Números 23:1-30
23 Fei Balaam feipifi ta Balac: “Tüfa mu deumayaimi regle altar. Pepicalelen regle toro ca regle caniru”.*
2 Feica müten Balac femi chem tañi feipieteu Balaam. Fei Balac ca Balaam chalintucuingu quiñe toro ca quiñe caniru caque quiñeque altar meu.
3 Fei hula Balaam feipifi ta Balac: “Mülenagnge tüfa meu, inafül tami lüpümngeelchi chalintucun,* iñche amutuan. Chau Jehová dunguafeneu chi. Fei chem rume tañi quimelaeteu, iñche quimelelayu”. Fei amutui huechuñ huincul mu.
4 Chau Ngünechen dungufi ta Balaam, tüfa feipieyu: “Pepicafiñ regle altar, caque quiñeque altar meu chalintucufiñ quiñe toro ca quiñe caniru”.
5 Chau Jehová quimelelfi ta Balaam chem tañi dungual ca feipifi: “Huiñotunge cheu ñi mülen ta Balac. Tüfa mülei tami feipial”.
6 Fei huiñotui, pefi ta Balac ca com pu principe Moab mu, huitraleingün inafül tañi lüpümngeelchi chalintucun mu.
7 Fei huli tüfachi huercün dungu:
“Balac, Moab ñi lonco ülmen, cüpaleneu Aram mu,tati mahuidantu tripahue antü püle mülelu.
Feipi: ‘Cüpange, iñche tañi duam meu malisiafinge ta Jacob.
Felei llemai, cüpange, condenafinge ta Israel’.
8 ¿Chumngechi am malisiayafun Chau Dios ñi malisianofiel?
¿Ca chumngechi am condenayafun Chau Jehová ñi condenanofiel?
9 Huechuñ fütraque cura mu puquintuniefiñ engün,ca huincul mu adquintuniefiñ.
Üye mu mülei tüfachi troquiñche, quisulei,püntühuingün* caquelu troquiñche mu.
10 Jacob tañi pu cüpanche alün-ngeingün trufür mapu reque, ¿inei am raquiafeyu engün?
¿Inei am raquiafui quiñe troquiñ müten pu Israel che meu?
Pu norngechi che tüngcülen mu* laqueingün,iñche ca femngechi ayüafun tañi layal”.
11 Balac feipifi ta Balaam: “¿Chumelen am? Cüpaleyu tami malisiayafiel tañi pu caiñe. Huelu eimi re cümeque dungu feipifimi müten”.
12 Fei huiñoldungueyu:* “Re feipiquen Chau Jehová tañi feipieteu, ¿feipipelaeyu ama?”.
13 Balac feipi: “Füreneen, amuayu cañpüle. Üye mu puquintuafimi engün. Huelu quiñe troquiñ müten peafimi, com puquintulayafimi. Tiye mu malisiayafimi engün iñche tañi duam mu”.
14 Fei yefi ta Zofim pingechi lelfün mülelu Pisgá ñi huechuñ mu. Deumai regle altar, fei chalintucui quiñe toro ca quiñe caniru caque quiñeque altar meu.
15 Balaam feipifi ta Balac: “Mülenagnge tüfa meu, inafül tami lüpümngeelchi chalintucun, iñche üyeu amuan ñi nütramcayal Chau Dios iñchiu”.
16 Chau Jehová dungufi ta Balaam, fei quimelelfi chem tañi dungual ca feipifi: “Huiñotunge cheu ñi mülen ta Balac, tüfa mülei tami feipial”.
17 Balaam amui cheu ñi mülen Balac, üngümcülerquei* inafül tañi lüpümngeelchi chalintucun mu, ca müleingün Moab ñi pu principe. Balac ramtufi: “¿Chem pi Jehová?”.
18 Fei Balaam feipi tüfachi huercün dungu:
“Huitrapürange, Balac, allcütunge.
Ahuem, allcütuen, Zipor tañi fotüm.
19 Chau Dios pecan huentrungelai, coilatuquelai.
Quisu quiñe huentru ñi fotüm no tati, caletuquelai ñi raquiduam.*
Feipile quiñe dungu, ¿femnoafulu am?
Eldungucünule, ¿mupitripanoafulu cai?
20 ¡Tüfei! Cüpalngen ñi feipial cümeque dungu.
Quisu deu feipi cümeque dungu, iñche chumlayafun rume.
21 Quisu ayüquelai ñi daungeal ta Jacob.
Quisu eluuquelai ñi cutrancangeal pu Israel che.
Tañi Chau Dios Jehová mülei quisu engün mu,püramyequefingün tañi lonco ülmen-ngen mu.
22 Chau Dios entumequefi engün Egipto mu.
Quiñe auca toro* ñi müta reque quellumequefi engün.
23 Dahun dungu* chumlayafi rume ta Jacob,ti pelontun dungu ca chumlayafi ta Israel.
Tüfa hula tati pu che feipiafui Israel ca Jacob mu:
‘¡Ngüneduamfimün Chau Dios ñi femün!’.
24 Tüfachi pu che huitrapürayaingün quiñe trapial reque,ti trapial reque huitraleaingün.
Cudulayai com ifile hula feitichi culliñ tañi nüfielca pütocofile com ti mollfüñ feitichi pu culliñ tañi langümfiel”.
25 Fei Balac feipifi ta Balaam: “Pepi malisianofilmi engün, ngelai tami feipiafiel cümeque dungu”.
26 Balaam huiñoldungufi* ta Balac: “¿Feipilaeyu ama com ñi femal Chau Jehová ñi feipicünueteu?”.
27 Balac feipifi ta Balaam: “Füreneen, cüpange, cañpüle amuayu. Tiye mu cümelu troquiafui Chau Dios tami malisiayafiel tati pu che iñche tañi duam meu”.
28 Balac yefi ta Balaam Peor ñi huechuñ mu, mülelu Jesimón* ñi adquiñ meu.
29 Fei Balaam feipifi ta Balac: “Deumange regle altar ca pepicalelen regle toro ca regle caniru”.
30 Fei Balac femi com tañi feipieteu Balaam, chalintucui quiñe toro ca quiñe caniru caque quiñeque altar meu.
Quimnieal
^ Ca lof mu: “Carnero”.
^ Ca lof mu: “Füchotun, mañumtun”.
^ Ca lof mu: “Hudahuingün”.
^ Ca lof mu: “Cüme duamcülen mu”.
^ Ca lof mu: “Lloudungueyu”.
^ Ca lof mu: “Esperalerquei”.
^ Cam: “Huiño huitrauquelai”.
^ Ca lof mu: “Aucan toro, caita toro”.
^ Ca lof mu: “Calcu dungu”.
^ Ca lof mu: “Lloudungufi”.
^ Ca feipiafui chi: “Ti huellin mapu”.
