Números 6:1-27
6 Chau Jehová dunguniefi ta Moisés, feipifi:
2 “Dungufinge pu Israel che, feipifinge: ‘Quiñe huentru cam quiñe domo eldungucünule ñi nazareongeal* Chau Jehová ñi adquiñ meu,
3 ngelai ñi putual* pulcu ca chem no rume.* Putulayai cotrü pulcu ca chem cotrü no rume. Ngelai ñi pütocoal cochü co deumangelu ofad mu, ilayafi ofad ca ancülechi ofad no rume.
4 Petu tañi nazareongen, ngelai ñi iyafiel chem no rume entungequelu anüm ofad mu, carü ofad ca trolüf ofad no rume.
5 Petu amulele tañi nazareongen, ngelai ñi cupilngeal tañi lonco.* Elcünuai ñi tremcüleal tañi cal lonco fentepuule hula tañi eldungucünuel. Femngechi pengelcünuai ñi püntücünungen* tañi cüdahuelafiel ta Chau Jehová.
6 Petu püntücünungele* ñi cüdahuelafiel Jehová, mülelai ñi fülcüleal* quiñe la mu.*
7 Lale rume tañi chau, ñuque, peñi cam lamngen, mülelai ñi podümuhual, quisu elcünulu cai ñi tremcüleal tañi cal lonco, femngechi pengelquei tañi nazareongen.
8 Petu amulele tañi nazareongen, püntüleai* ñi cüdahuelafiel ta Chau Jehová.
9 Huelu quiñe che larumele inafül ti nazareo mu, fei nünütufile, podümafui tañi cal lonco, tüfa pengelquei ñi püntücüngen* ñi cüdahuelafiel ta Chau Dios. Femle, fei rupale regle antü, feipicünungeai ñi lif chengetun. Feichi antü mülei ñi cupilngeal com tañi cal lonco.
10 Ti pura antü amuai ti sacerdote mu itrotripa ti trahunhue tolto ruca mu,* yelelafi epu maicoño cam epu pichique paloma.
11 Fei ti sacerdote nüai quiñe üñüm* ñi hulal quiñe chalintucun* culpan dungu meu,* cafei nüai cangelu ñi hulal quiñe lüpümngeelchi chalintucun. Femngechi liftuñmangeai ti che ñi culpan podümuulu cai quiñe la mu.* Feichi antü ti che püntücünuhuai* ñi cüdahuelafiel ta Chau Dios, feimu elcünuai ñi huiño tremcüleal tañi cal lonco.
12 Feiti huentru huiño püntücünuhuai* ñi cüdahuelafiel ta Chau Jehová, femngechi huiño nazareongetuai. Fei yeafi quiñe hue caniru* quiñe tripantu nielu ñi chalintucungeal culpan dungu meu.* Huelu podümuhui petu tañi nazareongen, feimu raquingelayai com feichi antü deu rupalu.
13 Tüfa tati ley ñi inayafiel pu nazareo che. Fentepuule tañi nazareongen, yengeai itrotripa ti trahunhue tolto ruca mu.
14 Üye mu tüfa chalintuculelafi ta Chau Jehová: ñi hulal quiñe lüpümngeelchi chalintucun yeafi quiñe tremolechi hue caniru quiñe tripantu nielu, ñi hulal quiñe chalintucun culpan dungu meu* yeafi quiñe tremolechi ufisa quiñe tripantu nielu, ñi hulal quiñe chalintucun quiñentrür ingequelu* yeafi quiñe tremolechi caniru.
15 Cafei yeafi quiñe canastu nielu cofque rangiñ mu huechodcülelu, deumangeai cüme rüngo mu aceite engu, huelu nielayai fayümhue.* Ca yeafi fayümngenochi churrasca huifontucungelu aceite engu. Ca yeafi fün chalintucun ca hutrulngeelchi chalintucun.*
16 Ti sacerdote com tüfa yeafi Chau Jehová ñi adquiñ mu, fei hulai ti chalintucun culpan dungu mu* ca ti lüpümngeelchi chalintucun.
