Números 24:1-25
24 Chau Jehová ayüquefui ñi cümelcayafiel pu Israel che. Balaam ngüneduamlu, ca quiñe rupa quintulai calcu dungu, doi mai huiñoquintui huellin mapu mu.*
2 Balaam adquintui, fei pefi pu Israel che, caque quiñeque troquiñche quiñentrür anücünui ñi tolto ruca.* Fei Chau Dios ñi nehuen eluhui ñi adnieafiel ta Balaam.
3 Fei huli tüfachi huercün dungu:
“Iñche Balaam, Beor ñi fotüm, petu hulün tüfachi huercün dungu.
Iñche feula fente cüme penien.
4 Iñche allcütun Chau Dios ñi huercün dungu.
Chau Dios Com Nehuen Nielu pengeleneu quiñe afmatun dungu.
Pochongnagün,* nülalei tañi nge:
5 ¡Rume cüme adngei tami tolto ruca, ahuem, Jacob!
¡Cüme adi cheu tami mülen, ahuem, Israel!
6 Fütraque laf mapu reque amulei,ayüfalchi mapu reque inaltu leufü mu,Chau Jehová ñi anümcaelchi aloe reque,*cedro anümca reque inafülcülelu co mu.
7 Ti co tüitüicülei* tañi epu palti mu* ñi mülen.
Tañi fün* ngantucungequei cheu ñi mülen fentren co.
Tañi lonco ülmen doicüleai Agag muca püramyengeai tañi ngünenieel.
8 Chau Dios entumequefi Egipto mu.
Quiñe auca toro* ñi müta reque quellumequefi engün.
Apümcayafi ti pu troquiñche ñi cutrancamequeteu,Ünatucañmayafi ñi foro engün ca apümcayafi engün tañi flecha mu.
9 Pochongnagquei, tranacünuuquei quiñe trapial reque,¿inei am eluhuafui ñi trepeltuafiel?*
Cümelcangepe com tami cümelcaqueteuca malisiangepe com tami malisiaqueteu”.
10 Fei Balac illcutufi* ta Balaam. Fente tañi illculen cultraftucui* tañi cuhu, feipifi ta Balaam: “Mütrümfalfeyu,* malisiafinge tañi pu caiñe pieyu. Huelu cüla rupachi cümeque dungu müten feipifimi.
11 Matu müten huiñotunge tami ruca mu. Fampüramayu pifeyu nga, huelu Chau Jehová catrütueimu”.
12 Balaam feipifi ta Balac: “¿Feipipelafiñ ama tami pu huerquen?
13 Feipifiñ engün: ‘Balac eluelimu rume tañi ruca apolelu plata ca oro mu,* iñche femlayafun cüme dungu cam huesa dungu iñche tañi duam mu feipinoelimu Chau Jehová’. ¿‘Chem tañi feipieteu müten Chau Jehová dunguan’ pipelan ama?
14 Tüfa hula huiñotuan tañi pu che mu. Huelu hunelu cüpange, feipiayu chem ñi chumafiel tüfachi pu che eimi tami pu che cüpalechi antü mu”.*
15 Fei huli tüfachi huercün dungu:
“Iñche Balaam, Beor ñi fotüm, petu hulün tüfachi huercün dungu.
Iñche feula fente cüme penien.
16 Iñche allcütun Chau Dios ñi huercün dungu.
Nien ti Doi Alüpüralelu ñi quimün.
Tati Com Nehuen Nielu pengeleneu quiñe afmatun dungupochongnagmequelu ca nülalelu tañi nge:
17 Peafiñ, huelu feula no.
Adquintuafiñ, huelu petu fülcülelai.*
Quiñe huangülen tripayai Jacob ñi pu cüpanche muca ti lonco ülmen ñi retrü fampürayai Israel ñi cüpanche mu.
Rüfcünu trafolmayafi ñi tol ta Moabca tañi lonco tati pu quehuatufengelu.
18 Nüafi ta Edom ñi quisungeal.
Felei llemai, Seír nüaeyu tañi pu caiñe tañi quisungeal.
Israel pengelai tañi nehuen piuquengen.
19 Quiñe che tripalu Jacob ñi cüpanche mu ngünenieafi tañi pu caiñe,apümcayafi com feitichi pu che mongetripalu ti huaria mu”.
20 Balaam pefilu ta Amalec, feipi tüfachi huercün dungu:
“Com ti pu troquiñche mu, Amalec fei tati hunelu,*huelu af meu larpuai”.
21 Adquintufilu ti pu quenita che, feipi tüfachi huercün dungu:
“Tami ruca mücüfcülei ca tami mülehue huente cura mu mülei.
22 Huelu lüpümngeai Cayín.*
¿Tuntelehuei tami presuyeaeteu Asiria?”.
23 Fei amulei ñi feipin huercün dungu:
“Ahuem, Chau Dios femle tüfa, ¿inei mongetripayai?
24 Fillque farcu cüpayai tripalu Kitim ñi ina lafquen püle.
Cutrancayafingün Asiriaca cutrancayafingün Éber.
Huelu quisu cafei apümcangeai”.
25 Fei hula Balaam huitrapürai, huiñotui cheu ñi mülequefel. Balac cañpüle amutui.
Quimnieal
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Carpa ruca”.
^ Ca lof mu: “Lloyünagün, ponornagün”.
^ Tüfa quiñe cüme nümün-ngechi anümca.
^ Ca lof mu: “Lüicülei”.
^ Ca lof mu: “Balde mu”.
^ Cam: “Cüpanche.”
^ Ca lof mu: “Aucan toro, caita toro”.
^ Ca lof mu: “Nepeltuafiel”.
^ Ca lof mu: “Lladcütufi”.
^ Ca lof mu: “Litraftucui”.
^ Ca lof mu: “Ngütrümfalfeyu”.
^ Ca lof mu: “Milla mu”.
^ Cam: “Afaelchi antü mu”.
^ Ca lof mu: “Püllelelai”.
^ Pu Israel che hue tripalu Egipto mu, tüfachi troquiñche hunelu lefcontueyu chumnon mu rume.
^ Tüfa tati pu quenita che.
