Números 35:1-34
35 Chau Jehová dunguniefi ta Moisés ti laf mapu Moab ñi huellin mapu meu* inafül Jordán leufü itrotripa Jericó huaria mu. Feipifi:
2 “Feipiafimi pu Israel che, chem tañi elungeal engün mülei ñi eluafiel pu Leví che fillque huaria ñi müleal engün. Cafei eluafingün pu Leví che ti lelfün ñi hualloñmanieteu feitichi huaria.
3 Pu Leví che müleaingün feitichi huaria mu, fei ütalafingün tañi ñomque culliñ tati lelfün meu. Tañi pu caquelu culliñ ca müleaingün fei meu.
4 Ti lelfün tami eluafiel pu Leví che huallpaleai ti huaria mu. Ti cura malal mu tuhuai, fei 445 metro* puhuai.
5 Huecun ti huaria mu tripahue antü püle mediaimün 890 metro,* huaihuen püle* mediaimün 890 metro,* conhue antü püle mediaimün 890 metro* ca picun püle* mediaimün 890 metro.* Ti huaria rangiñ mu müleai. Tüfa tati lelfün ñi nieal pu Leví che ñi huaria.
6 Feitichi pu huaria tamün eluafiel tati pu Leví che, cayu elcünuaimün ñi ellcahual* ti langümchelu. Cafei eluafimün caquelu 42 huaria.
7 Eluafimün pu Leví che 48 huaria ca tañi lelfün.
8 Pu Israel che ñi elungeel mu entuaimün huaria tamün eluafiel pu Leví che. Fütraque troquiñche mu doi fentren entuaimün, pichique troquiñche mu doi pichin entuaimün. Tunten ñi elungeel caque quiñeque troquiñche, eluafingün quiñeque huaria tati pu Leví che”.
9 Chau Jehová dunguniefi ta Moisés, feipifi:
10 “Dungufinge pu Israel che, feipiafimi engün: ‘Noaimün Jordán leufü mu, fei conpuaimün Canaán mapu meu.
11 Dulliaimün quiñeque huaria ñi ellcahual che, cüme adcünungepe ñi puhual. Üye mu lefmahuafui ti langümchelu tuntucun meu.
12 Tüfachi huaria mu ellcahuaimün tamün dinoaeteu ti langümngelu ñi pariente.* Femngechi ti langümchelu lalayai petu ñi juiciantucungenon pu juez* ñi adquiñ mu.
13 Tüfachi dungu mu elcünungeai cayu huaria ñi ellcahual che.
14 Tüfa püle Jordán leufü mu elcünuaimün cüla huaria ñi ellcahuam che. Canaán mapu mu ca elcünuaimün cüla.
15 Tüfachi cayu huaria mu ellcahuafui pu Israel che ca pu ca cüpanche mülelu pu Israel che mu. Femngechi inei rume langümchele tuntucun mu, lefmahuafui tiye mu.
16 Quiñe che hulelcayafui chi cangelu che quiñe pañillhue chemcün mu.* Fei larpule, quisu langümchefengei tati. Rüfcünu mülei ñi layal ti langümchefe.
17 Cam quiñe cura mu hulelcachele, fei larpule, langümchefengei tati. Rüfcünu mülei ñi layal ti langümchefe.
18 Cam quiñe mamüll mu hulelcafile ti che, fei larpule, langümchefengei tati. Rüfcünu mülei ñi layal ti langümchefe.
19 Ti langümngelu ñi pariente langümafi ti langümchelu. Pefile, langümafi.
20 Quiñe che layafui chi cangelu che ñi ültrentucueteu* üdehun mu cam ütrüftufile quiñe chemcün huesa duam mu.
21 Cam layafui chi quiñe che ñi hulelcangen cuhu mu üdehun meu. Feiti tañi hulelcaeteu rüfcünu mülei ñi layal. Langümchefengei tati. Ti langümngelu ñi pariente pefile ti langümchefe, langümafi.
