Números 22:1-41
22 Fei pu Israel che tripaingün tiye mu, toltoupuingün* ti laf mapu Moab ñi huellin mapu mu,* nometu Jordán leufü mu itrotripa Jericó huaria mu.
2 Balac, Zipor ñi fotüm, pei pu Israel che com ñi femfiel pu amorreo che.
3 Pu Moab che rume llicaniefingün tüfachi pu che, rume alün-ngelu engün cai. Felei llemai, pu Moab che müllmüllcüleingün fente tañi pellquen* pu Israel che ñi duam mu.
4 Fei pu Moab che feipifingün pu loncolelu Madián mapu mu: “Quiñe toro reque ñi apümcaquefiel ti cachu lelfün meu, ca femngechi tüfachi pu che apümcayafi com taiñ hualloñmanieteu”.
Feichi mu Zipor ñi fotüm, Balac pingelu, loncolerquei Moab mapu mu.
5 Balaam, Beor ñi fotüm, mülei Petor mu, cheu tañi choyüngeel, tüfa inafülcülei Éufrates leufü mu. Balac huercüleleyu quiñeque huerquen, mütrümfaleyu,* feipieyu: “¡Tüfei! Quiñe troquiñche tripai Egipto mu. ¡Ngüneduamnge! Com ti mapu* tacufingün. Feula iñche tañi adquiñ meu müleingün.
6 Fei cüpange, füreneen, malisiafinge tüfachi pu che, fei engün doi nehuen-ngeingün ta iñche meu. Huehuafun chi, fei huemünentuafiñ engün* tüfachi mapu meu. Iñche cüme quimnien, inei rume tami feipifiel cümeque dungu, cümelcalei. Huelu inei rume tami malisiafiel, cutrancauquei”.
7 Fei pu loncolelu Moab mapu mu ca pu loncolelu Madián mapu meu amuingün, tañi cuhu mu yenieingün ti plata ñi cullial ti malisian dungu meu.* Pemefingün ta Balaam, fei quimelelfingün ñi chem pin ta Balac.
8 Fei feipieyu engün: “Tüfa mu rulpapunaimün, fei feipihuaiñ chem rume ñi feipiaeteu Chau Jehová”. Feimu Moab ñi pu principe mülenagi Balaam engün.
9 Fei Chau Dios dungufi ta Balaam, feipifi: “¿Inei engün am feitichi pu huentru mülelu eimi mu?”.
10 Balaam feipifi ta Chau Ngünechen:* “Moab ñi lonco ülmen, Balac, Zipor ñi fotüm feipifaleneu:
11 ‘¡Tüfei! Feitichi pu che tripalu Egipto mapu mu tacuniefingün com ti mapu. Tüfa hula cüpange, füreneen, malisiafinge engün. Quehuayafun chi, fei huemünentuafiñ engün’”.*
12 Huelu Chau Dios feipieyu ta Balaam: “Amulayaimi fei engün meu. Malisialayafimi ti troquiñche, iñche cuñiutucuniefiñ engün”.
13 Balaam pulihuen mu huitrai, fei feipifi Balac ñi pu principe: “Huiñotumün tamün mapu mu. Chau Jehová elulaeneu ñi amual eimün mu”.
14 Fei Moab ñi pu principe amutuingün, huiñotuingün ñi feipiafiel ta Balac: “Balaam cüpa cüpalai iñchiñ mu”.
15 Huelu Balac huiño huercüfi tañi pu principe. Tüfa hula doi fentren huentru huercüfi, doi falin-ngelu.
16 Fei amuingün Balaam mu, feipifingün: “Tüfa ñi feipin Balac, Zipor ñi fotüm: ‘Füreneen, chem no rume catrütuquenoelmu tami cüpayal iñche mu.
17 Fampüramayu ca feman chem rume tami feipiel. Feimu cüpange, fürenepaen, fei malisiafinge tüfachi pu che’”.
18 Huelu Balaam feipifi Balac tañi pu huerquen: “Balac eluelimu rume tañi ruca apolelu plata ca oro mu,* iñche chumlayafun feipinoelimu tañi Chau Dios Jehová, pichi dungu cam fütra dungungeafui rume.
19 Huelu fürenemun, ca mülenagmün tüfachi pun, iñche inaduaman ca chem ñi feipiaeteu Chau Jehová”.
20 Pun meu Chau Dios dungufi ta Balaam, feipifi: “Amunge tüfachi pu huentru engün tami yepaeteu. Huelu iñche tañi feipin müten feipiaimi”.
21 Fei Balaam pulihuen mu huitrai, chillafi tañi burra ca amui Moab tañi pu principe engün.
22 Huelu Chau Dios rume illcui* tañi amun mu. Fei Chau Jehová ñi cüme püllü catrüconi ti rüpü mu. Balaam püraconcülei tañi burra mu, epu cüdaufe compañnieyu.