17 Ti sacerdote ñi hulal ti chalintucun quiñentrür ingequelu chalintuculelafi ta Chau Jehová ti caniru ca ti canastu nielu cofque rangiñ mu huechodcülelu nienolu fayümhue. Cafei hulai ti fün chalintucun ca ti hutrulngeelchi chalintucun.
18 Fei itrotripa ti trahunhue tolto ruca mu ti nazareo cupiluhuai com tañi cal lonco. Fei nüafi com feichi cal lonco tremlu petu tañi nazareongen ca tucuafi huente ti cütral meu, miñche ti chalintucun quiñentrür ingequelu.
19 Ti nazareo deu cupilngele tañi cal lonco,* ti sacerdote nüai ti caniru ñi paletilla* huadcümngelu, ti canastu meu entuai quiñe cofque rangiñ mu huechodcülelu nienolu fayümhue ca quiñe churrasca fayümhue nienolu, fei com tüfa tucuafi tati nazareo ñi pülai cuhu mu.
20 Fei ti sacerdote Chau Jehová ñi adquiñ meu epuñpüle nengümafi ñi chalintucuafiel. Tüfa püntücünulelngeai* tati sacerdote, chumngechi ñi elungeel tati rücu epuñpüle nengümngelu ca tati chang* püntücünungelu. Femle com tüfa, fei hula ti nazareo pulcutuafui.
21 Tüfachi ley mülei ñi inayafiel ti nazareo eluulu ñi eldungucünual: ti nazareo pepi femle, eldungucünuafui ñi eluafiel ta Chau Jehová quiñe chalintucun coneltulenolu tañi nazareongen meu. Fei inaniefiel mu tati nazareo ñi ley, mülei ñi huechunenturpuafiel tañi eldungucünuel’”.
22 Fei Chau Jehová feipifi ta Moisés:
23 “Feipifinge ta Aarón ca tañi pu fotüm: ‘Tüfa feipiafimün pu Israel che ñi cümelcaleal engün:
24 “Chau Jehová cümelcayaimünmeu ca cuñiutucuaimünmeu.
25 Chau Jehová pengelpe ñi ayüucülen eimün meu ca füreneaimünmeu.
26 Chau Jehová cutranpiuqueyeaimünmeu ca eluaimünmeu tüngün”’.*
27 Fei engün mülei ñi feipiafiel cümeque dungu pu Israel che iñche tañi üi meu, femngechi iñche cümelcayafiñ engün”.
Quimnieal
^ Quiñe huentru cam domo püntücünuulu ñi cüdahuelafiel ta Chau Dios. Diccionario mu ngüneduamnge “nazareo”.
^ Ca lof mu: “Pütocoal”.
^ Cam: “Chem no rume ngollilcachequelu”.
^ Ca lof mu: “Tünai lonco, cal lonco”.
^ Ca lof mu: “Hudacünungen”.
^ Ca lof mu: “Hudacünungele”.
^ Ca lof mu: “Pülleleal”.
^ Ca lof mu: “Hudaleai”.
^ Ca lof mu: “Hudacünungen”.
^ Ca lof mu: “Trahunhue carpa ruca”.
^ Ca lof mu: “Hudacünuhuai”.
^ Ca lof mu: “Yafcan dungu meu”.
^ Ca lof mu: “Füchotun, mañumtun”.
^ Ca lof mu: “Idum”.
^ Ca lof mu: “Hudacünuhuai”.
^ Ca lof mu: “Carnero”.
^ Ca lof mu: “Yafcan dungu meu”.
^ Ca lof mu: “Yafcan dungu meu”.
^ Cam: “Chalintucun ñi cümelcaucüleal Chau Dios engu”. Diccionario mu ngüneduamnge “chalintucun quiñentrür ingequelu”.
^ Ca lof mu: “Lefaura”.
^ Ca lof mu: “Huitrulngeelchi chalintucun”.
^ Ca lof mu: “Yafcan dungu mu”.
^ Hebreo quehun feipilei: “Chem ñi pengelqueel tañi nazareongen”.
^ Ca lof mu: “Lipang”.
^ Ca lof mu: “Hudacünulelngeai”.
^ Ca lof mu: “Llique”.
^ Ca lof mu: “Cüme felen”.
