Apocalipsis, chem ñi pengelngeel ta Juan 13:1-18
13 Ti llicafalchi fütra filu huitracünuhui ti cuyüm lafquen meu.
Fei pen ñi tripapan lafquen meu quiñe huapo huesa culliñ. Mari müta nierquei ca regle lonco. Tañi müta meu yeniei mari corona, tañi lonco meu nierquei fillque üi caiñetudungufilu ta Chau Ngünechen.
2 Quiñe fütra auca ñarqui reque felei* ti huapo huesa culliñ. Niei oso namun ca trapial hun. Ti llicafalchi fütra filu elueyu tañi nehuen, tañi ülmen huancu ca fütra autoridad.
3 Pefiñ ñi fütra allfülen quiñe tañi lonco. Epe lafui, huelu tremolngetui* tañi huesa allfen. Com mapu müleyechi pu che afmatufi ti huapo huesa culliñ ca inaniefi.
4 Püramyefingün ti llicafalchi fütra filu ñi elufiel autoridad tati huapo huesa culliñ, ca püramyefingün ti huapo huesa culliñ, feipingün: “¿Inei cai trürcüleafui ti huapo huesa culliñ meu? ¿Inei hueichayafeyu?”.*
5 Elungei quiñe hun ñi mallma dungual ca ñi caiñetudunguafiel ti yamfalngelu.* Cafei elungei autoridad tañi femal chem ñi ayünieel 42 cüyen.
6 Fei nülai tañi hun ñi caiñetudunguafiel ta Chau Ngünechen, tañi üi ca tañi mülehue. Felei llemai, ñi caiñetudunguafiel com pu mülelu huenu meu.
7 Ti huapo huesa culliñ elungei ñi hueichayafiel* ca huehuafiel Chau Ngünechen ñi pu che.* Cafei elungei ñi autoridadcüleal fillque tuhun che meu, fillque mollfüñ che, quehun ca troquiñche.
8 Fei com mapu müleyechi pu che püramyeafingün tati huapo huesa culliñ. Hue choyüngelu pu che ta fantepu meu, quiñe no rume tañi üi huirintuculelai tati langümngeelchi Cordero ñi lifru meu. Tüfachi lifru mu huirintuculei inei tañi mongeleal.
9 Tuchi pepi allcülu, allcütupe.
10 Inei rume mülele ñi presungeal, presungeai. Inei rume langümchele* fütra cuchillo meu, ca femngechi langümngeai fütra cuchillo mu. Feimu Chau Ngünechen ñi pu che* duamnieingün ñi nehuentuleal ca ñi feyentuleal.
11 Fei pefiñ cangelu huapo huesa culliñ mapu mu tripapalu. Nierquei epu müta cordero reque, huelu eluhui ñi dungual quiñe llicafalchi fütra filu reque.
12 Tati hunen huapo huesa culliñ ñi adquiñ meu pengelquei ñi nieel ca femngechi autoridad. Fei tañi duam mu, ti mapu ca tati pu che püramyequefingün tati hunen huapo huesa culliñ, tüfa tati tremolngetulu ñi huesa allfen.
13 Fütraque afmatun dungu femquei. Cafei huenu meu nacümpaquei* cütral ta mapu meu com pu che ñi adquiñ meu.
14 Tati huapo huesa culliñ ñi adquiñ meu elungei ñi femal afmatun dungu. Femngechi ngünencaquefi mapu müleyechi pu che ca feipimequefi engün ñi deumalelafiel quiñe adentun tati huapo huesa culliñ. Fei tüfa fütra cuchillo meu allfüngerquei, huelu tremotui.
15 Tati epungechi huapo huesa culliñ eluñmangei ñi eluafiel mongen* tati hunen huapo huesa culliñ ñi adentun, femngechi ti adentun ñi nentual tañi dungun, cafei ñi langümfalafiel com pu pinolu ñi püramyeafiel tati hunen huapo huesa culliñ ñi adentun.
16 Obligaquefi* com pu che ñi marcangeal tañi man cuhu cam tañi tol, pu illamcangelu ca pu falin chengelu, pu ricu ca pu pofre, pu lifre che ca tati pu esclavo.
17 Feimu inei rume nienole ti marca, tati huapo huesa culliñ ñi üi cam tañi numero, pepi ngillalayai ca pepi fendelayai.
18 Tuchi nielu quimün loncontucuai tüfachi dungu: tati adümuhun nielu ngüneduampe tati huapo huesa culliñ ñi numero, pu che mu tuhui tüfachi numero: 666.
Quimnieal
^ Cam: “Nahuel, caita ñarqui”.
^ Cam: “Mongelngetui”.
^ Cam: “Quehuayafeyu”.
^ Cam: “Respetafalngelu”.
^ Cam: “Quehuayafiel”.
^ Cam: “Pu che huichucünulelngelu ta Chau Ngünechen”.
^ Ca feipiafui chi: “Mülele ñi langümngeal”.
^ Cam: “Pu che huichucünulelngelu ta Chau Ngünechen”.
^ Cam: “Nagümpaquei”.
^ Griego quehun feipilei: “Neyen”.
^ Cam: “Fülümtucuquefi, dicümtucuquefi”.