23 Fei ti burra pefi Chau Jehová ñi cüme püllü huitralelu ti rüpü mu, nüniei quiñe fütra cuchillo. Fei ti burra eluufui ñi famtripayal ti rüpü mu ñi conal lelfün meu. Huelu Balaam hulelcafi tati burra ñi huiñotual ti rüpü mu.
24 Fei Chau Jehová ñi cüme püllü huitracünuhui pichi rupachi rüpü mu, rangiñcülei epu ofadentu meu, epuñpüle niei cura malal.
25 Fei ti burra pefilu Chau Jehová ñi cüme püllü, ültrentucuhui* ti cura malal mu, fei trañmafi ñi namun ta Balaam. Feica müten huiño hulelcafi ti burra.
26 Chau Jehová ñi cüme püllü doi üye püle amui, fei huitracünuhui cheu ñi ca pichi rupan ti rüpü, ngelafui chumngechi ñi huiñotual man püle cam huele püle no rume.
27 Ti burra pefilu Chau Jehová ñi cüme püllü tranacünuhui, Balaam petu püraconcülerquei quisu mu. Fei Balaam rume illcui* ca huiño hulelcafi ti burra tañi retrü mu.
28 Feimu Chau Jehová dungulfi* ti burra. Fei ti burra feipifi ta Balaam: “¿Chumpeyu am? Cüla rupachi hulelcaen”.
29 Balaam huiñoldungueyu:* “Quiñe hueluduam reque femcünuen. ¡Nüniefuli quiñe fütra cuchillo, langümafeyu!”.
30 Fei ti burra feipifi ta Balaam: “¿Com tami mongen mu eimi tami burra no am iñche? Fantepu mu püraconcüleimi iñche mu, ¿felei no am chi? ¿Rumel femngechi femquen?”. “Turpu” pi Balaam.
31 Chau Jehová nülañmafi tañi nge ta Balaam, fei pei Chau Jehová ñi cüme püllü ti rüpü meu, nüniei quiñe fütra cuchillo. Feica müten Balaam pochongnagi* ca fampuhuli ñi ange mapu meu.
32 Fei Chau Jehová ñi cüme püllü feipifi: “¿Chumngelu am* cüla rupachi hulelcafimi tami burra? Iñche catrüconün tami rupanoal. Tami femmequeel nüucülelai iñche tañi ayünieel mu.
33 Ti burra peeneu, feimu cüla rupachi eluufui ñi cañpüle amual. Femnofule, langümafeyu, huelu ti burra mongeleafui”.
34 Balaam feipifi Chau Jehová ñi cüme püllü: “Culpan tati,* quimlafun eimi tañi üngümnieteu* rüpü mu. Fei huesa femmequelu troquieli, huiñotuan”.
35 Fei Chau Jehová ñi cüme püllü feipifi ta Balaam: “Amunge tüfachi pu huentru engün. Huelu iñche tañi feipin müten feipiaimi”. Fei Balaam amulei Balac tañi pu principe engün.
36 Balac allcülu müten ñi acun ta Balaam, feica müten trafmefi Moab huaria mu, inafülcülei Arnón laf mapu mu, cheu ñi fentepuhun Moab mapu.
37 Balac feipifi ta Balaam: “¿Mütrümfalpelaeyu ama? ¿Chumngelu* cüpalaimi cheu ñi mülen iñche? ¿Saquilayaeneu troquihuimi am?”.
38 Balaam feipifi ta Balac: “Tüfa tañi mülen. Huelu, ¿iñche tañi ayüel feipipeafun mai? Chau Dios tañi feipieteu, fei müten feipiafun”.
39 Fei Balaam engu Balac amuingu ta Quiryat-Huzot.
40 Balac chalintucui quiñeque huaca ca ufisa, fei huercülelfi quiñeque catrün ta Balaam ca pu principe mülelu üye mu.
41 Pulihuen mu Balac yefi ta Balaam ñi amual Bamot-Baal mu, üye mu puquintufi com pu Israel che.
Quimnieal
^ Ca lof mu: “Elcünuingün ñi tolto ruca”.
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Llican”.
^ Ca lof mu: “Ngütrümfaleyu”.
^ Cam: “Com ti troquiñ mapu”.
^ Ca lof mu: “Quechanentuafiñ engün”.
^ Cam: “Pelontun dungu meu”.
^ Cam: “Rüfngechi Ngünechen”. Diccionario mu ngüneduamnge “rüfngechi Ngünechen”.
^ Ca lof mu: “Quechanentuafiñ engün”.
^ Ca lof mu: “Milla mu”.
^ Ca lof mu: “Lladcüi”.
^ Cam: “Ngütraltucuhui”. Ca lof mu: “Peltrintucuhui, rütrentucuhui”.
^ Ca lof mu: “Lladcüi”.
^ Hebreo quehun feipilei: “Nülañmafi ñi hun”.
^ Ca lof mu: “Lloudungueyu”.
^ Ca lof mu: “Lloyünagi, ponornagi”.
^ Ca lof mu: “Chemu”.
^ Ca lof mu: “Yafcan tati”.
^ Ca lof mu: “Esperanieteu”.
^ Ca lof mu: “Chemu”.
