Números 5:1-31
5 Chau Jehová ca huiño dungufi ta Moisés, feipifi:
2 “Quiñe che lepra cutran nieafui chi, trarcüleafui* quiñe troquiñ tañi cuerpo mu* cam lifcülelayafui tañi nünütufiel quiñe la.* Feipiafimi pu Israel che ñi entuafiel huecun com tüfachi pu che.
3 Huentru cam domo rume, mülei tamün entuafiel huecun, cheu ñi mülenon ta che. Iñche mülen rangiñ quisu engün meu, feimu entuafimün huecun. Femnolmün, quisu engün ñi duam meu lifcülelayaimün”.
4 Com tüfa femingün pu Israel che, entufingün tüfachi pu che huecun, cheu ñi mülenon ta che. Chumngechi Chau Jehová ñi feipifiel ta Moisés, femngechi femingün pu Israel che.
5 Chau Jehová feipifi ta Moisés:
6 “Feipifinge tati pu Israel che: ‘Quiñe huentru cam quiñe domo huesalcafile tañi chafche,* culpayai* Chau Jehová mu, fei mülei ñi cullial tañi femün mu.
7 Ti culpalu* mülei ñi entudungual* ca feiti che ñi huesa femfiel mülei ñi culliafiel com tañi huesalcafiel. Cafei tunte ñi hulal, hudamafi quechu troquiñ meu, fei ca mülei ñi cullial quiñe.
8 Huelu ti che huesalcangelu lale ca nienole quiñe fülmaucülechi pariente ñi llohual ti cullitu, ti culpalu* mülei ñi eluafiel ta Chau Jehová. Fei ti sacerdote ngen-ngeai ti cullitu mu. Ti che cafei eluafi quiñe caniru* tati sacerdote. Fei ti sacerdote chalintuculelafi ta Chau Dios ñi liftuñmangeal ti che ñi culpan.
9 Com ñi püntücünufiel* pu Israel che ñi yeafiel ti yamfal mülehue mu,* eluafingün tati sacerdote. Fei quisu ngen-ngeai.
10 Feiti yamfalchi chemcün ñi hulün ta che, ti sacerdote ngen-ngeai. Chem rume yelelngele ti sacerdote, quisu ngen-ngeai’”.
11 Chau Jehová dunguniefi ta Moisés, feipifi:
12 “Dungufinge pu Israel che, feipifinge: ‘Quiñe domo culpayafui chi,* ñihuañpeafui tañi huentru
13 cudumuulu cangelu huentru engu. Feimu Chau Dios ñi adquiñ mu lifcülelai ti domo. Tañi füta quimlai chi, quimngelai tañi femün. Inei no rume pelaeyu petu tañi huesa femmequen. Fei tüfa rupale, tüfachi dungu femaimün:
14 ti huentru rümpelafui tañi domo, raquiduamafui chi ñi ñihuaeteu. Tüfa rüfngeafui cam femlayafui.
15 Feiti huentru mülei ñi yeafiel tañi domo tati sacerdote mu ca yeafi quiñe kilo* cüme rüngo ñi chalintucuafiel ti domo ñi duam mu. Tüfa quiñe chalintucun* rümpeluhun dungu mu, quiñe fün chalintucun ñi quimngeal ñi culpan* cam ñi culpanon ti domo. Feimu tuculelngelayai aceite ca olibano huente ti chalintucun meu.
16 Ti sacerdote fülümpayafi ti domo ñi müleal Chau Jehová ñi adquiñ mu.
17 Ti sacerdote apolafi quiñe metahue lifngechi co mu, fei hula pichin trufür nüai cheu ñi mülen ti ngillatuhue tolto ruca,* fei tuculelafi ti co.
18 Ti sacerdote yeafi ti domo Chau Jehová ñi adquiñ meu, entupüroafi ñi cal lonco, fei ti domo ñi pülai cuhu mu tucuafi ti fün chalintucun ñi quimngeal ñi culpan* cam ñi culpanon. Tüfa tati fün chalintucun ti rümpeluhun dungu meu. Ti sacerdote nieai tañi cuhu mu ti füre co* cüpalquelu cutrancahun.
19 Ti sacerdote femcünuai tati domo ñi eldungucünual, feipiafi: “Petu tami nieucülen tami huentru engu, cudumuunolmi cangelu huentru engu, culpanolmi,* fei amulelmi tami lifcülen meu, huesalcalayaimu tüfachi füre co cüpalquelu cutrancahun.
