Números 20:1-29
20 Ti hunen cüyen mu com pu Israel che puhuingün Zin huellin mapu mu,* fei com pu che mülenagingün Cadés huaria meu. Tiye mu lai ca rüngaltucungei Míriam.
2 Tiye mu ti pu che nierquelai co, feimu com trahuluhuingün ñi chaftudunguafiel Moisés ca Aarón.
3 Tati pu che chaftudungufingün ta Moisés, feipifingün: “¡Larquefuliyiñ nga feichi lalu taiñ pu peñi Chau Jehová ñi adquiñ meu!
4 ¿Chumngelu* cüpalfimu Chau Jehová ñi pu che tüfachi huellin mapu mu? ¿Taiñ layal iñchiñ ca taiñ pu culliñ?
5 ¿Chumngelu* entumuiñ Egipto mapu meu ca cüpalmuiñ tüfachi huesa mapu mu? Fau pepi ngan-ngequelai higo, ofad, granada ca mülelai co taiñ pütocoal”.
6 Fei Moisés ca Aarón püntütripaingu* tati pu che mu. Amuingu tati trahunhue tolto ruca* ñi conhue meu, puhulingu ñi ange mapu mu, fei Chau Jehová ñi pelon peufaluhui quisu engu ñi adquiñ meu.
7 Fei Chau Jehová feipifi ta Moisés:
8 “Nüfinge tati retrü, eimi ca tami peñi Aarón mülei tamu trahulafiel tati pu che. Tüfa engün ñi adquiñ meu dunguafimu tati fütra cura, femngechi ñi tripayal co. Entulelafimi co engün feiti fütra cura mu, fei eluafimi ñi pütocoal tati pu che ca tañi pu culliñ”.
9 Fei Moisés nüfi ti retrü Chau Jehová ñi adquiñ mu, femi chumngechi ñi feipingeel.
10 Moisés ca Aarón trahulfingu tati pu che itrotripa tati fütra cura mu. Moisés feipifi: “¡Allcütumün, eimün pu yafü loncongelu!* ¿Ayüniepeimün am tayu entulelafiel co tüfachi fütra cura mu?”.
11 Feica müten huitrañpürami ñi cuhu, ti retrü mu epu rupachi hulelfi ti fütra cura, fei triparumei fentren co. Ti pu che ca ti pu culliñ pütocoingün.
12 Fei hula Chau Jehová feipifi ta Moisés ca Aarón: “Eimu pengel-laimu tamu maneluucülen iñche meu, püramyemulan tati pu Israel che ñi adquiñ meu. Feimu yelayafimu tüfachi pu che feitichi mapu tañi feipicünufiel engün”.
13 Tüfa Meribá* ñi co, fei mu pu Israel che notucadungufingün* ta Chau Jehová, huelu quisu huenupüramfi tañi üi tati pu che ñi adquiñ meu.
14 Mülelu Cadés huaria mu, Moisés huercülelfi quiñeque huerquen tati lonco ülmen Edom mu. Feipifingün: “Tüfa ñi feipin tami peñi Israel: ‘Eimi cüme quimnieimi com feitichi cüdaungechi dungu taiñ rupan mu.
15 Taiñ pu chau amuingün Egipto mu, fentren tripantu* mülepuiñ üye mu. Pu Egipto che cutrancafingün taiñ pu chau ca iñchiñ.
16 Ngillatufiyiñ ta Chau Jehová taiñ quelluaeteu, allcütueiñmeu. Fei huercüi quiñe cüme püllü ca entueiñmu Egipto mapu meu. Feula Cadés huaria meu müleiñ, inafülcülelu cheu ñi puhun tami mapu.
17 Fürenemuiñ, elumuiñ taiñ rumeal tami mapu meu. Lelfün cam ofadentu mu no rume rumelayaiñ. Pütocolayaiñ co tami rünganco mu.* Rüpütuleaiñ ti Lonco Ülmen ñi Rüpü mu müten. Famtripalayaiñ man püle, huele püle no rume, femngechi rumeafuiñ tami mapu mu’”.
18 Huelu Edom ñi lonco ülmen feipi: “Rupalayaimi tañi mapu meu. Femülmi, tañi fütra cuchillo mu trafmeayu”.
19 Pu Israel che feipifingün: “Amuleaiñ ti alürupachi rüpü mu müten. Iñchiñ cam taiñ pu culliñ pütocole tami co, cullingeaimi. Ayünieiñ ñi rupayal namuntu müten”.
20 Huelu Edom ñi lonco ülmen feipi: “Fau püle rupalayaimün”. Fei tripai tañi trafmeafiel engün. Compañnieyu fentren che ca fentren nehuen-ngechi hueichafe.*
21 Edom ñi lonco ülmen elulafi pu Israel che ñi rumeal tañi mapu meu, feimu pu Israel che cañpülecünuhuingün.
22 Pu Israel che, com tati pu che tripaingün Cadés huaria meu ñi puhual Hor huincul mu.
23 Hor huincul meu, inafülcülelu cheu ñi puhun Edom mapu, Chau Jehová feipifi ta Moisés ca Aarón:
24 “Aarón layai ca rüngaltucungeai tañi cuifiqueche yem reque. Quisu conlayai feichi mapu mu tañi eluafiel pu Israel che. Eimu allcütulaimu chem tamu feipifiel Meribá ñi co meu.
25 Pürapunge Hor huincul mu, yefinge ta Aarón ca tañi fotüm Eleazar.
26 Entuñmafinge Aarón ñi tacun, tuculelfinge tañi fotüm Eleazar, tiye mu Aarón layai”.
27 Moisés femi com ñi feipieteu Chau Jehová. Pürapuingün Hor huincul mu, com ti pu che ñi adquiñ meu.
28 Fei Moisés entuñmafi Aarón ñi tacun ca tuculelfi tañi fotüm Eleazar. Fei Aarón tiye mu lai, huechuñ huincul mu. Moisés ca Eleazar nagpatuingu.
29 Com pu che ngüneduamlu ñi lan ta Aarón, com Israel che ngümayefingün 30 antü.
Quimnieal
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Chemu”.
^ Ca lof mu: “Chemu”.
^ Ca lof mu: “Hudatripaingu”.
^ Ca lof mu: “Trahunhue carpa ruca”.
^ Cam: “Feyentuquenolu, allcütuquenolu”.
^ Tüfachi üi cüpa feipi “notucadungun” cam “yafcahun”.
^ Ca lof mu: “Chaftudungufingün”.
^ Hebreo quehun feipilei: “Antü”.
^ Ca lof mu: “Hufco, pozoco”.
^ Ca lof mu: “Quehuafe”.
