Deuteronomio 19:1-21
19 Tami Chau Dios Jehová apümcayafi pu troquiñche mülelu ti mapu mu tami eluaeteu tami Chau Dios Jehová. Müntuñmayafimi* ñi mapu engün ca mülepuaimi fei engün tañi huaria mu ca tañi ruca mu.
2 Tami Chau Dios Jehová eluaimu feitichi mapu tami ngen-ngeal, fei rangiñ mu püntücünuafimi* cüla huaria.
3 Cüla troquiñcünuafimi ti mapu tami eluaeteu tami Chau Dios Jehová tami ngen-ngeal. Cüme pepicayafimi ti rüpü, fei inei rume langümchele, lefmahuafui quiñe feitichi huaria mu.
4 Inei rume langümchele, tüfa mülei ñi femal tañi montual: langümafui chi quiñe huentru tuntucun mu ca ñi üdenofiel.
5 Amui chi tañi chafche engu* ñi ñimitumeal* mamüll mahuidantu mu, fei huitrañpüramfi ti toqui ñi catrüafiel quiñe anümca, huelu ti huechuñ toqui ütrüftripai, ütrüfnagpui tañi chafche mu, fei langümfi. Fei ti langümchelu lefmahuai quiñe feitichi huaria mu tañi montual.
6 Alü camapulele ti huaria, ti langümngelu ñi pariente illculen mu* inantucuafui chi ti langümchelu, diturpuafui chi ca langümafui. Huelu ti langümchelu üdequelafui tañi chafche,* feimu ngelafui ñi langümngeal.
7 Feimu feipicünuayu: ‘Püntücünufinge* cüla huaria’.
8 Tami Chau Dios Jehová femcünuai ñi doi alün-ngeal ti mapu chumngechi ñi feipicünufiel* tami cuifiqueche yem ca eluaimu com ti mapu ñi feipicünufiel engün.
9 Ñi femtripayal tüfa, mülei tami cüme inanieafiel com tüfachi huercün dungu tami feipimequefiel fachantü. Mülei tami piuqueyeafiel tami Chau Dios Jehová ca rumel miyahuaimi tañi rüpü mu. Fei doi alün-ngerpule tami mapu, püntücünuafimi* caquelu cüla huaria ñi lefmahual che.
10 Femngechi culpanochi che langümngelayai ti mapu mu tami eluaeteu tami Chau Dios Jehová eimi tami ngen-ngeal. Fei culpaconlayaimi* langümchen mu.
11 Huelu quiñe huentru üdefilu tañi chafche* llihuatulefui chi* tañi lefcontuafiel, huesa allfülfi, fei ti che lai. Tati langümchelu lefmahuafui chi quiñe tüfachi huaria mu.
12 Fei pu loncolelu ti huentru ñi huaria mu huercüai ñi yemengeal, fei hultucungeai ti langümngelu ñi pariente ñi cuhu mu. Quisu mülei ñi layal.
13 Ngelai tami cutranpiuqueyeafiel feitichi huentru. Israel mu apümcayafimi ti langümfilu culpanochi che. Femngechi cüme feleaimi.
14 Tami Chau Dios Jehová eluaimu mapu tami ngen-ngeal. Üye mu elungeaimi quiñe troquiñ mapu. Tami cuifiqueche yem marcacünufingün cheu ñi puhual tami carucatu che ñi mapu, fei eimi cacünulayafimi.
15 Inei no rume culpantucungelayai quiñe che müten feipile ñi culpan.* Epu cam cüla che ñi feipin mu cüme quimfalcünungeai ti dungu.
16 Quiñe che huesa duam mu feipintucufile quiñe huentru ñi inanofiel quiñe ley,
17 ti epu huentru nielu dungu amuaingu Chau Jehová ñi adquiñ mu, amuaingu pu sacerdote mu ca pu juez cüdaucülelu feitichi antü.
18 Pu juez cüme ngüneduamafingün com ti dungu. Fei ti huentru coila dungu feipintucufule, huitrameldungufi tañi peñi.
19 Fei chem ñi raquiduamün ñi femafiel tañi peñi, femafimün ta quisu. Ti huesaque dungu ñi mülen eimün meu entuafimi.
20 Mülehuechi pu che quimaingün tüfa, llicaleaingün, feimu huiño femhuelayaingün fente huesaque dungu eimün meu.
21 Cutranpiuqueyelayafimi. Inei rume langümchele, mülei ñi layal. Allfülmafile ca che tañi nge, tañi ayehue foro, tañi cuhu cam tañi namun, feitichi che femlu ca mülei ñi femngeal.
Quimnieal
^ Ca lof mu: “Montuñmayafimi”.
^ Ca lof mu: “Hudacünuafimi”.
^ Ca lof mu: “Trafche engu”.
^ Ca lof mu: “Ngümitumeal”.
^ Ca lof mu: “Lladcülen mu”. Hebreo quehun feipilei: “Arelelu cai ñi piuque”.
^ Ca lof mu: “Trafche”.
^ Ca lof mu: “Hudacünufinge”.
^ Ca lof mu: “Cuyalltufiel”.
^ Ca lof mu: “Hudacünuafimi”.
^ Ca lof mu: “Yafcaconlayaimi”.
^ Ca lof mu: “Trafche”.
^ Ca lof mu: “Uhuamtulefui chi”.
^ Ca lof mu: “Yafcan”.
