Números 34:1-29
34 Chau Jehová huiño dungufi ta Moisés, feipifi:
2 “Fei tüfa feipiafimi pu Israel che: ‘Conpulmün Canaán mapu mu, tüfachi mapu llohuaimün tamün ngen-ngeal: cheu ñi fentepuhun Canaán mapu.
3 Huaihuen püle* ti mapu puhuai Zin ñi huellin mapu mu,* tüfa inafülcülei Edom mapu meu. Ti mapu puulu huaihuen püle tuhuai nagaltu Cotrü lafquen mu* tripahue antü püle.
4 Cheu ñi puhun ti mapu cañpüle amuleai, huaihuen püle feitichi rüpü püralu Acrabim mu amuleai, fei amulerpuai Zin mu ca puhuai huaihuen püle Cadés-Barnea mu. Fei hula amuleai Hazar-Addar mu ca puhuai ta Azmón mu.
5 Azmón mu cañpüle amuleai cheu ñi fentepuhun ti mapu, puhuai Egipto ñi huitrunco mu,* fei fentepuhuai Lafquen mu.*
6 Conhue antü püle ti mapu puhuai inaltu Fütra lafquen.* Tüfa mu fentepuhuai ti mapu conhue antü püle.
7 Tüfa mu fentepuhuai ti mapu picun püle.* Fütra lafquen mu tuhuai, Hor huincul mu puhuai.
8 Cheu ñi fentepuhun ti mapu Hor huincul mu, amulerpuai Lebó-Hamat mu,* fei puhuai Zedad mu.
9 Cheu ñi fentepuhun ti mapu amulerpuai Zifrón mu, fei fentepuhuai Hazar-Enán mu. Tüfa mu puhuai ti mapu picun püle.
10 Tripahue antü püle cheu ñi puhun ti mapu tuhuai Hazar-Enán mu, fei puhuai Sefam mu.
11 Cheu ñi puhun ti mapu amuleai Sefam mu, puhuai Riblá mu, tripahue antü püle Ain mu. Fei hula nagai ca rupayai ti mahuida mu mülelu tripahue antü püle Kinéret lafquen mu.*
12 Amuleai Jordán leufü mu, fei fentepuhuai Cotrü lafquen mu. Tüfa tamün mapu ca cheu ñi fentepuhun’”.
13 Feimu Moisés elufi huercün dungu tati pu Israel che, feipifi engün: “Sortiañmangeai* tüfachi mapu tamün hudamelelngeal, chumngechi ñi feipicünun Chau Jehová tañi elungeal ti ailla troquiñche ca rangiñ.
14 Rubén ñi troquiñche, Gad ñi troquiñche ca Manasés ñi rangiñ troquiñche deu llohuingün ñi mapu tañi ngen-ngeal.
15 Tüfachi epu troquiñche ca rangiñ deu llohuingün ñi mapu tripahue antü püle Jordán leufü mu, inafülcülelu Jericó mu”.
16 Chau Jehová huiño dungufi ta Moisés, feipifi:
17 “Tüfachi epu huentru hudamelaimünmeu ti mapu tamün ngen-ngeal: ti sacerdote Eleazar ca Josué, Nun ñi fotüm.
18 Caque quiñeque troquiñche mu dulliaimün quiñe loncolelu, fei hudamcalelaimünmeu ti mapu tamün llohual.
19 Tüfa tañi üi engün: Judá ñi troquiñche mu dullingeai ta Caleb, Jefuné ñi fotüm.
20 Simeón ñi troquiñche mu dullingeai ta Semuel, Amihud ñi fotüm.
21 Benjamín ñi troquiñche mu dullingeai ta Elidad, Kislón ñi fotüm.
22 Dan ñi troquiñche mu dullingeai quiñe loncolelu, Buquí, Joglí ñi fotüm.
23 Manasés ñi troquiñche mu, José ñi fotüm, dullingeai quiñe loncolelu, Haniel, Efod ñi fotüm.
24 Ca Efraín ñi troquiñche mu, José ñi fotüm, dullingeai quiñe loncolelu, Quemuel, Siftán ñi fotüm.
25 Zabulón ñi troquiñche mu dullingeai quiñe loncolelu, Elizafán, Parnac ñi fotüm.
26 Isacar ñi troquiñche mu dullingeai quiñe loncolelu, Paltiel, Azán ñi fotüm.
27 Aser ñi troquiñche mu dullingeai quiñe loncolelu, Ahihud, Selomí ñi fotüm.
28 Ca Neftalí ñi troquiñche mu dullingeai quiñe loncolelu, Pedahel, Amihud ñi fotüm”.
29 Tüfachi pu huentru Chau Jehová huercüfi ñi hudamcalelafiel ti mapu pu Israel che Canaán mu.
Quimnieal
^ Ca lof mu: “Sur püle”.
^ Tüfa cüpa feipilei quiñe troquiñ mapu ñi epe mülenon che.
^ Tüfa Lachi lafquen pingei.
^ Tüfachi huitrunco fill tripantu arcüquei, ancüquei.
^ Ca quimngequei Fütra lafquen cam Mediterráneo pingechi lafquen.
^ Ca quimngequei Mediterráneo pingechi lafquen.
^ Ca lof mu: “Norte püle”.
^ Cam: “Cheu tuhui Hamat huaria”.
^ Tüfa tati Genesaret lafquen cam Galilea lafquen.
^ Ca lof mu: “Suerteñmangeai”.
