Apocalipsis, chem ñi pengelngeel ta Juan 8:1-13
8 Ti Cordero nülafilu ti reglengechi sello, huenu mu allcüngelai chem no rume rangiñ hora mu peno.
2 Fei pefiñ tati regle cümeque püllü huitralelu Chau Ngünechen tañi adquiñ mu. Tüfa engün elungei regle trompeta.
3 Fei puhui cangelu cüme püllü, nüniei quiñe oro pichi fraseru* ñi füchotungeal incienso.* Fei huitracünuhui inaltu altar meu. Elungei fentren incienso ñi füchotual ti oro altar meu mülelu ti ülmen huancu ñi adquiñ mu. Füchotulu ti incienso, ca mülefui ñi chalintucual ñi llellipuel Chau Ngünechen ñi pu che.*
4 Fei ti cüme püllü füchotulu ti incienso, Chau Ngünechen ñi adquiñ mu pürai ti fitrun* ca ñi llellipun Chau Ngünechen ñi pu che.*
5 Feimeu müten ti cüme püllü entui ailen* ti altar meu, apolfi ti pichi fraseru cheu füchotungei ti incienso, fei ütrüftucufi ti ailen mapu meu. Fei mülerquei tralcan, dungun, llüfqueñ* ca quiñe nüyün.
6 Fei tati regle cümeque püllü nielu ti regle trompeta pepicahuingün ñi dungulafiel.
7 Tati hunen cüme püllü dunguli ñi trompeta. Fei mapu meu ütrüftucungei pire* ca cütral reyülelu* mollfüñ engu. Lüfi quiñe troquiñ* mapu, quiñe troquiñ ti anümca ca com ti cachu.
8 Ti epungechi cüme püllü dunguli ñi trompeta. Fei lafquen mu ütrüftucungei quiñe fütra huincul reque üicülelu. Fei quiñe troquiñ* lafquen mollfüñcünuhui.
9 Lai quiñe troquiñ* lafquen mülechi mongen, ca quiñe troquiñ farcu teifücangei.
10 Ti cülangechi cüme püllü dunguli ñi trompeta. Fei huenu mu ütrüfnagpai quiñe fütra huangülen üicülelu quiñe cüdetuhue reque,* quiñe troquiñ* leufü ca ti hufco meu puhui.*
11 Ajenjo pingei feiti huangülen. Fei quiñe troquiñ co* ajenjocünuhui. Füretui ti co,* feimu fentren che lai.
12 Tati melingechi cüme püllü dunguli ñi trompeta. Fei dumiñnagi quiñe troquiñ* antü, quiñe troquiñ cüyen ca quiñe troquiñ huangülen. Feimu mülehuelai pelon quiñe troquiñ antü meu ca quiñe troquiñ pun no rume.
13 Adquintun, fei allcün quiñe ñamcu* rangi callfü huenu müpüyaulu, nehuentu dungun mu feipi: “Ti caquelu cüla cümeque püllü epe dungulniefi tañi trompeta. Feimu, ¡aungeai! ¡Aungeai! ¡Aungeai mai mapu müleyechi pu che allcüngele ñi dungulngeel tachi trompeta!”.
Quimnieal
^ Cam: “Milla pichi fraseru”.
^ Cam: “Pu che huichucünulelngelu ta Chau Ngünechen”.
^ Cam: “Pitrun”.
^ Cam: “Pu che huichucünulelngelu ta Chau Ngünechen”.
^ Griego quehun feipilei: “Cütral”.
^ Cam: “Relampago”.
^ Griego quehun feipilei: “Quiñe troquiñ ta cüla meu”.
^ Cam: “Deyülelu”.
^ Cam: “Yai”.
^ Griego quehun feipilei: “Quiñe troquiñ ta cüla meu”.
^ Griego quehun feipilei: “Quiñe troquiñ ta cüla meu”.
^ Cam: “Pelontuhue”.
^ Griego quehun feipilei: “Quiñe troquiñ ta cüla meu”.
^ Cam: “Huitrunco”.
^ Griego quehun feipilei: “Quiñe troquiñ ta cüla meu”.
^ Cam: “Mucüri”.
^ Griego quehun feipilei: “Quiñe troquiñ ta cüla meu”.
^ Cam: “Aguila”.
