Números 28:1-31
28 Feula Chau Jehová feipifi ta Moisés:
2 “Tüfachi huercün dungu quimelelafimi pu Israel che, feipiafimi: ‘Rüfcünu elumuchi tañi chalintucun,* ti iyael. Ti señacünuelchi antü meu mülei ñi hulngeal tañi chalintucun cütral mu ca cüme nümün-ngelu iñche mu’.
3 Feipiafimi engün: ‘Tüfachi chalintucun cütral meu eluafimün ta Chau Jehová: fill antü hulaimün epu tremolechi cordero quiñe tripantu nielu, tüfa lüpümngeelchi chalintucun-ngeai.
4 Quiñe cordero chalintucuafimi pulihuen mu, cangelu conantü mu.
5 Ca hulaimün quiñe kilo* cüme rüngo, reyülepe* quiñe litro* oliva aceite engu. Tüfa quiñe fün chalintucun-ngeai.
6 Sinaí huincul mu feipicünungei ñi hulngeal fill antü tüfachi lüpümngeelchi chalintucun. Cüme nümün-ngeai, cütral mu chalintuculelngeai ta Chau Jehová.
7 Caque quiñeque cordero mu ca hulngeai quiñe hutrulngeelchi chalintucun.* Feiti hutrulngeelchi chalintucun quiñe litro* pulcu nieai. Ti yamfal mülehue mu* hutrulngepe, quiñe hutrulngeelchi chalintucun-ngeai Chau Jehová mu.
8 Conantü mu hulaimi cangelu cordero. Pulihuen mu reque, ca hulaimi quiñe fün chalintucun ca quiñe hutrulngeelchi chalintucun. Cütral mu chalintucungeai, cüme nümün-ngeai Chau Jehová mu.
9 Huelu ürcütun antü meu* hulngeai epu tremolechi cordero quiñe tripantu nielu, cafei epu kilo* cüme rüngo reyülelu* aceite engu. Tüfa quiñe fün chalintucun. Ca hulngeai tañi hutrulngeelchi chalintucun.
10 Tüfa ti lüpümngeelchi chalintucun ñi hulngeal ürcütun antü meu, ca elungeai ti lüpümngeelchi chalintucun hulngequelu fill antü ca tañi hutrulngeelchi chalintucun.
11 Conün mu quiñe cüyen elungeai ta Chau Jehová quiñe lüpümngeelchi chalintucun, elungeai epu hue toro, quiñe caniru* ca regle tremolechi cordero quiñe tripantu nielu.
12 Caque quiñe toro mu hulngeai cüla kilo ca rangiñ* cüme rüngo reyülelu* aceite engu, tüfa quiñe fün chalintucun. Caque quiñeque caniru mu hulngeai epu kilo* cüme rüngo reyülelu aceite engu, tüfa quiñe fün chalintucun.
13 Cafei caque quiñeque cordero mu hulngeai quiñe kilo* cüme rüngo reyülelu* aceite engu. Tüfa quiñe fün chalintucun. Com tüfa quiñe lüpümngeelchi chalintucun-ngeai, cüme nümün-ngeai, cütral mu chalintuculelngeai ta Chau Jehová.
14 Cafei hulngepe tañi hutrulngeelchi chalintucun. Caque quiñeque toro mu hulngeai epe epu litro* pulcu, caque quiñeque caniru mu hulngeai doi quiñe litro* pulcu ca caque quiñeque cordero mu hulngeai quiñe litro* pulcu. Tüfa tati lüpümngeelchi chalintucun ñi hulngeal caque quiñeque cüyen tripantu mu.
15 Cafei elungeai ta Chau Jehová quiñe chalintucun culpan dungu mu,* quiñe pichi chifu* hulngeai. Ca hulngeai ti lüpümngeelchi chalintucun hulngequelu fill antü ca tañi hutrulngeelchi chalintucun.
16 Ti mari meli antü tati hunen cüyen mu femngeai ti Pascua ñi püramyengeal ta Chau Jehová.
17 Ti mari quechu antü feichi cüyen mu femngeai quiñe fiesta. Regle antü mu ingeai fayümngenochi cofque.
18 Ti hunen antü femaimün quiñe falin trahun. Fanechi cüdau femlayaimün feichi antü.
19 Cütral mu chalintuculelngeai ta Chau Jehová epu hue toro, quiñe caniru ca regle cordero quiñe tripantu nielu, tüfa quiñe lüpümngeelchi chalintucun. Tremolepe ti pu culliñ.
