Números 31:1-54
31 Fei Chau Jehová feipifi ta Moisés:
2 “Cutrancafinge pu Madián che ñi femfiel mu pu Israel che. Fei hula layaimi ca rüngaltucungeaimi tami cuifiqueche yem reque”.
3 Fei Moisés feipifi tati pu che: “Pepicayafimün quiñeque tamün pu huentru ñi hueichameafiel* pu Madián che, femngechi femngeai Chau Jehová tañi feipin ñi cutrancangeal pu Madián che.
4 Caque quiñeque troquiñche Israel mu huercüaimün huaranca huentru* ñi conal ti troquiñ hueichafe mu”.
5 Fei Israel ñi pu troquiñche mu* pepicangei 12.000 huentru ñi hueichayal. Dullingei huaranca huentru* caque quiñeque troquiñche meu.
6 Fei Moisés huercüfi engün ñi hueichayal. Amui huaranca huentru* caque quiñeque troquiñche mu. Ca amui Finehás, Eleazar tañi fotüm, tüfa tati sacerdote ñi compañniefiel pu hueichafe. Tañi cuhu mu yeniei ti yamfalngechi chemcün* ca ti hueichan trompeta.
7 Hueichamefingün pu Madián che, chumngechi Jehová ñi feipicünufiel ta Moisés. Com ti pu huentru langümfingün.
8 Cafei langümfingün pu lonco ülmen Madián mu: Eví, Réquem, Zur, Hur ca Reba, tüfa pu quechu lonco ülmen Madián mu. Cafei fütra cuchillo mu langümfingün ta Balaam, Beor tañi fotüm.
9 Huelu pu Israel che presuyefingün pu pichiqueche ca pu domo Madián mu tuulu. Cafei com müntuñmafingün* tañi chemcün, tañi ñom culliñ ca tañi caquelu culliñ.
10 Lüpümfingün com ti huaria cheu ñi mülequefel engün ca tañi tolto ruca.*
11 Müntuñmafingün tati pu che com tañi nieel, com tañi pu culliñ ca presuyefingün tati pu che.
12 Fei yefingün pu presu ca com feitichi chemcün ñi müntuñmafiel cheu ñi mülen ta Moisés, ti sacerdote Eleazar ca tati pu Israel che, tüfa engün toltoucüleingün* ti laf mapu Moab ñi huellin mapu mu,* inafül Jordán leufü itrotripa Jericó huaria mu.
13 Fei Moisés, ti sacerdote Eleazar ca pu loncolelu ti pu che meu trafmefingün huecun cheu ñi mülenon ta che.
14 Pu loncolelu huaranca* hueichafe mu ca pu loncolelu pataca hueichafe mu, huiñotulu hueichan meu engün, Moisés rume illcutufi.*
15 Feipifi engün: “¿Chumngelu* montulfimün com tüfachi pu domo?
16 Tüfa engün inanieingün Balaam tañi feipin. Huelulcafingün pu Israel che ñi püntütripayal* Chau Jehová mu ca ñi poyeafiel Peor ñi coila dios. Tüfachi pu domo ñi duam meu Chau Jehová ñi pu che cutrancangei.
17 Feimu mülei tamün langümafiel com ti pichique huentru ca com ti pu domo cudumuulu quiñe huentru engu.
18 Huelu langümlayafimün pu üllchaque domo cudumuunolu quiñe huentru engu.
19 Eimün regle antü mu toltoucüleaimün* huecun cheu ñi mülenon ta che. Com pu langümfilu quiñe che* ca com pu nünütufilu quiñe la, mülei ñi liftuhual puule ti cüla antü ca ti regle antü, eimün ca tamün presuyefiel.
20 Mülei tamün liftuafiel com tamün tacun, tamün trülque chemcün, itrofillem deumangelu cal capüra mu ca com deumangelu mamüll mu”.
21 Ti sacerdote Eleazar feipifi tati pu hueichafe amulu ñi hueichayal: “Tüfa tati ley dungu Chau Jehová ñi elufiel ta Moisés:
22 ‘Ti oro,* ti plata, ti cobre, ti pañillhue,* ti estaño ca tati plomo
23 chumquelaeyu rume ti cütral, feimu mülei tamün lüpümafiel* cütral mu, fei lifcülehuetuai. Huelu cafei co mu* liftuafimün, fei lifcületuai. Chem rume ñi apümcaqueteu cütral mülei ñi cüchangeal co mu.
24 Puule ti regle antü mülei tamün cüchayafiel tamün tacun, fei lifcületuaimün. Fei hula conafuimün cheu ñi mülen ta che’”.
25 Fei Chau Jehová feipifi ta Moisés:
26 “Raquiaimi ca huirintucuaimi com ñi nüngeel, tati pu che ca pu culliñ. Ti sacerdote Eleazar ca pu loncolelu caque quiñeque familia mu quelluaimu.
27 Com ñi nüngeel epu troquiñcünuafimi, quiñe troquiñ eluafimi pu hueichafe amulu hueichan mu, cangelu eluafimi tati pu che.
28 Fei 500 presulelu meu nüaimi quiñe, ca femaimi tati huaca mu, burro ca ufisa. Entuñmayafimi pu hueichafe amulu hueichan mu. Com tüfa elungeai ta Chau Jehová.
