Deuteronomio 23:1-25
23 Quiñe huentru no rume chapüdcülelu* ñi cudañ* cam catrünentuñmangelu ñi huillihue,* coneltulelayai Chau Jehová ñi troquiñche mu.
2 Quiñe yalltucu no rume coneltulelayai Chau Jehová ñi troquiñche mu. Quiñe no rume tañi pu cüpanche, turpu coneltulelayai Chau Jehová ñi troquiñche mu.
3 Quiñe Ammón che ca Moab che no rume coneltulelayai Chau Jehová ñi troquiñche mu. Quiñe no rume tañi pu cüpanche, turpu coneltulelayai Chau Jehová ñi troquiñche mu.
4 Tripalu eimi Egipto mu, fei engün quellulaeimu, elulaeimu iyael, co no rume ca cullifingün ta Balaam tami malisiayaeteu. Tüfa Beor ñi fotüm, Petor mu tuhui Mesopotamia mapu mu.
5 Huelu tami Chau Dios Jehová cüpa allcütulafi ta Balaam. Doi mai tami Chau Dios Jehová piuqueyeimu, feimu ti malisian dungu tami Chau Dios Jehová cüme dungucünufi tami llohual.
6 Tami mongen meu turpu quellulayafimi engün ñi tüngcüleal ca cüme feleal.
7 Üdenielayafimi pu Edom che, quisu tami peñi tati.
Üdenielayafimi pu Egipto che, eimi ca cüpanchengefuimi tañi mapu mu engün.
8 Quisu engün tañi pu bisnieto* coneltuleafuingün Chau Jehová ñi troquiñche mu.
9 Toltoucülelmi* tami hueichayafiel* tami pu caiñe, famentuafimi* com huesaque dungu.*
10 Pun meu quiñe huentru tripale ñi fine,* lif chengelayai. Feimu mülei ñi tripayal cheu ñi toltoucülen* pu che, huiño conputulayai.
11 Nagantüle, co mu müñetuai. Fei huiñotuafui cheu ñi toltoucülen* pu che conle hula ti antü.
12 Huecun cheu ñi toltoucülenon* pu che elcünuaimi quiñe püntülechi* tripatripatuhue.
13 Yenieaimi tami hueichahue ca quiñe mamüll. Fei amulmi tripatripatuhue mu,* ti mamüll mu rüngayaimi, fei hula tacuafimi tami pod.
14 Tami Chau Dios Jehová miyahui cheu tami toltoucülen,* montulaimu ca hultucuai tami pu caiñe tami cuhu mu. Fei tami toltoucülen mülei ñi lifcüleal. Femngechi Chau Dios pelayai pod dungu eimi mu ca quisucünulayaimu.
15 Quiñe esclavo lefmaule tañi ñidol meu, fei amule eimi mu, huiñoleltulayafimi tañi ñidol.
16 Quisu dulliafui cheu ñi müleal quiñe tamün huaria mu, mülenagafui cheu ñi ayünieel. Cutrancalayafimi.
17 Quiñe Israel che, huentru cam domongepe rume, plata mu ngelai ñi cudumuhual caquelu che engu* ngillatuhue ruca mu.
18 Tami huechunenturpuafiel chem tami eldungucünuel, yelayaimi tami Chau Dios Jehová ñi ruca mu ti plata ñi cullingeel* quiñe huentru cam quiñe domo cudumuuquelu caquelu che engu. Mür engu ünufalngei tami Chau Dios Jehová mu.
19 Arelelfilmi tami peñi plata, iyael cam chem rume, feipilayafimi tami huiñolelaeteu doi tami arelelfiel.
20 Doi cofrayafuimi quiñe ca cüpanche, huelu femlayafimi tami peñi. Femngechi tami Chau Dios Jehová cümelcayaimu com tami femal nüfilmi ti mapu.
21 Eldungucünufilmi tami Chau Dios Jehová, alüñmaquilnge tami huechunentuafiel. Femnge tami eldungucünuel feipiaimu tami Chau Dios Jehová. Huechunentunofilmi, culpan dungu mu* conaimi.
22 Huelu eldungucünulayan pilmi, tüfa culpan dungu no.*
23 Feman pilmi, femaimi tati. Huechunentuaimi chem tami eldungucünulelfiel tami Chau Dios Jehová, tüfa quiñe chalintucun reque felei* tami hulün eimi tami pin mu.
24 Conpulmi tami chafche* ñi anüm ofad mu, iyafuimi tunte* tami duamnieel tami ngüñülehuenoal. Huelu echelcünulayaimi* carpa mu.
25 Conpulmi tami chafche* ñi ngan mu, suchetuafuimi* ti lonco cachilla. Huelu rulpalayafimi ti ichona tami chafche ñi nganün mu.
Quimnieal
^ Cam: “Capüncülelu”.
^ Ca lof mu: “Cütrau”.
^ Ca lof mu: “Pünün”.
^ Ca lof mu: “Yom lacu”.
^ Ca lof mu: “Anücünufilmi tami tolto ruca”.
^ Ca lof mu: “Quehuayafiel”.
^ Ca lof mu: “Quiñepülecünuafimi”.
^ Cam: “Podümquelu”.
^ Ca lof mu: “Semen”.
^ Ca lof mu: “Cheu ñi anücünufiel ñi tolto ruca”.
^ Ca lof mu: “Cheu ñi anücünufiel ñi tolto ruca”.
^ Ca lof mu: “Camapulechi”.
^ Ca lof mu: “Cheu ñi anücünunofiel ñi tolto ruca”.
^ Hebreo quehun feipilei: “Pochongnagülmi”.
^ Ca lof mu: “Cheu tami anücünufiel tami tolto ruca”.
^ Cam: “Prostituta cam prostitutongeal”. Diccionario mu ngüneduamnge “prostituta”.
^ Cam: “Huehuel”.
^ Ca lof mu: “Yafcan dungu mu”.
^ Ca lof mu: “Yafcan dungu no”.
^ Ca lof mu: “Füchotun, mañumtun”.
^ Ca lof mu: “Trafche”.
^ Ca lof mu: “Chumte”.
^ Ca lof mu: “Guardacünulayaimi”.
^ Ca lof mu: “Trafche”.
^ Ca lof mu: “Pincultuafuimi”.