22 Quiñe che ültrentucuafui chi* cangelu che cam ütrüftufi chi quiñe chemcün mu. Huesa duam mu femlafi ca ñi üdenofiel ti che.
23 Cam quiñe che ütrüfentuafui chi quiñe cura, fei ñi penofiel ti che, tañi lonco mu puhuafui. Quisu caiñetulafi, pilafui ñi huesalcayafiel. Huelu larpule ti che,
24 pu che* juiciantucuai ti dungu ñi nieel ti huesa femlu ca ti langümngelu ñi pariente. Inangeai tüfachi huercün dungu.
25 Fei ti pu che* montulafi ti langümchelu, femngechi ti langümngelu ñi pariente langümlayayu. Huiño yengetuai feichi huaria mu cheu ñi ellcauquen che, üye mu lefmahurquei ellaca mu. Mülenagai üye mu lale hula ti hunen lonco sacerdote, feiti dullingelu ti falin aceite mu.
26 Ti langümchelu puulu quiñe huaria cheu ñi ellcauquen pu che, tripale feitichi huaria ñi mapu meu,
27 ti langümngelu ñi pariente peafeyu ñi mülen huecun feiti huaria cheu ñi ellcauquen pu che, fei langümafeyu. Femle, culpaconlayai* ñi langümfiel mu.
28 Ti langümchelu mülecayai ti huaria cheu ñi ellcauquen che lale hula ti hunen lonco sacerdote. Fei lale ti hunen lonco sacerdote, huiñotuafui tañi ruca mu.
29 Fei tüfa rupale, inanieaimün tüfachi ley dungu tamün juzgayal. Cheu rume mülelmün, eimün ca tamün pu cüpanche femaimün tüfa.
30 Inei rume langümchele, allcüngeai ñi feipin quiñeque che quimlu ñi rupan, fei layai tañi langümchefengen mu. Huelu inei no rume lalayai quiñe che müten ñi feipin mu.
31 Feipicünungele ñi langümngeal ti langümchefe, lloulayaimün cullitu ñi montulngeal. Rüfcünu mülei tañi layal.
32 Inei rume lefmaule quiñe huaria cheu ñi ellcauquen che, lloulayafimün cullitu ñi huiñotual tañi mapu mu petu ñi lanon ti hunen lonco sacerdote.
33 Mülelai tamün podümafiel ti mapu cheu tamün mülen. Mollfüñ podümquefi ti mapu. Feiti che hutrulfilu* mollfüñ, quisu ñi mollfüñ mu müten liftungeafui ti mapu cheu ñi hutrulfiel mollfüñ.
34 Ngelai tamün podümafiel ti mapu cheu tamün mülen, iñche ca mülen tüfa mu. Iñche, Chau Jehová, mülen rangi pu Israel che mu’”.
Quimnieal
^ Tüfa cüpa feipilei quiñe troquiñ mapu ñi epe mülenon che.
^ Hebreo quehun feipilei: “1.000 codo”. Quiñe codo fei ta 44,5 centimetro. Ngüneduamnge apendice B14.
^ Hebreo quehun feipilei: “2.000 codo”.
^ Ca lof mu: “Sur püle”.
^ Hebreo quehun feipilei: “2.000 codo”.
^ Hebreo quehun feipilei: “2.000 codo”.
^ Ca lof mu: “Norte püle”.
^ Hebreo quehun feipilei: “2.000 codo”.
^ Ca lof mu: “Llumuhual”.
^ Cam: “Ti castigaquefilu feiti hutrulfilu, huitrulfilu quiñe che ñi mollfüñ”.
^ Cam: “Ti troquiñche”.
^ Ca lof mu: “Hierro fillem mu”.
^ Ca lof mu: “Peltrintucueteu, rütrentucueteu”.
^ Ca lof mu: “Peltrintucuafui chi, rütrentucuafui chi”.
^ Tüfa pu juez peno dunguñpequefilu pu che.
^ Tüfa pu juez peno dunguñpequefilu pu che.
^ Ca lof mu: “Yafcaconlayai”.
^ Ca lof mu: “Huitrulfilu”.