29 Com tüfa entungeai quisu engün ñi troquiñ meu, fei elungeai ti sacerdote Eleazar ñi eluafiel ta Chau Jehová.
30 Cafei pu Israel che ñi troquiñ meu entuafimi quiñe che 50 che meu. Ca femaimi pu huaca mu, pu burro, pu ufisa ca com pu ñom culliñ. Fei eluafimi pu Leví che, tüfa engün elfalcünulelngei fillque cüdau nüucülelu Chau Jehová ñi ngillatuhue tolto ruca mu”.
31 Feimu Moisés ca ti sacerdote Eleazar femingu chumngechi ñi feipicünufiel Chau Jehová ta Moisés.
32 Tati pu amulu hueichan mu cüpalfingün 675.000 ufisa,
33 72.000 huaca
34 ca 61.000 burro.
35 Raquingei 32.000 domo turpu ñi cudumuunon quiñe huentru engu.
36 Ti troquiñ ñi elungeel pu amulu hueichan mu, feita 337.500 ufisa.
37 Chau Jehová elungei 675 ufisa.
38 Ca mülei 36.000 huaca, fei elungei ta Chau Jehová 72 huaca.
39 Ca mülerquei 30.500 burro, fei elungei ta Chau Jehová 61 burro.
40 Ca mülerquei 16.000 domo, fei elungei ta Chau Jehová 32 domo.
41 Fei com tüfa Moisés elufi tati sacerdote Eleazar ñi eluafiel ta Chau Jehová, femngechi Chau Jehová feipicünufi ta Moisés.
42 Com ñi cüpalün pu amulu hueichan mu, Moisés epu troquiñcünurquefi, fei Israel che ñi troquiñ mu
43 elungei 337.500 ufisa,
44 ca elungei 36.000 huaca,
45 ca elungei 30.500 burro.
46 Cafei elungei 16.000 domo.
47 Fei Moisés 50 che mu entufi quiñe, ca 50 culliñ meu entufi quiñe. Com tüfa entufi pu Israel che ñi troquiñ meu, fei elufi pu Leví che, tüfa engün elfalcünulelngei fillque cüdau nüucülelu Chau Jehová ñi ngillatuhue tolto ruca mu. Moisés femi chumngechi ñi feipicünueteu Chau Jehová.
48 Fei pu loncolelu huaranca hueichafe mu* ca pu loncolelu pataca hueichafe mu, fülmafingün ta Moisés.
49 Feipifingün: “Tami pu cüdaufe deu raquifingün com pu hueichafe taiñ elfalcünulelngeel, comcüleingün.
50 Feimu elumuiñ taiñ chalintuculelafiel ta Chau Jehová caque quiñeque iñchiñ taiñ peel, oro chemcün, cadenilla pünengequelu pallipalli mu, brazalete, yihul,* chahuai ca itrofill llancatu. Femngechi ñi perdonañmangeal taiñ culpan* Chau Jehová ñi adquiñ meu”.
51 Fei Moisés ca ti sacerdote Eleazar llohuingu tañi oro engün, com tañi llancatu.
52 Com ti oro ñi elufiel ta Chau Jehová pu loncolelu huaranca hueichafe mu* ca pu loncolelu pataca hueichafe mu, feita 16.750 siclo.*
53 Caque quiñeque hueichafe nürqueingün itrofillem hueichan mu tañi quisungeal.
54 Fei Moisés ca ti sacerdote Eleazar llohuingu ti oro ñi cüpalün pu loncolelu huaranca hueichafe mu* ca pu loncolelu pataca hueichafe meu. Yefingu ponhui ti trahunhue tolto ruca mu, femngechi com pu Israel che ñi raquiduamtucunieafiel Chau Jehová ñi femün quisu engün meu.
Quimnieal
^ Ca lof mu: “Quehuameafiel”.
^ Ca lof mu: “Mil huentru”.
^ Hebreo quehun feipilei: “Huarancaquechi Israel meu”.
^ Ca lof mu: “Mil huentru”.
^ Ca lof mu: “Mil huentru”.
^ Ca lof mu: “Respetafalngechi fillem”.
^ Ca lof mu: “Montuñmafingün”.
^ Ca lof mu: “Carpa ruca”.
^ Ca lof mu: “Elcünuingün ñi tolto ruca”.
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Mil”.
^ Ca lof mu: “Lladcütufi”.
^ Ca lof mu: “Chemu”.
^ Ca lof mu: “Hudatripayal”.
^ Ca lof mu: “Anümcünuaimün tamün tolto ruca”.
^ Ca lof mu: “Milla”.
^ Ca lof mu: “Hierro”.
^ Cam: “Rulpayafiel”.
^ Tüfachi co ñi duam meu pu che ca itrofillem lifngetuafui Chau Dios ñi adquiñ mu.
^ Ca lof mu: “Mil hueichafe mu”.
^ Ca lof mu: “Anillo”.
^ Ca lof mu: “Yafcan”.
^ Ca lof mu: “Mil hueichafe mu”.
^ Quiñe siclo fanei 11,4 gramo. Ngüneduamnge apendice B14.
^ Ca lof mu: “Mil hueichafe mu”.
