Números 9:1-23
9 Ti epu tripantu mu hunen cüyen deu tripalu pu Israel che Egipto mapu mu, Chau Jehová dungufi ta Moisés Sinaí huellin mapu mu.* Feipifi:
2 “Ti señacünuelchi antü meu pu Israel che mülei ñi pepicayafiel ti Pascua* chalintucun.*
3 Ella pun meu,* 14 antü conle tüfachi cüyen mu mülei tañi pepicayafiel, tüfa ti señacünuelchi antü. Ñi pepicangeal, com inaniengeai fillque ley ca huercün dungu deu elcünungelu”.
4 Fei Moisés feipifi tati pu Israel che ñi pepicayafiel ti Pascua chalintucun.
5 Ti hunen cüyen tati 14 antü ella pun meu,* pu Israel che pepicafingün ti Pascua chalintucun Sinaí huellin mapu meu. Pu Israel che com femingün Chau Jehová ñi feipifiel ta Moisés.
6 Huelu fentren huentru lifcülelaingün tañi nünütufiel mu quiñe la, feimu pepicalayafuingün ti Pascua chalintucun feichi antü. Fei pemefingün ta Moisés ca Aarón.
7 Feipifingün: “Lifcülelaiñ taiñ nünütufiel mu quiñe la, huelu ¿chumngelu* elungelayafuiñ taiñ eluafiel ta Chau Jehová quiñe chalintucun ti señacünuelchi antü meu quiñentrür caquelu Israel che iñchiñ?”.
8 Moisés huiñoldungufi:* “Tiye mu üngümcüleaimün,* iñche allcütuan chem ñi feipial Chau Jehová eimün mu”.
9 Fei Chau Jehová feipifi ta Moisés:
10 “Feipifinge pu Israel che: ‘Quiñeque eimün cam tamün pu cüpanche lifcülenole tañi nünütufiel mu quiñe la cam cañpüle miyaule, ca mülei ñi pepicayafiel ti Pascua chalintucun ñi püramyengeal ta Chau Jehová.
11 Mülei ñi pepicayafiel engün ella pun* conle 14 antü epungechi cüyen mu. Ca iyaingün fayümngenochi cofque ca fürechi tucucan.*
12 Ti chalintucun echelcünulayafingün* ñi ingeal ca antü ca trafol-layafingün quiñe foro no rume. Mülei ñi inayafiel engün tati Pascua ñi fillque ley.
13 Quiñe huentru lifcülele cam cañpüle miyaunole, huelu pepicanofile ti Pascua chalintucun, feichi che mülei ñi langümngeal, tañi elunofiel mu ta Chau Jehová ti chalintucun ti señacünuelchi antü meu. Feiti huentru castigangeai tañi culpan meu.*
14 Quiñe ca cüpanche mülele eimün meu, ca mülei ñi pepicayafiel ti Pascua chalintucun ñi püramyengeal ta Chau Jehová. Mülei ñi pepicayafiel chumngechi ñi feipin tati Pascua ñi ley ca tati fillque huercün dungu deu elcünungelu. Ca cüpanche ca eimün quiñe ley müten mülei tamün inayafiel’”.
15 Feichi antü ñi anücünungeel ti ngillatuhue tolto ruca,* quiñe tromü tacueyu. Huelu pun mu mülerquei quiñe cütral reque huente ti ngillatuhue tolto ruca mu cheu ñi mülen ti falin caja nielu Chau Dios ñi ley, feiti cütral hunmai.
16 Tüfa rupaquefui: antü mu quiñe tromü tacuniefi ti ngillatuhue tolto ruca ca pun meu huilüfcülei cütral reque.
17 Fei ti tromü püralu huente ngillatuhue tolto ruca mu, feimeu müten pu Israel che eluuqueingün ñi cañpüle amual. Fei cheu ñi anüpun ti tromü üye mu pu Israel che anücünuquefingün tañi tolto ruca.
18 Chau Jehová ñi feipin mu pu Israel che cañpüle amuqueingün ca Chau Jehová ñi feipin mu pu Israel che toltouqueingün.* Ti tromü petu mülelu huente ngillatuhue tolto ruca mu, fei mu mülenagqueingün.
19 Ti tromü fentreñmalu ñi mülen huente ngillatuhue tolto ruca mu, pu Israel che allcütuquefingün ta Chau Jehová, fei cañpüle amuquelaingün.
20 Quiñeque mu ti tromü fentren antü mülequei huente ti tolto ruca mu. Chau Jehová ñi feipin mu pu Israel che mülenagqueingün, Chau Jehová ñi feipin mu cañpüle amuqueingün.
21 Quiñeque mu ti tromü mülenagquei pun mu müten, huelu hunlu hula cañpüle amuquei. Fei ti tromü püralu pulihuen mu, pu Israel che cañpüle amuqueingün. Ti tromü püralu, antü cam pun-ngefule rume, pu Israel che cañpüle amuqueingün.
22 Ti tromü mülenagafui huente ngillatuhue tolto ruca mu epu antü, quiñe cüyen cam doi, fei pu Israel che mülenagqueingün müten, cañpüle amuquelaingün. Huelu püralu ti tromü, cañpüle amuqueingün.
23 Chau Jehová ñi feipin mu mülenagqueingün, Chau Jehová ñi feipin mu cañpüle amuqueingün. Pu Israel che allcütuquefingün ta Chau Jehová, inaniequefingün com ñi feipifiel Chau Jehová ta Moisés.
Quimnieal
^ Tüfa cüpa feipilei quiñe troquiñ mapu ñi epe mülenon che.
^ Ca lof mu: “Füchotun, mañumtun”.
^ Hebreo quehun feipilei: “Rangi epu nagantü meu”.
^ Hebreo quehun feipilei: “Rangi epu nagantü meu”.
^ Ca lof mu: “Chemu”.
^ Ca lof mu: “Lloudungufi”.
^ Ca lof mu: “Esperaleaimün”.
^ Hebreo quehun feipilei: “Rangi epu nagantü meu”.
^ Ca lof mu: “Mucürcülechi tucucan”.
^ Ca lof mu: “Guardacünulayafingün”.
^ Ca lof mu: “Yafcan meu”.
^ Ca lof mu: “Ngillatuhue carpa ruca”.
^ Ca lof mu: “Anümqueingün ñi tolto ruca”.
