Números 27:1-23
27 Mahlá, Noá, Hoglá, Milcá ca Tirzá feita Zelofehad ñi pu ñahue. Zelofehad tañi chau feita Héfer, quisu tañi chau feita Galaad, quisu ñi chau feita Makir, quisu ñi chau feita Manasés. Zelofehad ñi pu ñahue tuhui Manasés ñi pu familia mu, José tañi fotüm. Feitichi pu domo fülconpuingün*
2 cheu ñi mülen Moisés, ti sacerdote Eleazar, pu loncolelu ca com tati pu che itrotripa ti trahunhue tolto ruca mu.* Feipingün:
3 “Taiñ chau lai huellin mapu meu.* Huelu quiñeulai feitichi pu che engün chaftufilu ta Chau Jehová ca quelluntucufilu ta Coré. Quisu tañi culpan mu* lai. Nierquelafui fotüm.
4 ¿Chumngelu* taiñ chau ñi üi amulehuelayai tañi familia mu nienon mu fotüm? Elumuiñ mapu taiñ chau ñi pu peñi reque”.
5 Feimu Moisés pengeldungulelfi ta Chau Jehová.
6 Fei Chau Jehová feipifi ta Moisés:
7 “Zelofehad tañi pu ñahue cüme pingün tati. Rüfcünu eluafimi mapu quisu engün tañi ngen-ngeal tañi chau ñi pu peñi reque. Mülei tami eluafiel engün tañi chau ñi mapu.
8 Feipifinge pu Israel che: ‘Quiñe huentru lale nienon mu fotüm, mülei tamün eluafiel tañi mapu quisu tañi ñahue.
9 Nienole ñahue, eluafimün ti mapu tañi pu peñi.
10 Nienole peñi, eluafimün ti mapu tañi chau ñi pu peñi.
11 Huelu tañi chau nienole peñi, tüfachi mapu elungeai tañi doi fülmaucülechi pariente, quisu ngen-ngeai. Tüfachi dungu quiñe leyngeai pu Israel che mu, chumngechi ñi feipifiel Chau Jehová ta Moisés’”.
12 Fei hula Chau Jehová feipifi ta Moisés: “Pürapunge tüfachi huincul Abarim mapu mu. Puquintufinge ti mapu ñi eluafiel pu Israel che.
13 Puquintufilmi, tami peñi Aarón reque layaimi ca rüngaltucungeaimi tami cuifiqueche yem reque.
14 Zin huellin mapu meu tati pu che notucadungueneu,* huelu eimu inanielafimu chem tamu feipifiel. Iñche elufilu co engün, eimu püramyemulan fei engün ñi adquiñ meu. Tüfa Meribá ñi co Cadés mapu meu, Zin huellin mapu mu”.
15 Fei Moisés feipifi ta Chau Jehová:
16 “Chau Jehová, tati eluquefilu mongen com pu che, mülei ñi loncocünuafiel quiñe huentru tüfachi pu che meu.
17 Quisu adnieafi engün itrocom dungu mu ca fei engün inanieaeyu itrocom dungu mu. Femngechi Chau Jehová ñi pu che miyaulayai camañngenochi ufisa reque”.*
18 Feimu Chau Jehová feipifi ta Moisés: “Dullifinge ta Josué, Nun ñi fotüm. Quisu adümuhun-ngechi huentru tati. Fei fampuhulfinge tami cuhu quisu meu.
19 Yefinge cheu ñi mülen ti sacerdote Eleazar ca com ti pu che. Fei quisu engün tañi adquiñ mu loncocünuafimi.
20 Tami nieelchi autoridad, quiñe troquiñ eluafimi, femngechi com pu Israel che allcütuaeyu.
21 Fei pemeafi ti sacerdote Eleazar. Josué ñi duam mu ti sacerdote püneafi ti Urim ñi quimal chem ñi ayüqueel Chau Jehová. Com pu che inanieafi chem ñi feipingeal, Josué ca pu Israel che, com ti troquiñche”.
22 Feimu Moisés com femi chumngechi ñi feipieteu Chau Jehová. Dullifi ta Josué, yefi cheu ñi mülen ti sacerdote Eleazar ca com ti pu che,
23 fampuhuli ñi cuhu quisu meu ca loncocünufi. Femi chumngechi ñi feipifiel Chau Jehová ta Moisés.
Quimnieal
^ Ca lof mu: “Pülleconpuingün”.
^ Ca lof mu: “Trahunhue carpa ruca mu”.
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Yafcan mu”.
^ Ca lof mu: “Chemu”.
^ Ca lof mu: “Chaftudungueneu”.
^ Ca lof mu: “Cuidangenochi ufisa reque”.
