-le quiñe, com feichi troquiñ meu eimün eluafimün ta Chau Jehová. Eluafimün tati sacerdote Aarón, fei ñi elungeal ta Chau Jehová.
29 Com tamün elufiel ta Chau Jehová yamfalngeai, eluafimün ti doi cümelu tamün llohuel’.
30 Ca feipiafimi engün: ‘Eimün, pu Leví che, hulülmün ti doi cümelu tamün llohuel, tamün fün, tamün pulcu cam tamün aceite reque troquiafimün ti mülehuelu.
31 Eimün ca tamün pu che cheu rume iyafuimün. Tüfa cullingeimün tamün cüdaumequen ti trahunhue tolto ruca mu.
32 Hulfilmün ti doi cümelu tamün llohuel, culpaconlayaimün* tüfachi dungu mu. Pecancalayafimün* pu Israel che ñi yamfalchi chemcün. Femülmün, layaimün’”.
Quimnieal
^ Ca lof mu: “Respetafal mülehue mu”.
^ Ca lof mu: “Ngillatuhue carpa ruca”.
^ Ca lof mu: “Pülleconlayaingün”.
^ Ca lof mu: “Fillem mu”.
^ Hebreo quehun feipilei: “Quiñe quimngenoelchi che”. Tüfa quiñe huentru coneltulenolu Aarón ñi pu che meu.
^ Ca lof mu: “Lladcütuniehuelayafiñ”.
^ Tüfa ti cortina mülelu itrotripa ti Doi Yamfal Mülehue mu.
^ Hebreo quehun feipilei: “Quiñe quimngenoelchi che”. Tüfa quiñe huentru coneltulenolu Aarón ñi pu che meu.
^ Ca lof mu: “Füchotun, mañumtun”.
^ Ca lof mu: “Yafcan dungu mu”.
^ Tüfa chem dungu rume ñi elungeel ta Chau Dios ca ñi ngillanentungenoafel.
^ Hebreo quehun feipilei: “20 guerá”. Quiñe guerá feita 0,57 gramo. Ngüneduamnge apendice B14.
^ Quiñe siclo fanei 11,4 gramo. Ngüneduamnge apendice B14.
^ Ca lof mu: “Chivo”.
^ Ca lof mu: “Huidpüafimi”.
^ Ca lof mu: “Pitrun”.
^ Ca lof mu: “Llique”.
^ Hebreo quehun feipilei: “Eldungu chadingelu”.
^ Hebreo quehun feipilei: “Iñche tami troquiñngen”.
^ Cam: “Eluafiñ tañi herenciangeal”.
^ Ca lof mu: “Yafcan dungu mu”.
^ Cam: “Elufiñ tañi herenciangeal”.
^ Cam: “Elufiel tamün herenciangeal”.
^ Ca lof mu: “Yafcaconlayaimün”.
^ Ca lof mu: “Podümlayafimün”.
