Números 21:1-35
21 Négueb mapu mu mülei ti Canaán lonco ülmen ngünenielu Arad huaria. Fei quimlu pu Israel che ñi miyahun Atarim rüpü püle, contupafi pu Israel che ca presuyefi quiñeque engün.
2 Fei pu Israel che eldungucünufi Chau Jehová, feipifingün: “Hultucufilmi tüfachi pu che taiñ cuhu mu, rüfcünu apümcañmayafiyiñ ñi huaria engün”.
3 Chau Jehová allcütufi pu Israel che, fei engün ñi cuhu mu hultucufi tati pu Canaán che, feimu apümcafi engün ca tañi pu huaria. Feimu llemai Hormá* üitucufingün feichi mapu.
4 Tripaingün Hor huincul mu, amuleingün ti rüpü rupaquelu Quelü lafquen püle, femngechi ñi hualloñmayafiel Edom mapu. Huelu ti pu che ürcüingün fente tañi miyahun.
5 Feimu notucadunguniefingün* ta Chau Dios ca Moisés, feipi engün: “¿Chumngelu am* entungeiñ Egipto mapu meu? ¿Taiñ layal tüfachi huellin mapu meu?* Tüfa mu ngelai iyael, co no rume. Üdetripafiyiñ tüfachi huesa cofque”.
6 Feimu Chau Jehová huercülelfi tati pu che venenongechi filu, ünatuquefi ti pu che. Feimu fentren Israel che laingün.
7 Fei ti pu che amuingün cheu ñi mülen Moisés, feipifingün: “Culpan dungu mu* coniyiñ, notucadungufiyiñ ta Chau Jehová ca eimi. Dunguñpemuiñ Chau Jehová mu ñi entuafiel ti filu”. Feimu Moisés dunguñpefi ti pu che.
8 Chau Jehová feipifi ta Moisés: “Adentucünufinge quiñe venenongechi filu, fei tucufinge quiñe orcon mamüll meu. Inei rume ünatungele, mülei tañi adquintuafiel ñi mongeleal”.
9 Feica müten Moisés deumai quiñe cobre filu ca pültrücünufi quiñe orcon mamüll meu. Quiñe che ñi ünatueteu quiñe filu, adquintuquefi ti cobre filu, fei mongetripaquei.
10 Fei hula pu Israel che tripaingün tiye mu, mülenagpuingün Obot mapu mu.
11 Fei hula tripaingün Obot mu, mülenagpuingün Iyé-Abarim mu, mülelu ti huellin mapu meu. Tüfa mülei itrotripa Moab mapu mu, tripahue antü püle.
12 Üye mu tripaingün, mülenagpuingün Zered laf mapu mu.
13 Tripaingün üye mu, mülenagpuingün Arnón laf mapu mu mülelu ti huellin mapu mu. Cheu ñi puhun pu amorreo che ñi mapu, fei mu tuhui tüfachi huellin mapu. Moab mapu puhui Arnón laf mapu mu, tüfa huichucünufi pu Moab che ca pu amorreo che.
14 Feimu ti Lifru Nielu Chau Jehová ñi Hueichan* feipilei “Vaheb, mülelu Sufá mapu mu ca ti laf mapu mülelu Arnón leufü püle.
15 Ti laf mapu puhui Ar huaria püle ca inafülcülei cheu ñi puhun Moab mapu”.
16 Fei hula amuingün Beer mapu mu. Üye mu mülei quiñe rünganco,* fei mu Chau Jehová feipirquefi ta Moisés: “Trahulfinge tati pu che tañi eluafiel co”.
17 Feichi mu pu Israel che entuingün tüfachi ül:
“¡Huefpape ti co, ahuem rünganco! ¡Eimün huiñoldungufimün!*
18 Ti rünganco pu principe rüngafingün, pu ülmen huentru tati pu che mu deumafingün.
Deumafingün tati lonco ülmen ñi retrü meu ca quisuque tañi retrü mu engün”.
Tripaingün ti huellin mapu meu ñi amual Mataná mu.
