Números 36:1-13
-
Inei engu ñi niehual pu domo lloulu tañi chau yem ñi mapu (1-13)
36 Pu loncolelu Galaad ñi pu familia mu, tüfa Makir ñi fotüm, Manasés ñi fotüm, tuulu José ñi pu fotüm tañi pu familia mu, fülconpuingün,* fei dunguingün cheu ñi mülen Moisés ca pu loncolelu Israel che mu.
2 Feipingün: “Ñidol, Chau Jehová ñi feipin mu sortiañmayaimi* ti mapu tami hudamcünulelafiel pu Israel che, femngechi ñi ngen-ngeal engün. Ñidol, Chau Jehová feipieimu tami eluafiel Zelofehad ñi pu ñahue taiñ peñi yem ñi mapu.
3 Feitichi pu domo nieule quiñe huentru engu coneltulelu ca troquiñche Israel mu, tüfachi pu domo ñi mapu coneltuhuelayai taiñ pu chau ñi elungeel mu. Feiti troquiñche ñi conal ti domo ngen-ngeai ti mapu meu, fei coneltuhuelayai iñchiñ taiñ elungeel mu.
4 Israel mu puule ti Ayühun Tripantu, tüfachi pu domo ñi mapu coneltuleai feichi troquiñche ñi conal engün. Femngechi tañi mapu engün coneltuhuelayai chem ñi elungeel taiñ pu chau ñi troquiñche”.
5 Fei Chau Jehová ñi feipin meu Moisés feipifi pu Israel che: “Ñi chem pin José tañi troquiñche rüfngei llemai.
6 Tüfa ñi feipifiel Chau Jehová Zelofehad tañi pu ñahue: ‘Chem huentru engu rume niehuafuingün. Huelu mülei ñi coneltuleal tañi chau ñi troquiñche meu.
7 Chem ñi elungeel pu Israel che ngelai ñi eluafiel cangelu troquiñche Israel mu. Caque quiñeque Israel che niecayafi ti mapu ñi elungeel tañi cuifiqueche yem ñi troquiñche.
8 Chem ñahue rume ñi elungeel mapu quiñe troquiñche Israel mu, mülei ñi quintual huentru tañi chau ñi troquiñche meu. Femngechi pu Israel che niecayafi chem ñi elungeel tañi cuifiqueche yem.
9 Quiñe mapu no rume elungelayai cangelu troquiñche. Caque quiñeque troquiñche Israel mu niecayafi chem tañi elungeel’”.
10 Zelofehad tañi pu ñahue femingün chumngechi Chau Jehová feipicünufi ta Moisés.
11 Feimu Mahlá, Tirzá, Hoglá, Milcá ca Noá, Zelofehad tañi pu ñahue, niehuingün tañi malle ñi fotüm engün.
12 Tañi pu füta engün coneltulefui Manasés ñi pu familia mu, José tañi fotüm. Femngechi tañi chau ñi troquiñche niecayafi ti mapu.
13 Tüfachi huercün dungu ca ley dungu Chau Jehová elufi ta Moisés ñi eluafiel pu Israel che ti laf mapu Moab ñi huellin mapu mu* inafül Jordán leufü itrotripa Jericó huaria mu.
Quimnieal
^ Ca lof mu: “Pülleconpuingün”.
^ Ca lof mu: “Suerteñmayaimi”.
^ Tüfa cüpa feipilei quiñe troquiñ mapu ñi epe mülenon che.
