Deuteronomio 25:1-19
25 Epu huentru niele dungu, pemeafingu tati pu juez. Fei engün juzgayaeyu, fei pengelcünuaingün inei ñi culpan* ca inei ñi culpanon.
2 Ti huesa che mülele ñi cupafcangeal,* ti juez feipiai ñi llüpünacümcünungeal,* fei quisu tañi adquiñ meu cupafcangeai. Ti che rume huesa dungu femle, fentren rupa cupafcangeai, huelu fütra huesa dungu femnole, doi pichin rupa cupafcangeai.
3 Cupafcangeafui 40 rupa müten, doi femlayaimün. Doi cupafcangele, tami peñi illamcangeai tami adquiñ meu.
4 Petu pünoquetranle ti mansun, quiñe moral* tuculayafimi.
5 Quiñeque peñihuen trür müleingün chi, fei quiñe lale petu ñi nienon fotüm, ti lantu domo nieulayafui quiñe che engu coneltulenolu tañi familia mu. Tañi fillca mülei ñi nieafiel ti domo, femngechi femai chem ñi femafel.
6 Feiti domo ñi hunen püñeñ yenieai ti la huentru ñi üi, femngechi ngoimanentungelayai* tañi üi Israel meu.
7 Huelu ti huentru ayünole ñi nieafiel tañi peñi yem ñi lantu domo, feitichi domo pemeafi pu loncolelu tati huaria ñi puerta mu, feipiafi: ‘Tañi huentru yem ñi peñi ayülai ñi amulerpual tañi peñi ñi üi Israel meu. Pilai tañi nieaeteu, cüpa femlai tañi femafel tañi fillcangen meu’.
8 Pu loncolelu ñi huaria mu mülei ñi mütrümafiel* ti huentru ca dunguafiel. Huelu feipimequele ‘Iñche ayülan ñi nieafiel ti domo’,
9 fei ti lantu domo fülmayafi ti huentru pu loncolelu ñi adquiñ meu. Entuñmayafi ñi ocota* namun mu, tofcütuafi ñi ange ca feipiai: ‘Tüfa mülei ñi femngeal ti huentru ayünienolu ñi amulerpual tañi peñi yem ñi cüpanche’.
10 Feichi meu müten Israel mapu mu tañi pu che femngechi feipingeai: pu che ñi familiayefiel ti müntuñmangelu* ñi ocota.*
11 Epu huentru quehuamequele, quiñe tañi domo conafui chi ñi incañpeafiel tañi füta. Fei fampuhuli tañi cuhu ca cudañtufi ti huentru hulelcamequefilu tañi füta.
12 Femngechi femle, mülei tami catrünentuñmayafiel tañi cuhu. Cuñill-layafimi.
13 Tami carpa mu nielayaimi epu cura pesa, quiñe pichilu ca quiñe fütrañma.
14 Tami ruca meu nielayaimi epu rume cajon tami fanefanetual quetran,* quiñe pichilu cam quiñe fütrañma.
15 Tami pesa ca tami cajon norngepe. Femngechi alüñma mongeleaimi feiti mapu mu tami eluaeteu tami Chau Dios Jehová.
16 Tami Chau Dios Jehová üdequefi pu norngenochi che femngechi dungu femquelu.
17 Raquiduamtucunieafimün tamün femeteu Amalec rüpü meu, tripalelu eimün Egipto mapu meu.
18 Eimün rume cansalefuimün ca yafüngehuelafuimün, fei Amalec trafmeimünmeu rüpü meu. Lefcontufi com pu inangechi amulelu. Yamlafi* ta Chau Dios.
19 Tami Chau Dios Jehová eluaimu mapu eimi tami ngen-ngeal, üye mu hualloñmayaimu* tami pu caiñe. Huelu tami Chau Dios Jehová montulaimu fei engün mu ca eluaimu tüngün.* Fei apümcayafimi pu Amalec che mapu meu.* Inei no rume acordahuetulayayu engün.* Ngüyünentulayafimi* tüfa.
Quimnieal
^ Ca lof mu: “Yafcan”.
^ Cam: “Hulelcangeal”.
^ Ca lof mu: “Lüpünacümcünungeal, copünacümcünungeal”.
^ Ca lof mu: “Bozal”.
^ Ca lof mu: “Upenentungelayai”.
^ Ca lof mu: “Ngütrümafiel”.
^ Ca lof mu: “Tranu”.
^ Ca lof mu: “Montuñmangelu”.
^ Ca lof mu: “Tranu”.
^ Hebreo quehun feipilei: “Tami ruca mu quiñe efá ca quiñe efá”. Quiñe efá feita 22 litro. Ngüneduamnge apendice B14.
^ Ca lof mu: “Respetalafi”.
^ Ca lof mu: “Huallmayaimu”.
^ Ca lof mu: “Cüme felen”.
^ Hebreo quehun feipilei: “Miñche huenu meu”.
^ Ca lof mu: “Conümpahuetulayayu engün, tuculpahuetulayayu engün”.
^ Ca lof mu: “Upenentulayafimi”.