20 Cafei hulngeai cüme rüngo reyülelu* aceite engu, tüfa tañi fün chalintucun. Caque quiñeque toro mu hulngeai cüla kilo ca rangiñ,* ca caque quiñeque caniru mu hulngeai epu kilo.*
21 Caque quiñeque tati regle cordero mu hulngeai quiñe kilo.*
22 Cafei ñi liftuñmangeal tamün culpan* chalintucuaimi quiñe chifu, tüfa quiñe chalintucun culpan dungu mu.
23 Com tüfa hulaimün, fei ca hulaimün ti lüpümngeelchi chalintucun hulngequelu pulihuen mu. Tüfa coneltulei feiti lüpümngeelchi chalintucun hulngequelu fill antü.
24 Com femngechi chalintucuaimün fill antü, regle antü mu, tüfa iyael tati.* Cütral mu chalintucungeai, cüme nümün-ngeai Chau Jehová mu. Ca hulaimün ti lüpümngeelchi chalintucun hulngequelu fill antü ca tañi hutrulngeelchi chalintucun.
25 Ti regle antü, femaimün quiñe falin trahun. Fanechi cüdau femlayaimün feichi antü.
26 Ti Fiesta Conlu ti Cosecha* müleai quiñe antü tamün chalintucual ti hunenque afülechi fün. Fei chalintuculelafimün ta Chau Jehová hueque fün. Feichi antü femaimün quiñe falin trahun, fanechi cüdau femlayaimün.
27 Hulaimün epu hueque toro, quiñe caniru ca regle cordero quiñe tripantu nielu. Quiñe lüpümngeelchi chalintucun-ngeai, cüme nümün-ngeai Chau Jehová mu.
28 Cafei hulngeai cüme rüngo reyülelu* aceite engu, tüfa tañi fün chalintucun. Caque quiñeque toro mu hulngeai cüla kilo ca rangiñ,* tati caniru mu hulngeai epu kilo.*
29 Ca caque quiñeque feiti regle cordero mu hulngeai quiñe kilo.*
30 Cafei hulngeai quiñe pichi chifu ñi liftuñmangeal tamün culpan.*
31 Com tüfa hulaimün, fei ca hulaimün ti lüpümngeelchi chalintucun hulngequelu fill antü ca tañi fün chalintucun. Tremolechi culliñ hulngepe ca tañi hutrulngeelchi chalintucun.
Quimnieal
^ Ca lof mu: “Füchotun, mañumtun”.
^ Hebreo quehun feipilei: “Ti decima parte quiñe efá mu”. Quiñe efá feita 22 litro. Ngüneduamnge apendice B14.
^ Ca lof mu: “Deyülepe”.
^ Hebreo quehun feipilei: “Quiñe cuarto hin meu”. Quiñe hin feita 3,67 litro. Ngüneduamnge apendice B14.
^ Ca lof mu: “Huitrulngeelchi chalintucun”.
^ Hebreo quehun feipilei: “Quiñe cuarto hin meu”.
^ Ca lof mu: “Respetafal mülehue mu”.
^ Hebreo quehun feipilei: “Ti epu decima parte quiñe efá mu”.
^ Ca lof mu: “Deyülelu”.
^ Cam: “Sabado meu”.
^ Ca lof mu: “Carnero”.
^ Hebreo quehun feipilei: “Ti cüla decima parte”.
^ Ca lof mu: “Deyülelu”.
^ Hebreo quehun feipilei: “Ti epu decima parte”.
^ Hebreo quehun feipilei: “Quiñe decima parte”.
^ Ca lof mu: “Deyülelu”.
^ Hebreo quehun feipilei: “Rangiñ hin”.
^ Hebreo quehun feipilei: “Quiñe cuarto hin meu”.
^ Hebreo quehun feipilei: “Quiñe tercio hin meu”.
^ Ca lof mu: “Yafcan dungu mu”.
^ Ca lof mu: “Pichi chivo”.
^ Ca lof mu: “Deyülelu”.
^ Hebreo quehun feipilei: “Ti cüla decima parte”.
^ Hebreo quehun feipilei: “Ti epu decima parte”.
^ Hebreo quehun feipilei: “Quiñe decima parte”.
^ Ca lof mu: “Yafcan”.
^ Hebreo quehun feipilei: “Cofque”.
^ Cam: “Fiesta Rupalu Regle Semana”.
^ Ca lof mu: “Deyülelu”.
^ Hebreo quehun feipilei: “Ti cüla decima parte”.
^ Hebreo quehun feipilei: “Ti epu decima parte”.
^ Hebreo quehun feipilei: “Quiñe decima parte”.
^ Ca lof mu: “Yafcan”.