19 Tripaingün Mataná mu ñi amual Nahaliel mu. Fei tripaingün Nahaliel mu ñi amual Bamot mu.
20 Tripaingün Bamot mu ñi amual ti laf mapu mülelu Moab mapu meu. Pisgá ñi mahuidantu püle mülei, itrotripa Jesimón meu.*
21 Pu Israel che huercülelfingün quiñeque huerquen ta Sehón, pu amorreo che ñi lonco ülmen, feipifingün:
22 “Elumuiñ taiñ rumeal tami mapu meu. Cañpüle amulayaiñ, rupalayaiñ lelfün cam ofadentu mu no rume. Pütocolayaiñ co tamün rünganco mu. Rüpütuleaiñ ti Lonco Ülmen ñi Rüpü mu müten. Femngechi rumeafuiñ tami mapu mu”.
23 Huelu Sehón elulafi pu Israel che ñi rumeal tañi mapu mu. Doi mai trahulfi com tañi pu hueichafe, fei trafmefi pu Israel che huellin mapu mu. Jáhaz mu puhui, fei eluhui ñi hueichayafiel pu Israel che.
24 Huelu pu Israel che tañi fütra cuchillo mu hueufingün ca nüñmafingün tañi mapu mülelu ta Arnón puulu ta Jaboc mu, fülcülelu* pu Ammón che. Huelu puulaingün Jazer huaria mu, tüfa mülelu cai cheu ñi puhun pu Ammón che ñi mapu.
25 Fei pu Israel che nüñmafingün com tüfachi huaria. Mülenagpuingün com pu amorreo che ñi huaria mu, Hesbón ca com tañi püllelechi huaria.
26 Hesbón feita Sehón ñi huaria, pu amorreo ñi lonco ülmen. Quisu quehuafi pu Moab che ñi lonco ülmen ca müntuñmafi* com tañi mapu puulu ta Arnón mu.
27 Rupan mu tüfa, tati pu che ayentun mu feipiqueingün:
“Cüpamün Hesbón mu.
Deumangepe Sehón ñi huaria, fei cüme anücünungepe.
28 Hesbón mu tripai cütral, quiñe hueihuiñ cütral* tripai Sehón ñi huaria mu.
Com lüpümfi Ar huaria Moab mapu mu, pu ülmenque che mülelu alüpürachi mapu Arnón mu.
29 ¡Aungeimi Moab! ¡Apümcangeaimün, ahuem, Kemós ñi pu che!
Quisu femcünuquei tañi pu fotüm ñi lefmahual ca tañi pu ñahue ñi presuaeteu Sehón, pu amorreo che ñi lonco ülmen.
30 Lefcontuafiyiñ engün.
Hesbón apümcangeai, Dibón cütu.
Apümcayafiyiñ, Nófah mu puhuaiñ.
Ti cütral amulerpuai, Medebá mu puhuai”.
31 Feimu pu Israel che mülenagpuingün pu amorreo che ñi mapu meu.
32 Fei Moisés huercüi quiñeque huentru ñi lloftumeafiel* Jazer huaria. Nüñmafingün tañi püllelechi huaria, fei huemünentufingün* pu amorreo che tiye mu mülelu.
33 Fei hula huiñotuingün, amuingün ti Rüpü Amulelu Basán mu. Fei Og, Basán ñi lonco ülmen, ca com tañi pu hueichafe trafmefi pu Israel che ñi hueichayafiel Edréi huaria mu.
34 Chau Jehová feipifi ta Moisés: “Llicalayafimi, tami cuhu mu hultucuafiñ ca com tañi pu hueichafe ca tañi mapu. Femafimi chem tami femfiel ta Sehón, pu amorreo che ñi lonco ülmen, Hesbón huaria mu mülelu”.
35 Fei langümfingün ca tañi pu fotüm ca com tañi pu hueichafe. Quiñe no rume montulai. Ca nüñmafingün tañi mapu.
Quimnieal
^ Tüfachi üi cüpa feipi “hultucungei ñi apümcangeal”.
^ Ca lof mu: “Chaftudunguniefingün”.
^ Ca lof mu: “Chemu”.
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Yafcan dungu mu”.
^ Ca lof mu: “Quehuan”.
^ Ca lof mu: “Hufco, pozoco”.
^ Ca lof mu: “Lloudungufimün”. Cam: “Ülcantulelfimün”.
^ Ca feipiafui chi: “Huellin mapu meu”.
^ Ca lof mu: “Püllelelu”.
^ Ca lof mu: “Montuñmafi”.
^ Ca lof mu: “Üicülechi cütral”.
^ Ca lof mu: “Ngüneduammeafiel”.
^ Ca lof mu: “Quechanentufingün”.
