Números 8:1-26
8 Chau Jehová dungufi ta Moisés, feipifi:
2 “Dungufinge ta Aarón, feipifinge: ‘Üyümfilmi tati pelontuhue, feiti regle pelontuhue mülei ñi alofal itrotripa cheu ñi mülen ti candelabro’”.
3 Femngechi femi Aarón: üyümfi feiti pelontuhue ñi alofafiel itrotripa cheu ñi mülen ti candelabro. Femi chumngechi Chau Jehová ñi feipifiel ta Moisés.
4 Femngechi deumangei ti candelabro, quiñe troquiñ oro mu müten* deumangei martillo mu. Com deumangei martillo meu, tañi matra anümca reque felelu* ca tañi rayen. Moisés deumai ti candelabro chumngechi ñi pengeleteu Chau Jehová.
5 Chau Jehová huiño dungufi ta Moisés, feipifi:
6 “Püntücünufinge* pu Leví che mülelu pu Israel che mu, fei liftucünufinge engün.
7 Femngechi liftucünuafimi: nüaimi co tami liftuafiel engün,* fei pütefmayafimi.* Quiñe yungechi cuchillo mu mülei ñi cupiluhual com tañi cuerpo* ca cüchayai tañi tacun, femngechi liftuhuaingün.
8 Fei yeafingün quiñe hue toro ca tañi fün chalintucun,* feiti cüme rüngo reyülcülelu* aceite engu. Eimi cai yeaimi cangelu hue toro ñi hulal ti chalintucun culpan dungu meu.*
9 Itrotripa ti trahunhue tolto ruca mu* yeafimi pu Leví che, fei trahulafimi com pu Israel che.
10 Yefilmi pu Leví che Chau Jehová ñi adquiñ mu, pu Israel che mülei ñi fampuhulafiel tañi cuhu tati pu Leví che mu.
11 Fei Chau Jehová ñi adquiñ meu Aarón chalintuculelafi* pu Leví che quiñe chalintucun reque epuñpüle nengümngequelu, pu Israel che ñi hulfiel. Fei pu Leví che cüdahuelafingün ta Chau Jehová.
12 Fei pu Leví che fampuhulelafi tañi cuhu tati toro ñi lonco mu. Fei hula quiñe toro chalintucuafimi culpan dungu meu,* cangelu toro eluafimi ta Chau Jehová quiñe lüpümngeelchi chalintucun, femngechi perdonañmangeai pu Leví che ñi culpan.
13 Yeafimi pu Leví che Aarón ca tañi pu fotüm ñi adquiñ meu, fei chalintuculelafimi engün ta Chau Jehová quiñe chalintucun reque epuñpüle nengümngequelu.
14 Püntücünuafimi* pu Leví che tati pu Israel che mu, fei ti pu Leví che iñchengeaingün.
15 Fei hula pu Leví che conaingün ti trahunhue tolto ruca mu ñi cüdahual. Femngechi lifcünuafimi engün ca hultucuafimi quiñe chalintucun reque epuñpüle nengümngequelu.
16 Fei engün dullicünungeingün, püntücünungeingün* pu Israel che mu. Iñche ngen-ngean fei engün meu. Iñche dullirqueafun tati pu Israel che ñi hunenque fotüm, huelu mai dullifiñ tati pu Leví che.
17 Iñche ngen-ngen com pu Israel che ñi hunenque fotüm ca hunenque culliñ mu. Püntücünufiñ engün* tañi iñchengeal feichi antü ñi langümfiel com pu hunenque culliñ ca hunenque fotüm mülelu Egipto mapu meu.
18 Iñche dullirqueafun tati pu Israel che ñi hunenque fotüm, huelu mai dullifiñ tati pu Leví che.
19 Tati pu Israel che mu entuafiñ pu Leví che, fei eluafiñ ta Aarón ca tañi pu fotüm. Tüfa engün cüdahuai tati trahunhue tolto ruca mu pu Israel che ñi duam meu, femngechi ñi perdonañmangeal engün tañi culpan.* Femngechi pu Israel che fülconpulayai* ti yamfal mülehue mu,* fei cutrancangelayaingün”.
20 Moisés, Aarón ca com pu Israel che com femingün Chau Jehová ñi feipifiel ta Moisés tati pu Leví che meu.
21 Fei hula pu Leví che liftuhuingün ca cüchafingün tañi tacun. Fei Chau Jehová ñi adquiñ meu Aarón hultucufi engün quiñe chalintucun reque epuñpüle nengümngequelu. Fei Aarón huli quiñe chalintucun ñi perdonañmangeal tañi culpan,* femngechi ñi lifcületual engün.
22 Fei hula pu Leví che coningün ñi cüdahual ti trahunhue tolto ruca mu Aarón ca tañi pu fotüm ñi adquiñ meu. Chumngechi Chau Jehová ñi feipifiel ta Moisés pu Leví che mu, femngechi femingün tati.
23 Chau Jehová huiño dungufi ta Moisés, feipifi:
24 “Tüfa mülei ñi inayafiel pu Leví che: ti huentru 25 tripantu nielu cam doi, conai feichi troquiñche mu ñi cüdaumequeel ti trahunhue tolto ruca mu.
25 Huelu puhul-le 50 tripantu, coneltuhuelayai feitichi troquiñche mu cüdaumequelu ca huiño cüdauhuelayai.
26 Quisu quelluafui tañi pu peñi cüdaumequelu ti trahunhue tolto ruca mu, huelu cüdaulayai üye mu. Femngechi femaimi pu Leví che mu ca tañi elfal cüdau meu”.
Quimnieal
^ Ca lof mu: “Milla mu müten”.
^ Ca lof mu: “Namun anümca reque felelu”.
^ Ca lof mu: “Hudacünufinge”.
^ Cam: “Co tami entuñmayafiel ñi culpan engün”.
^ Ca lof mu: “Huidpüñmayafimi”.
^ Ca lof mu: “Calül”.
^ Ca lof mu: “Füchotun, mañumtun”.
^ Ca lof mu: “Deyülcülelu”.
^ Ca lof mu: “Yafcan dungu meu”.
^ Ca lof mu: “Trahunhue carpa ruca mu”.
^ Hebreo quehun feipilei: “Epuñpüle nengümafi”. Tüfa ca tripai versiculo 13, 15 ca 21.
^ Ca lof mu: “Yafcan dungu meu”.
^ Ca lof mu: “Hudacünuafimi”.
^ Ca lof mu: “Hudacünungeingün”.
^ Ca lof mu: “Hudacünufiñ engün”.
^ Ca lof mu: “Yafcan”.
^ Ca lof mu: “Pülleconpulayai”.
^ Ca lof mu: “Respetafal mülehue mu”.
^ Ca lof mu: “Yafcan”.
