Deuteronomio 24:1-22
24 Quiñe huentru nieule quiñe domo engu, fei peñmafile yehuen-ngechi dungu ca cüpa hudafile, mülei ñi eluafiel quiñe huirintucun ñi hudayafiel ca feipiafi ñi amutual.
2 Ti domo tripatule ti huentru ñi ruca meu, niehuafui ca huentru engu.
3 Fei ti cangelu huentru layafui chi cam üdeafui chi* ti domo, eluafui quiñe huirintucun tañi hudayafiel ca amutunge piafui.
4 Fei ti hunen huentru quechanentufilu ti domo, huiño nietulayafi, deu podümngelu cai. Tüfachi dungu Chau Jehová üdequefi. Yelayaimi culpan dungu* feichi mapu mu Chau Dios Jehová tami eluaeteu eimi tami ngen-ngeal.
5 Quiñe huentru hue nieulu tañi domo engu, quiñe tripantu mu ngelai ñi conal ti troquiñ hueichafe mu* ca lloulayai chem cüdau no rume. Mülecayai tañi ruca mu ca ayühuelafi tañi domo.
6 Quiñe che tañi huiñolelngetual chem tañi arelel, ngelai ñi nünacümafiel tañi chafche* ñi cudi cam ti cura rüngümquelu. Femle, tañi chafche pepicalayafui iyael tañi mongeleal.
7 Quiñe che nüfile, cutrancafile ca fendefile quiñe tañi chaf Israel che,* fei quimngele ñi femün, feichi che mülei tañi layal. Ti huesaque dungu ñi mülen eimün meu entuafimi.
8 Huefrumele lepra cutran,* cuñiutucuucüleaimün tamün inanieafiel com ñi feipin pu sacerdote Leví tuhun-ngelu. Cuñiutucuucüleaimün tamün cüme inanieafiel com tañi feipifiel engün.
9 Raquiduamtucunieafimün tamün Chau Dios Jehová ñi femfiel ta Míriam rüpü meu tripalelu eimün Egipto mapu mu.
10 Chem rume arelelfilmi tami chafche,* quisu elcünuai quiñe chemcün* ñi pengelal tami culliaeteu. Huelu eimi conlayaimi tañi ruca mu tami yeñmayafiel.
11 Huecun mülenagnge, fei ti huentru aretulu entuai feitichi chemcün.
12 Pofrengele ti huentru, fei eluelmu tañi huente tacun ñi pengelal tami culliaeteu, cudulayaimi nien mu quisu ñi tacun.
13 Conantüle müten, mülei tami huiñoleltuafiel ñi huente tacun. Femngechi quisu cuduai tañi tacun mu ca cümeque dungu feipiaimu. Fei tami Chau Dios Jehová peai nor dungu tami femmequen.
14 Ngünencalayafimi quiñe cullingequeelchi cüdaufe fillalelu ca pofrengelu, tami peñingeafui cam quiñe ca cüpanche mülelu tami mapu mu quiñe tami huaria meu.*
15 Feichi antü mu müten culliafimi, petu tañi connon ti antü. Quisu fillalei, duamniei ñi cullitu tañi mongeleal. Femnolmi, feipintucuaimu Chau Jehová mu, fei culpaconaimi.*
16 Pu chau ngelai ñi layal tañi yall* ñi femün meu. Ca ti pu yall ngelai ñi layal tañi chau ñi femün meu. Caque quiñeque che mülei ñi layal quisu tañi culpan mu.*
17 Norngenochi dungu femlayafimi tati ca cüpanche ca ti cuñifall. Nünacümlayafimi quiñe lantu domo ñi huente tacun tami culliaeteu.
18 Ngoimalayaimi* tami esclavongefel Egipto mapu meu. Tami Chau Dios Jehová montuleimu üye mu. Feimu feipicünumequeyu tüfa.
19 Püramfilmi tami nganün, fei elcünurumefilmi quiñe cütrüng* lelfün mu, huiñolayaimi tami yemetuafiel. Elcünulelafimi tati ca cüpanche, ti cuñifall ca ti lantu domo. Femngechi tami Chau Dios Jehová cümelcayaimu com tami femün meu.
20 Mütroufilmi tami olivo anümca ñi rou,* quiñe rupa müten femaimi. Tati mülehuelu, elcünulelafimi tati ca cüpanche, ti cuñifall ca ti lantu domo.
21 Tami anüm ofad meu tufilmi ñi fün, huiñolayaimi tami tumeafiel ti mülehuelu. Elcünulelafimi tati ca cüpanche, ti cuñifall ca ti lantu domo.
22 Ngoimalayaimi* tami esclavongefel Egipto mapu meu. Feimu feipicünumequeyu tüfa.
Quimnieal
^ Cam: “Famentuafui chi”.
^ Ca lof mu: “Yafcan dungu”.
^ Ca lof mu: “Troquiñ quehuafe mu”.
^ Ca lof mu: “Trafche”.
^ Ca lof mu: “Traf Israel che”.
^ Hebreo quehun feipilelu “lepra”, fillque dungu adentuleafui, fillque trahua cutran tulchequelu cam quiñeque cutran mülelu tacun cam ruca mu.
^ Ca lof mu: “Fillem”.
^ Ca lof mu: “Trafche”.
^ Hebreo quehun feipilei: “Pu puerta meu”.
^ Ca lof mu: “Yafcaconaimi”.
^ Ca lof mu: “Familia”.
^ Ca lof mu: “Yafcan mu”.
^ Ca lof mu: “Upelayaimi”.
^ Ca lof mu: “Trarin”.
^ Ca lof mu: “Chamida”.
^ Ca lof mu: “Upelayaimi”.
