Apocalipsis, chem ñi pengelngeel ta Juan 17:1-18
-
Juiciantucungei ti “Fütra Babilonia” (1-18)
-
Ti fütra cüri domo (ñihua domo) anülerquei huente quiñe huapo huesa culliñ quelülelu (1-3)
-
Ti huapo huesa culliñ “mülequefui, feula mülehuetulai, huelu epe tripaletui ti fütraconchi lolo meu” (8)
-
Tati mari müta hueichayafi (quehuayafi) ti Cordero (12-14)
-
Ti mari müta üdeafingün tati cüri domo (16, 17)
-
17 Quiñe tati pu regle cümeque püllü nielu ti regle metahue feipipaeneu: “Cüpange, pengelelayu chumngechi cutrancangeai* ti fütra cüri domo,* feiti anülelu fentren co meu.
2 Mapu müleyechi lonco ülmen pod cudumuhui* tüfachi cüri domo engün. Mapu müleyechi pu che ngollicahuingün ti domo ñi pulcu meu. Tüfachi pulcu adentulei tañi femquen pod cudumuhun”.*
3 Chau Ngünechen ñi nehuen mu ti cüme püllü yeeneu huellin mapu meu.* Feimu pen quiñe domo, anülerquei huente quiñe huapo huesa culliñ meu. Ti culliñ quelüngei, com püle nierquei fentren üi caiñetudungufilu ta Chau Ngünechen. Regle lonco nierquei ca mari müta.
4 Coñol tacun* ca quelü tacun yeniei ti domo, adelcaucülei oro meu,* falinque cura ca llancatu.* Cuhu mu niei quiñe oro copa, tüfa apolei ünufal dungu mu ca tañi podngechi femün pod cudumuhun mu.*
5 Tol meu huirintucuniei quiñe üi, quiñe quimngenochi dungu. Feipilei: “Tati Fütra Babilonia, ñuque reque felei pu cüri domo meu ca ti mapu müleyechi ünufal dungu”.
6 Fei pefiñ ti domo, ngollilerquei ti mollfüñ tripalu Chau Ngünechen ñi pu che meu* ca pu huldunguquelu Jesús mu.
Pefilu iñche, rume afmatulehuen.
7 Feimu ti cüme püllü feipieneu: “¿Chumngelu* afmatulehueimi? Iñche nütramcalelayu tati quimngenoelchi dungu ti domo meu ca tati huapo huesa culliñ cheu tañi püralen, feiti nielu regle lonco ca mari müta.
8 Ti huapo huesa culliñ tami pefiel mülequefui, feula mülehuetulai, huelu epe tripaletui ti fütraconchi lolo meu* ca amulei ñi apümcangeal. Mapu müleyechi pu che afmatulehueaingün ñi pefiel tati huapo huesa culliñ. Tüfa mülequefui, feula mülehuetulai, huelu huiño mületuai. Hue choyüngelu pu che mapu meu ta fantepu mu, feichi pu che ñi üi huirintuculelai ti mongen ñi lifru meu.
9 Duamfali quimün ñi adümngeal tüfachi dungu. Ti regle lonco adentulei regle huincul, tüfa mu anülei ti domo.
10 Mülei regle lonco ülmen: quechu ta falihuelai,* quiñe ta mülei, cangelu petu aculai, huelu acule, pichiñma mülenagai.
11 Ti huapo huesa culliñ, fei tati purangechi lonco ülmen, tüfa tati mülequefulu, huelu feula mülehuetulai. Tati cangelu regle lonco ülmen mu tripai ca amulei ñi apümcangeal.
12 Tati mari müta tami peel adentulei mari lonco ülmen, petu elungelai ñi ngünenieal. Huelu quiñe hora elungeai autoridad ñi lonco ülmencüleal quiñentrür tati huapo huesa culliñ engu.
13 Quiñeucülei tañi raquiduam engün, feimu elufingün tañi pepiluhun ca autoridad tati huapo huesa culliñ.
14 Fei engün hueichayafi* tati Cordero, huelu ti Cordero huehuaeyu engün, fei Ñidolcülei com pu ñidol meu, ca Lonco Ülmencülei com pu lonco ülmen mu. Tati pu compañniefilu ti Cordero ca hueutripayaingün, fei engün tati pu mangelngelu, dullingelu ca manelfalngelu”.
15 Ti cüme püllü ca feipieneu: “Tati co tami peel cheu ñi anülen ti cüri domo, adentulei pu che fillque mollfüñ nielu, fütraque trahunche, fillque troquiñche ca pu che fillque quehun dungulu.
16 Ti mari müta tami peel ca ti huapo huesa culliñ üdeafingün tati cüri domo, müntuñmayafingün* com tañi nieel ca triltrangcünuafingün. Iñmayafingün tañi fün ca com lüpümafingün.
17 Chau Dios raquiduamelfi engün ñi femal tañi ayünieel. Quiñeucülei tañi raquiduam engün, eluucülei engün ñi eluafiel autoridad tati huapo huesa culliñ ñi lonco ülmencüleal femtripale hula Chau Dios ñi feipin.
18 Ti domo tami peel adentulei ti fütra huaria, tüfa ngüneniefi tati pu lonco ülmen mapu mu mülelu”.
Quimnieal
^ Cam: “Ñi juiciantucungeel”.
^ Cam: “Ñihua domo”.
^ Griego quehun feipilei pornéia. Ngüneduamnge “pod cudumuhun”.
^ Griego quehun feipilei pornéia. Ngüneduamnge “pod cudumuhun”.
^ Tüfa cüpa feipilei quiñe troquiñ mapu ñi epe mülenon che.
^ Cam: “Purpura tacun”.
^ Cam: “Aifiñcülei milla meu”.
^ Cam: “Perla”.
^ Griego quehun feipilei pornéia. Ngüneduamnge “pod cudumuhun”.
^ Cam: “Pu che huichucünulelngelu ta Chau Ngünechen”.
^ Cam: “Chemu”.
^ Ngüneduamnge “fütraconchi lolo”.
^ Griego quehun feipilei: “Tranalehuetui”.
^ Cam: “Quehuayafi”.
^ Cam: “Montuñmayafingün”.