20 Huelu petu tami nieucülen tami huentru engu, culpalmi,* lifcülenolmi, fei cudumuhulmi cangelu huentru engu, cutrancangeaimi llemai”.
21 Fei ti sacerdote feipiafi tati domo: “Rüf femülmi tüfachi dungu, Jehová femcünuai tami niehuenoal püñeñ* ca ñi poipoicüleal tami pütra. Fei tati pu che eldungucünule cam malisiale engün, Chau Jehová femcünuai ñi raquiduamal engün eimi tami femün meu.
22 Feitichi co cüpalquelu cutrancahun conai tami cüllche mu, fei poipoicüleai tami pütra ca niehuelayaimi püñeñ”. Fei ti domo mülei ñi huiñoldungual:* “¡Felepe mai! ¡Felepe mai!”.
23 Fei hula ti sacerdote ti lifru mu huirintucuafi feitichi malisian dungu, fei ti füre co mu entuafi ti huirintucun.
24 Fei ti sacerdote pütocolelafi ti domo, feitichi co conai quisu mu ca cutrancayaeyu.
25 Tati sacerdote nentuafi tati domo ñi cuhu mu ti chalintucun rümpeluhun dungu meu, fei epuñpüle nengümafi Chau Jehová ñi adquiñ meu ca fülümtucuafi ti altar mu.
26 Ti sacerdote nüai quiñe runa* feiti fün chalintucun mu, femngechi Chau Dios cüme llohuafi com ti chalintucun, fei ti sacerdote lüpümafi huente altar ñi tripayal fitrun.* Fei hula pütocolelafi ti co tati domo.
27 Ti sacerdote pütocolelafi ti domo, fei ti domo lifcülenole ca ñihuañpefile tañi huentru, feiti co cüpalquelu cutrancahun conai quisu meu, cutrancayaeyu, tañi pütra poipoicüleai ca pepi nielayai püñeñ. Com ti pu che feipile malisian dungu, raquiduamyenieafingün ñi rupan tüfachi domo.
28 Huelu ti domo podümuunole Chau Dios ñi adquiñ mu, fei lifcülele, cutrancangelayai, fei pepi niepüñeñai ca nieai cüpanche.
29 Tüfa tati ley rümpeluhun dungu meu quiñe domo culpale* ca lifcülenole Chau Dios ñi adquiñ mu petu tañi nieucülen tañi huentru engu.
30 Cafei inaniengeai tüfachi ley quiñe huentru rümpelfile tañi domo ca raquiduamle ñi ñihuañpeteu. Ti huentru yeafi tañi domo Chau Jehová ñi adquiñ meu, fei ti sacerdote femafi ti domo com ñi feipin tüfachi ley.
31 Ti huentru culpantucungelayai, huelu ti domo culliai tañi culpan meu’”.
Quimnieal
^ Tüfa cüpa feipilei ñi trarcülen ti huentru cam ti domo ñi huillihue quiñe huesa cutran mu.
^ Ca lof mu: “Calül mu”.
^ Ca lof mu: “Trafche”.
^ Ca lof mu: “Yafcayai”.
^ Ca lof mu: “Yafcalu”.
^ Ca lof mu: “Pengeldungual”.
^ Ca lof mu: “Yafcalu”.
^ Ca lof mu: “Carnero”.
^ Ca lof mu: “Hudacünufiel”.
^ Ca lof mu: “Respetafal mülehue mu”.
^ Ca lof mu: “Yafcayafui chi”.
^ Hebreo quehun feipilei: “Ti decima parte quiñe efá mu”. Quiñe efá feita 22 litro. Ngüneduamnge apendice B14.
^ Ca lof mu: “Yafcan”.
^ Ca lof mu: “Füchotun, mañumtun”.
^ Ca lof mu: “Ngillatuhue carpa ruca”.
^ Ca lof mu: “Yafcan”.
^ Ca lof mu: “Mucür co”.
^ Ca lof mu: “Yafcanolmi”.
^ Ca lof mu: “Yafcalmi”.
^ Hebreo quehun feipilei: “Ñi trananagal tami chang”.
^ Ca lof mu: “Lloudungual”.
^ Ca lof mu: “Truna”.
^ Ca lof mu: “Pitrun”.
^ Ca lof mu: “Yafcale”.
